من يعرف وله مني الدعاء

[مشعل العيسى]

أخواني الأفاضل بهذا المنتدى الرائع بحق ...

السلام عليكم ورحمة الله وبركاته ،،،

والله اقولها وبكل صراحة .. لقد استفدت فوائد كثيرة وكبيره في هذا المنتدى .. ولا حرم الله القائمين عليه الأجر والمثوبه ..

اخواني عندي سؤال بسيط ...

إذا اردت ان اقوم بكشته قصيرة وبسيطة وانا من سكان الرياض فما الموقع القريب والهادءوالجميل . ؟

وفقكم الله وسدد خطاكم ...

[كويشيت]

السلام عليكم ورحمة الله وبركاته
أخي غيثه أغاثنا الله وإياك وجميع المسلمين أمين
بالنسبه لسؤالك يأخي فإنني أرى فيه بعض الغرابه لأنني لا أتوقع أن يكون أحد من سكان الرياض ولا يعرف الأماكن التي يمكن الكشته لها قريباً من الرياض ، ولكن أضن أنك لو حددت طلبك أكثر لكان بالامكان إفادتك يعني قريب وشكثر خمسين ستين ميه ميتين كيلو ، جميل وشلون شعيب جبل ولا نفود ، أما هادي فهذي بعد تبيلها تفسير وتحديد أكثر ، على كل حال فيه أماكن كثيره حلوه وقريبه من الرياض بس أنت أجزم والله يوفق

[مشعل العيسى]

اخي : كويشيت ... يا مرحبا بك ..


ابي مكان يبعد حوالي 30 او 40 كيلو ..


وابيه يكون شعيب او ارض مستويه وغير وعره او نفود خفيف ،

[imksa]

والله اني مثلك يا اخوي ( وليتك حطيت عنوان الموضوع يبين هالطلب )

مره رحت لشعيب صلبوخ وغثتنا الله يكرمكم الريحه كل ما نزلنا تلطمنا وركبنا


الثمامه كلها مشبكه


الشوكي وحواليها ( بعيده )


فمان الله

[قرقاص]

عندك الحيسيه بالعيينه
طبعا شمال الرياض
تشرح الصدر
والا دز شوي واوصل لحريملا
فيها شعيب ممتاز

[shay_bone_4]

30 او 40 كيلو ماتقدر ولا تاصل المحطة يبيلك 30 او 40 كيلو عشانتطلع من الرياض لاكن رايي
تبي شعيب الطوقي لا هنت نضيف وقريب
ولا نفود مخرج 9 طريق الدمام شي مرتب للي يحب النفد
لاكن تكفون الي يكشت لاينشر الزبايل تسنة منتسفي اقل شي يجمعهن بكيس ويا ليت لو تحرقهن تكون تمام .

[عبدالرحمن السالم]

والله فييييييه اماكن واجده بالرياض الواحد يستانس بصراحه للطلعه لها ..

شف وانا اخوك تعرف محطه الحزام .. مضبوط خليها على يدك اليسار تجيب لوحه على يدك اليمين مكتوب البويبات
لف من عندها وابتل بيجيك شعيب على يدك اليمين واليسار شعبان وجبال تفتح النفس وطلح شى شى فضيع

واذا تبي كشته خفيفه يعني ونفسك على طريق القصيم رح بنبان

والأماكن كثيره


بالتوفيق اخوي

[المموه]

الزويليات . مع طريق الخرج باتجاه الخرج لحين تصل التفتيش . بعد التفتيش بمئتين متر تلف يمين وتستمر حوالي 3 كيلو متر تشوف على اليمين طعوس ومنطقه رمليه تصلح للعوائل . المسافه من الرياض حوالي 34كيلو متر .

[عبدالرحمن السالم]

فعلاً نفود الزويليات نفود حلو لدرجه ان السيارة تمشي فيها وهي مرتاحه وعلى رجلك ماتغطس نفود نضيفه وحلوه

عامتنا المناطق اللى بالجنوب بالخرج وماحلوها حلوه وزينه للكشته بعيده عن الناس وازعاجهم

[ابوهتون]

اخي دحيم ممكن اسأل عن محطةالحزام وينها به..هل تقصد اللي عند طعس التحدي ام ...(اعتقد اني غلطان) ...بس ممكن تجاوب على سؤالي..وسلامتكم.

[الاقبال]

اقول الله يرزقنا وياكم مالها طعم الطلعات والكشتات مالم يرزقنا الله بالمطر ويطلع العشب اما الحين كلها غبار وروائح سواء قريب الرياض ولا بعيد منها ولكن اذا انك معزم للكشته حسب قولك عليك بعروق الدهناء طريق التنهات يسمونه البدو خط الملك امش من التنهات خمسين كلم ثم لف على يمينك وتلاقي الجو الطيب والارض النظيفه وفقك الله كها حوالي 300كم من الرياض شمالا ولا لاتروح نهائي ريح نفسك احسنك

[كويشيت]

الله يحييك أخوي غيثه وأسف على تأخر الرد
30 ،40 كيلو مثل ما قالو الاخوان أغسل يدك
لكن خلنا نقول قريب يعني 60،70 كيلو سجل عندك :

أولاً : البويبيات - تروح طريق الثمامة ومن عند محطة خزام تلف يمين باتجاه الجبل ( بويب ) وبعد نهاية الشبك إلي على جهة اليمين
تروح مع المزفلت يمين باتجاه الجنوب وهذا الطريق ينتهي عند محطة كهرباء كبيره قبل المحطه اطلع يمين مع الخطوط الي تروح جنوب
وامش كيلو أو اثنين وادخل الشعبان الي على اليسار .

ثانياً : شعبان بويب يعني تروح طريق بويب وبعد ماترقى الضلع تمشي عشره كيلو وتجيك الشعبان يمين ويسار .

ثالثاً : شعييب الحيسيه بالعيينه .

رابعاً : شعيب بنبان طريق القصيم .

خامساً : : المحليه - طريق حفيرة نساح - تروح مع طريق الحجاز طريق مكه وبعد طلعة القديه وبعد قصور المقبل تلف يسار وأول ملف يمين ملف حفيرة نساح تروح معه أربعه أو خمسه كيلو وبعدين على اليمين أو اليسار كله واحد.

سادساً: الثامره بس تراني مبطي عنها مادري كيف وضعها الآن وهي قريبه جداً يعني حوالي ثلاثين كيلو عن الرياض على طريق ديراب بعد نقطة التفتيش بحوالي ثلاثمية متر تلف يسار مع طريق شديد الانحدار يحول في شعيب الثامره .

سابعاً: سعد والوسيع طريق الدمام السريع ولو انها حوالي ميه وعشرين كيلو بس تستاهل العنوه.

[imksa]

بالله يالغالي ليتك توصفلي الحيسيه وينه فيه ،،،ووش فيه هل هو مثل شعيب حريملا ؟


وبرضه بنبان طلعت يمين مع القصيم ومشيت الين دخت مالقيت شعيب يفتح العين ( الكلام هذا قديم )

هذي صوره لو توصف عليها

http://www.riyadh.gov.sa/assests/dareyah.jpg

وهذا موقع امارة الرياض فيه صور المحافظات

http://www.riyadh.gov.sa/PageShow.asp?Page_id=6#m1

فمان الله

[مشعل العيسى]

أخواني : الأعزاء

imksa .. قرقاص ...shay_bone_4 ......المموه .. دحيم آخر لفه ....... أبو هتوف ......... الاقبال .....كويشت ...


الحقيقة ... ما قصرتوا وبيض الله وجيهكم .... وأسعدكم دنيا واخره وجعل الفردوس الأعلى منزلكم ...

[الخادم]

مشكورين حتى حنا من سكان الرياض و لا اعرف وصفهن خاصة الزويليات
كثر خيركم و جعلة في ميزان اعمالكم اجمعين

[صمان1]

الوسيع طريق الدمام السريع حوالي ميه وعشرين كيلو مع الخط السريع تستاهل العنوه

[عريدان]

يلله تنق وطب وتخير ما قصروا الشباب والخير واجد والحمد لله ونرجوا أن ينزل علينا رحمته وبأن يغيثنا يالسيول والامطار .
وصلى الله على نبينا محمد وآله وصحبه وسلم.

[imksa]

للمعلوميه تم افتتاح طريق جديد للثمامه


عن طريق بنبان يحطك عند خزام ويبعد 10 كيلو

[مشعل العيسى]

أخي Imksa

وين يجي منه ووين يطلع منه .. أقصد وين يطلعك عليه في الثمامه ... لأن الثمامه كبيرة ...

[الشبكة2]

أخوي في أماكن كثيرة عندك من جهة الغرب حفيرة نساح ومن الجنوب الغربي الثامره ومن الجنوب الشرقي الزويليات (( طبعا طعوس وفيها كم رباضه ارجو الانتباه للشي هذا ) الزويليات تجيها بعد التفتيش بــ200 متر تلف يمين عاد تلقى الطعوس على اليمين واليسار وان طولت سيده يلف بك الشارع يمين ويطلعك على كم شعيب كلها مليانه اشجار بس العيب ان وادي حنيفه يمشي هناك ونهاية الطريق يطلعك على الحاير ومن الشرق هناك شعبان السلي عد واغلط وان طلعت جبال العرمة برضو هناك شعبان يحبها قلبك فيها اشجار ولا تشوف نور الرياض ابد (( في توقعي اهداء مكان قريب من الرياض )) طبعا تخلي شبك الحرس الوطني على يسارك وسكه القطار على اليمين ووجهتك شرق وفيه ايضاء شعبان البويبات وانت على طريق الثمامة تجيك لوحه البويبات تلف يمين معها وسيد تطلع عليها (( للمعلومية هناك مصلحه مياه تفرغ جزء من الماء لبراء المصلحه والماء هذا طول السنه وهو يصب مما كون ارض معشبه حلوة الجلسة فيها )) وايضاء من الشرق روضه خريم والرمحيه ورماح إلى الطوقي بعدها روضة التنهاة وإذا اتجهت جنوب روضة التنهاة تجيك روضة الخفس (( طبعا الرياض مافيها شي الحين )) وان كان معك موتر صح تمش على جبال العرمة تبي تدعي لي لأن فيه اماكن ما احد جاها لوعورة الطرق .. آمل اني افدك .

[مشعل العيسى]

أخي الشبكة 2 ... بيض الله وجهك .. واسعدك دنيا واخره ... وماقصرت يالغالي ..

[imksa]

يطلعك عند بوابة خزام :)

[ابرهـ العقرب]

السلام عليكم ورحمه الله وبركاته.... اخوي غيثه.. فيه مكان قريب جدا لكن مهوب بذاج الجمال بس ميزته في قربه ... امش مع طريق الشفا كنك تبي ديراب.. لين يجيك التفتيش .. بعد التفتيش فيه ملف ينزل بك يسار .. امش لك خمسه كيلو تقريبا ويجيك شعيب حليو على يدك اليسار...هذا واحد ,,,, انصحك بالمكان اللي قال اخوي كويشيت اللي هو المحليه .. مكان حلو وءامن وفيه دبابات اذا معك عيال ولا فيه زحمه....