أبحث عن قصيدة ونبي منكم مساعدة يا إخواني

[قصر عيدان]

بسم الله الرحمن الرحيم

إخواني الاعزاء السلام عليكم ورحمة الله وبركاته

في قصيدة عجزت القاها ع النت .. وهذه القصيدة كانت تطلع في قناة الواحـة قديما وهي خاصة بالمقناص ...وكانوا يجيبوا في مقاطع صيد بالصور ومعاها القصيدة كان يقول فيها واحد من الناس اللي كانوا قانصين في نفس الفيديو ... اذكر منها بعض الكلمات ..

مثل

يا محلا لازوح القيض وانزاااح

وماعاد نبيه يطرد حمامة وتلواح ... الخ الخ

سامحوني والله ماني حافظها ولا اعرف عنوانها بس ياليت حد يفيدني

وجزاكم الله خير

[ابو اسامه 2]

وعليكم السلام ورحمة الله وبركاته

حصلت لك هذي مدري هي او لا

قصيدة الشاعر / شبيب بن عرار النعيمي في المقناص





ياهل الطيـور مبعديـن المراويـح= ياللـي لكـم فالبـر والصيـد راده
سهيـل بيّـن وأرزمـن المراويـح= والنود عقب القيض ذعـذع بـراده
والجو زان وزان وقـت المساريـح= وكل (ن) يجهـز يانشـامـا عـتـاده
من فوق مايدنـي بعيـد المشاويـح= طرزه جديد ومركب أهـل السيـاده
من مصنعه صمم لبوج الصحاصيـح= ومن مصدره صدر ومعـه اعتمـاده
شفي اليا انحـن النجـوم المدابيـح= اليـا اهتنـى للنـوم راس الربـاده
تله على خط (ن) تعاوى بـه الريـح= مسراه طـول اللـيل مامـن هـواده
ينصى الفياض اللي بها زايف الشيح= قفر (ن) عليها الوسـم هـل القـلاده
فيها الزهر يلعب معا الريح ويريـح= والورق تسجع فوق غصـن الكـداده
والربد فيهـا ممسيـات ومصابيـح= تـدارجـن بشعابـهـا والحـمـاده
ومعنا الحرار الصارمات المشافيـح= اللي لهن صيـد المخاريـش عـاده
كل اشقر (ن) بالفعـل كنـه شلويـح= عوق العنيـد اللـي تزايـد عنـاده
أشقر نحر ماخذ مـن الثلـج تلميـح= كن البياض بقحف راسـه ضمـاده
صافي ظهر وموضح الريش توضيح= لون البـرد لونـه ويكشـف زيـاده
طوله بعرضـه والمناكـب مشابيـح= متقلـط الثنـداه كنـهـا الـوسـاده
ومنسر جليل (ن) والمناسم مطافيـح= وعين (ن) بها جمر (ن) تزايد وقـاده
كنه الى اطلع وانتهض عقب تمريـح= عنق الحنيش اللـي يهـاوز جـراده
كن وفقته رجلن على الجمـه يميـح= ضافي شليـل وجـل ساقـه سنـاده
هو السنـد يـوم الهـدد والتماديـح= طير السعد يـوم اللـزز والجـلاده
لاجا نهار (ن) فيـه للفعـل ترجيـح= ياهل الطيور القـول يبغـي وكـاده
الخرب قـدم عيونكـم يالزحازيـح= روح يضف الريش جـل اجتهـاده
تسعة طيور (ن) عندكم روّحت ميـح= مافيهـن اللـي يستحـق الاشــاده
من عقبها قالـوا معـاك التصاريـح= قلت ألزمو والخرب جالـه صمـاده
ظهر ومتنه يلفـح الريـش تلفيـح= يرمـع بمتـن (ن) ماتجيـه البـراده
اللي يشوف الخرب قـال التفاريـح= واللي يشوف الطيـر هـل الشهـاده
الطير وصل الخرب مافيـه تبريـح= شكـه براسـه وابشـرو بالسعـاده
من فوق متن الغيم جابه على الضيح= ( كنه مضلي في حـروب الابـاده
أنا أشهد انه يشـرح البـال ويريـح= يوم الهـدد والقـول يبغـى وكـاده

[قصر عيدان]

تسلم يا غالي ... بس مو هاذي القصيدة ..

القصيدة كانت تجي في قناة الواحة ..

وبدايتها " يا محلا لا زوح القيض و إنزاح "

وهي تتكلم عن بداية موسم المقنااااص

اجمل قصيدة أسمعها ولي معها ذكريات جميلة