المساعد الشخصي الرقمي

مشاهدة النسخة كاملة : إلى خبراء السيارات أفيدوني في مكيف اللاند..............


ملاعب الريح
28/10/2006, 06:00 PM
بسم الله الرحمن الرحيم


السلام عليكم ورحمة الله وبركاته

كما هو موضح في العنوان أشتكي من تبريد مكيف موتري

قبل فتره قل تبريد المكيف فذهبت إلى ورشة بالصناعيه وقال ناقص فريون وعبيت فريون أصلي (134) ولاكن بعد حوالي أسبوع وأنا أمشي فجأه معد برد المكيف وكنت طالع البر دخلت الشعبان وتمشيت ويوم طلعت وأشغله ولا برد ومن بكره طلعت مشوار وشغلته تمام ما هنا بأحسن من تبريده

وبعدها بكم يوم تكرر معي نفس الشي وفي أوقات مختلفه (ظهر , عصر , ليل) المكيف معد يبرد رحت لورشه وفحص الموتر قال الفريون سليم والكمبرسر سليم ماهنا إلا الحساس حق الثلاجه والثلاجه يبي لها تنظيف قلت توكلنا على الله ونقدت حول الـ500 وبعد حوالي أسبوع تكررت نفس المشكله

الموتر لاندكروزر 93

يا ليت الل عنده علم بالمشكله يفيدنا عنها وجزكم الله خيراً

تحياتي (ملاعب الريح)
m1m
28/10/2006, 09:48 PM
أخوي عندك حساسين في السيارة ..


واحد كهرب وواحد حساس ثمرموستات .. مثل حق مكيف البيت شف انت وش غيرت ..

عموما الفريون وزنية .. صارت معي لكن أنا صار يشتغل المكيف اللي ورى مرة يبرد ومرة لا :)
hbobnjd
28/10/2006, 11:21 PM
الاخ العزيزا جل ذبحك الحر-- الخلل فى االاديتر حق المكيفو و الله أعلمhttp://mekshat.com/vb/images/smilies/smile.gif
العنقري
29/10/2006, 12:30 PM
اذا كان المكيف الخلفى والثلا جه شغا له (اىيبردن) والمكيف الاما مى مايبرد فا الخلل فى فى البلف اللى الذى فى الكبوت بجانب علبة الفر امل غيره اوخرطه با لدريل
ملاعب الريح
29/10/2006, 05:13 PM
إخواني
m1m
hbobnjd
العنقري

مشكورين على الردود وما قصرتوا وبيض الله وجيهكم

في إنتظار بقية الردود

تحياتي (ملاعب الريح)
مروق
29/10/2006, 05:20 PM
يفهم من كلامك ان الخلل كهربائي !!




1- شيك على مفتاح المكيف ممكن عندك يفصل

2- شيك على الحساسات (فيه اكثر من حساس حسب علمي )

3 - شيك على كتاوت المكيف

4 - شيك اخيرا على نفس دينمو المكيف والبكره وشدة السير
قلم حر
29/10/2006, 11:08 PM
وعليكم السلام ورحمه الله وبركاته

تأكد من نوع الفريون
لأن 134 للسيارات الجديدة

السيارات القديمة قد تكون
R12
او
R11
فيه لزقه صفراء في الكبوت مكتوب فيها نوع الفريون
عندي موديل 93 بتأكد وأرد لك بكره
تــــوني
30/10/2006, 04:26 AM
كن المشكلة الي عندك فلتر يجي داخل ماصورة الفريون من عند الدبه

بس عشان ما اتفلسف عليك فيه واحد تركي شايب قديم بها الشغلة قد صلحت عنده صالون وصار المكيف (فريزر)
الوصف الرياض صناعية الديرة مخرج 16 او 17 شارع الجمعية تمشي بأتجاة الغرب (باتجاة دويرة الخرخ) لين يجيك محل السبيعي لقطع الغيار على اليمين تلقى فيه مطعم في الزاوية على اليسار ادخل السكة الصغيرة ثالث محل على اليسار جنسيته تركي وأصلع ولا أعيبه

ان شاء الله تنحل مشكلتك عندة... وبالتوفيق
SilverSniper
30/10/2006, 08:59 AM
لاندكروزر 93 نوع الفريون 12 وليس 134.. انتبه من هذه النقطة..
لما يوقف التبريد عندك.. هل تسمع صوت غريب.. من الكمبروسر.. صوت ونه أو حنه أو كتمه ؟؟
لما يوقف التبريد.. هل يتوقف عن الأمامي فقط وتبقى الثلاجة تبرد والمكيف الخلفي يبرد ؟؟
الكونترولCONTROL
30/10/2006, 09:13 AM
انا من 3 سنوات يتوقف المكيف فجأة عن التبريد ......
====================================
كل ما اعمله : اطفيء المكيف - اتوقف - اطفيء المحرك - أدير المحرك مرة اخرى - ثم اشغل التكييف و يعمل مباشرة من او عملية .........
مع ملاحظة ان هذه المشكلة لا يمر شهر الا و تحدث مرة واحدة على الأقل
فيظهر ان العملية هي عمل reset لبعض ال sercuits الدوائر الالكترونية أو الثرموستات ..... ليس إلا !!!!!!!!!
=============================================
و لا تعلم احد !!!!!!
====================
الكونترولCONTROL
30/10/2006, 09:15 AM
ْْْْْْْْْْْْْْ................. مكرر .......................
====================
الشقردي
30/10/2006, 10:35 AM
وكلامك على متمه يالكنترول معي vxr 98 اللي يصير هو ان الثلاجة ما تبرد بعض الأحيان مع ان المكيف الامامي والخلفي يبردون اللي أعمله هو اني اشغل المكيف الخلفي شوي وتبرد الثلاجة. وبعدين أطفيه
قلم حر
30/10/2006, 01:03 PM
أخي الكريم نوع الفريون المستخدم R12

هذه الصورة تبين نوع الفريون أخذتها لسيارتي في اكس ار 93

http://www.mekshat.com/pix/upload/images21/mk14328_r12.jpg
ابوحديجان
30/10/2006, 02:24 PM
انا معي جي اكس موديل 2000 صار له اكثر من ست سنوات معي صارت معي ثلاث مرات تقريبا يصير المكيف حار والحل اطفىء المكيف واشغله مره ثانية ويرجع زي ماكان ولا صلحت شىء ولاعبيته شد بلد
خيال الغلبا
30/10/2006, 03:53 PM
يااخوان انا المكيف ممتاز اذا كنت ماسك خط سريع

اما داخل الديره ماينفع ولا بريال ..يقلب دفايه

هل الكمبرسر خربان والا وش العله
ملاعب الريح
30/10/2006, 09:09 PM
الأخوان

مروق مشكور على الرد وبخلي الورشه يشيكون جزاك الله خير

قلم حر مشكور على الرد والتنبيه وبأتكد من نوع الفريون وجزاك الله خير

توني مشكور على النصيحه والوصف وجزاك الله خير

SilverSniper مشكور وبالنسبه للمكيف الخلفي يبرد ويبقى شغال والمكيف الأمامي ما يبرد ولا حنه ولا شي جزاك الله خير

الكونترولCONTROL مشكور شكل مشكلتي غيرك أنا إذا طفيت الموتر وشغلته ما يبرد لين تمسك معه ويزين :) جزاك الله خير

الشقردي مشكور على مرورك وعلى المعلومه وجزاك الله خير

قلم حر أكرر شكري وجزاك الله خير على التوضيح لمصور

ابوحديجان مشكور على المعلومه بس عندي ماتزبط حتى لو طفيت الموتر كله وشغلته وجزاك الله خير

خيال الغلبا مشكور على المرور وما أدري عن مشكلتك يمكن الفريون ناقص وجزاك الله خير


أشكر جميع من رد أو شارك أو أبدى رأيه وفي إنتظار باقي التجارب:)

تحياتي (ملاعب الريح)
SilverSniper
31/10/2006, 09:28 AM
المشكلة عندك في البلف الكهربائي.. بلف اسود طالع منه سلك.. تلقاه في الرفرف الأيسر.. قيمته في حدود 500 ريال..
تقدر تلغيه وتفك وسطه وتخليه زي الماسورة.. راح يبرد معك لكن الثلاجة ما راح تبرد الا على السرعات العالية..
ملاعب الريح
31/10/2006, 01:00 PM
SilverSniper مشكور على الإفاده لاكن وش لون عرفت إنه منه أخاف أخسر لي 500 ثانيه ولا يصلح إعذرني على كثرة الأسله وجزاك الله خير

تحياتي (ملاعب الريح)
يازين البر
31/10/2006, 10:10 PM
السلام عليكم ورحمة الله وبركاته

خذ النصيحة من أخوك

ولدعمي صار معه نفس مشكلتك معه لاند 93 وما خلى ورشة ما جاها اللي يقول له البلف واللي يقول الفريون واللي يقول الثلاجة

وخذ من فلسفة الكهربائيين اللعابين المهم دفع أكثر من 2000 ريال ولا زان المكيف !!!

كل ما قال له كهربائي غير كذا غيره ولا يصير شي .. بالنهاية زان المكيف من نفسه سبحان الله

الزبدة:

الشباب ماقصروا أعطوك شي من تجاربهم وقد تكون مشكلتك نفس مشكلة أحد الشباب

لكن احذر من تغيير القطع الغالية الثمن بالذات دون تروي فقد تتخسر في تغيير بعض القطع السليمة وهي لا تحتاج إلى تغيير أصلا

والسبب تخمين بعض الكهربائيين فإذا قال لك راعي الورشة القطعة الفلانية تالفة فلا تجعله يغيرها مباشرة بل إذهب إلى غيره واجعله يفحصها

فإذا اتفق اثنان أو أكثر على تلفها فلن تندم على تغييرها..

أسأل الله أن يفرج همك وييسر لك أمرك ويصلح سيارتك من غير خسائر والسلام
ملاعب الريح
01/11/2006, 12:54 PM
أهلاً وسهلاً بك أخي يازين البر

مشكور وما قصرت لاكن الظاهر المشكله طلعت عندي في الثيرموستات سعرها جديده حول 450 وسويت لها إصلاح بحول 150 وبتطلع اليوم بإذن الله جزاك الله خير


تحياتي (ملاعب الريح)
هاوي الله
01/11/2006, 06:10 PM
يااخوان انا المكيف ممتاز اذا كنت ماسك خط سريع

اما داخل الديره ماينفع ولا بريال ..يقلب دفايه

هل الكمبرسر خربان والا وش العله

الظاهر والله العالم إن العله = الأديتر حق المكيف ( يمكن يبي تنظيف أو تغيير )
ترى هذا توقُع فقط لاغير والسبب (( قوة الهواء الخارجي اللي يتخلخل في فتحات الأديتر )) يعني إذا أنت مسرع ( خط ) يبرد وإذا أنت تمشي ببطء ( المدينه ) مايبرد والله أعلم &
ملاعب الريح
01/11/2006, 06:22 PM
الحمد لله طلعت الموتر وإن شاء الله إنه تمام وصراحه صار الموتر أبرد بحيث إنه يبطي لين يفصل الكمبرسر حقه بأتأكد منه وبرد لكم

مع تحيات (ملاعب الريح)