شوري في ذمتكم يالنشاماا

[راع البل 999]

مسااكم الله بالخير يالربع

اما بعد.........

يا اخواني انا راعي مقانيص وراعي كشتات وبر وابل وابا اشري شاص لاكن؟؟؟؟؟

اخذ 8 ريش ولا 11ريشه
سالت اكثر من شخص وكل شخص له راي واحترمه
وقريت مواظيع في الانترنت بخصوص هذاا الشان ناس تمدح ال8ريش وتقول اريح وناس تمدح ال11 وتقول يتحمل و ونا احترت وتقروشت
والمطلوووب...
هو
انه تكفوون يالربع عطوني العلم الوكاد لاتروح دراهمي خساره اخذلي واحد من هاذي الاثنين ومايطلع عملي
واتورط
بالمختصرررر
ابيه لك وللزمن ابي اكدده مقانيص وكشتات
تكفوون
والباقي عليكم عطوني العلم الي يجمد على الشارب
ارجو اني ما طولت عليكم
وسلامتكم

[راع البل 999]

45مشاهد ولارد واحد
لايكون اني اخطيت الهدف؟؟؟؟

[بلاكوتا]

السلام عليكم

ماوضحت بالعنوان إنك بتستفسر عن الشاص

وإلا الخبراء بالشاص واجد

إلا أني ما أعرف الشاص وماعمري أمتلكته ولا إستخدمته

ولافهمت المقصود بالريش

قريت فزعه قلت نقوم باللي نقدر عليه

والله يسهل لك الإختيار الزين ويبارك لك فيه ويطعمك من خيره ويكفيك شره

لكن لقيت نفس إستفسارك هذا بموقع آخر

ونسخت لك الرد الوافي

الشاص ا8 ماهو للحمل يشيل لان مايشيل شي كثير فقط لراحه فقط
اما ال11عطي الله فهو للحمل الثقيل ومطبه قوي وحساس حيل يعني لو اي شي
يحس عليه الموتر
الفرق بينها ال11 ريش يجي فيه عاامود توازن خلفي تحت الدفرنش
والياي يجي مقفل ولفتحه ضيقه بين طويات الياي
__________________________________
ا8 ريش يجي مافيه عامود توازن خلفي وياي مفتوح
والحين صار ينزل 8 ريش برفارف وبدون رفرف
العيوب ا8 ماشوف به عيب الاانه اذا مشى على الخط يرتفع من قدااام وينطحه الهواى اذا انت مسرع
عكس ال 11يكون خشمه ماسك الارض اذا حملت به اوشلت حمل ثقيل يتواسى اما اذا فاضي يكون مرتفع من الخلف
اما من ناحيت العيوب فا ال 11 مابه عيب الاممشاه حساس بلحيل ونا من هناحيه ماشوفه عيب الان الموتر موتر حمل ثقيل
والمواصفات الشاص كله يجي ثلاث درجات الاولى. قزاز كهرب ونش ودفلك والمرايات كهرب وثلاجه من بعد مديل 2013./ ادرجه الثانيه قزاز كهرب والمرايه كهرب والفطيمياو الخليجي يجي به دفلك بدون ونش. اما الدرجه الثالثه ولاخيره الي هي القزاز هندل ومرايات عادي وعداد سرعه بدون عداد ضغط
المواصفات هاذي تنزل بشاص كله سوى رفارف او بدون
وشگرآآ

[نايس × كول]

خذ شاص نيسان ماكينه 4800 فتك ومريه وافخم وحلو وسعره 100 الف والشاص التويوتا 160 خذ 60 الف وحدها في نيسان سنترا كيدا اكذت سيارتين بسعر سياره

[التعـ King ـديل]

قبل تشتري الشاص التويوتا خذ تامين طبي من شركه بوبا

والله يعين ظهرك بيتكسر من المناقز والقساوه اللي فيه ،، نصيحتي لك شاص نيسان وعن تجربه موتر مابعده موتر

على فكره انا مجرب الاثنين وموتري الحين تويوتا

[راع البل 999]

بيض الله وجيهكم ولاهنتم
لاكن تراني ماهمني الراحه ولاشي

اهم شي انه يكون مثل الحرباء ام سبعة الوان ان بغيته للبر وكشتات فهو راعيهاا ,ون بغيته للمقانيص فهو راعيهاا مثل ماتخبر الوحد منا في ذا الزمان متولع بالبر والمقانيص ونا دخيل اهل مكشات وذا الخيمه
شدو حيولكم يالسناعيس واعطوني بيت القصيد

ولي بيعطيني العلم الي مايخرره المااا اباخذه معي مقناص ولا كشته هو يامر بس وحنا تحت امره ههههه

[صديق كلم رفيق]

موتري شاص 2011 11ريشه . مطبه عذاب . انصحك نصيحه تأخذ ابو رفرف حسب اللي استخدموه يقولون مطبه مقارب لمطب الجكسار .

وان كانك تقول ابو رفرف شكله قبيح خذ سلق ثمان ريش وهذي وردها البريمي والفطيم .

[ابو عطر]

مرحباً

مبروك مقدماً .. أستخر الله أول وأخر .. ورائيي ب11ريشه ان بغيته 11 ولا تقدر تشيل 3 ويصر 8 ريش .

[راع البل 999]

بيض الله وجيهكم

وننتظر اهل الخبره والمعرفه

لاكن اخوي صديق كلم رفيق

هل ال8ريش يكد ويتحمل الكرف وفالبر يمشي ولا بيغرز وتعلقه الرمله والسبب انه 8 ريش مرتخي مهوب مثل ال11 ريشه مرتفع ؟؟؟؟

[Al Rasee]

الشاص للتحميل مو للكشتات والمطامر خذلك موتر اريح منه وايضا اوسع وبالتوفيق

[Al Rasee]

بيض الله وجيهكم

وننتظر اهل الخبره والمعرفه

لاكن اخوي صديق كلم رفيق

هل ال8ريش يكد ويتحمل الكرف وفالبر يمشي ولا بيغرز وتعلقه الرمله والسبب انه 8 ريش مرتخي مهوب مثل ال11 ريشه مرتفع ؟؟؟؟

حياك الله .. السست مالها دخل باي شي سوى التحميل فيقط

[راع البل 999]

حياك الله .. السست مالها دخل باي شي سوى التحميل فيقط

هلابك اخوي وشلون السست مالهاا دخل ؟؟
الناس تركب سست استرالي علشان مايطيح الموتر فالبر
وفوق كذا بعضهم يرفع الموتر
\\\ وتقولي السست مالهاا دخل\\\\

ونا اقولك من هذا المنطلق ان الموتر الواطي والله ليتعبك فالبر يغرز من اول مايطب الرمله وتعلقه عروق الرمله وبعدهاا الله؟؟؟؟؟؟؟!!!!! اله يخلف علي وعلاك ههه

لاكن الي ابغا اوصله الشاص ابو 8 ريش هل هو \\\مرونته ولياقته فالبر\\\ مثل ابو 11 ريشه يعني

[نايس × كول]

مالك الا شاص نيسان فخامه وقوه ماكينه وشكل احل ومرييييييح

[دقات قلبي]

بالفعل النيسان الافضل+ قوة



سعودي انحراف (http://www.saudi7r.com/)

[راع البل 999]

بيض الله وجيهكم و لاهنتم لاكن التويوتا مامثله ابد
ونا قررت اخذ شاص تويوتا موديل 2013الي خطوطه مثل الخط العريض مهوب خطوط الدمعه لان 2013 نزل القطري والفطيمي خطهم واحد والبريمي نزل بخطوط يسمونهاا الدمعه

لاكن المشكله اني مريت المعارض في الرياض في النسيم المتخصصه في تويوتا الربع والشاص الخ.....
ومالقيت 11 ريشه خطوط عريض مثل ماذكرت سابقاا واب ونش ودفلوك كل الي فيها ونش ودفلوك خطوطه الدمعه \لاكن تفضل الله علي ولقيت شاص ابو 8 ريش 2013خط عريض فل كامل بس ان التعشيق ماهوب مخشب ويقولي راع المعرض انه فطيمي

السؤال والمغزا وبيت القصيد هل ؟؟؟؟؟؟؟؟؟

\\\ هل وارد الفطيمي زين \\\
ارجو اني ماطولت عليكم وسلامتكم

[راع البل 999]

سبحان الله وبحمدك ,,سبحان الله العظيم

[راع البل 999]

يالربع تراني مانيب بعيد عن مشتراه

لاكن عطوني العلم الوكاد الفطيمي زين ولا ماهوب زين ؟؟؟؟؟؟؟

[شاق النفد]

اول شي استغرب من اللي كل ما احد نشد عن الشاص طمرو وقالو خذلك نيسان خذلك نيسان هههههههههه
يكفيك ان الاشهب فيه طرمبتين بنزين في كل تانكي وحده هذا غير شكله وداخليته وونشه وركزته وهيبته
وانا اخوك ابعطيك العلم
معي بريمي 2012 11سسته ويايه 11لفة مقفولة
يصلح للي يظرب العرق ظرب سيده لان وجهه مايتحرك ويصلح لراعي الحمول الثقيلة
ابو8سست ويايه 8لفات مفتوحة سوا رفرف او السلق
تراه اريح ويحمل المطلوب لاكن في في ظرب العرق مهوب مثل ابو11سسته
وكلها مبروكه والله

[شقن بقا]

سلام على الجميع وعسى ردي ماهو متأخر شف يخوي ياراع البل مع إحترامي لشخص ورأي كل من شارك في الرد أبعطيك العلم إللي يجمد عليه الشارب ولا تزعل ولا يتكدر خاطرك ولا خواطر المشاركين القرار هذا قرارك إنت بروحك ماحد يقدر يقرر لك الشي إللي يصلح لك لأنهم مايعرفون ظروفك المادية ولا الصحية والدعوى مطامر وطرد وطلوع ضلعان ومن هالمشاكل إللي الله أبتلانا فيها وفوق ذا كله ترى ما يمدح السوق إلا من ربح فيه وأيضا إرضاء الناس غاية لا تدرك وكل واحد يدلك على الشي إللي هو مرتاح له لأنه من واقع تجربة وبعدين تراك منت مقصر لو دليتك على شي ومدحته إلين طلعته السما وإنت إقتنعت فيه وشريته وبعد ما جربته ماجاز لك وش بتقول ساعتها أقل شي بتقول ( وهقنا الله يهديه ) عشان كذا خذ من الناس تجاربها في الأنواع إللي لك نظر فيها وبعدها إستخير الله ثم توكل عليه وإشتر إللي يدبرك عليه الله والمثل يقول ( شاور أكبر منك وشاور أصغر منك ثم إرجع لعقلك ) هذي نصيحتي ولو طولت عليكم سامحوني

[راع البل 999]

سلام على الجميع وعسى ردي ماهو متأخر شف يخوي ياراع البل مع إحترامي لشخص ورأي كل من شارك في الرد أبعطيك العلم إللي يجمد عليه الشارب ولا تزعل ولا يتكدر خاطرك ولا خواطر المشاركين القرار هذا قرارك إنت بروحك ماحد يقدر يقرر لك الشي إللي يصلح لك لأنهم مايعرفون ظروفك المادية ولا الصحية والدعوى مطامر وطرد وطلوع ضلعان ومن هالمشاكل إللي الله أبتلانا فيها وفوق ذا كله ترى ما يمدح السوق إلا من ربح فيه وأيضا إرضاء الناس غاية لا تدرك وكل واحد يدلك على الشي إللي هو مرتاح له لأنه من واقع تجربة وبعدين تراك منت مقصر لو دليتك على شي ومدحته إلين طلعته السما وإنت إقتنعت فيه وشريته وبعد ما جربته ماجاز لك وش بتقول ساعتها أقل شي بتقول ( وهقنا الله يهديه ) عشان كذا خذ من الناس تجاربها في الأنواع إللي لك نظر فيها وبعدها إستخير الله ثم توكل عليه وإشتر إللي يدبرك عليه الله والمثل يقول ( شاور أكبر منك وشاور أصغر منك ثم إرجع لعقلك ) هذي نصيحتي ولو طولت عليكم سامحوني

بيض الله وجهك كفيت وفيت وماقصرت اشهد بالله ان كلامك صواااب

لاكن المثل على قولت هل الخير \\\ من استشار ماخاب \\\
ونا ابيهم يعلموني حاجتين فقط

هي؟؟؟

اخذ 11 سسته ولا 8 سست

والفطيمي زين ولا مهوب زين

[شقن بقا]

الله يختار لك إللي فيه الخير

[sgl2002]

انا امتلكته مرتين بو ثمان ريش

للتحميل القوي جدا ماينفع يربض بالارض

وترى الراحه ماهنا راحه ابد ابد والله انها ماتكمل معي ٤ شهور الا وبايعه

يعوفك الطلعه والمشوار البعيدد
مع اني سحبت منه سست لكن غير مريح ويطفشك

يازينه وهو واقف لكن ان ركبته كرهته

لكن تبي ادلك محل يأجر شاص في الريااض ابشر

[سرحان الوعرة]

ياخوي انا معي شاص 2010 بريمي 8 ريش
كل من ركبه من راعين الشواص مدحه ومدح راحته
وكل راعي 11 ريشه متوذي منه واذا على التحميل كلهن يتحملن
وبالنسبه لي مركب له لعابات طوال للسست ورفعته من ورى اكثر من رفه ابو 11 ريشه
ويتحمل كل شي
واريح مطب ان بغيت خط ولا بر من تجربتي ونظرتي انا انصحك باابو 8 ريش
وعليك بكفرات البالون ماكسس900:good2::good2:

[راع البل 999]

الله يبيض وجيهكم كلن بسمه
ولاهنتم يا قرووم

[بومالك]

1 - هلا بك اخوي ترى الفطيمي مايجي له مساكه للراكب الي فوق الدرج وداخليه رمادي بالغالب

2 - 8 ريش اوفق بس ابورفرف للشيبان والسلق ابو كفر سخيف وقفته بايخه نازل من ورى وانتبه تطول اللعب من تجربه يقعد

الموتر يروج مع اللفات .

3- وتراه غير صالح لركوب الأهل راح يكرهونك بالموتر

[راع البل 999]

مشكور وماقصرت يا بومالك
لاكن ابسئلك هل 8 ريش ينفع للبر يعني الي بيروح الدهنا والرمله ماعليه خوف؟؟؟؟؟

[بومالك]

هلا بك اخوي

بالعكس 8 ريش هو المخصص للرحلات البريه اريح ولايتعلق بسهوله مثل 11 ريشه . لمرونته خاصة وان الياي حقه مفتوح

زي الربع . عكس 11 مضغوط

[مافيه]

خذ العلم اللي يجمد على الشارب من رجال مجرب

موتري 2011 فل كامل بدون رفرف 11 ريشه وماشريته الا اني ماقبلت الرفرف خير شر

اول ماشريته غثني بمطامره ومطبه لدرجة اني انتبه للحفر و البطانيج اكثر من السيارات اللي قدامي وركبت له تانكي حول ال300 لتر ومعبيه كامل كانه لان شوي لاكن المطب هوهو ماتغير ولا ارتاح الا لامني حملت الموتر

كتب الله علي وسحبت 3 ريش ((ولو الرابعه سمحت كان سحبتها))

الصدق اني مرتااااااااح عقب التسحيب ولا فرق معي في التحميل واجد ((لاكن تراها تفرق من رجال لرجال حسب تحميلك)) ولامني عبيت التانكي والحوض فاضي تقول اقرب ماله هايلكس غمارتين او اخف مطب

عن نفسي اغلب تحميلي 30 كيس شعير او 4 قعدان او عزب ومعاميل البر او جراكل ماء 4 من الزرق مليانه مع التانكي

تزود بعض الاحيان او تنقص خص بعد التسحيب
والحمد لله مرتاح واسافر عليه وامس به خطوط والحوض فاضي بدون مشاكل وماعمره خيبني او ردني عن شي بعد التسحيب ولي حول السنه ونص او ازود

انت شف وش اغلب تحميلك كانك حولي منتب بعيد عليك بابو 8 ريش وكانك رجال راعي جلد وترص الموتر واغلب الوقت تحمل عليه لاتتعدى ابو11 ريشه
وانت شف وش استعمالك وقرر وش انت تبي تشري

ودامك تنشد عن الممشى في البر الدهنا عليك خوف فيها ان شاء الله وتقطعها سهالات

لاكن الرملة كانك من اهل المقانيص اللي يركب توانكي الماء ودبلها بنزيم وترص الحوض عفش من اوله لاخره اقول عليك بابو 11 ريشه

[راع البل 999]

لاهنت اخوي
والله يبيض وجهك

[راعي سهوه]

والله الظاهر انك منتب شاري بس حب استطﻻع هذا ثاني موضوع لك وفي منتدى مزاين لك موضوع ياخوي اشتر ابو11 سسته وان ماجاز لك بعه واشتر ابو رفرف تراك منتب بلشان ببيعتها سوقها ماشي كلها

[راع البل 999]

والله الظاهر انك منتب شاري بس حب استطﻻع هذا ثاني موضوع لك وفي منتدى مزاين لك موضوع ياخوي اشتر ابو11 سسته وان ماجاز لك بعه واشتر ابو رفرف تراك منتب بلشان ببيعتها سوقها ماشي كلها
على شحم وهرجك لايكثر وناخوك والشي الثاني هو انك \\ اتخساا و اتعقب \\ انا ماكتبت موظوعي الا في مكشات

[راعي سهوه]

http://www.mekshat.com/vb/showthread.php?t=596738


http://www.mzayan.com/vb/showthread.php?t=53896


ادخلو االراابط