المساعد الشخصي الرقمي

مشاهدة النسخة كاملة : ما الحل مع نيسان بيك أب دفرنس واحد


أبو خلف
25/10/2006, 01:38 PM
لقتراحك أهمية كبيرة



ما الحل مع نيسان بيك أب دفرنس واحد لتكون أفضل وما تغرز على طول في النفود؟؟؟


أنا في أنتظار أبداعكم وأرئكم........
المربد
25/10/2006, 01:45 PM
الـــتـــــــنــــــســــــــــــــــــيــــــــــ م !!
أبو أسامة
26/10/2006, 01:02 AM
السلام عليكم ورحمة الله وبركاته

أخي الكريم :


إذا كانت بخاخ فإن شاء الله ما يبيلها إلا شيء بسيط .......

مروحه كهربائيه ........ عشان تروح حنة المكينه ويزين العزم وتقل الصرفيه طبعاً بشكل بسط ...
........
إذا بغيت أن العزم يصير أحسن ببعيد يبيلك تغير حاجتين أول حاجه أنك تغير الكرونه في الدفرس بس لا توديها لأي واحد بعدين يعدم عليك الدفرس ويطلع منه أصوات مزعجه هذا إذا ما أنكسرت الكرونه الجديده لأن يبيلها وزنيه .........
والأمر الثاني وهو صعب لأنه لازم تسوي طلبيه على القطعه الثانيه وأنا أنصحك تنساه لأنه راح يكون سعره قرابة ال3000 ريال ..... بس صراحه راح يخلي موترك مجنون عزم ......... بس إذا ماعندك مشكله مع الـ3000 أقول ليش ماتزودها شوي وتركب تيربو........ وراح تزيد قوة الددسن وأكيد راح تاصل فوق الميتين وعشرة أحصنه ........

ملاحظه :إذا تبي تتمشى في النفود على الددسن إن شاء الله أنك منت مغرز حتى بدون التعديلات اللي ذكرتها لك سابقاً .... بس بشرط وهو أنك تركب كفرات أعرض من الوكالة وتخلي هواها على 15 وإذا غرز الموتر لا تدعس بعدين يحفر على طول أول ماتحس أنه بدأ يغرز أنزل ونسم الهواء على 10 وبأذن الله أنك ما عاد أنت مغرز بس إذا الهواء على عشره يمكن يحك أي شيء بالموتر لأنه صار واطي يعني لا جت ضربه بالسياره من تحت لا تدعي علي.....

مقاس الكفرات المفضل لدي على الددسن هو 225 /70/ 15

والسلام عليكم ورحمة الله وبركاته
خالد777
26/10/2006, 09:55 AM
تنسيم الكفرات ومسايسة النفود والركادة نوعا ما
(( ســـعود ))
26/10/2006, 12:09 PM
كفرات ضخمه كبيره وعريضه ويفضل إن كانت طلعاتك قليله تشري جنوط مع كفرات كبيره ولاتركبها الا إذا طلعت للبر شعيب أو نفود ... أما التنسيم على حسب إن كانت النفود ممطوره خل العيار على عشره وإن كنت بصيف أو هراده خل العيار على خمسه أو أقل بشرط تبعد عن السيوف لجل مايقرض اللستك إن كانت لساتك ولجل ماينسم الكفر إن كانت تيوبلس ,ولا تقشم الطعس بالوجه سايره ودور المطاليع السهله وإن كان عزم الموتر بثنين قوووي عادي لارقيت بثنين أما إن كان ردي ويرتخي بسرع خلك على واحد في الطلعات وأشحط بس لاتعدم الموتر هههههههههههه وإن شاء الله ماتغرز
بختصاااااااااااااااااااااااااااااااااااااااااااااا اااااااااااااااااااار كفرات كبيره وعريضه مع التنسيم
سلامتكم
rehaam88
26/10/2006, 11:01 PM
أول حاجه أنك تغير الكرونه في الدفرس بس لا توديها لأي واحد بعدين يعدم عليك الدفرس ويطلع منه أصوات مزعجه هذا إذا ما أنكسرت الكرونه الجديده لأن يبيلها وزنيه .........
وشلون تغير؟؟
أبو خلف
26/10/2006, 11:23 PM
شكراً لقتراحاتكم الجميلة والأكثر من رائعة

وننتظر أبداعكم المتجدد
أبو خلف
26/10/2006, 11:25 PM
شكراً لأبداعاتكم المتجدد والأكثر من رائعة

وننتظر الجديد والمبدع
أبو أسامة
27/10/2006, 05:44 AM
السلام عليكم ورحمة الله وبركاته

أخي الكريم :

ريهام 88 ...............

وشلون تغير الكرونه ؟

الجواب هو أنك تفتح قلب الدفرنس أو منطقة إلتقاء العكوس داخل الدفرنس مع عمود الكردان .......... طبعاً تجيلها مجموعة من المسامير في المنطقة الخلفيه منها لما تفك هذه المسامير راح تشوف الكرونه وكرونة الددسن قليله وسنونها عراض وذلك من أجل أن تكون عمليه وتعمر كثير ... فمن أجل عزم أفضل تكون السنون كثيره وليست عريضه يعني نحيفه أو ذات رؤس دقيقه........ فبعض الشباب يقوم بخرط الكرونه من أجل أن تصبح ذات أسنان كثير ونحيفه لكن ياكثر اللي تكسرت عليهم لأنها خرط...... ماهي صبة حديد حامي على قالب ذو أسنان نحيفه وكثيره ........ يعني ماهي شد بلد .......

فإذا بغيت الحل الأمثل يعني وين تحصل كرونه رياضية تركب على دفرس الددسن فأنا هنا أقولك أنتهت معرفتي يعيني ما أقدر أفيدك بشيء والله يكون بعونك وويفقك .......

والسلام عليكم و رحمة الله وبركاته
حايرالقلم
27/10/2006, 08:44 AM
السلام عليكم
ابوخلف انا اعطيك الحل النهائي تبي الصراحه ليتك ماخذ ددسن دفرنشين انا اشهد انه موتر واحد عند عيال عمي مركب له جنوط باث فندر موديل 2004 وتواير عراض والله والله انه موتر ولايفرق عن الدفرنش واحد شي وعلى الخط مافي احسن منه
عليك بالدفرنشين كانك تقدر وانا بروح بعد كم يوم باخذ لي وحده ددسن دفرنشين بغيتها خط قالت مشينا وبغيتها بر قالت مشينا
بارود العتيبي
28/10/2006, 02:10 AM
السلام عليكم
مروحه كهربائيه ........ عشان تروح حنة المكينه ويزين العزم وتقل الصرفيه طبعاً بشكل بسط ...
الاخ ابو أسامه لو سمحت سؤال المروحه وين القاها وشنو اسمها او حقت اي سياره ووين تركب وهل الغي المروحه الاساسيه يعني مروحة المكينه؟
أبو أسامة
28/10/2006, 05:18 PM
وعليكم السلام ورحمة الله وبركاته

المروحه هي مروحة السوبارو تركب ثنتين صغار بجانب بعضها البعض من الجهه الداخلية لرديتر يعيني تثبت على الراديتر من داخل وحده من ها المروحتين تشتغل على السلف والثانية لها حساس على كيفك يعني تبيها تشتغل إذا وصلت حرارة المكينه للنصف أو الربع أو ...........
أو تبي تحط لها فاصل يعني أنت اللي تشغلها متى تبي ولو أني أفضل أنك تخليها على حساس ويفضل أنك تخلي تمديدات الكهرب مستقله لكل مروحة على حده عشان لو كان في مشكلة في الكهرب ماتطفى عليك الثنتين مع بعض ........ ولا تنسى تركب معها كتوات .....

بالنسبه لخراب المروحه نادر بالذات إذا كانت يابانية أصلية .... لكن تعطلها دائماً إذا كانت أصلية بسؤ تمديد الكهرب ....... يعني أن شاء الله إذا أشتغل عليها كهربائي ممتاز ماعاد فيها مشكله إن شاء الله ........

مروحة المكينه راح تنفك علشان هي سبب الحنه ولو ما أنفكت ماراح تقدر تركب المراوح الكهربائية لأن المساحة ضيقة .......

والسلام عليكم ورحمة الله وبركاته........
rehaam88
29/10/2006, 12:31 AM
مشكور على الايضاح يابو اسامه ويخليك ربي
بارود العتيبي
29/10/2006, 05:08 AM
تعيش ابو اسامه والله يجزاك الخير
أبو خلف
29/10/2006, 01:21 PM
شكراً لأبداعاتكم المتجدد والأكثر من رائعة

وننتظر الجديد والمبدع