استشارتين بخصوص الجمس قطع 10

[escape_man]

سلام عليكم وكل عام وانتم بخير وتقبل الله منا ومنكم صالح الاعمال

ودعنا رمضان ومعه ودعنا خيمة البيع والشراء بعد ان وفقنا الله وشريت

جمس قطع عشره. المهم يا اخواني انا ملاحظ عليه ميلان بالصندوق او

بالغماره. صعب اني اميز ونزلت وشيكت ولا لقيت اي شيء ولله الحمد بالشاص

والصندوق راكب على الشاص مباشرة, يعني مافي ميزانيات تقول باوزنهن.

الزبده مادري اذا احد يعرفلنا ورشة توزن البدي على الشاص لان قطع عشره

حساس من هالناحية ولا ودي احد يتعبث بوزنيته. وايضا يرفعلي قفا الموتر

ويزودلي كم سسته.


ابي ورشة لها باع وخبره بهالمسئلة.

ثانيا وهالشغله ابيها من الزقرت والي يطربهم صوت الشكامين. الي بالونيت كناديس

عاديه ومحتار اركب دبات رياضية او اني اركب مفرغه ( الي تجي فاضيه ) ابي

صوت يطرب الشايب وهو بالصاله.

فزعتكم يالنشاما ولا ترى باشيل عليه جح واجرح كبرياء قطع 10.

اخوكم ابو المثنى

[escape_man]

للرفععععععععععع

[العزوم]

وعليكم السلام ورحمة الله وبركاته
اولا/ مبروك الموتر بس لازم تغير التوقيع
ثانيا / اذا كان الميلان قصدك الصنوق عن الغماره فهي احد امرين1- ان الصندوق نفسه منفتل 2- السست في احد الجوانب غير موزونه مع الاخرى او الكفرات حجمها مختلف
ثالثا / ابوصف لك ورشه متخصصه بالشغلات هذي ويوزن لك الصندوق المسطره وعنده عامل ماشاء الله ابكم واصنج ولايجيد الا ضرب المرزبه (يماني) والمعلم حضرمي شايب وخبري فيه من ايام ازمة الخليج
رابعا / الوصف واضح بداية شارع الجمعيه من غرب وانت نازل من طريق الخرج شمال قبل الدوار بجوار البنك البريطاني سابقا تلف يمين مع الجمعيه اول تقاطع على يدك اليمين محلات السبيعي لقطع الغيار امريكي تشوف الورشه على يسارك مقابلتهم في الزاوية الشماليه وبالنسبه للصوت اذا لك طربه في صوت الوانيتات القديمه يرهمون لها دبة غاز الفريون عند اهل الشكمانات بس يطلع صوتها عالي
تحياتي

[escape_man]

هلا وغلا بك يالعزوم

ولو داري انك بتدخل مشاركتي كان حطيتها من زمان . مشكلة الونيت انه حساس ويبين فيه الميلان بوضوح وانا ناوي فعلا اشقله وازود السست. باوديه لهالحضرمي على شورك وهو يتصرف. وعنديلك شور يالعزوم ,,, خل عنك البليزرات ودورلك ونيت . الفرق واضح
في الخف والنشاط.

حفظك الله اخوي الغالي ولاحرمك الله الاجر.