رأيكم في نيسان أكستييرا 2013 أوتوماتيك

[Arabian Penin]

http://img1.haraj.com.sa/userfiles30/2013-12-03/529e08ce12d68.jpg



السلام عليكم
أخواني الكرام
مقبل على شراء سيارة عن طريق البنك تكون دفع رباعي

حاجتي للسيارة هي
طلعات للبر كثيرة
وأيضا بحكم ان مقر عملي يبعد حوالي 80 كيلو اتردد يوميا

احترت كثيرا في أمر السيارات واستقر قراري على الاكستييرا
بسبب قوة هذا الجيب والكثير يمدحونه وايضا سعره مناسب 102 الف نص فل تماتيك سله و دعاسات وداخليه بيج عند معرض العمر بالرياض


السؤال وش رايكم بالموتر من ناحية الراحة
ابيه معقول يعني لا يكون مثل الشاص يكسر الظهر

وأيضا كيف رساوة الموتر وانسيابيته بالمنعطفات


هل يعاني من مشاكل او اعطال

كيف القير الأوتوماتيك في الجيب هل يعاني من حنه او نتعه عند التعشيق
لأني لن أشتري الا تماتيك بحكم انه اريح وأفضل في زحمات الرياض وغيره
بالاضافة الا ان طلعاتي للبر خفيفه ولاني براعي استخدام خشن ومطامر بالطعوس



كيف صرفيه السيارة للبنزين
الفل بكم وكم يمشي كيلو بالخطوط السريعة




ما هي فئات السيارة
الي عرفت ان فيه X وهذا الستاندر والpro او الأوف رود وهذا الفل كامل

لكن وش الفرق بين الا S وبين الا SE


هل تضمن وكالة العيسى الجيب في حال الأعطال لا سمح الله لو شريته من المعرض خليجي مع العلم ان سعره بالوكالة 113 الف

هذا ما أردت الاستفسار عنه وجزاكم الله كل خير

[اسبيدر مان]

وعليكم السلام
استخدمت انا الاكستيرا لمده خمس سنوات وكان نعم الخوي ايضا كان دوامي يبعد 77 كيلو وكنت اتردد عليه واسافر واكشت واقلص سيارات واطاعس
وكان اوتو طبعا يجي هو خمس نسب اماميه ومن ناحية الحنه انس لان لما يكون عداد الدوران الار بي ام على 3 تكون سرعه السياره حول 180 كيلو متر في الساعه العزل الصوتي فيه جيد جدا
الراحه جيد جدا اريح من جيب الربع والددسن والهايلوكس الرساوه فيه ممتازه العزل الارضي جيد مع انه الافضل تركب له عزل من ناحية البنزين تعبيه 91 بمبلغ من 32 الى 34 فل وبحاله انك توك مطلعه من الوكاله ياخذ 36 ريال
طبعا تانكي البنزين سعه 80 لتر واستهلاكه للبنزين معقول جدا مثلا تعبيه من الرياض فل وتتجه للقصيم على سرعه 160 مع التكييف توصل وباقي في التانكي الثلث تقريبا
الحقيقه السياره رهيبه جدا وسياقته ممتعه
وبالاخير الله يكتب لك الى فيه الخير

[اتجاه السحاب]

موتري الحالي اكستيرا لة سنة معي الآن
الراحة: أريح من الشاص بواجد لكن فية ردحة بالخلف والحل: ركب لعاب خلفي يرفع الموتر تروح الردحة وتحمل أغراضك ماينزل الموتر وفية مطب أمامي والحل: تدبيل مساعدات أو تغيير مساعد الوكالة
الرساوة : خذ ولد ماشاء الله بالمنعطفات الموتر أنت تتحكم بة بمنعى أنة إنسيابي
صرفية البنزين: أعبي ٩٥ الفل ٤٥ إذا كان مرة فاضي ويمشي من ٣٥٠-٤٠٠ على سرعة ١٦٠ تقريباً وعلى حسب دعسة البنزين تقل الصرفية
يتميز بعدم وجود الهواء أثناء القيادة إلا بعد سرعت ٢٠٠ يكون فية صوت خفيف
عيبة المرتبة الوسطية ضيقة عند الركوب والنزول
والأفضل خذ اللي فية مثبت سرعة ..

ومبروك مقدماً

[نايس × كول]

حلو وانا انصحك في الباترول الجديد استاندر 165الف

[عابد]

السلام عليكم ورحمة الله وبركاته

رح لهالموضوع يغنيك إن شاء الله
http://www.mekshat.com/vb/showthread.php?t=107208

[السلمان2]

حصلت قير عايدي اخوي وكم سعرة ؟؟؟؟؟؟؟


وانا محتار بينه وبين الفورشنر

ياريت احد يفيدنا اكثر من الشباب بالنسبه للقطع والقير سمعت انه فيه مشكله بالمبرد حق القير ؟

[jeep 2001]

انا اقول مادامك بتاخذ عن طريق بنك طق لك موترن اووسع مثل الباترول او اللاند كروزر وبس

[مظلووم]

والله الموتر زين ونشيط حسب معلوماتي

[abu fars]

الموتر مع واحد من العيال شاريه ماشي 7000 ومشاه اللحين تقريبا 170 موديله 2009 اوف رود فاقعه فقع ماشاء الله يطرب الموتر ونشيط والصرفيه معقوله يمشي تقريبا من 400 الى 500 حسب دعست رجلك يعبيه بنزين 95


بس عيبه المركب ورا ضيق فتحت الباب والتنده عفطتها مهيب زينه وبس وباقي الامور ماشاء الله منتاز

وسلامتك ومبروك مقدماً

[Arabian Penin]

اسبيدر مان
اتجاه السحاب
نايس × كول
عابد
السلمان 2
jeep 2001
مظلوووم
هندسة سيارات
Abo fars


حقيقة كلمات الشكر والثناء لا تفيكم حقكم يالأجاويد
فالنصيحة هذة الأيام تشترى بأغلى الأثمان فكيف بمن يهديها لأخيه المسلم الذي لا يعرفة ولم يقابلة لا لشيئ أنما لوجة الله تعالى
بيض الله وجيهم جميعا وانا اشهد انكم كفيتوا ووفيتوا وجزاكم الله عني كل خير وانا عزمت بإذن الله تعالى على الموتر بس باقي اجراءات البنك
والله يكتب الي فيه خير وصالح

[مشلخ الذيب]

يمشي التانكي معي 530 كم

فل 91 ب32 ريال

الموتر ماشاء الله راسي وثابت وقوي ونشيط الله لايضرة ..
فيه الردحة ماتطلع الا مع التحميل ولها حلول كثيرة لو تبيها اوردتها لك ..

فالبر خذ رجال منتب لاقي ازين منه ممشى .. ادخل للطوقي منسم 17 وبدون دبل ماشاء الله