هل يمكن رفع الهايلوكس العايدي مثل الدبل.

[مدمن مرق]

بسم الله الرحمن الرحيم
السلام عليكم ورحمة الله وبركاته.

قبل كل شئ حبيت اشكر منتدى مكشات قسم السيارات على الكم الهائل من المعلومات,
حقيقة انا غالبا وعند حدوث مشكلة او البحث عن معلومة اتجه لجوجل بالانجليزي لاستفسر عنها
لضعف المجتمع العربي او بخل بعض كفاءاته بتقديم المعلومة او الحل بصورة صحيحة مثل الانجليزي.
ولم اكشتف وجود هذا القسم الا بالصدفة ولعل ارتباطه بنطاق منتدى مكشات المميز بكل اقسامه
وعدم وجود نطاق خاص به جعل المواقع المتخصصة بالسيارات تتفوق عليه بالنتائج في جوجل وهي ماتوصل ربع مستواه(حقيقة بدون مجاملة). شكرا للقائمين عليه وشكرا للاعضاء.

الموضوع اني ان شاء الله باخذ هايلوكس غمارتين مستعمل من الجدد,
وانا الحمد لله مايهمني الدبل بصورة كبيرة وحبيت اوفر كم الف من قيمة الدبل بالعايدي لكن
الدبل داخل مزاجي بسبب ارتفاعه ورزته, تحسه متعافي مشمر وناوي شر :)
ماهو مثل العادية طايحة بالارض, وسؤالي هو:
هل يمكن رفع العايدي وتصير مثل شكل الدبل تماما (ركز بتماما) ولاحد يقدر يفرق بينهم الا من
الدفرنس الامامي او يناظر داخل الغمارة؟
اذا نعم هل لها اضرار فعلية وكم التكلفة التقريبية واذا فيه امكانية ياليت ولكم كل الشكر القطع المطلوبة.

وكل عام والجميع بخير.

[راع العراوي]

وعليكم السلام ورحمة الله وبركاتة
اتوقع لازم ترهيم
لان سست الهايلكس الدبل تجي فوق الدفرنس عكس العادية تجي تحت الدفرنس

[راع العراوي]

اتوقع بامكانك

[مدمن مرق]

يعطيك العافية راع العراوي, المشكلة ماهي من ورا المشكلة من قدام, الرفع من ورا هين :)

[حبيب الامس]

السلام عليكم

ياغالي كم فرق بالسعر بين العاديه والدبل عشان تاضح الصوره اكثر عند الاخوان
دام انك ناوي التوفير وتوك مابعد شريت الموتر
اشتر الدبل لان التعديل بياكل ولاهوب مجمل مثل الي يجي شد بلد

[مدمن مرق]

الفرق بحدود تقريبا 10, وشد البلد مافيه زيه فعلا لكن الرفع بالهايلوكس اعتقد سهاله.
شوف هذا واحد رافع هايلوكس عايدي, كانها دبل تماما بس مادري الجديد كيف
http://www.youtube.com/watch?v=gbJwoDpr4Lw

[جني صغير]

الدبل يجيله زوائد بالرفرف زي التبريزه

[كم كيلو باقي]

الدبل جنوطه ست مسامير وكفراته اكبر
العادي خمس مسامير وكفرات صغيرة

[مدمن مرق]

حقيقة فيه معلومات اول مرة اعرفها
سست الدبل تجي فوق الدفرنس=شكرا اخر راع عراوي
رفارف الدبل اوسع لو فكيت الزوائد=شكرا جني صغير
مسامير الدبل 6 ماهي خمسة= شكرا كم كيلو باقي

اتضح ان الموضوع اكبر من مجرد سست ومساعدات, شكرا للجميع على المساعدة.

[مشلخ الذيب]

تستطيع رفع الهايلكس الدفرنس بسهووووله


واغلب الشباب يشترون بدون دبل ويرفعونه اكثر من الدبل ^_*

يرفعونه من ورى لعابات وتقويس سست ومن قدام كعكات او ياي استرالي ويغيرون المساعدات عشان يثبت الوجه

[مشلخ الذيب]

ونصيحة اذا شريتىهايلكس دفرنس ركب جنوط مرسدس وكفرات يوكوهاما او هانكوك خط 225 افضل في النفود وارسى في الخطوط والين للموتر

[مدمن مرق]

مشلخ الذيب
الى الان من عام 2006 الى عام 2013 ماعمري شفت هايلوكس دفرنس بارتفاع الدبل ووقفته, حتى بجوجل ماني محصل لو صورة بالغلط.
ونصحيتك على العين والراس لكن ادع الله يوفق لي ولك بخير

[التعـ King ـديل]

وجهه نظري دامك تبي رفيع خذ دبل لسببين الاول ان الدبل مع ارتفاعه اكثر رساوه من العادي بعد رفعه بسبب فارق الوزن بين السيارتين

الثاني يجي وقت احيانا تحتاج موتر دبل وودك تكشت ولا تبي موتر يفشلك ولا يغرز بك مهما كنت تملك من مهاره في القياده ولكن الاحتياط واجب

نصيحتي لك خذلك دفرنسين والمبلغ اللي بتوفره بتحطه في الترهيم على فكره

[ابونبيل]

وجهه نظري دامك تبي رفيع خذ دبل لسببين الاول ان الدبل مع ارتفاعه اكثر رساوه من العادي بعد رفعه بسبب فارق الوزن بين السيارتين

الثاني يجي وقت احيانا تحتاج موتر دبل وودك تكشت ولا تبي موتر يفشلك ولا يغرز بك مهما كنت تملك من مهاره في القياده ولكن الاحتياط واجب

نصيحتي لك خذلك دفرنسين والمبلغ اللي بتوفره بتحطه في الترهيم على فكره

:good2::good2:
الصراحه الي يشري هلي والنيه كشتات ووناسه اذا ما خذ دبل مراح يحس ان معه موتر بر

[مدمن مرق]

الدبل مابه كلام لكن الكشتات وقتها بالشتاء والطعوس بالشتاء قاسية ماتستاهل دبل.
عشان كذا قلت اوفر المبلغ بشئ يستاهل.
وكل الشكر للجميع

[أبن ثعلي]

انا اعطيك نصيحة مجرب


والله ان مر علي من السيارات الشي الكافي حتى وصل بي الوضع اني ما عدت انزل شنطة العده من السياره ابد ابد ابد


حتى والله لونها جديدهـ حبيب قلبي السياره اذا رهمت او بمعنى اخر اذا سويت لها اضافات ماهي لها خصوصاً ترفيع السيارات والتعديل على الشاص والاشياء الخاصه بتوازن المركبه فمن وجهة نظري ومما رأيت انك راح تدفع

ضريبه او اكثر من ضريبه على هالتعديلات وهي الخرابات المستمره والمسحيه ومشكلة في ونة القير

و .. و .. و


انا اقول لك وانصحك دامك فالبر ما شريت (( الزود ولا النقص )) والزود ما يضر ابد اما نفعك ولا نفع غيرك

الترفيع راح يكلفك تقريباً مع الكفرات والجنوط والقطع واليد العامله حدود 3500 إلى 6500 حسب شغلك واختيارك للقطع وشغل المصنعي ناهيك عن الوقت اللي راح تخسره بين روحه وجيه وبين الموتر يبي وزنيه ضبط ما ضبط الخ ....


توكل بالله وريح نفسك وهذ لك دبل احيان تجي في منطقه جبليه او منطقه هيار ما تنتبه لها الا بعد ما توصلها واحتمال ما تكون منسم كفرات او غافل او تطيح في موقف في شتاء او صيف انت في غنى عنه

واذا انك صملت على بدون دبل فغير لها يايات برادو رقم الموديل ome882 بإذن الله تركب تراهم بيقولون ما تركب الخ انت رص عليهم وغصبهم يركبونها او يجربون وتر شغلهم ما يتعدى 200 ريال شغل يد راح تركب ان شاء الله بدون ترهيم او تعديل واذا ما ضبطت راسلني خاص وزهلها على حسابي ...:good2:

عموماً الله يدلك على الخير


وعذراً على الاطالة

[كحيلان تميم]

والله أنصحك طق هلي دبل وريح مخك .. لاتقول بوفر .. اول شىء راح تخسر على التعديلات ولاتدري راح يضبط اولا ولا كل محل يعرفلها وقروشه مالك داعي فيها ..

نصيحتي خذ الدفرنسين واترك التوفير .. :)

[مدمن مرق]

يعطيك العافية يابن ثعلي ويافارس العالمي, وموضوع الرفع صراحة طابت النفس عنه :)
وان شاء الله اخذ دبل للاسباب اللي ذكرتموها, وايضا لو هي بالبساطة اللي كنت اظنها
كان اصحاب الهايلوكسات اللي قبلي مطبقينها والبلد مليان هايلكسات بدون دبل مرفوعة.

الرفع يصلح لشخص مقتدر ماديا (حق ترهيم) فقط ولاهو معتمد على السيارة اللي يرهم فيها.