وين اللي يركبون البطارية الثانية

[ابن بدران]

السلام عليكم ورحمة الله وبركاته

صبحكم / مساك الله بالخير يالربع

مالكم بالطويلة

وين أحسن محل أو ورشة يركبون بطارية ثانية للجيوب بالرياض ؟؟؟

سمعت عن محل اسمه 4*4 يمدحونه من اللي يعرفه وجربه يالربع ؟؟

وجزاكم الله خيرا مقدما

[bb5599]

وعليكم السلام ورحمة الله وبركاته
مساك الله بالنور اخوي
فيه ورشة بالسلي ممتازة جدا جدا جدا وبتشوف بعينك اذا رحت له..
شغل نظيف ومرتب..
اسم الورشة ( سوافي)..
الوصف: وانت ماسك الدائري من الجنوب متجه للدائري الشرقي وبعد ماتتعدى مصنع الاسمنت بيجيك النفق امش عدال بيجي امامك طريقين طريق يسار يدخلك الدائري الشرقي وطريق آخر امامك جديد يطلعك للسلي ادخل مع الطريق هذا تجيك اشارة رح يمين امش سيدا حتى تجي على يمينك عمارة فيها كبينة هاتف ادخل معها يمين ثاني لفة يسار تصير الورشة امامك .. تراها بين مستودعات لذلك يكمن تضيع لكنها ممتازة..
أتمنى اني خدمتك اخي الغالي..

[ابويعقوب]

السلام عليكم ورحمة الله وبركاته
تكفون الي يعرف محل بالشرقية يدلنا عليها ضضضضضضضضضضضضضضضضضضضروري جداًً

[الفهد11]

صادق اخوي bb5599 ورشة سوافي معروفه مره
وواحد من اخوياي شاري حوض جديد مكمله من الى عند ورشة سوافي
وارجو اني افدتك .

[ابن بدران]

السلام عليكم
الله يجزاكم خير ويحرم وجيهكم ووالديكم عن النار

اخوي bb5599
بيض ولله وجهك وما قصرت والله لايهينك إن حصل الوصف من داخل السلي أو رقم تلفون الورشة

[غالي]

انا مركب عند السوافي بس من وجهة نظري ماتستحق السالفه 600 ريال
الصراحه تنقال كلها بطاريه ومدد لها ودقمه وانتهى الوضع
القطع ماتكلفهم على فكره 250 ريال الى 300 ريال والتصليح في نصف ساعه
بس وش نقول
الله يعين وينصرنا على الظالم

[المشراق]

أخي الغالي فيه محل بالسويدي ارخص بكثير وأنا مركب عنده في صالون جمس ومحله وانت متجه من الشرق للغرب مع شارع السويدي بعد النفق تجيك اسواق الراجحي على يدك اليمين ومع اللإشارة لف يمين ثم تجيك إشارة لف يمين بعد حوالي 200 م تجيك ارض فضاء على يدك اليمين الورشة مقابلتها قبل المطبات الصناعية وبجوارها بقالة ومصور ومخبز الخيلاء ( مركز الرياض ) المهندس فلبيني اسمه قطو وارجو لك التوفيق 0

[هاوي الله]

ياخوي تراها بسيطه ليش ماتركبها أنت!؟ وش فرق ابو هنود وبليبينو عنا !!!؟

يعني 300 ريال شغل يد معقوووووله !!؟ يُعقل إنها بــ 50 وآخر حد 100 ريال غير ها والله مايشمونها أركبها بنفسي يكون بعد أحسن أضبطها ضبط وأكون حريص على سيارتي أكثر من الورش &

[ابن بدران]

السلام عليكم
يالله الربع الله يجزاكم خير ويحرم وجيهكم عن النار
السالفة ماهيب سالفة تركيب بطارية ثانية ...!!!
البطارية الثانية أنا اللي مركبها بيدي ما كلفت مع تفصيل القاعدة والاسلاك والكتاوت ولا 200 ريال
كلها مشتغلها بيدي الا تشبيك الكتاوت بس علشان تفصل مع السلف وتشتغل مع تشغيل السيارة

وحبيت أختصر القصة والسؤال والظاهر لازم الشرح

السالفة يالربع معي باترول مقلوب ديزل وتخبرون الديزل ومشاكل التشغيل معه خصوصا بالشتاء
وركبت بطارية 100 امبير للسيارة والثانية 70 امبير للثلاجة الكهرب
البطارية الاضافية تشحن من الاساسية بسلك بينهم مع كتاوت والشحن مع تشغيل السيارة واذا طفيت تفصل البطاريات عن بعض
الدينمو 90 امبير ولا يركب على الديزل أكبر لان وراه طرمبة الهواء لاصقة فيه (يعني مابه محل علشان يركب دينمو أكبر)

المشكلة الثلاجة تسحب البطارية الثانية حتى لو الجو بارد مع إن البطاريتين كلهن جديدات والدينمو يشحن زين مافيه خلاف ..!!
الثلاجة سحبت البطارية والجو بارد يعني ما تشتغل واجد بصلالة الصيفية اللي فاتت وقمت غيرت البطارية بجديدة
وبمقناص الساحل قبل رمضان بعد سحبت البطارية الجديدة قمت وشبكتها ببطارية السيارة الاساسية ؟؟؟

يعني عندي مشكلة بالشحن وابي اقوي الكهرب إذا كان فيه مجال
علشان كذا أنشد عن 4*4 اللي يذكرونه بشوف عندهم سنع والا لا ..؟؟

طولت عليكم يالربع لكن علشان تكونون بالصورة
الله يطول أعماركم على الطاعة ولا يهينكم على مروركم وفزعتكم

[j w a l]

أخي الغالي فيه محل بالسويدي ارخص بكثير وأنا مركب عنده في صالون جمس ومحله وانت متجه من الشرق للغرب مع شارع السويدي بعد النفق تجيك اسواق الراجحي على يدك اليمين ومع اللإشارة لف يمين ثم تجيك إشارة لف يمين بعد حوالي 200 م تجيك ارض فضاء على يدك اليمين الورشة مقابلتها قبل المطبات الصناعية وبجوارها بقالة ومصور ومخبز الخيلاء ( مركز الرياض ) المهندس فلبيني اسمه قطو وارجو لك التوفيق 0

اخوي كم سعر التركيب عنده وهل هو يسوي القاعده للبطاريه الثانية ام لا ايضا هل يركب معه كتاوت ولا لا

انا عندي جي اكس ودي اركب له بطاريه ثانيه

يعطيك العافيه

[أبو الكشتات]

جئتكم بالخبر اليقين عن السعر بالتفصيل
انا عندي ثلاث سيارات مركب فيهن بطاريات
الكرسي (70)
الكتاوت كتاوت فرد (70)
التركيب (70)
اسلاك اصابع (30)
وسلامتكم

[j w a l]

جئتكم بالخبر اليقين عن السعر بالتفصيل
انا عندي ثلاث سيارات مركب فيهن بطاريات
الكرسي (70)
الكتاوت كتاوت فرد (70)
التركيب (70)
اسلاك اصابع (30)
وسلامتكم

دلنا على اللي ركبها وهل انت مركبها في الرياض ولا وين

[أبو الكشتات]

ركبتها ببريده تركيب الكرسي عند الحسن والتمديدعند المقيطيب وسلامتكم

[هاوي الله]

كرسي بــ 70 ريال !!!!؟ معقوله !! يمكن مصنوع من نحاس ههههه

[متعة الترحال]

اخوي بن بدران
إسمع العلم وانا أخوك من واقع تجربه
اللي يركبون بطارية إظافية والمشهورين بهذا الشي: ورشتين حسب علمي :
1) ورشة 4*4 إمتداد طريق العروبة بام الحمام وهي الأفضل بلا منازع حسب رأيي ،،
ميزاتها : شغل نظيف ومرتب ـ أسلاك مخفية ـ القطع اللي يستخدمونها جيده جدا ـ الأسلاك حرارية خاص للثلاجة ـ عندهم كتاوت ممتاز وقوي .
عيبها الوحيد : السعر غالي ،،،
بالنسبة لي زينت عندهم التالي :
1ـ بطارية إظافية + قاعدة . 2ـ تمديد للثلاجة سلك حراري مع فاصل عند الطبلون _ حاط ثلاجة 50 لتر _. 3ـ تمديد أسلاك للأيكوم والقارمن . 4ـ تمديد لمحول الكهرباء . 5ـ عدد ( 2) لمبة غاز بالكبوت والثانية مسحوبه ورا للشنطه ،،،
مع ملاحظة إنهم حاطين إفيوزات واحد رئيسي كبير المقاس وعدد سته الحجم المعروف لكل نوع من أنواع التمديد وذلك لحماية الشبكه الكهربائية من الإلتماس ،،
وذلك بسعر (( 1100 )) ريال قبل سنتين ولا أدري نزل سعرهم الآن ولالا وللمعلومية الى الآن ما شية زي الحلاوة ولا يطفا الموتر أو يسحب البطارية الرئيسة ولا جيب إشتراك ولا هم يحزنون .

2) ورشة سوافي بالسلي إشتغلوا عندها بعض الشباب وشغلها صراحة ما يرتقي لجودة شغل 4*4
علما إنهم جيدين بتمديد المحول ،، وهي أرخص بالقيمة ،،،
وإن تبغى نصيحة أخوك إذا موترك معك مطول و لا عندك نية بيع عندك 4*4 لاتجنب عنه ،،،
وتقبل تحياتي ،،،

[شايب الصمان]

وعليكم والسلام ورحمه الله وبركاته

أئييد كلام الاخ كاشت كاشت

وللمعلوميه نقلوا محلهم للشرقيه ومن أراد عنوانهم يرسل على الخاص . حسب سياسة المنتدى .

[منتعش]

أخوي اللي يقول إنه مركبها عند محل بالسويدي
ياليت تفيدنا الله يحفظك بكم سعرها ؟
وماذا يشمل شغله ؟
والله يرعاك ويوفقك .

[ملاعب الريح]

أخي الغالي فيه محل بالسويدي ارخص بكثير وأنا مركب عنده في صالون جمس ومحله وانت متجه من الشرق للغرب مع شارع السويدي بعد النفق تجيك اسواق الراجحي على يدك اليمين ومع اللإشارة لف يمين ثم تجيك إشارة لف يمين بعد حوالي 200 م تجيك ارض فضاء على يدك اليمين الورشة مقابلتها قبل المطبات الصناعية وبجوارها بقالة ومصور ومخبز الخيلاء ( مركز الرياض ) المهندس فلبيني اسمه قطو وارجو لك التوفيق 0

عن إذنك أخوي ابن بدران

عندي إستفسار عن طريق موضوعك للأخ المشراق

كم كلفك الشغل وهل فيها مشاكل......

(ملاعب الريح)

[الرهدن]

اللي يبي الدراهم تخدمه ولايخدمه يركب عند 4*4غالي فوق 1000ريال لكن حلال عليهم الدراهم00واللي ماشاف وشلون التركيب لايحكم00


غفر الله للجميع00




.

[ابن بدران]

السلام عليكم ورحمة الله وبركاته

اخوي الكريم j w a l
عسى اخوي المشراق يقرا سؤالك ويرد عليك
ولاهنت

اخوي الكريم أبو الكشتات
صدقت تقريبا نفس التكاليف عندي
ولاهنت

اخوي الكريم فتى البران
70 ماهيب شي وأنا اخوك عند الوقت اللي ياخذه التفصيل
الدعوى ماهيب غلا (الحديد) الدعوى الوقت اللي يضيعه العامل علشان يفصل الكرسي على سنع
ولاهنت

اخوي الكريم كاشت كاشت
الله يبيض وجهك عز الله انك تجيب العلم الطيب وتحري به
كفيت ووفيت ياغالي مابعد كلامك كلام ..
ولاهنت

اخوي الكريم شايب الصمان
حياك الله عدد ما كتبت ولاهنت من أول نحسبه قريب بالرياض وأثرهم مبعدين ؟؟
ولاهنت

اخوي الكريم منتعش
على الله يرد عليك الأخو
ولاهنت

اخوي الكريم ملاعب الريح
الموضوع موضوعك ياخوك
عسى الله يجعل فيه فايدة للجميع
ولاهنت

اخوي الكريم الرهدن
والله ياخوك لو إننا نحسب للدراهم ما شرينا جيوب ولا كشتنا وقنصنا ؟؟
والشغل الزين يستاهل زود القيمة المعقولة ..لكن المبالغة ؟؟ما احد يرضى بالغبينة وأنا أخوك
التركيب مركبين من زمان بس نبي من يفحص الشغل ويشوف وش عيبه ...
ولاهنت ..


المعذرة يالربع على التأخير بالرد
رحت لورشة أعرفها من سنين اسمها ورشة (الناصرية) بالصناعية القديمة وحطيت السيارة عندهم
أعادوا ترتيب الأسلاك مرة ثانية وخاصة كيبل (الماص) غيروه لأن الأول صغير يقولون ما يكفي ؟؟
ومن عقبها ما عاد أشركت للسيارة ..
ولا بعد جربت الثلاجة بعد عليها علشان نحكم صح ...

الله يجزاكم خير كل واحدن باسمه وشخصه الكريم ويحرم وجيهكم عن النار ووالديكم