المساعد الشخصي الرقمي

مشاهدة النسخة كاملة : سيارتي بدتي تقطّع وتطفى بي ... وش السواة ؟؟


راعي الكيف
19/10/2006, 12:59 AM
بداية السلام عليكم ورحمة الله وبركاته ..

ياخواني .. محاتسيكم ماعنده اي خلفيه عن مشاكل السيارة وخرابيطها ...

وسيارتي مدري وش جاها ... بدت تقطع وتتفتف ... واحيانا تطفى بي ولازم ادقها سلف مرة ومرتين لين تشتغل ... مع العلم بانها ماقد سوت بي هالسوايا .... ولامني عطيتها الحامي ماش كنها تقول : مافيني حيل يابوسعد !!

مع انها ماهيب قديمة ... سيارتي كامري موديل 2001 تماتيك ...

وودي اوديها لم الوكالة بس خايفن يقصون ظهري .... وش شوركم ياجماعة الخير ؟؟
عاشق الجبال
19/10/2006, 01:04 AM
غير البواجي وتضبط ان شاء الله
متفائل
19/10/2006, 01:14 AM
غير البواجي وتضبط ان شاء الله

صحيح انا مع اخي عاشق

البواجي غيرها وبإذن الله يصلح الموتر

سين سؤال : هل هي تطفى عليك وان تمشى ولا لا ؟؟؟

اذا تطفي تأكد من السيور وكذلك تأكد من البطاريه وأصابع البطارية <<<< هذي بعد ماتغير البواجي أولا

والسيارات يجب صيانتها وملاحظتها باستمرار لانه فيه اشياء لازم تغير من فتره لفتره
هذا بحسب مامر علي والله اعلم
راعي الهـــدد
19/10/2006, 01:16 AM
ونخوك تأكد من البواجي وأسلاك البواجي

ممكن انك مبطي ماغيرتها

وإذا كان مافي البواجي شي

فتنبه لما هو تبع للبنزين من صفايه او طرمبه اذا كان فيها طرنبه

دمت بخيرات
بن عاقول c.o
19/10/2006, 01:25 AM
أخونا راعي الكيف .... أنتبه ليكون مغيّر زيت عند أحد محلات الغيار ونسوا قطعة قماش في المصفاة للهوا حق الموتر وبالتالي انّسد المجرى وصارت قومتها ومشيها ثقيل .ترى تصير ذي النسيان وارد. وقد صارت لي
وإذا مهب ذي.. أقترح عليك زي ماقال أخونا عاشق الجبال. البواجي والفلاتر والوايرات للبواجي وأمور التصفية يعني الله يعينك على تغييرهم بس قبل كل شي الأفضل تروح لفحص الماكينة بالكمبيوتر بـ 100 ريال تقريباُ او أقل قبل ماتحط قريشاتك على الفاظي ويعلمونك بكل التفاصيل ألي بالماكينة فربما يطلع عندك بلف قافل وألا شي بس إذا طلع بلف قافل راسلني أو أسأل من جديد لأن عندي حل بسيط وغير مكلف بدون فك الراس ومشاكل والشباب أخبر منّي عندهم الحل إن شاء الله .. وسلامتها الكامري من كل شر :)
Abu Saad
19/10/2006, 01:35 AM
عندي نفس السيارة بس موديل 2000 قراندي.
غير البواجي + صفاية البنزين ..
ولاينقص التانكي عن الربع ..
وسلامتك .
راعي الكيف
19/10/2006, 01:36 AM
ياخواني جعلي لكم فدوا


بالنسبة للبواجي .. كشفت عنها عند واحد كهربائي .. قال مابها شي هي واسلاكها..

وانا والله من الناس اللي حريصن على السيارة من ناحية الصيانة .. ولو اني ما افهم ولاههه >>> يشر بنصف اصبعه الصغير ... بعلوم السيارت ..

وسوت بي منكح بغيت اشب فيها قبل شوي ... طفت بي عند الاشارة واشتغلت البواري علي ... وادق سلف لين مابغيت احرقه لين اشتغلت ...

وضااااااااايقن صدري بالحيل ... مدري وش سالفة اهلها معي .. كنا حبايب من قبل ليش كذا ؟ هههههههه

رحت لورش بصناعية النسيم ... واحدن يقول لي غير الصفّاي .. وواحدن يقول لي غير الطرمبه ... وواحدن يقول لي غيرهن كلهن ونشوف :d !! وبعد فيها نشوف !!

يعني بصراحة خايفن منهم ... شكلهم يبون يتعلمون على السيارة ولا يدرون وش بلاها ... والحرمية واااجد !!

هل فيه ورشة سننننعة شغلهم تمام وامانه ... وان حصل سعرهم معقول :d ؟؟ ولا بس ادزها للوكالة وامري لله :( ؟؟
Abu Saad
19/10/2006, 01:54 AM
انت لاعب في كهرب السيارة ومحبرش فيه ؟؟ قل ايه :) هذا اولا ..
ثانيا انت وين اذا انت في الرياض اخبرك كهربائي (ساحر) !.
في انتظار ردك.
راعي الكيف
19/10/2006, 03:21 AM
هلا بك راعي الددسن ..

لا والله مالك لوا ... اصلا يجيني وسواس لو فكيت طيس السيارة ههههههههه وشلون عاد الكهرب ؟؟

مالي بالحبرشة ابد ... وش تهقا منه ؟؟

وتراي بالرياض ..

في انتظار ردك
غضنفر
19/10/2006, 04:05 AM
راعي الكيف :
طرمبة البنزين سهل جدا انك تعرف اذا هي خربانة
الطريقة طال عمرك
شف الكاتلوج حق السيارة عشان تعرف محل الطرمبة في الكبوت
ثم افصل اللي الي فوق الطربمة وهو الي يوصل البنزين للمكينة
وشغل السيارة
اذا طلع بنزين من فوق الطربمة معناه انها سلمية والبلاء من غيرها
GMC79
19/10/2006, 05:53 AM
حبيبي رح الان لاقرب كهربائي وخله يتتبع الاسلاك اللي طالعه من كمبيوتر السيارة بيلقى واحد مفصول خله يدور الفيش حقه ويشبكه فيه والسلام

وعلى فكرة مهيب الكامري اللي بتشتكي من بواجي وطرمبة بنزين ولا حساس ابد تاركتها لغيره
Abu Saad
19/10/2006, 06:05 AM
اذا انت في السويدي وصفت لك الكهربائي المجنون ...
واذا بعيد عنه و ناوي تعني للسويدي برضه وصفت لك ..
في انتظار الرد..
سلام
راعي الكيف
19/10/2006, 06:15 AM
والله ياحبذا يا اخوي ددسن ...

واشكر الجميع لتفاعلكم .. والله ماتقصرون ...

واللي يخبر لي ورشة جيدة بهالامور ... يدلنا عليها .. وله مني الدعاء ...
(( ســـعود ))
19/10/2006, 06:17 AM
السلام عليكم
قديما كان عندي سياره كابرس موديل 89 المهم تمشي زين واحيان تطفي الين مادعس عليها واحيان ان وقفت عند الاشاره من غير مادعس على البنزين طفت واحيااان تبقى شغاله واحيان واحيان المهم الدعوه كلها مزاج وعلى كيفها رحت ووديتها لواحد خبير قال بخاخات ونظفها بس وش اقولك ماشاء الله عليه وعلى شغله وعلى السياره من بعد التنظيف ابد الموتر ماهو موتري يصق طبلونه وبوقت قصير جدا واذا دعست عليه يعطي ولاغير للثاني قامن كفراته يدرن وخشمه ينقز لفووق هههههههههههههه الله يذكره بالخير ويهني من معه
m1m
19/10/2006, 06:23 AM
شف يا اخوي مثل هالمشكلة مش أي واحد يحلّها .. لأن هالمشكلة تصير من عدة أشياء

الكامري بنت الكراسيدا حمار مكدة .. اللي عندك ما أظن عطل إلا إذا كان جايها صدمة ..

تابع الليات الخاصة بالبخاخ .. لأنه يكون أنفصل الّلي .. وضاع تنظيم الهواء .. شف فلتر الهواء .. البواجي ما تخلي السيارة ثقيلة في التشغيل إلا في حال مقلوبة الأسلاك
هولوكس2005
19/10/2006, 07:10 AM
غير اسلاك بالواجي ابد كانت عني نفس المشكله بجميسان الله يذكره بالخير
إبن فيصل
19/10/2006, 07:50 AM
أخوي أنا أبعطيك بعض الحاجات وهي ناتجة من خبرة طلعت من كثر ما أصلح بالسيارات الي قد شريتها.

أخوي إذا كانت السيارة وهي باردة يعني مبطي وأنت مطفيها وشغلتها تشتغل تمام ولا تبدأ تقطع وتطفئ الا إذا ابطيت وأنت ماشي عليها يعني أحترت ترى هذا دليل أكيد على أن طرنبة البنزين خربانة عندك وفيها ضعف ما تشتغل تمام الا لين تبرد الطرمبة حقت البنزين...وإذا كنت أنت من الي يخلون السيارة لين تولع لمبة البنزين أكيد الطرمبة لأنها تتأثر بالشي هذا.
وبعدين أنا أقول أن البواجي ما راح تأثر على السيارة كذا فجأه على كلامك كانت السيارة حلوه معك والبواجي أصلاً إذا كانت السيارة مكينتها زينة ما تخرب بل تصير قديمة وتضعف عزم الموتر فقط الين عاد تندمر البواجي وتبدأ تشوف السيارة يالله تمشي ويمكن تطفي أويالله تشتغل.
الكمبيوتر عندك ما أعتقد أنه خربان لأنه إذا تعطل ما عد إشتغلت السيارة أو بتل على عطاله يعني مهوب يشتغل شوي ويطفي شوي زي طرنبة البنزين الي تزين شوي إذا بردت.
طبعاً إذا غيرت الطرمبه جديدة لا تنسى تغير الصفاية معها طبعاً إذا كانت الصفاية مهيب مع الطرمبة على طول يعني خارج التانكي(بالعادة تكون الصفاية خارج تانكي البنزين والطرمبة جو التانكي )لكن في الموديلات الجديدة تطورو وصارو يحطون الطرمبة والصفاية مع بعض وفي قطعة وحدة....إذا صار لك نفس كلامي فنصيحتي رح لكهربائي جيد وشف وش يقول لك وأكيد بيأكد لك صحة كلامي طبعاً تغيير الطرمبة شغل اليد عموماًَ ومتعارف عليه 150 ريال غير قطع الغيار..
ملاحظة:عدم إغلاق محرك السيارة عند تعبئة البنزين وخصوصاً إذا كانت فاضية مرة يؤدي الى تعطل طرمبة البنزين خاصة في السيارات الامريكية).
وتقبلوا تحياتي....إبن فيصل،،،،
عاشق الجبال
20/10/2006, 02:23 AM
اخي راعي الكيف
ولايهون باقي الاعضاء
واضح ان الخلل عندك يتعلق بالكهرباء والدليل اشتغال البواري حسب كلامك
فعلا يبيلك كهربائي بارع يقص الاسلاك وتفحص الضفيرة واسلاك البواجي والكويل
وان شاء الله تضبط
راعي الكيف
07/11/2006, 12:54 AM
عذرا للانقطاع المفاجئ ... العيد وانتم خابرين عقب العيد الواحد يالله يتواسى ويضبط اموره

ابشركم ياجماعة الخير ...

سويت الآتي ::

رحت وسويت فحص للسيارة بالكمبيوتر .... وطلع لي ان مدري الطرمبة او الصفاي خربان ومنسدّ ... ومخربن كذا شغلة ...

وغيرت الاتي ..
- طقم البواجي
-اسلاك البواجي
- الطرمبة
- الصفاي

وكلفت علي شغل اليد بالقطع ... 1000 ريال ... وعسى الله يبارك فيها ولا تخرب مرة ثانية

ولا عدمتكم جميعا يا احبتي ... فقد عودتوني دائما فزّاعين للخير ... جعلكم سالمين غانمين
نجد 1
07/11/2006, 02:51 AM
الصيانه المستمره ، ظروريه للسياره ، وليس شرط ان تكون فى الوكاله