مطلوب شيروكي جير عادي

[بنيللي]

مساكم الله بالخير يا جماعة :
لي صديق عزيز علي ولا هان الحاضرين كلكم اعزاء والله يعلم . يدور له على جيب شيروكي جير عادي من موديل 1996 وحتى 1998 ويفضل اللون أحمر . وأهم شي النظافة جير وماكينة وبدي .
فالي خابر موتر من هالنوع يعلمني وجزاكم الله خير تراه شراي وما بذنه ماي .
شاكرين حسن تعاونكم.

[جــلــمــود]

والله يا عزيزي بنيللي المشكلة انك بالكويت ولا كان اقولكاذا صاحبك ماهو مستعجل حيل وعنده نية يروح ياخذ الموتر من اي مكان فا بالسعوديه في مدينة جده شفت نوعيات كثير وموديلات كثير من الي يرغبها خويك اسعارها ارخص من الرياض والدمام
وغير كذا جده مافيها رمال واهلها قليل يطرقون البر لذلك تجدها في مجملها نظيفة
ولكن غير ذلك مااذكر شي
واعذرني اخي بنيللي ولكن حبينا نفزع بالي نقدر عليه



مع احلى الاماني

[الاجودي]

انا اعرف واحد يبي يبيع شروكي 96 لون ابيض قير عادي

توه شاريه من الامارات وهو الحين في الرياض

وهو توه شاريه يعني الى الحين ما غير لوحاته

[الشيخ]

راجع مكاتب حولي
قبل كم يوم انا شايف واحد اسود موديل 99 كل مافيه عادي حتى الابواب والشبابيك
بس بصراحة ما عجبتني نظافته ولا سعره
بس للعلم مسحت السوق مالقيت غيره الا واحد بدون دبل اذا تصبر لك اسبوعين وتاخذ جولة على معارض السيارات يمكن جابوا شي جديد
ولا رح للحراج تراك بتلقى بس ما اذكر اني شفت شروكي نظيف بالحراج
بس انت رح والحراج كل يوم يتغير
( مكانه الجديد اذا ما سمعت عنه ورى سكراب امغره )
و سلامتك

[راعي الحمره]

اخوي الغالي بنيللي انا اوافق كلام اخوي الشيخ الاني انا دورت حوالي ثلاث شهور علشان احصل شروكي قير عادي بس انصحك اذا بتاخذ اخذ من 97 وصاعد الان اجمد بالديكورات وشكله احلى .


مع تحيات

اخوك راعي الحمره

[بنيللي]

مشكورين واجد يا جماعة على اهتمامكم بموضوعي .
عندي سؤال ثاني انا لقيت شيروكي جير عادي بس وارد أمريكا وقالوا لي انه يجي شفت واحد ووارد الكويت او الخليج يجي شفتين ، شنهو الفرق بينهم وهل له تأثير ؟

[راعي الحمره]

اخوي الغالي بنيللي الشروكيات التجاريه كثريه بالكويت والمشكله انها تجي مواصفات ضعيفه الان اهل المكاتب يدورون الرخص والربح العالي , والاغلبيه شفت واحد يعني تاير واحد الي يحركه البككس , اذا انت معزم انك تاخذه وكان سعره مناسب ما في مشاكل , واذا حبيت تغير البككس وتركب شفتين تلقا بالسكراب عند بن نخي يجيبهم من المصنع جديد مو مستعمل وسعره مع التركيب 180 دينار واذا كان مع البدل يطلعلك ارخص بواجد .

وانشالله اني اكون وصلت المعلومه واذا حبيت اي معلومه عطني خبر .

مع تحيات
اخوك راعي الحمره

[بنيللي]

عشت يا راعي الحمره وعساك على القوة على هالمعلومة، في الحقيقة انا فعلا ناوي على الشراء بس مثل ما قلت اسعارهم غالية بالنسبة للشروكي التجاري .
واذا بقيت اي معلومة ما راح اتردد ابسألك .
وشكرا