لاندكروزر 2003 .. 2007

[استغفر الله 1]

السلام عليكم

اخواني بغيت فزعة راعين الاندكروزر من 2003 الى 2007

لقيت لاند 2007 نظيف وابشتريه ان الله قسم ويسر

لاكن فاجئني اخوي وقال ان الموديلات هذي تصرف بانزين كثيير

ودي انكم تفتوني من باب تجربتكم وخبرتكم ب مواتركم

ابي الي عنده خلفيه يكتب لي :

1- كم يفلل الموتر
2- كم يمشيه بالكيلو خارج الديره
3- كم يمشيه بالكيلو داخل الديره

و وش اقل صرفيه .. v6 ولا v8 ؟

ومشكورين .. الله يفرج هم وييسر أمر كل من يفيدني لأن شريتي تعتمد على الله ثم عليكم :heart:

[V I P]

الله يبارك لك

رجال تبي مركب وكد ومد لا تحسب حساب البنزين وانصحك بالفكسار

على العموم الرجال صاحب المشاوير الكثيرة لابد يكون عنده سيارة صغيرة

[صديق كلم رفيق]

عندنا جكسار 2003 قير عادي .
التانكي الاساسي يشيل تقريبا 80 لتر ، ويمشيه 500 كيلو داخل الديره .
التانكي الاحتياطي صغير يشيل تقريبا 40 لتر ، ويمشيه تقريبا 200 الى 250 كيلو .

[باوزير]

التانكي الكبير 95 لتر
الصغير 45 لتر

يمشي تقريباً 600 الى 650 كيلو

عن تجربة هدد 2004

[هدد9007]

عن استخدام اراء صرفيته معقوله جدآ وصرفيه الثمانيه متقاربه للسته سلندر عن تجربة يفرق اذا كنت تمشي فوق 140 لصالح الثمانيه وبالديره السته اوفر .
واستهلاك البنزين نفس مابين اخوي:looney: صديق كلم رفيق

[استغفر الله 1]

شرفتوني بمروركم جميعاً :heart:

ننتظر بقية الأعضاء .. تجاربكم وآرآئكم بمعقولية صرفية الاند من 2003 إلى 2007 :redcar:

[R M A D]

أنآ معي جكسآر 2001 قير عآدي
نفس الـ 2003 - 2007 ميكآنيكياً ومآيختلف بشي

أفلل 91 بـ 55 ريآل للتآنكيين
التآنكي الكبير فل ب35 ريآل .. حوآلي 80 لتر
والتآنكي الصغير فل بـ 20 ريآل .. حوآلي 45 لتر

يمشين بالتآنكيين فل إلى 820 كيلو تقريبا
بس ترآي منب رآعي كد وشد
في الغآلب مآتآصل سرعتي إلى أكثر من 120

وأنآ بصرآحه أشوف صرفيته ممتآزه مآشآء الله

:)

[استغفر الله 1]

^ ماشاء الله .. الله يرفع قدرك ي الغالي على هالرد اللي يثلج الصدر .. كنت في حيره من امرني :heart:

ننتظر البقيه وانشاء الله مايقصرون :j

[استغفر الله 1]

استغفر الله عدد ماكان وعدد مايكون وعدد الحركات والسكون ..

[استغفر الله 1]

لا اله الا انت ربي استغفرك واتوب اليك ..

[استغفر الله 1]

وين المشاركات ي عرب ؟

[راعي الرود]

انا معي لاند 2000 وكلها نفس المكينه الاختلاف بالداخليه فقط

التـانكي الاساسي اعبيه 91

ياخذ 85 لتر بـ 38 ريال

الاحتياطي ياخذ 40 لتر بـ 18 ريال تقريباً

المجموع تانكيين = 56 ريال تقريباً بنزين 91

الفل بنزين 95 = 75 ريال للتانكيين و الممشى نفسه الا بالعكس عندي الـ91 مشى اكثر من الخمسه

**

الاساسي امشي فيه 400 كيلو بالبلد برا البلد يوصل 500 إلا شوي على حسب ممشاك اذا مثبت 120 يوصل للـ 460 تولع اللمبه

مع الجلد في النفود يصرف احتمال تولع اللمبه على الـ380 اذا كنت جالده

التانكي الاحتياطي تولع اللمبه عندي على 280 كيلو بالبلد برا البلد 300 و مع النفود والجلد يوصل 270 تولع اللمبه

الاجمالي بالديرة 400 + 280 = 680 كيلو

خطوط = 500 + 300 = 800 كيلو

و بالنسبه للزيت ياخذ 7 علب زيت بدون سيفون
مع السيفون 8 علب

الفكسار اخصم علبه بدون سيفون ومع سيفون

و بالنسبه للصرفيه انا مجرب اكثر من واحد و بالبيت عندنا 3 كروزرات صرفيتها تختلف اذا سويت للموتر تصفيه بيفرق للافضل واهم شيء صفايه البنزين تحرص عليها ان كتب الله وشريت بحكم موديل الموتر قديم شوي

التماتيك يصرف اقل من القير العادي من تجربه و في الخطوط ماتفرق

لكن التماتيك ثقيل نفس في القومه بس مايعيبه قطعت به عروق الدهناء وموتري تماتيك بس يبي لك تتعود عليه ولا انصحك تشتريه اذا كان معك جيب خفيف نفس زي الفتك الا بعد التجربه لأنك يمكن ماتتقبل العزم و ثقل الموتر

معلومه :

الفكسار الجيل السابق اقل صرفيه مع الجلد من الجكسار

الجكسار اذا عطيته النار بلع بنزين

اما الفكسار يبلع لكن اقل

و بالمدينه اثنينهم نفس بعض

بالخطوط الافضليه بالصرفيه للفكسار بسبب القير التماتيك 5 نمر يريح اكثر من الجكسار لانه 4 نمر

**

سواءاً اخذت هذا ولا هذا انت كسبان الموتر اعتمادي بشكل لا يوصف ماشاء الله خويك وين ماتبي معك مايرده شيء وكلن يعرف يصلحه و القطع رخيصه

الا قطع بطن الموتر زي الركبه و المقص و العكس هذي نار اسعارها اذكر شاري الركبه تجي مع المقص كامله بـ 900 ريال ولا تسعفني الذاكرة اتذكر هي جهه ولا جهتين لكن الله العالم انا جهه وحده

الشيء الثاني الموتر مع التحميل ورى ينزل على طول مايبيله شيء ولا صار محمل بيتعبك بالسواقه يصير يردح مع المطاب و الحل طال عمرك غير المساعد حق الوكاله و الياي ان حصل

من الامام ماعليه خلاف و تراه بدون ياي قدام بس مساعدات واذا بتضرب عروق فيه غير المساعدات الاماميه وارفع الموتر من قدام وورى لأنه بيضرب وجهه مع ادنى شيء لكن مايخالف صداماته ماشاء الله مهيب مثل التاليات

المكيف ماشاء الله تبارك الرحمن مايحتاج اتكلم عنه ثلاجه في عز الظهر شهر 8 على طقه وحده تكفيك واحياناً طقتين ماتزود عنها والمكيف اللي ورى بارد بعد بس يحتاج له وقت لين يبرد عكس الامامي سريع اما الخلفي لا صرت بتركب اهلك معك طق المكيف الخلفي قبل لا تركبهم لأنه ياخذ وقت على بال مايبرد

القير التماتيك اعتمادي ماشاء الله ولا يخالف .. موتر الوالد فاكه جديد 2001 اخو موتري و مشى عليه 300 الف ولا غيرت زيت القير لأنه اول موتر تماتيك يشتريه ولا يدري ان فيه زيت قير مع ذلك ماقال شيء غيرت له الزيت و صار انعم القير من اول

فيه مشكلتين باللاند شائعه الاولى جلد البلوف

ركز عليها في الفحص لا نويت تشتري

الثانيه مشكله الدودة ركز على خراطيشها و تأكد ان مافيه اثار زيوت من الدوده لأنها تخرب بسرعه و قيمتها جديدة غاليه حول الـ3 الاف لكن تتصلح عند مراكز الهيدروليك

الله يوفقنا وياك و اتمنى اني عطيتك معلومات كامله على قد معرفتي و ان شاء الله استفدت منها

وفقك الله

[استغفر الله 1]

الله يجزاك خير ويرحم والديك وينور دربك ويرفع قدرك على هالمعلومات القيمة

موفق يالأمير وماقصرت :heart::heart:

[رهيف المشاعر]

طيب ياجماعه من قد جرب استبدال التانكي الإضافي للفكس آر بتانكي برادو او فورتشنر علشان يشيل أكثر

لأني على ما سمعت ان البرادو تقريبا 80 لتر والفورتشنر 60 او 50 لتر

ياليت تفيدوننا اذا فيه احد قد سواها ترهيم

[باوزير]

حوله سبير علاق و مكان السبير ركب تانكي تفصيل او برادو لانه الوسع كبير تحت