احد يعرف حساسات للمراوح الكهرب

[العيد]

السلام عليكم

يا شباب الله يعطيكم العافيه انا مركب مراوح كهرب وحده تشتغل تلقائي مع بداية التشغيل والثانيه بحساس مرسيدس يشغلها من النصف لكنه تلفيق لانه مركب على كوع بلف الماء ومااااش ماهو مضمون لانه ممكن يهرب الماء من الكوع واروح فيها جريش :)

ما تخبرون حساسات تركب في مكان آمن ؟؟ شغل المخاطرة مخوفني

[(طيرشــــلوى)]

شل الحساس وركب فاصل عنـدك بالغماره أريح لك تشغله متى مابغيت........

[ابو الريم]

اخوي العيد هذه الشغله يجب ان تكون متقنه ..........

فأنا انصحك انك انك تسوي مثل ما قال الاخ طير شلوى بالاضافة الى تشبيكها مع المكيف في حالة عمله .


تحياتي ابو الريم ,,,,

[العيد]

صحيح انا الآن موصله لداخل الغمارة واتحكم بها على كيفي لكن ولو فيه مخاطرة ممكن انساها او يسوق السيارة غيري ... وما فيه غير المرواح هذي لان مروحة المكينه الغيتها من بداية الشغله يعني لو ما اشتغلت المرواح بالوقت المناسب راح ترتفع الحرارة والله يستر

[جــلــمــود]

عزيزي العيد

ولا يهونون الشباب

اجعل المروحه الثانيه الي بفاصل داخلي تشتغل على السلف

يعني اذا طفيت السياره وانت مشغل الفاصل تطفي المروحه الي مع المحرك والمروحه الي على فاصل

واذا شغلت السياره يشتغلن الثنتين لان الاولى على المحرك مشبوعه والثانيه فاصلها مشغل ولكن يحتاج دقة سلف وتشتغل المروحه

وبذلك تستطيع طول فترة الصيف انك تشغل المرواح الثنتين مع بدء تشغيل المحرك ويطفن الثنتين مع تطفية المحرك وبذلك لا تترك مجال للحرارة بالارتفاع ستلاحظ ثبات الحراره عند الربع

اما في الشتاء فتستطيع تطفية ام فاصل وتشغلها عند الحاجه ( تطعيس )

فمثلا في الصباح لا تحتاج الا لواحده فقط وتلاحظ انها طول الوقت الحراره الربع مع انك ما استخدمت الا وحده .

مع احلى الاماني



جــــلـــمـــود

[العيد]

يا اخوي يا جلمود والله انك ما قصرت من زمان وانت فازع معي . . لكن خويك اللي وصفته لي ماااالقيته ابداً مريت المكان اكثر من مرة وما حصلته والمحل اللي جنبه يقول انه مسكر :confused: وشرااايك
وبعدين حلك هذا ما خطر على بالي من قبل والله ممتاز لكن ودي ان المروحة تشتغل من نفسها عشان لو نسيت او تعطلت المروحه الاساسيه الا الثانيه تشوف شغلها وبكذا يكون الشغل في احتياط كافي لا سمح الله وانت ابخص

[جــلــمــود]

عزيزي العيد

انا اسف بخصوص الرجال الي روحتك لمه بس يوم اروحك لمه كان خبري فيه من زمان

ولما قابلته بعد ماوصفتلك طلع الرجال بايع المحل ومنتقل لتشليح وناقل نشاطه هناك

والتقصير مني عزيزي العيد الي مابلغتك بوقتها او على الاقل تأكدت من الرجالووجوده قبل مااوصفلك

المهم يا عزيزي العيد حصل خير واعذرنا وابشر بالحق ومايلحق ,

والحل الي عطيتك هو احسن حل وانا متبعه من اكثر من سنتين وماشي مثل الحلاوه

وهو الطريقه الي تضمن لك استمرار عمل المراوح او احداهما عند تعطل الاخرى لا سمح الله

وبعدين يا خلفهم المراوح بأذن الله اذا كانت جديده والتركيب مضبوط ماعليها خلاف انشالله

غير كذا ليه انت عندك حساسيه من ارتفاع الحراره اذا تعطلت المراوح وارتفعت الحراره فا انمبير الحراره يبي يعلمك :)

بعدين الطريقه الي قلتها لك بردي السابق يضمن لك تشغيل المروحتين كلها وتطفيتها كلها مع بعض عند تشغيل او تطفية السلف

يعني لو تعطلت وحده الثانيه بتشتغل




وتسلم

[العيد]

الله يطول في عمرك يا خوي والله الحق لك انا اللي اشغلتك بهالمراوح :) .. وبالنسبة لطريقتك ممتازة جدا وانا ماشي عليها من رمضان لكن الكلام لو اخذ احد السيارة غيري هنا المشكله يعني مثلا لو اخذها الوالد صعبه اقوله انتبه للحرارة وشغل وطف بذا المراوح . . والجو الحين ما فيه مشكله الصباح مشيت مشوار ثلث ساعة بدون مراوح اجرب والحرارة ما وصلت الثلث لكن المشكله بعد شهرين احتاج للمروحة الثانية بعض الاوقات . . مااااا ادري وش اسوي بس الله يعين والله فكرت الغي الدعوى كلها ولازلت متردد حسوفه تعبي كله يروح بالهواء:(

الف شكر يخوي وما قصرت

[جــلــمــود]

يا خلفهم يا العيد بالعكس انا بالخدمه وممنون وانا اخوك نعين ونعاون

حنا ليه جايين لها المنتدى الا عشان نفيد ونستفيد

افا عليك بس

بعدين يالعيد انا اقولك ماعليه خوف لو اخذ احد الموتر والمراوح يشتغلن بالطريقه الي اقواك
يعني وحده على الفاصل الي يكون الفاصل مسحوب وتشتغل مع السلف وتطفى مع السلف والثانيه سيده مع المكينه بدون فاصل كذا حتى لو اخذ احد السياره والفاصل شغال اللهم يطفي مع السلف ويولع مع السلف والثانيه سيده شغاله مع السلف بعد يعني المروحتين يبي يولعن ويطفن مع بعض يعني مافيه خوف
خلها على هالحال طول الصيف يعني من اول ماتبدا تولع المكيف اسحب فاصل المروحه وخله طول الصيف اريحلك
وانتبه تفكر ترجع شد البلد بعد كل هالتعب
والدعوى بسيطه انا لي سنتين على هالطريقه اسحب الفاصل مع اول توليعة مكيف بعد الشتاء ولا اطفيه الا مع اول كشته عقب المطر السنه الي عقبها ولا اولعها الا اذا زريت المتور بالرمل وقامت حرارته فوق الربع سحبت الفاصل و اتوكل على الله
ومرتااااح الحراره يالله من فضلك تحت الربع بشرطه ( ديره , خط , زحمه , واقف )
واول ما ركبتهن كنت مثلك اللحين دايما خايف ترتفع الحراره مغير اناظر امبير الحراره واتفقد الفاصل اتأكد هو مسحوب ولا لاء :)
بس اللحين الحمد لله الامور زينه
والحين ابشرك ودي اشبك الثنتين على السلف مره وحده بدون فاصل
بس الي مخليني اتردد اني بعض المرات وانا كاشت اولع لمبات على البطاريه وانساهن واذا جيت اشغل
من يوم ادق السلف قبل التشغيله يشتغلن المراوح ويسحبن كهرب زياده لذلك اطفي ام فاصل واشغل اضمن


واسلم







واي خدمه ابشر بعزك يا العيد يا حبيبي

[جاروود]

بسم الله الرحمن الرحيم
وش السياره الي تتحدثون عنها

[جــلــمــود]

هلا اخوي جاروود

نكلم عن المراوح الكهرب الي تركب على الامريكي

عندك اضافه ولا معلومه اللحقنا بها

:) :)

[العيد]

تسلم والله . . تسلم والله ما تقصر .....عموما فكرتك هي اللي انا مطبقها لحد الان لكن حبيت اطور اكثر وسمعت من احد الشباب ان حساس الفورد يركب في اي مكان بدون ما نروح نخرط كوع الماء ونحوس السيارة .. على فكرة ترى انا فتحت سنه بالكوع وركبت الحساس حق المرسيدس بس بعد كم يوم بدا يهرب وحاولت اشد عليه شوي وانصدع كله وقعدت القط وجهي قدام اخوياي يالله مابه الا سطحه :D )

وش رايك ؟

اخوي جارود ابد شوفت عينك نفك ونركب بهالمراوح وما يفرق نوع السياره لان الدعوة تلفيق اصلا :)

[ابو عمر اللاحم]

السلام عليكم

قريت ردودكم على بعض بشأن المراوح ما شاء الله عليكم على هالاخلاق العالية .

اتوقع المراوح بدون حساس تصير شغله لاكن ليش مايكون الحساس بالخرطوش بحيث انك تقصه ثم توصله بماصور بعد ما تركب فيها الحساس وش رايكم ما هيب فكرة زينه .

تحياتي واحترامي،،،

[العيد]

امممممممممممممممممممم والله فكرة صحيح ما خطرت على بالي يبيلها دراسة :) ما ادري وش راي اخوي جلمود . . وصراحة ما ودك تنفذ اي فكرة الا متاكد منها لانك ممكن تقعد بوسط البران تدور لك احد يساعدك الله يستر لكن فكرتك مجدية في حال عدم وجود حساس يركب بدون قص ولا خرط ولا فتح سنه ونشوف نسوي اجتماع مغلق ونتشاور فيما بيننا بس طبعا في هالمكان :)

[ابو عمر اللاحم]

والله اضن الفكره ذي احسن حل خصوصاً انك تتلحم مكان الحساس بلحام والخرطوش تربطه على الماصوره بقفزان بعد كذا يبي يطلع وكالة:light: لاكن ترى براءة الاختراع محفوظه انتبه :p ;) ;) :p

[العيد]

اكييييد الحقوق محفظة لكم :D لكن وضح اكثر اولا في بالك حساس معين ؟ لان الحساس خق المرسيدس اصغر من الخرطوش بكثير فكيف اثبته ووين بالضبط عطنا الفكرة كامله عشان نعرف نسرقها ونسجلها باسما خخخخخخخخخ

[جــلــمــود]

السلام عليكم

اخي نهار اشكرك جزيل الشكل على هذا الثناء الصادق :)

ارجو منك مراجعة ردودي على الاخ العيد وستجد انها الحل الامثل لقطع الشك باليقين
وهذه الطريقه التي شرحتها للاخ العيد اعمل عليها منذ سنتين وبدون اي مشاكل او ملاحظات ولله الحمد الحرارة ماشاء الله على الربع صيف وشتاء وخط وبر وتطعيس

وبذلك استغنية عن الحساسات ولم اركبها منذ البداية .

[العيد]

ايه بس يخوي جلمود صعب تشتغل الثنتين علطول تلعب بالكهرب وهذا لاحظته مع طول فترة تشغيلها وخاصة مع بداية التشغيل احس بضعف البطاريه والله لا يلومها مراوح شافطتها :) ومروحة وحدة بالصيف ما تكفي ترتفع الحرارة فوق معدلها الطبيعي لذلك انا احاول ادور حساس مناسب وانشاء الله تكون فهمت قصدي الحين

[جــلــمــود]

عزيزي العيد الفاصل وش شغله ؟

طق الفاصل وشغل وبعدين ولعها

بعدين البطارسيه اذا صارت صاحية ماعليها ومع تركيب كتاوتات على المراوح برضو ماعليها

على العموم انت شكلك راعي فك وتربيط ومواصير وحساسات :D

الله يوفقك وانا اخوك والله يعطيك من خيرهن وكيفيك شرهن هالمراوح اتمنى انه مايواجهك اي مشكلة معهن سواء بعد الحساس ولا قبله

وانصحك بحساس كابرس ss من القديمات

وايضا سمعت عن نوع حساسات تقدر تبرمج مستوى الحرارة الي تبي المروحة الثانيه تشتغل عندها

ووانتبه عند تركيب الحساس ترا ممكن الكهربائي يشبك المروحتين على الحساس وكذا تبلش لان المروحتين بيكونن طافيات كلهن ولا يشتغلن الا اذا قبت حرارة الموتر
لذلك خل الصغيره بس هي الي على الحساس والثانيه على السلف مباشره

والله يوفقك وانا اخوك


مع احلى الاماني

[ابو عمر اللاحم]

وفي يا جلمود ما انت مثل بعض ناس;) لاكن سؤال يطرح نفسه وش فايدت المراوح يعني هل هناك فرق بينه والمروحه العاديه يسوى هالشغلات .

[جــلــمــود]

السلام عليكم

الله لا يهينك يا نهار :)

من ناحية المراوح الكهربائية فهي لها فائده كبيره لسيارة اذا ركبت بطريقة ممتازه

من فوائدها :

1 - تبريد المحرك بشكل فعال

( لان اغلب المراوح الكهربائية تأتي بسرعات متفاوته تزداد حسب حرارة السياره )



2 - تزيد عزم السيارة بشكل ملحوظ

( لانها تعمل على الكهرباء وليس مثل المروحة التي مربوطه بالمحرك مباشرة والتي تأخذ قوتها من احصنة المحرك بالتالي اذا استغنية عن مروحة المكينه بمراوح كهرباء فأن الاحصنه التي كانت تستهلكها مروحة المكينه تعود الى المحرك ويزداد عزمة بشكل مقبول )



3 - تخفف من استهلاك الوقود

( حيث يخف الضغط على المحرك كثيرا بسبب ازالة المروحة المرتبطه بالمحرك وبذلك توفر في الوقود بشكل مقبول )



واي خدمه يانهار تأمر امر

[ابو عمر اللاحم]

وعليكم السلام

شئ جميل ياجلمود ... الله يعطيك العافيه .


تقبل تحياتي ///