فتك او جي اكس ار 2009 ؟

[احمد الصالحي]

السلام عليكم ورحمة الله وبركاته
يا اخوان ناوي ان شاء الله اشري لي جيب الان معي ا فجي 2008
ممتاز ماشفت شي منه الا أشياء استهلاكية لكن (ضيق) وأبي أتوسع ومحتار بين الفتك والاند
معي حوالي 120 الف ريال و أبروح الإمارات أخذه لأني شريت الافجي من هناك وكل شي تمام الحمد الله
المبلغ اللي معي يجيب لي فتك 2009 لولوي ممشاه تحت 100 فل كامل دفلك والخ...
ويجيب لي جي اكس ار2008 او 2009 الفطيم 6 سرندل بدون دفلك فل فتحه والخ...
والفتك والاند كلهن 6 سرندل
الدفلك بعد ماجربته بالافجي اقتنعت انه من الأمور المهمه
الفتك من داخل شكل ممتاز وديكور تخشيبه والخ...
الاند عادي من داخل مافيه شي يذكر
والممشى كلهن متقاربة ومحتار الفتك أكثر مواصفات ومن الداخل أفضل من لاند بكثير
أما لاند تايوتا ومجرب تايوتا بالكامري والافجي قطع غيار رخيصة ومتوفرة ويتحمل
أما النيسان ما جربته قبل ابدا ابدا
ودخلت هنا رابطة ملاك الاند يتشكون منه والفتك مثل
علما استخدامي للسيارة خطووووووط 5 أيام بالأسبوع رابح جاي للمجمعة
320 كيلو وقت الدوام وللبيت وطلعاتي للبر لكن طلعاتي بسيطة جدا

انصحون الله لا يهينكم وش الأفضل لاستخدام ؟؟؟

[qx55]

بسم لله
السلام عليكم ياخوي
خذ الفتك افضل اقوى وافخم من الجي السته سلندر

[احمد الصالحي]

بسم لله
السلام عليكم ياخوي
خذ الفتك افضل اقوى وافخم من الجي السته سلندر

وعليكم السلام
ياخوي لان هل سعر قطع الغيار الاستهلاكية للفتك معقوله ؟

لان لافجي جلبت العكوس للجهتين 220 ريال من الوكاله وصوفة المكينه الخلفيه 35 ريال وتركيبها ب500ريال لانه لازم ينزل القير عندي يهرب الان بالجيب

[طرقشون]

الجي اكس ار ٦ سلندر ماينفع بريال

والفتك اذا بتاخذ خذ عادي لان التماتيك بارد في النفود وبيجيب لك المرض

[المميـز]

:

بما ان المقارنه محصوره بين فتك فل كامل
وتويوتا ٦ سلندر

ارشح لك الفتك لاسباب عديده غنيه عن التعريف
لكن اللاند ابعد عنه ٦ سلندر ماينفع نهائيا
واعرف واحد شراله هدد جي ٢٠١١ قير عادي ٦ سلندر
وعافه عقب سنه يقول ثقيل
لكن لو مانت المقارنه مع اللاند ٨ سلندر
هنا الواحد يحتار مايدري وش يختار

مقارنتك سهله وعليك بالاستخاره بعد الاستشاره
والله يكتب لك اللي فيه الخير
وتروح وترجع بالسلامه

:

[احمد الصالحي]

الجي اكس ار 6 سلندر ماينفع بريال

والفتك اذا بتاخذ خذ عادي لان التماتيك بارد في النفود وبيجيب لك المرض

يا اخي ان شاء الله تماتيك باخذ لو بشري ددسن القير العادي لراعين البر واللي يكشتون لم الديار البعيدة
ابي استخدام عاااائلي سفر وخط ومشاوير



:

بما ان المقارنه محصوره بين فتك فل كامل
وتويوتا 6 سلندر

ارشح لك الفتك لاسباب عديده غنيه عن التعريف
لكن اللاند ابعد عنه 6 سلندر ماينفع نهائيا
واعرف واحد شراله هدد جي 2011 قير عادي 6 سلندر
وعافه عقب سنه يقول ثقيل
لكن لو مانت المقارنه مع اللاند 8 سلندر
هنا الواحد يحتار مايدري وش يختار

مقارنتك سهله وعليك بالاستخاره بعد الاستشاره
والله يكتب لك اللي فيه الخير
وتروح وترجع بالسلامه

:

امين يارب

8 سرندل اخاف ينشب بحلقي بانزين يكفي الافجي الحين

اقوم الفجر وانا طالع من عنيزة للمجمعة اعبيه فل وانا راجع الظهر لازم اعبي بانزين بالغاط 10 او 15

دام خيوك هدد ماشاء الله يبعد بالصمان والتنهات الوعد

وانا صعفيق بعمري ماطبيتها :)


يا اخوان همن قطع الغيار والكرف مثلا الافجي الحين له 11 شهر ماشاء الله

دخلته للصناعيه لاشياااء المهمه جدا تهريب عكس يسار والحين المكينه وساحب عليه
مصدوم من ورا ساحب عليه حساسات مايشتغلن عقب الصدمات وتاركه
من قدام وجهه غبار واللوحه متعرفطهه ومن طرف اليمين منكسر شوي من صدامه واهم شي يمشي
جلنطه له 3 اشهر مافيه جلنط ونظامي اهم شي قدام يمسك الفرام
لاني اللاسف طبعي بالقياادده سيئ جدا جدا اللي يسد علي موقف والخ...
راح يجي يا يلقى رمانة الهك واصله الاديتر او بقايا اسطبه بالارض
واذا كنت امش وسادن علي قدام يتمشى فيه 3 حلول
اما يفتح وهو رجل وبيني انا وياه كم سم
او اذا فيه مجال اسقط يسار وعادي كفرين بالرصيف فوق
او اسقط يمين ان ياتطير مرايته يايصرف نفسه بالرصيف .


استخدامي للسيارة يا تطفى وانا امشي او اذا طفيتها ماتشتغل هنا فعلا خربانه :)

مادام تمشي تقطع شوي مايضر يبي يهرب زيت بكيفه يبي يوسخ زفلت الحكومة والخ...

وقبله كامري بعتها مافيها شي سليم الا المفتاح

تدخل الصناعيه مرتاح نفسيا وموترك تايوتا

اما نيساااان ماجربته قبل ابدااااااا

[zzfzz]

انا ارشح لك

[zzfzz]

الفتك وبس بعدين لاتنساء حجم المكينه
4000gx
4800vtc

[sgl2002]

خذها من مجرب


تبي تنسى تهريب الصوف والعكوس مع الباترول

[احمد الصالحي]

الفتك وبس بعدين لاتنساء حجم المكينه
4000gx
4800vtc
يارجل مكينة الافجي مكفيتن وزيادة

وانا بسابق به

خذها من مجرب


تبي تنسى تهريب الصوف والعكوس مع الباترول

ايه والله التهريب به ما ادري هل هي مع الاستخدام ؟او استهلاكيه
الشهر اللي راح جلبة عكس والحين صوفة المكينه قبل المكافاة يومين ثلاث يخرب حاسبن له :)


لكن تهريبه صورة المكينه 35 ريال لكن المشكلة شغل اليد 500 ريال ويوم كامل ياقف

الباترول سعر قطع غياره معقوله ؟ متوفره ؟ما ابي ادفع مبلغ وقدره وباتسر ينفصل به فيشن والا شي ينكسر واروح ادور بالتشاليح او انتظر طلبيه والبلغ كبير

[sgl2002]

^^^^

مافي الباترول شي يخرب دايم بس حافظ على نظام تبريده فقط

والقطع موجوده ان مالقيت هنا تلقى بالخليج كثرها مرتين


وقطعه نفس قطع التويوتا لاحد يقولك غاليه ولاشي

لاني مجرب التايوتا ومجرب النيسان كلها نفس القطع


بس عاد ماهو تدوس ببطنه زي الافجي


لان الباترول اذا طفى مايطفي الا اذا خبطت المكينه

واذا تبي قير تماتيك لازم تواطب على تغيير زيته

[مجالس الرجال]

لاند افضل
لأني لو بمكانك ما اخذت الا لاند كروزر
لكن اقتراح اذا انت كل يوم تضرب مشوار طويل
مالك ومال الجيوب خذ صغيرة افضل بمراحل
ولا ننسى وشيش الهواء بالباترول تراه على ١٤٠ و ١٦٠ مزعج نوعا ما

[احمد الصالحي]

^^^^

مافي الباترول شي يخرب دايم بس حافظ على نظام تبريده فقط

والقطع موجوده ان مالقيت هنا تلقى بالخليج كثرها مرتين


وقطعه نفس قطع التويوتا لاحد يقولك غاليه ولاشي

لاني مجرب التايوتا ومجرب النيسان كلها نفس القطع


بس عاد ماهو تدوس ببطنه زي الافجي


لان الباترول اذا طفى مايطفي الا اذا خبطت المكينه

واذا تبي قير تماتيك لازم تواطب على تغيير زيته

وش بلاه نظام التبريد ممكت تفيدن مير هو وشو الاديتر يعني ؟؟

الزيت كل 7الف او 8 الف على حسب المزاج اغير الزيت من معي الكامري وانا تسذا
وبدون سيفون بعد اهم شي يمشي

ومحتسيك احد ضحايا الامريكي دجيت من خراباته وكهربه
بديت اشوف السيارة اللي كثيره مواصفات وشكل يغري والخ...ينخاف منه
اما اللي مركبها مثل مركب الدسن مابه شين زود كد ومد
والقير يهرجون عن حق الباترول الانه به توماتيك عادي والاشياء هذي
ان كان على الزيت سهله حقت القير كل 100 الف غير


لاند افضل
لأني لو بمكانك ما اخذت الا لاند كروزر
لكن اقتراح اذا انت كل يوم تضرب مشوار طويل
مالك ومال الجيوب خذ صغيرة افضل بمراحل
ولا ننسى وشيش الهواء بالباترول تراه على 140 و 160 مزعج نوعا ما

يابن الحلال الوحد يبي الوساع والبر من متى لمتى اطلع وان طلعت للغضا وان ابعت للخبيبه

وان كان على الهواء اركب الافجي متب واصل المجمعة الا مولع له

عادي تمشي على القطعه 180 ويجيك من ورا اكسنت يكبس لك تفتح الطريق :)

والاند 6 سرندل نظامه هو البرادو والافجي واحد على ما اظن

[ذيب زلفاوي]

فكر بافتك ولا صغيره ولا لاند 8 سلندر

بس نصيحه انحش انحش انحش عن الاند 6 سلندر وخاصه قير تماتيك
موتر ثقيل مره ومكينته زينه على الاف جي وطقته بس ماتشيل الاند وبالخط بتص اير تصرفكثر من الثمانيه لان المكينه تبذل جهد اكبر عشان تمشي السياره بسرعه 140 ولا 160. بعكس الثمانيه تمشي 180 والضغط مريح والمكينه تقدر تشيل الموتر بالراحه ولا صوت حنه ولا شي

[شقران نجد]

مايبي له نشدة شيخ خذ الفتك دام الدعوى 6 سلندر .....

الفتك روعه بس تطيح بالنظيف والله يدبر لك الخيره

[نايس × كول]

خذ نيسان سوبر سفاري 2009 لولوي نضيف وقت البيع تحصل زبون اذا اللون لولوي

و احرص ع بطن الموتر لا يكون مصدي او مركب له فلاتر و هدرز

[sgl2002]

اقصد بنظام التبريد يعني تشيك مويته كل فتره ومروحته وتغير مويته كل سنتين ولاتعبيه الا مويه اصليه


والفتك معروف موتر كد ومد وشفه مع حقين القنص والمقاومات والتطعيس لوه يخرب دايم ماشفته معهم

لكن ان حصل تاخذ جديد افضل


وصدقني ان دخلت عالم الباترول ماعاد بيملا عينك موتر غيره ابد

[مقلع الرمث]

اخوي مشكله التايوتا تفقع اصوف وهذا ما حدث معك بالاف جي

أنصحك ياتاخذ تايوتا 8 سلندر اقل صرف مع الطريق

وإلا كان الدعوى 6 سلندر خذ فتك

[الندى]

لا تعدا الجكسار لو انه 4 سلندر
دام انك راعي خطوط
عزل وراحة
اما الفتك عزل وراحة معدومة حتى النشاط مب ذاك الفرق

[kasdar]

انا معي فتك

موتر ماشاء الله ماعليه

لاكن اذا شريته الله يعينك على بانزينه

[بدوي مطور]

خذ الفتك. وررررريح نفسك

[speed62]

مقارنتك غريبه اخوي
انت راعي خطوط منت براعي مقاوم ولا تطعيس ولا راعي بر
الباترول مايختلف عليه اثنين بس العزل على سرعات عاليه بيطفشك
خذ لاند 8 عزله جدآ قوي حتى على سرعة 200 ماتحس انك مقلع..بالنسبه للسرفيه اشوفه افضل من الفوجي
لاتنسى الاستخاره..بالتوفيق

[طير شلوى نجد]

وانا اخوك انت تضرب مشوار ماهو بسيط والله يوفقك ويرزقك القرب للديرتك والجيب ما هو خوي بالتردد والمبلغ الي معك يجيب لك سيارتين بالراحة والصغيره مثل الكامري وغيره لا تقارن ابد بالجيوب بالصغيرة ما تحس بالطريق ولا تنسى المخاطر على السرعه العاليه تمشي 160 وانت مرتاح وفوق ذالك مايرهق المخبات بمصروف البنزين والباقي تجيب به موتر يكفيك الحاجة وزود و اخوك مجرب التردد بالجيب والصغيرة والمعذرة خروجي عن الموضوع .

[MR.MESHAL]

لا تبعد عن الفتك

[ابونبيل]

الفتك انشط والدفلك ضروري
اللند 6 سلندر سيء الا اذا كان قير عايدي والصراحه اشوف ان الفتك يناسبك اكثر

[احمد الصالحي]

مشكورين وماقصرتو

اليوم بالوكالة وطاح عيني على الفش فش قير عادي 6 سرندل لولوي 2013 جديد ب112

http://im37.gulfup.com/E1H9h.jpg (http://www.gulfup.com/?GEEQNS)