من يخبر لي محل يركب ( حنايا ) للجمس الحوض ؟

[منتعش]

السلام عليكم ورحمة الله وبركاته
حي الله أخواني الغالين والمحبين للنفس
مساكم الله بالخير .

أخواني : عندي جمس حوض ( أحمر ) - وأبي - أركب له ( حنايا ) وطربال أسود .
من منكم يعرف محل - سعره مناسب - غير ( المواهب والمميز ) هؤلاء غالين
والجمس يعني ما يستاهل لأن موديله ( 90 ) وبدون دبل .:no:
وياحبذ لو يكونون حقين الحنايا والطربال حول بعض عشان الواحد يرتاع
وعشان ما يذبونها على بعض إذا ما ضبط
والله يرعاكم ويبارك فيكم .
وفمان الله

[عاشق البسيتين]

الصناعية القديمة اذا جتك الاشاره شف رابع محل على ايدك اليمين يركب لي نوع من السيارات

[منتعش]

حي الله أخوي المحب : عاشق البسيتين
وأشكرك على تفضلك وزيارتك .
بس الله يحفظك ياليت توضح أكثر
من أي إشارة أنا جاي ؟
ووش وجهتي ؟
واسم الورشة ؟
والله يرعاك

[altheeeb79]

أخي فيه محلات كثيره في الصناعيه القديمه وتقريبا شغلهم كله واحد وبنفس الجوده000 لكن نصيحه حاول انك تخفف من كميه مواسير الحنايا قدر الامكان حتى لو تطلب الامر انك تفصل واحد على مزاجك0هم عندهم شئ جاهز واكثره ثقيل على السياره لذلك حاول تفصل تفصيل0000000 ايه تذكرت محمل اصلح عنده حنايا وصناديق العده والعزبه بسيارتي لانه عندي ونيت تقريبا مثلك0 لكن وصفه صعب وسأحاول وصفه قدر الامكان000 انت نازل من كبري غبيره الى بين حلة العنوز وخان شليله متجه شمال تجيك اشاره لف يمين وعلى طول متجه شرق( حتى بالماريه يكون على يدك اليمن محلات قطع غيار وعلى اليسار ورش والشارع بوسطه رصيف) تجيك اشاره (وقف عندها واذا ولعت خضراء امش )على طول(بالماريه هذه الاشاره حرف تي يمين تدخلك حلة العنوز ويسار ترجعك ) بعد هذه الاشاره بحوالى 100أو 300 منر شوف يسار فيه محل حداده فتحه وحده وبجانبه من جهة الشرق محل حلو ديكوره شوي محل المنيوم وهذا محل الحداده المقصود وتراهم يمانيين بس تعاملهم الى حد ما زين000000000000000 واذا طولت الى اخر الشارع بتشوف على اليسار محلات حداده كثيره00000000000000000000

[منتعش]

حي الله أخوي المحب : altheeeb79
وأشكرك على تفاعلك للموضوع
وودي أسألك - الله يرعاك -
الحديد هل يوجد نوع خاص لذلك أو أي حديد عادي ؟
أو أنه يدهن بمادة المانعة للصدأ ؟
لأني أخاف من صدأ الحديد .
وياليت الله يبارك فيك تعطيني أقتراحات أو أفكار قبل التركيب . منكم نستفيد .

============
وينك يا أخوي المحب : عاشق البسيتين ؟؟؟؟

[altheeeb79]

هلا أخوي المنتعش00 أسف على تأخير الرد لكن البارح حصلت سؤالك وجلست أكتب لك الرد وأجمع اللى بالدميجه من أفكار وأخذ مني وقت ولما عطيت الجهاز الامر باعتماد الرد صار مشكله بالمنتدى ماأدرى عندي فقط أوعند الجميع المهم تسكر المنتدى وجلست أحاول الدخول لمدة حوالي 20 دقيقه مره يقول لايمكن العثور على الموقع ومره يدخل واذا بدأت التصفح يقطع المهم زعلت وعصبت وسكرت الكمبيوتر كله ورحت أجيب خبز لعيالي(ههههههههههههه)0 وهذه ملاحظه أسوقها للمسؤلين عن المنتدى لاني كنت أدخل على منتديات ومواقع أخرى في نفس الوقت وزي الحلاوه ماكان فيه مشكله000 تجد الرد تحت وهذا رقمي اذا فيه أسئله مستعجله(0505459290)

[altheeeb79]

أخوي المنتعش المحل اللي قلتلك يعرف محلات البويه وأهم شئ انك تدهن الحنايا بدهان أساس ومن بعد تدهن اللون اللي ترغب والعاده نفس لون السياره(دهن الاساس والبويه قبل ماتركب الحنايا) أما الحدبد فهو حديد عادى ونوعه خفيف وهو المستعمل في صنع الحنايا وكذلك خيام بيوت الشعر(على حسب ماأعرف)فيه حاجه وتراها مهمه من وجهة نظري بين حافة الصندوق من فوق والحنايا ركب ربلات بلاستيك (مثل لستك كفر السياره) عشان يمنع قرقعة الحديد مع بعض 0000 الحداد سيخرق حافة الصندوق من فوق ومن نفس المسافه سيخرق الحنايا عشان يركب المسمار ويربطه بالصاموله من تحت خله يخرق البلاستيك ويحطه بينهن عشان المسمار يمسك الثلاثه مع بعض000(ملاحظه 0لاتنسى ورد المسمار من تحت وفوق ترى الورد(بكسر الواو وفتح الراء) مهمه000 فيه جاجه انا مسويها بالونيت عندي انا خليت الحداد يلحم الصاموله تحت الفتحه اللى فتحها لان الصنوق فيه توانك ماء وصناديق عده وكلها مثبته بالصندوق لذلك لحمت الصواميل من تحت عشان اذا انحلت الصواميل مع الوقت والمطانيج اقدر اربطهن بسهوله وبدون فك توانك الماءوصناديق العده0000 هذا اللي في بالي الان واذا تذكرت شئ أعلمك00(رجاء أخوي المنتعش اسأل ناس اخرين قد يكون عندهم أفكار أحلى وأنفع مني) والله يوفقك

[منتعش]

والله أنا مثلك أخوي المحب : altheeeb79
تعبت .. أبي أرد عليك عدة مرات ورافض الرد .
وأشكرك على حرصك ومعلوماتك القيمة .
وتراها كلها في عين الأعتبار .
وننتظر البقية الله يحفظهم ويرعاهم .
وبارك الله فيك أخوي المحب .

[الرهدن]

السلام عليكم00
أخ منتعش هل لقيت من يركب حنايا وشغله زين وذمة00


.

[منتعش]

حي الله أخوي : الرهدن
أبشرك أمس يعني يوم السبت 4/11/1427هـ
رحت للصناعية القديمة ولقيت محلات واجد
ومشيت عليهم واحد واحد
المحلات الأولى يقولون 800 ريال واللي بعده 650 حتى وصلت لوحد سعره 380 ريال
وقلت ميده الشي اللي أبيه
ويوم الاثنين بيطلع إن شاء الله
والله يرعاك ويحفظك

[هاوي قصيده]

اخوي منتعش


اذا طلع باذن الله ...لا تبخل علينا بصوره

والله يطعمك خيره يابعد حيي

[شاص]

بـ380 ريال متأكد ؟؟
كم ارتفاعه ؟؟
هل هو مرصص ؟؟
وشلون شغله ؟؟
بأي ورشة ؟؟

بانتظار ردك ..

[منتعش]

يا هلا ومرحبا بأخواني الفضلاء :
هاوي قصيدة
أبشر إن شاء الله بنزل الصورة

============
مراحب ومراحب ومراحب بأخوي المحب : شاص
تعرفني أدور أدور إلين أدور الرخيص والزين ههههه
المحل الله يحفظك بالصناعية القديمة
السيارة : جمس قطع صغير
أرتفاعه 45سم تقريباً
والطول 205سم
والعرض 140 سم
ومالك لو ماهو رص
وبنزل صورته إن شاء الله - أجل بأخر راعي الشراع ما يركبه لأنه مواعدني اليوم عشانكم -

[شاص]

يا هلا ويا غلا ويا مرحبا .. مغير أتردد على هالموضوع انتظر الرد .. تدور الرخيص والزين معادلة صعبة شوي لكنها ماهيب مستحيلة (شكلك تحب الدراهم ) :D :D .. وبعدين ارتفاع 45 كأنه كثير وإلا:j ؟؟ وكم عقرب حطيت ؟؟..
عجل علينا بالصور والتفاصيل الله لا يهينك وإضافاتك وإبتكاراتك المميزة على هالشد واللي تعودناها في كل مشاركة لك

[منتعش]

أهلين وسهلين بأخي المحب : شاص
الله يهديك تراني منيب بخيل ولا ني أحب الدراهم بس أحب ( الرخص ) :D
وهذي الله يحفظك الصور للحنايا ( وتراني أخرت تركيب الشد عشانك لكي أنزل الصور )

http://www.mekshat.com/pix/upload/images23/mk7805_gmc1.jpg

http://www.mekshat.com/pix/upload/images23/mk7805_gmc2.jpg

http://www.mekshat.com/pix/upload/images23/mk7805_gmc3.jpg

http://www.mekshat.com/pix/upload/images23/mk7805_gmc4.jpg

يلاحظ في الصور التي في الأسفل أنه لا يوجد حديد لربط الحبال
وأنا قاصد هذا ، عشان إذا ركبت الشراع أخلي الربط نوع ( زرار ) لأنه أسهل في الفك .
http://www.mekshat.com/pix/upload/images23/mk7805_gmc5.jpg


وهذه الصورة وضعت قفل مخروق داخل الباب لحماية الأشياء والأستفادة منه في عدة أشياء :
http://www.mekshat.com/pix/upload/images23/mk7805_gmc6.jpg

وآمل أن ينال على اعجابكم جميعاً .

[شاص]

عز الله إنك كفيت ووفيت .. وآسف لتأخيرك .. فكرة القفل هذي طبعا من بنات أفكارك - الله يصلحهن http://mekshat.com/vb/images/smilies/biggrin.gif - .. والشراع فصلته ولا توك ؟.. عارف إني زودتها شوي .. بقي وصف الورشة ولا عليك أمر

[GL2006]

ياليت وصف المحل يالغالي

[هاوي قصيده]

ماشاء الله تبارك الله...

شغل جميل

الله يعطيك خيرو ويكفيك شرو

[منتعش]

يا هلا ومرحبا بأخوي المحب : شاص
ما تحس إنك طولتها شوي كل مره تسأل :d :d :d
أبشر بسعتك أنت أسأل وأنا أجاوب
الورشة الله يحفظكم جميعاً
في الصناعية القديمة
وأنت واقف عند إشارة الزجاج اللي على يدك اليمين ووجهك شمال
رح يمين يصير وجهك شرق ، تعد الإشارة الأولى لين يجيك محلات الحدادة على يدك اليسار
بالمارية تجيك على يدك اليسار مديور مزفلت رح معه يصير وجهك غرب
تقريباً 5 أو 6 ورشة على يدك اليمين وأسمها ( ورشة الوفاء ) وترى اللوحة صغيرة
يعني ركز زين وأنتبه تعطل السير ;)
والله يرعاك ويوفقك

[منتعش]

حي الله أخوي : GL2006
المحل الله يرعاك وصفته في الأعلى لأخوي : شاص
ياليتك تشوفه
والله يحفظك

===========
أهلين وسهلين بأخوي : هاوي قصيده
وحياك ربي على مرورك الطيب
=========

والصور بعد الشراع جايه إن شاء الله
يعني كل يوم يا أخوي : شاص شرف على الموضوع :j

[شاص]

يا هلا بالغالي منتعش .. أنا مسنتر عند الموضوع من كتبته http://mekshat.com/vb/images/smilies/wink.gif .. عجل ركب الشراع الله لايهينك http://mekshat.com/vb/images/smilies/biggrin.gif وإلا وش رايك أروح معك :D :D

[GL2006]

في انتظارالصور

[منتعش]

يا شين اللزقات يا شاص
ورانا ... ورانا نبي الفك منك في النت وشلون عاد نفتك منك بالسوق ههههه
أبشر أخوي المحب أنا ركبت الشراع بس بنزل الصور في الجهاز وبرسلها إن شاء الله

===========
مراحب أخوي : Gl2006
,وأبشر بالصور إن شاء الله

[منتعش]

حي الله أخواني جميعاً
وخاصةً إللي ناشبلي أخوي ( شاص ) :D
هذه بعض الصور لتركيب الشد ( الشراع )

http://www.mekshat.com/pix/upload/images23/mk7805_gmsh1.jpg

http://www.mekshat.com/pix/upload/images23/mk7805_gmsh2.jpg

http://www.mekshat.com/pix/upload/images23/mk7805_gmsh3.jpg

http://www.mekshat.com/pix/upload/images23/mk7805_gmsh4.jpg

والبقية سوف تأتي إن شاء الله

يالله وينك يا شاص !!!! :j

[شاص]

استلمت.. ياخوي دمجة هالزيدي ما هيب غريبة كأني قد شفته :rolleyes: .. عموماً عجل علي الظاهر بيطلع الشتاء وأنا أحتريك تخلص :D :D :D ( واحد يمووووووووووووووون بقوة )

[almobd3]

طيب نبي صور بعد التركيب

[منتعش]

طررررط ... أستلمت
أبشر بالصورة ألحين

هذه صورة الشد وهو جاهز :
http://www.mekshat.com/pix/upload/images23/mk7805_gmcs1.jpg

http://www.mekshat.com/pix/upload/images23/mk7805_gmcs2.jpg

http://www.mekshat.com/pix/upload/images23/mk7805_gmcs3.jpg

http://www.mekshat.com/pix/upload/images23/mk7805_gmcs4.jpg

http://www.mekshat.com/pix/upload/images23/mk7805_gmcs5.jpg

آمل أن تنال الصور على إعجابكم
وعذراً على عدم الدقة والتصوير الزين لأني كنت مستعجل
وبهذه تنتهي سالفة الحنايا والشد المطولة
وهذه هي الحلقة الأخيرة .

وفمان الله


وينك يا شااااااااص

[هاوي قصيده]

ماشاء الله تبارك الله


شغل مضبوط ..

يبيله عالجمس شد تنزاني بيج ..

على كيف كيفك ..

هذا اذا ما بعت الجمس حقي

لا هنت والله يعطيك خيره يا رب ويكفيك شره وشر الدنيا

اخوك

[شاص]

صحيح .. طيب وش نوع الشراع اللي ركبته وبكم وين وشلون شغله ؟؟ (خابر إنك تدور الرخيص:d )

[سالم بن سالم]

صحيح انك لزقه بس تعجبني الله يصبر منتعش عليك وعلى اسالتك الى ما تنتهي ، استاذي منتعش اعجبني الجمس كثير الله يعطيك من خيره ويكفيك شره .

عندي اقتراح ليش ما تسوي مسلسل بعنوان الجمس والحنايا بطولة منتعش وشاص ...

[منتعش]

أهلين وسهلين بأخواني الفضلاء :

هاوي قصيده
ومرحبابك وهلابك
ويعطيك العافية على طلتك الحلوة .
والله يوفقك .


==============

والله النشبه من هالرجال :o ( شاص )
وش خلاني أنزل الموضوع :j

هذا الشراع الله يحفظك نوع بلاستيك- تايلندي - الصنع
والسعر 350
ومركبه في الغرابي عند حقين الخيام
تبي تسأل شي ثاني تراك طولتها :D :D :D
والله يوفقك ويرعاك ويحفظك ويسددك
وهلابك ومرحبابك

[منتعش]

يا مليون هلا ومية سهلا بأخوي المحب : سالم بن سالم
والله إني ضحكة ضحكة من غير شعور يوم شفت تعليقك .
وش رايك تكون المخرج !!!!
والله يوسع صدرك بالعافية أنت وأخوي الغالي : شاص
والله يحفظكم جميعاً .



لا تصدق ياشاص
بعدين تسألني وتقول : ( وين ركبت الأزرار فيه ؟؟؟ ) ووين .......
أزعجتني
وفمان الله .

[سالم بن سالم]

تصدق ياخي العزيز شاص انك ذكي وظريف واستفدت كثيراً من اسئلتك حتى اني عرفت ان الحنيا تخضع لمواصفات فنية كثيرة منها الخفة والارتفاع والشكل كما ان الشراع له مواصفات ايضا منها نوعية القماش وطريقة تركيبه ...الخ

واستاذنا العزيز منتعش ما قصر اجاب واجاد والله اني افكر جد بشراء جمش حجم صغير مثل جمس منتعش بس يكون لونه ابيض لاني مهمل وكسول ولا احب تنظيفه بأ ستمرار .كما اني اعشق الون الابيض .

[منتعش]

حي الله أخوي العزيز : سالم بن سالم
لا تكبر راس ( شاص )
بعدين يزعجنا بكثرة الأسئلة . ههههه

أبشر بسعدك اغير لون الجمس إلا أبيض - أنت أمر بس -

[شاص]

أصلاً أنا مركب شد وشراع ومن أبدع ما يكون - اللي تشوفونه بالتوقيع- بس أبغى باقي الأعضاء يستفيدون وياخذون خبرة .. وهذي طبعاً إحدى طرق التعليم ، وحتى أقيس مدى حلم وسعة صدر أخوي المنتعش :D :D :D (شكل وده يدبغن :mad: :mad: )

[منتعش]

كأنك داري يا أخوي الغالي والمحب والعزيز ( شاص )

[almobd3]

احلى شي لمعة الكفرات
وش الملمع الي تستعمله؟

[almobd3]

<<<888>>>
كلـ(ن) على همه سرا

[منتعش]

مراحب أخوي الغالي : almobd3
وأشكرك على مرورك الطيب .
سؤالك حول التلميع :
أنصحك بعدم التلميع لأنه يضر الكفرات مره
وترى سيارتي يوم غسلتها ولمع الكفرات تهاوشت معه
وقلت له : ليش تلمع ؟

وعلى العموم شرف لي تفضلك وزيارتك للموضوع .
والله يرعاك ويوفقك

[ملاعب الريح]

مشكور لاكن ما قلت لنا وصف المحل اللي فصلت عنده الشراع ودي أفصل شراع تنزاني للحنايا على شاص وياليت لو ترسل رقم الرجال ولا رقم المحل وأكون لك من الشاكرين...........


تحياتي أخوك (ملاعب الريح)