قصيدة في بيع وشرا الحباري .. الشاعر :عبدالله الغزي

[الفحل مليون]

عفت الولع وملاعب الطير باللوح ... ولاعاد يطري لي على الصيد طاري
اول وذكر القنص ياخذ عن الروح ... وسج رجلي مع فجوج الصحاري
لاقامت بروق الحيا فالسما تلوح ... ولا ذعذع الشامي ليال الصفاري
نقلت طير(ن) لبرق الريش ذابوح ... وابعدت عن جو المدينه مداري
واليوم ماوالله ورا القنص مصلوح ... من يوم جونا مشترين الحباري
صارت نهابه بين دارق ومشفوح ... وكل(ن) بكثر الصيد روّح يماري
حتى الاثر كنه من الخد ممسوح ... يمضي نهارك ما تلاقي اثاري
وراع الولع قفى من الغبن مجروح ... من قوم بياعه ومن قوم شاري
كنه يمله داخل الروح ساموح ... يكن من تحت الضلوع العباري
من بعد طال الصمت جت ساعة البوح ... العلم مايحمل صبر وانتظاري
الصيد سلمه صار بالغصب منكوح ... بلوه عربان(ن) غريبة طواري
اول ماتنقل طير ماتبعد شبوح ... حمام دار (ن) ماتعرف المساري
واليوم صارت تسهج الدو وتروح ... المال خلاها طويلة اشباري
خلاص عفت القنص ياطير مسموح ... حرام والله مانقلك في يساري