### شيروكي 3 دبلات ### دبل خفيف :: ودبل ثقيل :: ودبل سبدي

[رجـ الصدى ـع]

سلام الله عليكم ورحمته وبركاته ،،
ما به إلا سلامتكم
ياشباب أنا معي شيروكي وحرارتة نار باستمرار - سجع غير متكلف - المهم عليه مراوح كهرب وكلها شغالة مع السويتش ومركب رديتر ألومنيوم 720 ريال وحطيت بلف كابرس 160 ومع ذلك كل طلعة أما ينشق خرطوش أو ينفك أو يهرب ويكون متحجر من شدة الضغط وحرارة السيارة.
عموما نصحني ميكانيكي أفك البلف وفكيته،، ولازالت الحرارة

شكل آخرتها بعبي الرديتر فيفادول ، مع أن العامل كل صبحية يروشة ولا فاد ،،، خخخخخخخخخخخ

تكفون يالربع شيروا علي ..
هل ممكن يكون من طرمبة الموية ، وكيف أقوم بفحصها ؟
وبكم ألقاها؟ ووين؟

إذا فيه ورشة أمينة واسعارها معقوله تنصحوني بها

ملاحظة :
السيارة قبل أشتريها كانت مرهمه وفيها سدة وفلتر هواء رياضي ، م 99 وماشي 290000.

يا هل الخبرة فزعتكم ،، الله لا يحرمكم الأجر..

[لبرتي]

وعليكم السلام ورحمة الله وبركاته

أخوي فيه أكثر من أحتمال

تأكد من رأس المكينة أحتمال يكون منشعر
تاكد أن الماء ياصل للمكينة بشكل طبيعي أحتمال يكون فيه أنسدادات داخليه

وإذا كنت بالرياض أنا راح أعطيك رقم مكانيكي أن شاء الله مضبوط تخصص شد مكائن


أبو راكان

[قلبي طيب]

""


والله وانا اخوك حاط عيني على الشروكي


ويوم قريت ها المشكلة اللي عندك ......... قرصني قلبي


تشور علي اشتري مثل اللي معك استخدالم امريكي ........ ولا اقظب ارضي


نبي المشورة واذا له مميزات اذكرها


وآسف اني ماخدمتك في سؤالك ؟


محبكم[i]

[لبرتي]

أخوي نسيت أقول لك

ياليت تشيك على غطاء الأديتر أحتمال يكون مصدي ولا يعمل تنسيم


بالتوفيق

[إبن فيصل]

الاخ/رجع الصدى....أرجو زيارة مشاركتي لمعرفة الحل على هذا الرابط:

http://www.mekshat.com/vb/showthread.php?p=545650#post545650

وللإضافة أحب أنوه لعدة حاجات وهي للتشييك كالتالي:
1. أولاً عب الاديتر ماء وعب الاحتياطي حق الاديتر ماء لنقطة معينة وأحفظ مكانها إذا جيت من مشوار والسيارة حارة خلها تبرد يعني بعد مدة طويلة ورح عاير الموية حقت الاحتياطي إذا لقيتها فاضية ترى عندك تهريب ماء وهو بيكون واضح من أي مشوار طويل يخلي السيارة تحتر.
2. كرر العملية إذا حصلتها مره ثانية فيها تهريب أعمل الاتي:
- شف إذا بردت السيارة رح لعيار الزيت وهي باردة مرة شيك عليه إذا لاحظت إن فيه بياض خفيف مع الزيت على شكل نقط وإذا لاحظت أيضاً لون رمادي مع الزيت بدون البياض....تأكد أن راس المكينة فيه تهريب أو شعر والله يعينك وقتها.
- إذا كانت تمام ما فيها الشي الي ذكرناه في الي قبل الحمد لله سو الي قلتلك عليه في مشاركتي الي في الرابط الي فوق وإنشاء الله بتكون تمام التمام وبترتاح.
نصيحة شل الفلتر الرياضي وحط حق الوكالة...لأن الفلتر الرياضي يبيله تنظيف كل فترة ...ريح عمرك وركب الوكالة وأرتح لأن الفرق الي بيسوية الفلتر الرياضي ما هو زود.
وتقبلوا تحياتي....إبن فيصل،،،،

[رجـ الصدى ـع]

أشكركم ياشباب على المرور والتفاعل
"آخر لفة":
كيف أتاكد أن الماء ياصل للمكينة بشكل طبيعي ?
وعجل علينا برقم الميكانيكي
وبالنسبة للغطاء : فعلاً ما فيه أمل ينسم ، وهل هذا خلل؟؟

"قلبي طيب" ... أشكركم على المرور والتفاعل
بالنسبة للشروكي اللي معي سعودي ولا أبي أروعك ، لأني أعرف شباب ما شي معهم الشيروكي زي الحلاوة
لكن إن كان هناك بديل فهو أفضل ، مع أني ما لي شهر على الشروكيات ( توني شاريه)
لكن ميزتها في أسعارها وقوتها وتوسطه في استهلاك الوقود خلاف بعض سيارات الدفع الرباعي
وبانتظار رأي الشباب

[رجـ الصدى ـع]

شكراً أخوي ابن فيصل على هالراي والنصيحة
وسأعمل التجربة بإذن الله ،،
عموما ما أحد قالي عن طرمبة الموية ، وهل ممكن تكون السبب ؟
تسلموووووون يالغالين..

[رجـ الصدى ـع]

ودي أسأل ياشباب عن ساعة الحرارة الخارجية ، لأن عندي لمبة ولا قامت بالغرض ،،
كيف تركيبها ، وهل هي بنفس المقاييس المتعارف عليها بالحرارة لأني أشوف رقم 100 - 200 -والـ H=230
الله يعطيكم 9999 عافية.

[إبن فيصل]

أخي رجع الصدى بالنسبة لطرمبة الموية خرابها واضح جداً إذا كانت خربانة فإن الماء بيطلع وبتشوف الماء من عند المكينة يطلع....هذا شي والشي الثاني الطريق الي تعرف أن الطرمبة زينة والا لا شف يالغالي إذا بردت السيارة أفتح الاديتر وهي تشتغل ثم إدعس بنزين وإذا شفت الموية تطلع من الاديتر هذا يدل على أن طرمبة الموية شغالة تمام(يستثنى من ذلك إذا كان الاديتر متسدد بشوف الموية يالله تطلع من الاديتر أو إذا كان الاديتر ما فيه موية كفاية يعني مخلص ماه).

بعدين الطرمبة إذا خربت أو ما تبدء تخرب يطلع لها صوت تحس فيه إذا جيت من مشوار ووقفت عند إشارة أو وقف وهي تشتغل باي مكان الصوت يكون زي ما تقول إحتكاك أو صوت تجييم حديد(طبعاً هذا ناتج من تجييم مروحة الطرمبة الداخلية).
وللتأكيد على ذلك الصوت الميكانيكيين يأخذون سكروب (مفك )أو قطعة سيم حديد المهم شي طويل يسهل عملية التوصيل بين الطرمبة ويد الميكانيكي عشان يحط إذنه على يده ويتسمع الصوت إذا كانت خربانة يبين الصوت للميكانيكي على طول ويبي يحس فيه وفي الاهتزاز الي يطلع منها.
آمل أن أكون قد أفدتك والسلام عليكم ورحمة الله وبركاته.
وتقبل تحياتي...إبن فيصل،،،،

[لبرتي]

أشكركم ياشباب على المرور والتفاعل
"آخر لفة":
كيف أتاكد أن الماء ياصل للمكينة بشكل طبيعي ?
وعجل علينا برقم الميكانيكي
وبالنسبة للغطاء : فعلاً ما فيه أمل ينسم ، وهل هذا خلل؟؟


اخوي رجع الصدى
أحياناً الماء ما ياصل للمكينة بشكل طبيعي لأنه أحتمال فيه تكدسات املاح تعيق مرور الماء مع الخراطيش أو في الأكواع

والغطاء إذا كان ما فيه تنسيم فأكيد يبيله تغيير لأنه هو المتنفس الوحيد

طيب يا اخي رجع الصدى أبيك تتاكد من الخراطيش عندك أبيك إذا قمتاا الصبح والسيارة باردة تفتح الكبوت وتضغط على الخراطيش إذا كانت لينه مره مره مره فأنا أنصحك أنك تغيرهاااا لأنها تعيق مرور الماء للمكينة وذلك لانكماشهااااا


والرقم أرسلته لك رسالة خاصة

بالتوفيق

[رجـ الصدى ـع]

ماقصرتوا ياشباب والله يعطيكم العافية ..
بالنسبة للمشكلة فأبشركم أنها انحلت والفضل لله أولاً
ثم لأعضاء منتدانا الغالي..
أرشدني أخي (زيزوم) إلى ورشة بالصناعية القديمة ورحت لفرعهم الخاص بمعالجة الحرارة والرديترات ( ورشة البركات )
فحصها لي المختص ( صادق ) وقال يبيله تصييخ !!!
عجيب مالي 3 أسابيع شاري رديتر جديييييييييد ؟؟؟!!
قال إن خويك الأول ما نظف الموية اللي بالمكينة قبل يركبه لك (فعلاً أصلاً اللي ركبته عنده مهوب مختص)
بداية اعترضت عليه ، فقال أثبت لك ، فدعس على الأبنص بشده وأنضغط عندي خرطوش مرررررررررة والآخر صار يشفط ولاهوب لاقي موية فانكمش بشدة ،،
عموما :
صيخ الأديتر ، وغير لي المروحة القديمة ( يقول أنها حقت كورلا ) بمروحة ( سوبارو) سرعتين.
وجبت له امبير حرارة ( 45 ريال ) وركبه لي.
خذ علي 250 ريال ( تصييخ - تنظيف - تركيب الحساس - المروحة مع التركيب - بلف من عنده مع التركيب).
والحمد لله زالت المشكلة تماماً.
واللي يبي رقم الورشة أو وصفها أنا مستعد ، لأني أشوفه أمين وشغلهم ما يحتاج ،،

[رجـ الصدى ـع]

بالمناسبة .. والشيء بالشيء يذكر،،
حدثت لي مشكلة مقاربة:
انشق علي رديتر لومينا وقلت أوديه للوكاله لأني كنت حولهم ( العيسى - الدائري الشمالي )
وبعد يومين جاء الرد وكان كالصاعقة بالنسبة لي : اجمالي التكلفة تقريباً ( 4500 ريال )
تمشكلت أنا وإياهم ودخلت على الخبير المسؤل عن تشخيص السيارات وأثره يبي يغير لي نظام التبريد كامل تقريباً ، ونشبت له ودريت أنهم استغلاليين فقط ويبون الحل الشامل الاكيد !! لأني بقوله أنه يتوقع ويخمن !!
عموما طلعتها من عندهم بدون تصليح وأخذوا علي 160 ريال للكشف .. تهون عند 4500 ريال.
ودخلتها عند خوينا البركات وكانت المشكلة كالتالي :
( دينمو مروحة من التشليح 150 + طبله جديدة -القديمة منشقة- 110 + تصييخ رديتر وتنظيف الموية
+ قسام مكيف حار 75 + مويه حمراء AC Delco مع كرتون ماء المقطر 75 ) المجموع كامل مع شغل اليد 500 ريال!!
شف كم قالوا لي الوكاله 4500 !! الله حسبي عليهم ، عموما نظام الوكاله ( تمليك منتهي بالإيجار !! ) منكثر ما يطلبون على الصيانة .

واللي عنده أي مشكلة في الحرارة لايتردد يروح لها الورشة ويشوف ما يسره بإذن الله ( والله ما أعرفهم قبل لكن أبي الخير للجميع )
وبالتوفيق،،

[رجـ الصدى ـع]

بالنسبة لقراءة أمبير الحرارة الخارجي كم تعادل هالأرقام في أمبير الشيروكي شد بلده لأن عندي أنا لمبه:
في الأسفل 100 : المنتصف 230 : بالأخير 280 ..
اللي عند خبره به وكم يعادل يقولي تكفون ..

[رجـ الصدى ـع]

أرجو الرد يا أهل الخبرة بالنسبة للأمبير ؟

[فايز العامر]

بصراحة لو تبيعه وتشري لك سيكل أحسن من هالنوعية التعبانة.

نفس المشكلة اللي عانيتها قبل كم سنة، ولا نفع فيه الطيب ولا الطبيب...

وبصراحة أحسن مكان توديه له،،، المعارض وريح بالك... وترى النيسان والتايوتا أحسن من الشيروكي مليون مرة...