المساعد الشخصي الرقمي

مشاهدة النسخة كاملة : وش الحل الشاص كسر ظلوعي كسر الله ظلوعة


اقحطاني%
21/10/2006, 12:59 AM
كيف الحال يا نشامى
انا كان معي نيسان 2005 تماتيك فل كامل اسود ويوم جاء الشتاء ودخل البراد وجا وقت المقانيص قمت وبعته على رجال ب115 الف علما انه جديد المهم خذت لي ذاك الشاص 2006 ذهبي رقم واحد وارد بهوان خذته 94 الف المهم قلت بخليه اجسن من النياسين والسيارات الباقية وبخليه عندي لاني راعي مقانيص 24 ساعة ولا ينفع الا الشاص وسويت المستحيل وخسرت عليه فوق عشرين الف وهي التالي :-
1.تركيب بوالين +جنوط المنيوم
2.تركيب كراسي فتك 2006 كهربائية +ثلاجة في اكس ار
3.تركيب مخفي ضد الشمس والحرارة ضمان 10 سنوات
4.وصل بطارية اضافية مع توصيل سلك لها وتركيب قاعدة لها نفس الوكالة بالضبط
5.تركيب ماطور هواء استرالي اصلي
6. تركيب مراوح مكسيما الجديدة +مروحة في اكس ار حقت المكيف الخارجية
7.تركيب هدرز +فلتر امريكي الاسود
8.تركيب وايرات الزرق +بواجي سبلت فاير
9.تنجيد السيارة بالكامل مخمل (الشامواه) الاصلي اضافة الى وضع عازل للحرارة اضافي (مدبول) فوق وتحت في الغمارة
10. تركيب شاشة دي في دي +سي دي 12 اسطوانة
11. تركيب تايمر حق التوربو
هذا اضافة انه يوجد به ريموت كنترول وتخشيب للبيبان من الوكالة لانه وارد بهوان
المشكلة الكبرى والي بهذلتني بعد هذي الخساير مازال شاص وما تغير وانا ماخليت فيه شي الا وغيرته لكن مازال يطب ويناقز ومش مثل الفتك مريح
واذا رحت مشاور فيه تعافه من كثر المناقز والمطاب (يعني بالعربي ابي اخليه اريح من الفتك ويتحمل المقناص )
بالعلم اني ماابي انزله واجد عشان التحميل والمقانيص وابي شي مضمون ومجرب لاني مش ناقص خساير ووقفات في الصناعية
والله اني ندمان على شريتي للشاص وعلى الخساير الي ما فادت فيه والحين نبي فزعتكم ياهل الخبرات

وجزاكم الله خير
راعي الكيف
21/10/2006, 01:20 AM
والله ياوخيي ... مانيب رجالن فاهم بالسيارات ...

بس اللي اعرفه ومتأكد منه ... اذا انت تبي موترك يتحمل بطانيج الدروب والمهاوي اللي تجيك وتاكلها وانت ماشي 120 على الاقل بالبر ..

مالك إلا هاللي انتي مشتكين منه .. لانه اصبر للسيارة من لو انك تبي تركب ياي ولا سبرنق ولو كان قوي ويتحمل ..!!

عندي لك اقتراح .. اذا بغيت تطلع للمقناص ... خله على ماهو عليه - وضعه الحالي - .. واذا رديت للديرة ... فكهن وركب يايات ولا سبرينق هههههههههههههه ... مالك إلا هالسوات ..!!


بس معليش اخوي ممكن سؤال ؟؟ تركيب الشاشة الدي في دي والسي دي 12 اسطوانة ... ليش ؟؟
لاني اعتقد ان السيدي والدي في دي مايصلحن إلا على سيارات الديرة ... لانهن اجهزة حساسة جدا ضد الغبار والرجة ..


واعتذر عن الاطالة
اقحطاني%
21/10/2006, 01:29 AM
هلا راعي الكيف ومشكور على المرور ولو ان ما فيه اجابة مفيدة لكن ماعليه
اذا كنت راعي خطوط ومقانيص وبنفس الوقت راعي كيف ومزاج ركب دي في دي وسي دي وشف كيف اما من ناحية الغبار لا تهتم الاصلي يدوم
غضنفر
21/10/2006, 03:44 AM
وشلون
يعني الحين ما تدري ان الشاص يكسر الظهر قبل لا تشتريه
الله يهديك
الشاص ماخذ دكتوراه في تكسير الظهر
بعدين وشلون تبي الشاص يكون مريح مثل الفتك
نظام التعليق يختلف وكل شي يختلف
باختصار ما تقدر تخلي الشاص مثل راحة الفتك
افضل حل بما انك راعي نيسان انك تبيع شاص التويوتا وتشري شاص نيسان
واذا ما تبي تبيع
فيه حلول تخفف شي بسيط
اهم حاجة اذا موترك 11 سستة
فك 4 سست من الجهتين وركب لعابات راح تحس بفرق في المطب
وفيه حلول ثانية تجدها هنا
http://mekshat.com/vb/showthread.php?t=56189
المطلق
21/10/2006, 03:54 AM
أخوي اقحطاني

لاتسحب سست ولا شي كل اللي تحتاجله دبّل المساعدات وركب يايات من النوعيات الممتازة وبس

وعلى فكرة إذا سحبت السست أي شي تحمله في الحوض راح يطيح الموتر من ورى
مسير عليهم
21/10/2006, 03:59 AM
تبي الصراحة بعه وخذ ونيت نيسان باترول صح الشكل لك عليه بس اريح منه بكثير
إبن فيصل
21/10/2006, 04:35 AM
الله يعينك أخوي تحمل الشاص هذي ضريبته قوي ومتعب...لكن ما ينفعلك الا هو على كلامك راعي بر ومقانيص 24 ساعة.

المهم أنا عندي بعض الاقتراحات يمكن تفيدك أولها إنك تغير المراتب حقت الشاص وتحط مراتب ثانية يعني ترهم له مراتب مريحة داخلها سست قويه وأنصحك بمراتب الجمس لأنها مريحة مرة وسماكتها أكبر من سماكت مراتب الشاص الي مهيب شي قدامها...طبعاً الجموس والصوالين مراتبها تختلف حسب أحجامها الله يعينك رح للتشليح وتطرح لين تلقى الي تناسب سيارتك وأنا أقول هالكلام من تجربة ركوب الصوالين والجموس تحس بفرق إذا ركبتها بعد الشاص....هذا شي والشي الثاني حليو ويكلف وهو إنك تنسم للكفرات...ترى التنسيم يخلي المطب أخف لكن بتندمر الكفرات عليك لكن الحل الحلو والي ما يأثر على السيارة هو المراتب جرب وبتدعيلي.
وتقبلوا تحياتي...إبن فيصل،،،،
اقحطاني%
21/10/2006, 12:59 PM
يا شباب النيسان الشاص ما ينفع بسبع المذاهب
اما السست انا منزلها الى 8 ومركبن مراتب فتك رقم واحد الكبار 2006
المشكلة المناقز والمطب القوي
وشهو احسن نوع يايات وهل هو مفيد
لو سمحتوا ابي شرح واضح الله لا يهينكم واعذروني اذا ثقلتها شوي
شبح الصحراء
21/10/2006, 08:40 PM
الشاص معروف انه يكسر الظهر وانصحك هدي لا تسرع مع المطناج ترى وجع الظهر ماله طب ومع الوقت يمكن تصاب برضوض بالظهر اذا انت راعي تكسر ومطامر في البران فداري على عمرك واذا مصمم بع الشاص واشتر هايلوكس دبل غمارة أريح كثير من الشاص وسيارة تكسير وشعبان وتتحمل دعسة رجلك .
دندشه
21/10/2006, 09:25 PM
السلام عليكم ورحمة الله وبركاته
عندي حل لك وهو انك تشيل اربع سست من الجنبين وتركب بدالهن عريضة ددسن قديم من الخمسه وتحت وجرب الفرق كثير من الشباب مركبينها وتراى المناقز واراح يروح كله بس يخف عليك شي بسيط تتحمله

اخوك دندشه
اقحطاني%
21/10/2006, 09:54 PM
مشكورين على المرور
اخوي دندشة ممكن توضح لاني مافهمت واناخوك
اقحطاني%
21/10/2006, 10:00 PM
شكرا على المرور
اخوي دندشة ما فمت كيف عريضة ددسن ياليت بالتفصيل
الا بسئلك وين محل ورقم محل الشد الي في موضوع المسفهل
شكرا للمرور
ابو مرام
21/10/2006, 10:10 PM
اخوي اقحطاني انا مثلك عانيت كل المعانت ولكن الحـــــــــــــــــــــــــــــــــــــــــــــــ ــــــل عندي وانا ابو مرام الحل هو اني بعته وارتحت
كانك رايع مقانيص وتبي سياره اخو الشاص فخذ هايلكس دفرنسين غماره توفي بنفس الغرض واريح بكثير اخوك المحب ابو مرام....
ابو مرام
21/10/2006, 10:12 PM
اسحب سست دبل مساعدات جنوط لكزس الشاص هو الشاص يكسر الظهر..
الرهدن
21/10/2006, 10:39 PM
أخ أقحطاني00
أظن إن هناك شبه إجماع من الإخوان بأن تبيع الشاص وتشتري هايلكس دبل وريح دماغك 00لكن الحظيظ بصراحة اللي يبي ياخذ الموتر عقبك وأنت ماشاءالله عليك مكمل الشاص00
وش رايك تبيعه لي00 ترى الشاص يكسر الظهر00مع إنه والله عندنا شاص ديزل00
بس ودي براحك ;)




.
اقحطاني%
21/10/2006, 10:48 PM
يالربع انا مكلفني حوالي 117 الف ماني بايعه ولو كلفني الامر ابدله من دفرنس الى مقصات
ا
المخـــاطر
21/10/2006, 10:56 PM
شف يالغالي

الصراحة أحس أنك محترق ومنقهر

ومن حقك
17 ألف بلحالها مهيب سهلة وشلون 117

لكن فيه يالغالي أنك تدبل المساعدات وبإذن الله بيفرق واجد

وغير المساعدات يامساعدات جي اكس ار
والا من هالمساعدات الثانية

ولو تبي أدلك على ناس راعين شيصان على النت راسلني على الخاص وبإذن الله بتلقى عندهم الحل
المجدي
21/10/2006, 11:02 PM
اقول الجي اكس وانا اخوك وسالفت التحميل حمل ورى وطزززز على الديكورات والله يستر عليك وبتدعيلي وانا اخوك اسئل مجرب ههههههه
اقحطاني%
21/10/2006, 11:13 PM
المخاطر يسلملي هالفم وعزا الله اني منقهر ياخوك لكن تكفى الله الله بالعلوم اول باول
يالربع ابي نصايح عن الشاص وتعديله اما البيع او التبديل خلاص حصل الحاصل
مقدور
22/10/2006, 12:01 AM
القحطاني مثل ماقالوا الاخوان عن تدبيل المساعدات والياي الاسترالي

وفيه نقطه غفلوا عنها الاخوان وهي التوانك لان التوانك الى عبيتها وخاصه الى صارت بالطول

راح تروح النقزه وباذن الله انك راح تفرق مطبه عقب التدبيل والياي والتوانك

واتمنى لك التوفيق يالغالي
فلان بن عفتان
22/10/2006, 12:52 AM
أخوي الحل سهل ..

وهو استبدال السست الخلفيه بالياي , وبما أنك من الإمارات اذهب لكراجات التزويد مثل السويدي والكويتي وغيره ,وهم الي يقدرون يسوون هذا الشي بإحتراف والشغل مايكلف إلا 2000 إلى 3000 ريال ..
القناص
22/10/2006, 01:12 AM
شاص نيسان وبس

واسال بدو الربع الخالي عنه
كحيلان 11
22/10/2006, 01:37 AM
ركب مراتب جمس ولا تندم
هو صحيح انك اذا ركبته مراتب الجمس بتضوق الغماره
بس ما عليه ضح بشيء عشان شيء
عقاب طويق
22/10/2006, 01:42 AM
هذا الشاص أوله ولع وتاليه مافي دلع ماغير تكسير ضلوع
الدبل الثقيل
22/10/2006, 04:20 AM
والله العظيم انه موتر بر وذيب ولو انه قاسي...
صوح الجبل
22/10/2006, 05:47 AM
اذا عدوا الرجال والذيابه ....... عد الشاص من الرجال وانا اخوك ..... الاخوان جعلهم يسلمون ماقصروا .... فيه اضافه بسيطه ..... انك مع تركيب مراتب الجمس تركب تانكي اربعين لتر ..... بين الاستنبه والصدام ..... وبيظهر لك الفرق
شبح الصحراء
22/10/2006, 02:17 PM
يالربع انا مكلفني حوالي 117 الف ماني بايعه ولو كلفني الامر ابدله من دفرنس الى مقصات
ا

ظهرك اولى أم الموتر؟! الصحة يالغالي ما تقدر بثمن .

كثرة المطناج والتكسير مع الوقت إحتمال تكون رضوض بالعمود الفقري خصوصاً لأصحاب الأوزان الثقيلة واسأل الشيبان وهذي مالها طب .

انصحك بعه وفك الإكسسوارات اللي مركبها وركبها في موتر ثاني احسن لك ، واذا مصمم على حوض يمدحون الشاص النيسان بس لازم تجربه قبل . وفيه الهايلوكس الدبل الغمارة مجربينها عندنا في السعودية صحيح ماهي قوية مثل الشاص بس اريح كثير وتتحمل المطبات والتكسير في الشعبان خصوصاً موديلات 2005 وتحت .
هاوي الله
23/10/2006, 02:35 AM
أخوي الحل سهل ..

وهو استبدال السست الخلفيه بالياي , وبما أنك من الإمارات اذهب لكراجات التزويد مثل السويدي والكويتي وغيره ,وهم الي يقدرون يسوون هذا الشي بإحتراف والشغل مايكلف إلا 2000 إلى 3000 ريال ..

هذا أفضل حل وبس
shagyteacher
24/10/2006, 06:19 AM
السلام عليكم
اياراعي الشاص ان كانك مقناص رجع السسست مكانها وانصحك لاتبيع الشاص لانه موتر الصراحه ومثل ماقال واحد من الاخوان فصل تانكي ماي تحت حوالي 30 لتر واستان ستيل وحتى لو توصل قيمته 700 ريال وان شاء الله بترتاح وياشباب لا اطيحون عزوم الرجال على بيع الموتر امانه تحطون الشاص تيويوتا عند الهايلكس الي كانها سمكه والا عند شاص النيسان الي كانه فيل
جرب تانكي الماي ولا انت خسران
ال معلى
24/10/2006, 06:53 AM
ابن عمري ركب تانكي الماء وريح بالك
نازل ردميه
24/10/2006, 03:04 PM
ياراعي الشاص

والله ثم والله اني مالقيت جيب اطلق من الشاص على الرعم اني جربت الجمس والسفاري والاند.....صيح انها افضل من ناحية الراحه والوسع...لكنها ماتبرد الكبد وخاصة في الارض الوعره والمطبات القويه....

كان عندي 2005 وبعته والحين مثل المجنون كلما شفت شاص طار قلبي.....

ياخي قاعده قوه ومتانه وقاسي مع المطبات ...مايتفكك بسرعه وتحمل على المدى الطويل.....
مرونه وسلاسه ولين مع المطاب.....بسرعه يتهرقل ويتفكك

وهذا الفرق بين النيسان والتايوتا


وسلامتكم


نازل ردميه
اقحطاني%
25/10/2006, 11:01 PM
بيض الله وجيهكم يا مداحة الشاص والله العظيم لو انكم راكبينه وشفتوه من داخل ان تقولون مثل ما قال الزلامي" انا اشره على الي يشري الشاص ويبيعه"
ولكن لاتهتمون ماني بايعه دامني للمقانيص تواق
ال معلى
26/10/2006, 02:30 PM
ولكن لاتهتمون ماني بايعه دامني للمقانيص تواق

كفووو يالذيب

هذا الشاص طول الله عمرك
قناصه
13/07/2011, 02:18 AM
سلام اخوي فيه موضوع ممتاز للعضو نسناس نت بعنوان:

لعشاق الشاص !! ولأول مرة بالمملكة .... وداعا لألام الظهر ماعرف احد الرايط سلام
gx-low
13/07/2011, 10:31 AM
اخوي بدال هالخساير خذلك موتر سيدان للديرة والخطوط وخل الشاص للكشتات والطلعات

ولا بعه واشتر لك جكسار او باترول
المنعفط
13/07/2011, 11:41 AM
سلام اخوي فيه موضوع ممتاز للعضو نسناس نت بعنوان:

لعشاق الشاص !! ولأول مرة بالمملكة .... وداعا لألام الظهر ماعرف احد الرايط سلام

:D:D:D
الموضوع قديم جدا يالحبيب
بحر يتلاطم
13/07/2011, 12:07 PM
الزلامي يقول بعد
انشهد ان الجيب مايستويلي*كسر ضلوعي كسر الله ضلوعه
ينثر زيوته مثل نثر الصميلي*وحصيله اللي بالاديتر يزوعه
وبندر بن سرور يمدحه
الله على اللي ضبط اليابان فنه * وخترع فيه الدبل ضد الحتيفه
ذئب اليل
13/07/2011, 01:13 PM
ارجع على الفتك وريح راسك من الوجع
هلي ديزل
13/07/2011, 03:45 PM
الموضوع قديييييييييييييييييييييييييييييييييييييييييييييييي يييييييييم
رامي ع الموت
13/07/2011, 04:11 PM
خل كل شي على ماهو عليه

غير بس المساعدات الخلفية حط حقت السيدان الامريكي

تحياتي
مخاوي دابذريع
13/07/2011, 04:19 PM
لا تدعي على مطيتك وانا اخوووك تراه مكروووه ......
aooa
13/07/2011, 04:25 PM
شف هذا الموضوع


وبعدين عطني رايك ..
http://www.mekshat.com/vb/showthread.php?t=416412
شادي الرياض
20/07/2011, 01:03 PM
http://www.mekshat.com/vb/showthread.php?t=416412
أبوعابد 22
20/07/2011, 01:23 PM
موضوع قديم من عام 2006 يعني أقدم من هيك
نايلات11
20/07/2011, 04:58 PM
دق على ابوخالد صاحب ورشة توارن ويفيدك0505162394

موضوع المسفهل