سياره الاسعاف ماذا يجب ان نعمل عند مشاهدتها ( خطاء مع صوره )

[التعـ King ـديل]

السلام عليكم ورحمه الله وبركاته

اخواني سياره الاسعاف كما نعلم انه وجدت لانقاذ المصابين في الحالات الطارئه واي شخص يتواجد فيها فهو محتاج لكل ثانيه يتقدم فيها على الاخرين وصولا الى المستشفى ولكن نلاحظ ان بعض الناس هداهم الله يستغل هذا الشي في التسبب في حوادث اخرى مثل الصوره المرفقه

http://www.mekshat.com/pix/upload01/prof024/mk61060_555.jpg


فصاحب الالنترا استغل ابتعاد الناس عن سياره الاسعاف والتصق بها علشان يمر بسرعه طيب فرضا لو سياره الاسعاف توقفت فجأه راح تكون المشكله مشكلتين غير كذا بعض الناس بيحاول يسوي مثله وممكن يتسبب في حوادث اخرى


نصيحتي لكم : عند مشاهده سياره الاسعاف اولا قم بفتح الخط لهم ولا تحاول اللحاق بهم او الالتصاق مثل صاحبنا ولا تحاول تحد احد يحاول يلحق بهم لاني اشوف بعض الناس يسوونها ويسببون مشاكل


اعتذر على عدم وضوح التصوير لاني صورت بسرعه وانا اسوق :D

[ماجد الحايلي]

وعليكم السلام ورحمة الله وبركاته
فعلاً اخوي صدقت
والأسبوع الماضي اعتقد يوم الأثنين أو الثلاثاء
تقريبا الظهر بالدائري الجنوبي بالرياض امام مصنع الاسمنت
نفس ماذكرت جاء الاسعاف وفتح له الطريق راعي السيارة اللي قدامه
وطبعا الاسعاف خلفه 100 سيارة مثل راعي الالنترا بعد ماتعدى الاسعاف
راعي السيارة حب يستفيد من الفرصة وبما انه فتح له الطريق اعتقد
ان الطريق له وبمجرد ماتعداه الاسعاف يبي يصير وراء الاسعاف
والسيارات تمشي بسرعة ولف عليهم وزعلان وحركات بالايدي
وبغت تتصادم العالم وكل سيارة يتعداها الاسعاف يصير نفس الموقف
الا ماهدى الله عز وجل .....
وانا اقولك الصراحة كنت اسوي كذا:D
بس كل اللي راح تستفيد من دقيقة الى 5 دقايق حد اقصى
واحتمال انك تصدم او يصدمك احد وتوقف بالساعات .
والله يجزاك خير على هالموضوع
ولسان حالي يقول ( الا ليت قومي يعلمون )

[راعي الرود]

هي مسأله ثقافه

للاسف الثقافه في القيادة عندنا شبه معدومه

مدرسه دله كلام فاضي تتعلم اشارات و لوحات الطريق و اللي اساساً على ارض الواقع يا طاقها شمس ومشهبه ولا سادحها واحد و على وضعها مازينوها

لو يكون التعليم جدي اكثر و يحرصون على الجانب التثقيفي .. ماراح تحس بفررق الا بعد سنين يمكن توصل عشر او 15 سنه لأن الوضع دمار لكن تبي تفلح لازم نشتغل من اللحين .. وهذا اللي للاسف ماشوف فيه اي اهتمام من المرور

او اذا الله لا يهينهم مايبون وجع الراس خل الرخصه على 21 سنه زيك زي دول العالم و فكونا من البزارين

على كل حال دام انهم يسمون شغلهم و واجبهم بـ (حمله) اغسل يدك ..

شاطرين بالحملات الاسبوعيه واللي هي اساساً شغلهم لكن مدري ليه يخلونها حمله مؤقته و يلحقها ترفيع و تطبيل من الجرايد و كبار الضباط تصوير و فشخره و سوينا وقلنا و حملتنا ...... و اسبوع يرجع كلش زي ماكان و اردى

و اللوم مشترك بينهم و بين السائقين المتهورين خصوصاً المراهقين ,, لكن الحل و الربط بيد المرور ..

الوضع صار مزري بالرياض اشتدت الكثافه السكانيه و صارت الشوارع زحمه في جميع الاوقات و كثرو المستهترين ..

[تنومه1]

اسلوب الوعي والتثقيف ولى وانتهى...... لانه غير مجدي في ظل انعدام تطبيق الانظمه بكل حزم وصرامه ...

العقاب والمحاسبه وتطبيق النظام افضل وانجح اسلوب لرفع درجة الوعي .

[ابونواف سعد]

فعلا كما قال راعي الورد هي مسألة ثقافه نفتقر لها جميعا المشكله إذا انت واقف عند الاشاره وفيها كامرات ساهر وجاء الاسعاف خلفك ومشغل صفاراته وش تسوي تقطع وتاخذ قسيمه او تنتظر وتحير الاسعاف لو سيارات الطوارئ لهم مسارات خاصه فيهم كان احسن واسرع

[رفيق المجره]

ليش تصور كفشناك ماتدري إن إستخدام الجوال في السيارة خطر هههههههههههههه
ولكن صحيح كلامك وتشكر عليه ونحتاج لمثلك كي يوعي الناس

[أنصر نبيك]

أنا عندي نقطة حاب أضيفها في الموضوع أصحاب الحوادث وانا بالمناسبة عندي ابن توفى في حادث قبل
ثلاث سنوات جاه شاب طائش وبسيارة الحكومة الرسمية لأن ابوه مسؤول كبير وصدمه وهو على دراجته
عند المنزل يلعب مع بزارين الحارة ومشى فيه هو ودراجته عشرين متر لأن الشاب كان مسرع بالحيل
ونقل المستشفى في حالة حرجة وتوفى الله يرحمه بعد أربعة أيام أستغرق نقله الى المستشفى حول 35 دقيقة
وهذا هو الخطأ القاتل ولب المشكلة لماذا ؟!
لأن الانساب المصاب في الحادث يحتاج فقط لعشر دقائق لانقاذه وهذه هي اللحظة الحرجة فلو مضت دون
اسعافه تضاءلت فرص انقاذه القلب يتعب ويصبح غير قادر على امداد الدماغ بالاكسجين فيتوفى دماغيا
وهذا مايحصل مع جميع مصابي الحوادث للأسف الشديد ولذلك لما سألت جراح المخ الاعصاب عن وضع
مخ الولد قال sorry It is black

أعتقد مشرفنا نحن قبل ان نوعي الناس بافساح المجال لمرور عربة الاسعاف علينا أن نثمن اللحظات الحرجة
الفاصلة بين الحياة والموت وهي العشر دقائق فأي اسعاف بالله سيحضر لانقاذ حياة مريض خلال تلك المدة
الزمنية في الغرب يثمنون الثواني وتنطلق طائرات الهليوكوبتر في لحظات لاسعاف المريض وانقاذه في نفس
موقعه حتى لاتفوته العشر الدقائق الحرجة
سيدي الفاضل انهم يحضرون لاسعاف المصاب بعد فوات الاوان وسواء افسحنا لهم المجال للعبور ام لا فالامر
سيان
تحياتي

[صديق كلم رفيق]

اسأل الله ان يرحم ابنك ويعوضه بالجنه ويكون شفيعا لوالديه .

[التعـ King ـديل]

اخوي ضباب الله يرحم ابنك ويغفر له ويجعله شفيع لوالديه

طبعا قبل كل شي هذا قدر ومكتوب ويومه ،، ولكن تقول حتى لو افسحنا لهم الخط المشكله ليست في افساح الخط او وصولهم متاخرين المشكله تكمن في الدقرش اللي وراه يسببون حوادث اخرى الله يصلحهم

[كم كيلو باقي]

الله يرحم أبنك يا ضباب ويجعله شفيع لكم
والله يبيض وجهك ياكنق موضوع مميز مثل صاحبه

[abu-turki2009]

تصدقون ديم أشوفهم خلف الاسعاف مسرعين. توقعتهم من قرايب المصاب

[digital99]

لكن السؤال؟
اذا الاسعاف او الدفاع المدني خلفك
وساهر امامك (( في الاشارة ))
يابطل وش بتسوي...

[التعـ King ـديل]

لكن السؤال؟
اذا الاسعاف او الدفاع المدني خلفك
وساهر امامك (( في الاشارة ))
يابطل وش بتسوي...


اذا انت اول سياره افتح له واذا جاتك مخالفه راجع المرور واطلب منهم الغائها ،، وتكون كسبت اجر انقاذ حياه مصاب ،، ان لم يلغوها احتسبها لوجه الله فيمن ظلمك

وبكل الحالتين انت كسبت الاجر ان شاء الله

[بيك اب 4X4]

في الخارج فيه نظام مكتوب و يدرسونه لكل من يطلب رخصة
و بعدين في اختبار نظري و عملي مع مدرب
و فيه شرطه تطبق القانون على المخالفين
و من اهم القوانين انه يجب التوقف التام على جانب الطريق عند مشاهدة سيارة الإسعاف او الإطفاء

في المقابل تجد عندنا النظام مبهم و كل عسكري يفتي من رأسه
الدراسة عشان تطلع رخصه
1- تحفظ ورقة فيها كم اشارة مرورية غير موجودة في اغلب الشوارع
2- اختبار عملي و هو عبارة عن اختبار ( التلبيقة )
3- لا وجود للمرور لتطبيق النظام إلا على التظليل
4- مخالفات السرعة و قطع بعض الإشارات عند ساهر

الزبده بدون توعية الناس ثم تطبيق النظام على المخالفين و عدم استثناء اللي عندهم واسطه
ما بيعتدل الحال
و الحين حتى الأجانب صاروا هم اللي يخالفون
و لنا في الدول المجاورة قدوه مثل الإمارات
ليه عندهم الواحد يمشي سيده و المخالفين قليل جداً ؟

[التعـ King ـديل]

في الخارج فيه نظام مكتوب و يدرسونه لكل من يطلب رخصة
و بعدين في اختبار نظري و عملي مع مدرب
و فيه شرطه تطبق القانون على المخالفين
و من اهم القوانين انه يجب التوقف التام على جانب الطريق عند مشاهدة سيارة الإسعاف او الإطفاء

في المقابل تجد عندنا النظام مبهم و كل عسكري يفتي من رأسه
الدراسة عشان تطلع رخصه
1- تحفظ ورقة فيها كم اشارة مرورية غير موجودة في اغلب الشوارع
2- اختبار عملي و هو عبارة عن اختبار ( التلبيقة )
3- لا وجود للمرور لتطبيق النظام إلا على التظليل
4- مخالفات السرعة و قطع بعض الإشارات عند ساهر

الزبده بدون توعية الناس ثم تطبيق النظام على المخالفين و عدم استثناء اللي عندهم واسطه
ما بيعتدل الحال
و الحين حتى الأجانب صاروا هم اللي يخالفون
و لنا في الدول المجاورة قدوه مثل الإمارات
ليه عندهم الواحد يمشي سيده و المخالفين قليل جداً ؟


الحين الدراسه شهر بس مدري وش يسوون لذلك مااقدر اتناقش معك

بالنسبه للامارات اقولك شغله هل تعلم وانت داخل الامارات لين تطلع من بوابه الامارات جميع الشاحنات ملتزمه بالنظام ويمشي بركاده ولا يسقط ولا يسوي اي مخالفه بس من يطلع من بوابه الامارات تقل راكبه جني يتجاوز ويطير ويحد ويقفل الشارع ومره اضطريت اعكس الطريق علشان امشي مسكرين الشارع التريلات طبعا هذا كله قبل يدخلون السعوديه الابداع وين يكون بعد مايدخلون السعوديه تلاقيهم يتجاوزون ويطيرون بالخط وعادي تمشي 150 والطريق مفتوح قدامك وفجاه تلاقي التريله داخل عليك بالخط وتلاقي نفسك بالردميه

[أنصر نبيك]

الاخوة الكرام
صديق كلم رفيق
مشرفنا الغالي
كم كيلو باقي

اللهم آمين الله يجزاكم الخير ولا يريكم مكروه أبداً

[غار بن شعلان]

ياكثرها ياخوي هالتصرفات الشينه والله السواقه عندنا تحتضر كل واحد يحسب الخط ملك له

هالتصرف الي يلحق له سياره اسعاف عندي اهون مليون مره من الي يجيك يمشي بوسط الخط مهدي والسياره تلعب يمين ويسار

وتكبس له ولادرى عنك واذا سقطت عليه لقيته ماسك الجوال ويكتب ياجعل يدياته الشلل

صار لي موقف قبل شهر تقريبا مع اني رجال في حالي ولالي بالمشاكل والله لكن عجزت امسك اعصابي ذاك الوقت الي

هو نفس الموقف الي قلته فوق يمشي ومعطل السير عشان يسولف بالبيبي ولافتح الخط حديته ووقفته وخذ المقسوم جلدته

وكسرت جواله لاشعوريا اشهد بالله الله يغفر لنا بس لكن ماهقوتي عقبه يطلع جواله من البيت

لازم يتغيير نظام المرور ويرجعون يعلمون من اول وجديد انظمه المرور حتى الي معهم رخص يرجعونهم يدرسون تعبنا والله

صرت اكره اطلع اوقات الذروه والسبه هالعينات الي تمرض الواحد الله يمرضهم

[خوي السطحه]

المشكله لما تكون واقف عند اشاره وفيها كمرات ساهرويجي سيارة الااسعاف وراك ماذا تعمل تقطع الاشاره ويصورك ساهر وتتحمل غرامه ويمكن الحاله حرجه او بسيطه اما تقف ولاتدع سيارة الاسعاف تمر حتى تفتح الاشاره وتشغلك الناس بالبوري وصوت الاسعاف

[ابومحمد 808]

كل ما قلة ثقافة قيادة المركبة ينتج عنه اخطاء و مخالفات مرورية!!!

[التعـ King ـديل]

المشكله لما تكون واقف عند اشاره وفيها كمرات ساهرويجي سيارة الااسعاف وراك ماذا تعمل تقطع الاشاره ويصورك ساهر وتتحمل غرامه ويمكن الحاله حرجه او بسيطه اما تقف ولاتدع سيارة الاسعاف تمر حتى تفتح الاشاره وتشغلك الناس بالبوري وصوت الاسعاف


انا عن نفسي بفتح الطريق لسياره الاسعاف وحتى لو رفضت اداره المرور اسقاط المخالفه لاني بهالتصرف ممكن انقذ حياه انسان ماله ذنب يموت بسبب تحجر اداره المرور ،، ان اسقطو المخالفه خير وبركه وان مااسقطوها دفعه بلا عني وعن اهلي وبذمتهم ليوم القيامه

[Abunorh]

السلام عليكم

صادق يا صاحبي بس
فيه مدرس على ايام الثانويه قال طريق الملك فهد مكتوب عليه قاعده مانشوفها في باطن العقل
إن لم تكن ذئباً أكلتك الذئاب يعني لو تهدي انت كل العالم مسرعه انت واحد منت مغير شيء

[الرقم]

صح لسانك وكثر الله من أمثالك ياصاحب الموضوع
أنا اشتغل فالإسعاف ودائماً يدي على قلبي من المطافيق اللي يلحمون ورى الإسعاف
للمعلوميه يوجد داخل كابينة الإسعاف من الجهه الخلفيه إسطوانة أوكسيجين سعة ٢٠٠٠لتر يعني قنبله موقوته الله يكفيناواياكم الشر

[التعـ King ـديل]

صح لسانك وكثر الله من أمثالك ياصاحب الموضوع
أنا اشتغل فالإسعاف ودائماً يدي على قلبي من المطافيق اللي يلحمون ورى الإسعاف
للمعلوميه يوجد داخل كابينة الإسعاف من الجهه الخلفيه إسطوانة أوكسيجين سعة ٢٠٠٠لتر يعني قنبله موقوته الله يكفيناواياكم الشر




الله يكون بعونك ويعطيك على قد نيتك ،، انت تنقذ ارواح بشر بعد الله سبحانة

[hgaughk]

أعرف على نفسي شخص يقرأ الموضيع ولا يرد بتاتاً ، ولكن بعد الموضوع هذا رديت لأني أحس أنه في الصميم جدا ، وأشكر صاحب الموضع وأقول له جزاك الله خير وفيه واحد رد على الموضوع يدعي على الناس "أدعوله بالهداية" وراعي الأسعاف ماشاء الله عليك وضحت شيء خفي عنى خاص القنبلة

هناك قاعدة سرية يجهلها الكثير
عندما تعصي الله يسلط الله عليك "ومنها كل شيء تكرهه | "