يا أصحاب الشيروكيات أفيدوني الله يجزاكم خير ...

[ABO.56AB]

بسم الله الرحمن الرحيم

السلام عليكم ورحمة الله وبركاته

يا إخوان أنا ناوي على شروكي بإذن الله موديلات التسعين 93 , 96 , 2000 وأنا راعي خطوط وسفريات وكدهـ وراعي بر الوكاد إن مخي قفل ماعرفتله ناس تمدح وناس تذم فيه قالو مشكلة الحراره والمكيف ... وحلها مراوح وإذا مره رديتر جمس وش المشاكل الي عليه دايمآ غير الي ذكرتها وهل المراوح الي يركبونها السوبارو وغيره تضبط الحراره وكيف هو في الخط والسفريات والنفود يليت ترشدوني , أتمنى يا إخوان الي يجاوبني يكون مجرب الموتر ...


والله يجزاكم خير

[الجامح الطامح]

اقو اتركك منه اول كان ممتاز قبل مايقفلوا التصدير من امريكا طبعا الي مديلات ٢٠٠٤

[جنيفاوي 503]

الشيروكي مايحتاج بس يبيله واحد يناظره وان كانك بتاخذ خذ من 98 الى 2001
والحراره شيك على الرديتر وعبه مويه اصليه والغ البلف وركب مروحه سوبارو صغيره بدال حقت المكيف

[hsdt]

انا استعملت التويوتا والنيسان والشروكي
اذا تملك قيمة التويوتا فهو رقم واحد
اما الشروكي حساس نوع ما مع كثرة اعطال بشكل عام
كل 100 شروكي ينجح منها 35
كل 100 تويوتا ينجح منها95
اللي يقول غير مروحة المكيف وحط حقت سوبارو ياخي كيف تفتي بدون علم

[جنيفاوي 503]

انا استعملت التويوتا والنيسان والشروكي
اذا تملك قيمة التويوتا فهو رقم واحد
اما الشروكي حساس نوع ما مع كثرة اعطال بشكل عام
كل 100 شروكي ينجح منها 35
كل 100 تويوتا ينجح منها95
اللي يقول غير مروحة المكيف وحط حقت سوبارو ياخي كيف تفتي بدون علم

ترا كثر الفهامه مهب زينه اجل كل 100 شيروكي ينجح 35
ولا يكون الموتر قبل لايطلع من المصنع يجيبونه لك تشيك علبه

[راعي الرود]

ياخوك خذ العلم مني توني بايع الشروكي اللي كان معي موديله 2001

و والله اني متنقي انظف النظيف بالسوق شريته بـ21 و من وقفته تقول يستاهل البدي نظظيف المحركات ورده و راعيه مايحركه و ماهوب من اهل الرياض من خميس مشيط عشان مانقول انه راعي مراقى او مكاشيت

و ماشريته الا بعد الفحص و الحوف والشوف و جربته

مشكله الحراره فيك فيك على النص دايم ولو تحط مروحه طياره تجلس على النص في الصيف و الشتاء تنزل بشكل خفيف حول النص

مشاكله لا تعد ولا تحصى اول ماشريته نافضه من إلى حتى طرمبه البنزين قال راعيها انه مغيرها و غيرتها زود احتياط لأني عارف الشروكي ماتضمنه و كلف علي حول 5 الآف ريال صيانه شامله

بعد ما استعملته في المكاشيت بدأ يخورها و اكتشفت انه موتر مهوب كفو تعتمد عليه

مشاكله الكارونه بتتعب منها و بتغير دفرنسات و بترجع لك الونه

عمود الدبل فيه ضعيف ولا له فرارات لازم تفكه واذا تبي النفود تركب العمود يعني شغلته شغله

بعد فتره طلع لي صوت صبابات و ذراع بستم في المكينه على اني ما فجرته تمشيت به في النفود ولا لي بالمراقى

و بعته بالعله اللي في مكينته بـ16 الف خسران من قيمته الاساسيه 5 الآف و الصيانات وصلت للـ7 الآف حافظ فواتيره كامله عندي

لكن بعته ماصدقت القى زبون يارجال اخسر دراهم ولا اخسر راحتي و اخسر وقتي على ذا الكسره و بيعته كانت اكبر مكسب ولا الدراهم تروح و تجي

باختصار شديد والله اني ناصح لك لا يقرربك لا يقرررربك ماتسلم من مشاكله كهرب و عمدان كردان ودبل و كارونه و الدبل بيشغلك و الحراره

وقطع الغيار ماتلقاها ماعندك الا نجم الرمال و باجحزر و كم محل ثاني و اكثر شيء بتسمعه لا دورت قطعه "مافيه" و الوكاله صلخ و حتى التشاليح ماعندك الا تشليحين مشهورة بالشروكي المطيويع و الزنيتان و اسعارهم ماترحم لأنهم دارين انك منحد عليهم مافيه الا هم

المكاين المستعمله من التشاليح ماتلقى نظيف اغلبها ان ماكان كلها مفجورة فجر و النظيف تلقاه عند ابو علي الثويني ولا ورشة كرامه او كراج الحرابي يجيبون مكاين يابانيه كانت اسعارها على 3500 ماتزود لكن اتفقوا كلهم على رفع اسعارها لين وصلوها 5000 ريال و هذا سبب بيعتي والله اللي ماطرت احط 5 الاف على مكينه شروكي
ازين مافيه خفه النفس و النشاط و غير كذا لا ترجي منه شيء و مقابل هالاشياء بيطلع شيب براسك

[التعـ King ـديل]

خذ لك ربع نيسان بقيمته ارحم لك

[حزم نجد]

كان معي شيروكي موديل 98 سعودي واستخدمته 5سنوات

مثل ماذكر اخونا راعي الرود عن الشيروكي ومشاكله

والشيروكي عشق لاينتهي ومشاكل لاتنتهي

كنت اسوي له صيانه كل 6شهور عند الكابتن ابوعلي الثويني وكل صيانه اقل شي 1500ريال

مع اني ما اعرف للمطامر ولا اروح للنفود كثير بحكم منطقتنا كلها حزوم وشعبان وجبال

لكن احتديت له ذيك الفتره

شريته ب21الف وخسرت عليه 6000 تقريبا

غيرت له اشياء كثيره ما ادري ليش خربت مع اني محافظ عليه

وبعته ب18الف


نصيحه شف لك خيار ثاني الا اذا كنت محتد عليه

[abo naser 1]

سيئ وكيل أسعار تشاليح عند أعادة البيع مهما تحط مايبين
حرة عرة عمدان دفرنس وجلد لا تنتهي تعليق سي مهما تحط ولو تغير أصلي بقيمة موتر في السوق

مكينة وقير جبارة تغيير الزيت من 10 الف وطالع لا نقص ولون ذهب يعشق الحرارة ولا يتأثر منها

[خ م خ م]

طيب وش تقولون في الاكسبدشن

[خوي السطحه]

الشروكي حله غير مكينته لمكينة لكزاس طاحو فيها الشباب قويه وبارده

[عبادي464]

نصيحه ابعد عنه صح انه يطرب بس ماضمنه ابد كان عندي وماعمري سافرت عليه مخليه كشتات بس ومغير يطلب

[حاميش]

نصيحة لا تقرب الشيروكي

إذا الماده عندك ماهي ذاك الزود تحصل لك باترول لو تربط فيه ماهو خسارة

أما الشيروكي راح تكون من كبار العملاء في الصناعية وقطع الغيار والتشاليح ( يعطونك بطاقة تميز )

حرارة ما تنتهي ودفرنس خلفي من عله بعله مره كرونه ومره كلتشات

وفلنجاته ضعيفه توقع أي وقت يطيح العمود

أبتعد عنه حتى لو أنت من اللي يحافظون على السيارة