شوركم ياهل الشمال

[جلعاد]

السلام عليكم ورحمة الله وبركاتة

يالربع انا عندي مشوار من الدمام إلى عرعر ان شاء الله يوم الجمعة ، والوالدة ( الله يحفظها ) بتكون معي ، وودي اوسع خاطرها بالربيع ، وان شاء الله النية اني امشي قبل الفجر بحيث نصلي الفجر بالنعيرية ان شاء الله
بس ودي تشورون علي وش ازين مكان ممكن ناقف به بالخط نتغدى ونتقهوى ، الوالده شفقانة على الربيع وودي بمكان زين يوسع خاطرها ولا يكون بعيد عن خط سيرنا

لا تخلونا من شوركم المبروك
تراي اول مره امسك خط الشمال ، ابعد ماوصلت الحفر

[East]

وعليكم السلام ورحمة الله وبركاته

حياك الله اخوي جلعاد والله يحفظ لكم الوالده ويمد في عمرها ان شاء الله على صحة وعافية و زود عملن صالح ..

شف طال عمرك .. عندك من تعدى شعبة نصاب ( تقع في نصف المسافة بين الحفر و رفحاء )

إلى ما توصل عرعر الآرض أغلبها مربعة

لكن اذا تبي النصيحة عندك طال عمرك فياض حول ام رضمه ( تفرق لها من شعبة نصاب ) طيبات لكن بعيدات عن الخط

وعندك طال عمرك القصوريات قريبات للخط الدولي و زينات ( القصوريات عدد من الفياض عند قرية ام صور وهالقرية تفرق لها من بعد شعبة نصاب )

وعندك ابن هباس أو روضة هباس اغلب الفياض اللي حوله مربعات ( ابن هباس قريه على الخط الدولي نفسه )

قبل رفحاء ب 80 او 100 تقريباً

وعندك مفرق المصندق و الخشيبي يجيك على اليسار قبل رفحاء بمسافة ميهب بعيده ازفلت الظاهر ( مبطي ماجيته ) تفرق معه تشوف الفياض يمين ويسار

هذا كله فياض الحجره

اذا كنت تبي رمل و خزام وارض ليان رح لرفحاء مع الطريق الثاني اللي هو

اذا جاك مفرق القاعدة على اليسار قبل الصداوي وانت رايح للحفر امسك هالخط لين توصل كبري القاعدة اللي يتقاطع مع طريق الحفر ام رقيبه اطلع يسار كأنك رايح لام رقيبه تجيب محطة البطيحان على اليمين ادخل معها يمين ( هالطريق يوديك لرفحاء وهو طريق موازي لطريق الحفر رفحاء ) المهم ادعس حول 200 كم تقريباً يجيك ديرة على اليمين اسمه رغوه شف على يسارك الدكاكه حقت الدهنا مربعه ربيعن لابأس وان ماجاز لك كمل الخط رايح للينه 40 كم تجيك فياض على الخط مربعات و زينات ) (( رفحاء تبعد عن البطيحان حول 340 كم ان كنت مانب واهم ))

ويفيدونك اهل الشمال أفضل من وصفي بإذن الله ..

وإن بغيت احداثيات أبشر بعزك وتاصلون بالسلامة ان شاء الله

[جلعاد]

اخوي EAST
بارك الله فيك ، عز الله انك ماقصرت وشورك مبرووك
وكان مابه كلافة لو تزودنا ببعض الاحداثيات تسوي بنى جميل ( وبخلي الوالده تدعي لك بالعرس :D)

ومانستغني عن شور البقية

[East]

اخوي EAST
بارك الله فيك ، عز الله انك ماقصرت وشورك مبرووك
وكان مابه كلافة لو تزودنا ببعض الاحداثيات تسوي بنى جميل ( وبخلي الوالده تدعي لك بالعرس :D)

ومانستغني عن شور البقية





هذا المطلوب دعاوي الوالدة طال عمرك بالتوفيق :D

أبشر أبرتب لك بعض الاحداثيات اللي أنا زرتها هالسنة و أحطها هنا إن شاء الله الليلة أو

غداً صباحاً

[هبوب الحماد]

اخونا East ما شاء الله عليه ما قصر
و انت يا جلعاد ما قول غير الله يجزاك خير الي تبي تونس امك و تمشيها بالربيع

[صمان1]

الله يجزاك خير برك بوالدتك الله يحفظها وﻻتنسانا من الدعاء

[غيث الشمالي]

ياخي اذا ماتعرف الشمال خلك مع الاسفلت واذا شاهدت ربيع على الخط صفط واستمع فيها نزل الوالده المهم خل حول الاسفلت حتى لاتضيع وانت ماتعرف المنطقه ويستحسن يكون معك قارمن

المحافظات والقري الى عرعر

الصدواي حفر الباطن الازقلت الهباس ابن شريم الجبهان رفحاء طلعة التمياط المركوز العويقيلة ابارواث ام الضيان عرعر

زمان علمي فيها ولا ادري هالسنة امكان الربيع اين هي بالضبط

[foxpic.com]

الله يوفقك وييسر امرك

[جلعاد]

اخونا East ما شاء الله عليه ما قصر
و انت يا جلعاد ما قول غير الله يجزاك خير الي تبي تونس امك و تمشيها بالربيع

الله يجزاك خير ويبارك فيك

[جلعاد]

الله يجزاك خير برك بوالدتك الله يحفظها وﻻتنسانا من الدعاء

الله يرزقك الجنه

[جلعاد]

ياخي اذا ماتعرف الشمال خلك مع الاسفلت واذا شاهدت ربيع على الخط صفط واستمع فيها نزل الوالده المهم خل حول الاسفلت حتى لاتضيع وانت ماتعرف المنطقه ويستحسن يكون معك قارمن

المحافظات والقري الى عرعر

الصدواي حفر الباطن الازقلت الهباس ابن شريم الجبهان رفحاء طلعة التمياط المركوز العويقيلة ابارواث ام الضيان عرعر

زمان علمي فيها ولا ادري هالسنة امكان الربيع اين هي بالضبط

جزاك الله خير

[جلعاد]

الله يوفقك وييسر امرك

امرنا وامرك

يالله ياكريم ياعزيز يارحيم
اسئلك ان توفق كل من ساعدنا برائي وكل من ذكرنا بدعوة وكل من تواجد بهذا المنتدى لخدمة اخوانه المسلمين وتعين وترحم وتوفق القائمين على هذا المنتدى يا رب

[ماجد الشمال 1]

الله يجزاكم بالخير بس اللي عنده إحداثيات ينزلها تكفون

[فرقاص]

اللي معه قارمن نوفي يفيده لو تضيع يوصلك لرفحا او عرعر او سكاكا او طريف
المهم انت تمشي مع الطريق الدولي اي خضار يمين او يسار انزل ولا تبعد حتى ما تضيع لأن الجوال احيان مافي ابراج له او بعيدة
والعزبة والماء
ماجد تحصل كتيب بمحلات المقناص بالشمال به احداثيات لأماكن الشمال

[شيخ العبدان]

جزاك الله خير