المساعد الشخصي الرقمي

مشاهدة النسخة كاملة : اللي يعرف عن السوناتا الكوريه شي يدخل


برق سرى
16/10/2006, 07:12 PM
السلام عليكم ورحمة الله وبركاته

ياشباب ابي اسألكم عن السوناتا وش تعرفون عنها
تصلح للخطوط وإلا ماتصلح صبور ماهي صبور اي شي تعرفونه عنها

انا لقيت لي وحده 2006
بس ما اعرف عنها شي
السياره ماشيه 40 الف
الرفارف اللي قدام مغيره وكاله

قلت مالي الا اهل مكشات يفزعون لي
شبح الصحراء
16/10/2006, 07:30 PM
والله مالي خبر بها ومكشات اسألهم عن الجيوب والوانيتات اما الصغار مالك إلا ترسل بريد على موقع الساحات (ساحة السيارات) على بريد اشخاص مثل ربيع حائل او فانتوم او اودي وان شاء الله راح ينشرون استفسارك وتلقى الرد . واذا تبي نصيحتي اشتر لك جيب توسان جديد من عند هونداي لأن مركبه مريح كأنه مركب سيارة سيدان وبنفس الوقت جيب يمشي الحال في المهمات البرية ورخيص بحدود 55 الف ريال جديد .
شمالي غير
16/10/2006, 07:58 PM
قطع غيار غاليه وما تلاقيها الا بالوكاله حسب علمي
برق سرى
16/10/2006, 08:39 PM
شبح الصحراء مشكور على نصيحتك وجزاك الله خير


شمالي غير مشكور على هالمعلومه وجزاك الله خير

لكن انا ابي اعرف كم قيمت 2006 الجديده
شبح الصحراء
16/10/2006, 09:25 PM
السوناتا الجديدة بحدود 63 الف ريال وتختلف حسب المواصفات واذا انت راعي خطوط وسفرات خذ ستة سلندر وفيه طراز جديد من هيونداي اسمه أزيرا فخامة ولا فخامة البي إم (بدون مبالغة) وسعرها يبتدئ من 70 الف ريال .
برق سرى
16/10/2006, 10:20 PM
شبح الصحراء
ما ادري ويش اقولك كلمة شكرا قليله بحقك
كفيت ووففيت ياذيبان وبيض الله وجهك
هاوي قصيده
17/10/2006, 02:37 AM
اسمع وانا اخوك ..

القيمه اللي بتدفعها على سوناتا ادفعها على كورولا والا سفك ..

نصيحه من اخ لاخوه ..

السوناتا يطيح حيلها بسرعه ..البدي حقها ورق ..هو صحيح ان الكل ورق بس الهونداي بزود..

قطع غيراها متوفره ..بس غويليه شوي ..

رساوتها مهيب ذاك الزود..

يعني موتر رزه لسنه بس ...

انصحك انك تبعد عنها اذا انت تبيها لمشاوير الطويله ..وشغل وامش

ابعد عن الكوري ..وانا اخوك
الدبل الثقيل
17/10/2006, 03:13 AM
الكوري له مستقبل وخصوصا الهونداي داخله بقوه.... وأتوقع بعد خمس أوعشر سنوات ينافس الياباني.... لكني ماجربته ولا أدري عنه ... لكن انتشاره قد يدل على ذلك...
الغانم1
17/10/2006, 03:28 AM
اسوناتا سياره أقتصاديه ولاكن يعيبها بديها خفيف جداً أى صدمه قول الله يخلف
salehhd
17/10/2006, 04:40 AM
السلام عليكم

بقول كلمتين بأختصار

الكوري عمر شبابة قصير فأستمع به

الموتر حدة سنتين ولا ثلاث

اذا تبي موتر خطوط خذلك هوندا ولا جلنت وادعيلي
ومر علينا في منتدى السيارات والشباب ما راح يقصرون (بعد اذن الادارة )
http://www.assayyarat.com/forums/

في الختام انصحك بالاستخارة والله يوفقك
عبوووود
17/10/2006, 05:52 AM
الكوري له مستقبل وخصوصا الهونداي داخله بقوه.... وأتوقع بعد خمس أوعشر سنوات ينافس الياباني.... لكني ماجربته ولا أدري عنه ... لكن انتشاره قد يدل على ذلك...

كلام صحيح...
إبن فيصل
17/10/2006, 06:09 AM
أخوي برق سرى ترى الهونداي مهيب شينة وحليوه أنا بالنسبة لي لو أباخذ خذت هونداي سوناتا والا النترا كلهن زينات حتى الأكسنت الصغيرة مهيب سهلة ولا يغرك تراهن صبورات وقطعهن متوفر عن المستعمل من قيرات ومكاين وغيره صح بديهن خفيف لكن سلملي عليهن عز الله داخلات بقوة على السوق وأكبر دليل على ذكل شف سيارات اللوموزين بدت تتجته للهونداي ليش لأنها حلوه وأقتصادية وتتحمل حتى سيارات التأجير ليش كلهم على الهونداي عشانها قوية وتتحمل الكرف.

أنا قد كان عندي هونداي أكسنت 2002 وقامت تهرب زيت من عند القير منتبهت لها أشوف قطرات زيت تحت قلت يمكن من المكينة عادي لكنه كان من القير وأنا ما أدري ومشيت عليها فترة بديت أحس أن السيارة قيرها مهوب الي وبعدين خبط علي تكسرت التروس...مالك بالطويل رحت للتشليح المستعمل الي في الصناعية وخذت قير مستعمل على كيف كيفك وبـ600 ريال وتركيبه بـ250ريال يا سلام سلم.
وتقبل تحياتي....إبن فيصل،،،،
شبح الصحراء
17/10/2006, 02:17 PM
الكوري اتوقع اذا الواحد حافظ ودارى عليه يعيش سنين طويلة خصوصاً الهيونداي انا كانت عندي هيونداي هاتش باك ماتريكس اربعة سيلندر والله الموتر حليل واقتصادي ومريح بس كانت فيها صوت طقة خفيفة قدام للحين ما ادري وشي مع انها ما اثرت على الموتر أبد وجلدتها خطوط بالشهر اسافر مرة او مرتين والسرعة ما تنزل عن 160كلم/ساعة وبعد ما كملت سنة واحدة حصل فيها خراب واحد بسيط وهو رمان بيل العكس وصلحته على الضمان يعني لو اني استخدمتها للديرة بس كان ما خربت ابد لذلك انصحك اذا كنت راعي خطوط اشتر ستة سيلندر ولا تغتر بكلمة كوري ترى الكوري تغير كثير .
لبرتي
17/10/2006, 02:39 PM
سوناتااااااا حلووووووة

لكن إذا حاب السعر المعقول والمواصفااات العالية
خذ أزيرا
أو نوع من الكيا أسمه على ما أعتقد أبوتس <---- لا يجي أحد ويذ علي :d


وأسعارهاااااا معقولة وصبورة والله يوفقك
hsb_128
22/10/2006, 10:24 AM
السلام عليكم .. الصراحه كلام هاوي قصيده معقول .. اقل من سنه وتسمع صوت بالكراسي الديكور وغيرها ومهنى رساااوه ابعد ابعد عن الكوري ..مالك الا( كورلا , سيفك , صني, التيما 4 سلندر )
طخيمان
22/10/2006, 01:28 PM
راعي السوناتا وصل

أخوي أنا معي سوناتا 2006 والحمد لله ماشية معي زي الحلاوة وصرفية البنزين أكثر من رائعة ورساوتها عجيبة وبعدين من داخل ديكوراتها
من جووا حلوه وعلى فكرة ترا ما فيها قير تماتيك قيرها يجي عادي أو تروبونيك (عادي و تماتيك) وعلى فكره سعرها موديل 2007 ارتفع شوي (يوم شافوا الكامري ب85 ألف ولا تسوى قالوا وش زودنا حنا بعد)وصار سعر الفل كامل اللي يجي 4 سلندر ومن برا شكل 6 سلندر (شكمانين وجنوط17)72000
وعلى فكرة ترا 2007 ما يجي 6 سلندر عشان تمشي الأزيرا

وأنا ما شريت سيارتي اللا بعد ما سألت واحد من الشباب كان معه سوناتا 2002 ويقول ما بقى شي اللا وسويته , تطعيس خطوط حتى انها مشت 200 ألف وكان شارييها ب33 ألف وباعها بـ14 ألف بعد ما جار عليها جور مهوب طبيعي وهالحين مع واحد أنا اعرفه وماشية معه

أعتذر على الإطالة ولكن أحبيت أشارككم وأي استفسار أنا جاهز
وبعدين تراها كوري 100% مهوب ياباني و تجميع صيني وتايلندي ومدري وشو

وعلى فكرة أنا قبل ما أشتريها سألت واحد من الشباب معه كامري 2003 سألته قلت تنصحني بكامري وللا بسوناتا قال خذ سوناتا أزين وهو معه كامري يعني مجربها وعارفها(الكامري من بعد 2002 ما تنفع)
سلكي نت
23/10/2006, 02:07 AM
اخوي جارنا عاطل حال اغلب الشباب معاه اكسنت كادها مكده ركاب ومشاوير وصابره ... اعتقد انها سيارة مع المداراه والاهتمام يمشي حالها عيبها اذا فكرت تبيع ، على ما سمعت قطعها متوفرة ومعقولة ولكن لموديلات حديثة يعني لو تغير الشكل واصبح الموتر قديم شوي يمكن القطع تنقص ,,, عموماً شركات كوريا معروفة مثلاً :
الاول على العالم في صناعة السفن هونداي
الاول على العالم في صناعة جميع انواع المكيفات ال جي ولخمس سنوات
الاول على العالم في صناعة الرقائق الالكترونية المستخدمة في الكمبيوترات والجوالات هي سامسونج
الاول على العالم في صناعة الشاشات المسطحة هي سامسونج ... وغيرها مما لم نعلم ........

استخر ثم اختر ودعائنا لك بالتوفيق ............