هل حراج السيارات الحكومية مجدية ومربحة سواء للمستخدم او للشريطي؟؟؟ [الأرشيف]

مشاهدة النسخة كاملة : هل حراج السيارات الحكومية مجدية ومربحة سواء للمستخدم او للشريطي؟؟؟

سلكي نت

09/12/2013, 06:43 PM

انا تورطت واشتريت سيارة مافيها صدمات بوديها نظيف جدا من حراج الدفاع المدني ،
السيارة مافيها صدماات ابدا لكن واقفه من فترة طويله تقريبا سنة الى سنتين .
وكان موديلها 2002 وقلت انها ما راح تكلف كثير وصراحة فرحت فيها كأنها لقطة مع اني مشتريها بسعر تقريبا ينقص قليل عن سعرها شغاله بالمعارض
المهم اني دفعت فيها حتى طفشت منها وبالاخير لم تضبط
غيرت فيها :
1-كفرات
2-رديتر
3-بطارية
4-جميع السيور
5-تنجيد داخلي كامل
6-زيوت كامله مع السيفون
7-اقمشه
8-خرط هوبات مع مسامير الكفرات بعضها مكسر
9-ليات زيت فرامل
10-بعض كليبرات الاقمشة
11-صلبان الاعمدة
12-صحن كلتش ودزق وفحمة
13-مروحة تبريد
14- طرمبة تبريد
15-مكينة قزاز الراكب
16-القزاز الامامي
17-ساعة الحرارة وساعة الزيت
18-اذرعة الدركسون واصلاح الدودة
19-اصلاح المكيف مع فريون
واصلاحات اخرى نسيتها من كثرتها
المهم اني طفشت وتبهذلت والسيارة مافيها عزم وحرارتها عالية وماتمشي ولا تقبل دعس وتدخن
وبالاخير طلع الراس مشعور لان السواقين اللي كانو يسوقونها مايكشفون على الماء ويشغلون المكيف لفترات طويلة
يعني :
20-راس مكينة مع الوجية كامله وصنفرت البلوف
هذا غير تكاليف الفحص والتامين وتجديد الاستمارة
يعني لو شريت من المعارض احسن اقل شي ارتاح من المشاوير للورشة ومحلات القطع والمخارط كل يوم
وبعد هذه الخسارة يالله ابيعها براس مالها اللي شريتها به من حراج الدفاع واقساط بعد مع ملف كامل بالفواتير:D

هل انا حظي كذا :looney: ؟؟؟ ام انها فعلا مقلب واكلته :mad:

ماجد الحايلي

09/12/2013, 07:34 PM

ياساتر والله معاناة
وسيارات الحكومة فعلا ياهو مقلب راح تاكله وانت غاص
او لقمه هنيه على قولتهم
اخوي اخذ باترول 92 من الجيش بـــ 9000 الاف ريال
وكلفه الى 15000الف تقريبا وباعه بــــ 21 الف تقريبا
يعني هي حظوظ بس على حسب ماسمعت هالحين
ان حراج السيارات الحكومية بالجملة تباع بس ماني متأكد

MAAMutlaq

10/12/2013, 05:05 AM

السلام عليكم ورحمة الله وبركاته .

الحراج الحكومي مربح ومفيد لكل من الشريطي والمستخدم بشرط :

أنك تعرف أحد من نفس الجهة الحكومية يدلّك على السيارة النظيفة .

أما أنك تشتري على عماك هنا المسألة أنت وحظك ( أغلب السيارات تكون مستهلكة ) .

تحياتي .

القرائن

10/12/2013, 08:37 AM

مشكلة مزاد الحكومه على حسب اللي بيشترون احيان تطيح في شي زين ورخيص واحيان يطيح في حلقك موتر تقول وين اللي بيشتريه بخساره.

شريت قبل اربع سنيين جيبين ربع باترول واحد ٩٤ والثاني ٩٦. من الحماية الفطريه. ٩٦ شريته بعناد في المزاود وخذته ان ما خانتني الذاكره ب ١٦٥٠٠. حصلته مخبط والشاصي منشعر والدفرنس الامامي فيه كسر. وحطيت فيه حدود ٩٠٠٠ وبعته نفسس طريقتك اقصاد بمكسب الف. والاقصاد كانت على دفعتين.
الثاني ياطويل العمر خذته ب ١٣٠٠٠, ما حطيت فيه الا كفرات والحمد لله بعته بمكسب لكن ما جاب لي خير بعد ما بعدته خبط مع اللي شراه.
العلم وانا اخوك انحش عن المزاد الا في حالة وحده وهي صعبه مره مره مره. انك تدخل المزاد مع اثنيين او ثلاثه وتتنقاء. وهذي ما صارت لي الا مره وحده وبالصدفه.

سلكي نت

10/12/2013, 02:28 PM

انا انسدت نفسي عن الحراجات الحكومية سواء السيارات الحكومية او المصادرات
صراحة اخاف ادخل بعدها اي مزاد
إلا اذا كان اقدر احضر للمزاد قبلها بكم يوم واحدد السيارات اللي بشتريها
واحاول اشغلها او اكشف عليها وبرضه الواحد خايف
لكن اعتقد انها توبه

غار بن شعلان

10/12/2013, 04:29 PM

المزادات سكر في مويه وبتاخذ مقالب فيها

وخذها قاعده المواتر الزينه خذوها الرجاجيل وسبقوك عليها الي يشتغلون بنفس الدائره وماهب مخلين الا الي منتهي

انا اشوف انه خساره ع الشريطي والمستخدم بتكون مربح لك ان خذته بملبغ زهيد مره وماعليه حط فيه لين يرجع ورده

موتت القلب اذا شريته بسعر النظيف ويطلع منتهى هنا البلا

سلكي نت

11/12/2013, 02:01 PM

فعلا كلام سليم
السيارات الصاحية الحية يدبرونها الرجال من بدري
وما يبقى غير المشاش
اخ بس

ابوعقيل81

11/12/2013, 03:27 PM

انا شريت كثير من مزادات لي وللاهل ولأخوياي
اهم شي انك تعرف سعر السيارة بالمعارض وتفحصها وتتوقع اسوء الإحتمالات .

اذا تبي تستخدم حلوة لكن في البيع صعب خصوصا اذا كان عليها شعار او استيكرات تضطر ترشها بوية جديدة.

ميزتها تجيك عداد حقيقي مو ملعوب فيه وصدماتها وخراباتها تشوفها بنفسك محد يخبيها عنك .
مكينة وقير أصلي مو موظب وحتى لو مخبطة انت توظبها بطريقة صحيحة مو تجيك موظبة بأرخص شي.

وفي منها جزء يكون نظيف مرة بس صار فيه عطل بسيط وماعرفو له او توقعو تكلفة عالية للاصلاح وتخزنت سنين ثم عملو عليها مزاد.

صمت الثواني

11/12/2013, 04:01 PM

عليك بالمزاد حق وزارة العدل غيره لااااااا

مكشاتي النماص

11/12/2013, 06:18 PM

من واقع خبرتي وبما اني بجهة حكومية ولدي بعض المعلومات عن الرجيع السيارات
الرجيع للسيارات التي تكلفت صيانتها مكلفة جدا ولا تصلح هذا بخصوص سيارات الداخلية

سقم المعادي 1

15/12/2013, 09:42 PM

المواتر الزينه تروح من تحت لتحت و لا يعرضون الا المترديه والنطيحه

و هالكلام مع شريطي في واحد من المعارض جلست وتقهويت معهم و سألت عن مواتر المزادات كان براسي اترزق الله من وراهن

و عطاني الزبده قال انه ياخذ المواتر من معارف و وساطات و يحط به كم قرش لين تعتدل وقفه الموتر وينزل به السوق يجيب له مكسب بما انه ممشاه قليل و ابد هذي شغلته يدور في السفاري والباترول ويشتري ويبيع بما انه مرغوب

يعني الشخص اللي مايعرف احد انس تلقى موتر لقطه الا في حالات نادره عاد

و شف مزادات الجمارك ترا فيها سيارات محجوزه بعضها ماتعدى عشر الاف ممشى و تنباع برخص شريت كابرس منهم و ترزقت الله فيه

hamad4499

16/12/2013, 02:15 AM

سيارات المزادات الربحان الوحيد هو الورش ومحلات قطع الغيار
نصيحه لوجه الله لو فيه خير ما كان نزل مزاد
ولو كان حظك تمام وشريت منها راجع الطبيب يمكن يجيك ضغط ولا سكر
انحشششششششش
��

أبو نقزه

16/12/2013, 04:04 AM

مثل هالبيع المفروض يرفض تمام

وانا اعتبره من الغش

لان الرؤوس الكبيره ياخذون الطيب والباقين يرمونه للمساكين ويشترون بدون فحص
وهناك قاعده طبقها مهما كانت الاسباب

لاتشتري موتر الا لمن تفحص وتجرب

لاتضيع فلوسك في شي مثل شختك بختك الفلوس جايه من تعب وشقى وحنا اصحاب الدخل المحدود اوضاعنا بالقوه نشيلها

فليه ارمي فهذا الموقف

ابو حلا العروي

16/12/2013, 02:12 PM