ما خاب من استخار واستشار

[شويح]

السلام عليكم ورحمة الله وبركاته



يا جماعه ناوي اشري لي سياره وتكون للبر وللديره وتكون السياره ونيت وبعد الاستخاره وقف خياري عندالامريكي يا ال اف 150 فورد غماره ونص يا الجمس غماره ونص وباقي علي الاستشاره قالت اشاوركم وانتم افضل من اشاور واذا كان احد مجربهم وبالذات الفورد الجديد من قبل يعلمن عن مشاكله ومحاسنه



والله يوفق

[مسير عليهم]

شوف أخوي انا ماجربت الونيت الفرد لكن الفرد عامة مايتحمل الكرف مثل الجمس ولو حدتك الظروف لاسمح الله تلقى من يشتريه

الفرد لين ومريح لكن الجمس أصبر وأقوى

وشوف اللي عندهم خبرة

[آل علي]

الجمس تراه موتر وانا عاشق النوع القديم ومعي واحد منهن دبابه في البر وكدلك في المدينه

جمسٍ يهوم المدح ويحارب الذم ...............
...............امهجنٍ يحيي القلوب اشتغاله

أمه ترايستار وأبوه جي إم .............
............وأكثر اطبوعة من طبايع خواله

امصممينه للفضاء قبل يفطم .............
.........ويوم افطموه فقالت القاع أنا له

كن حس سلفه لا غرسته ورنم ................
.................ضحكت صغيرٍ يدّرج وسط صاله



ولك الشكر

[الكلاسك]

انحش من ونيت الفورد

[ابو ناصر2020]

الجمس ارغب للبيع ولا قطع الغيار بس القوه الفورد الجديد اقوا بكثير واسأل مجرب ولا تسأل طبيب .

[altheeeb79]

قبل كم سنه كنت بالمعارض (النسيم)ادور على ونيت للبر وشفت ذاك الفورد ونيت (نسيت معلوماته الان) يبغون يحرجون عليه وبدأالحراج وأنا معهم المهم وقف على الحراج يوم جيت اعطيهم العربون قالى واحد من حقين المعرض الملاعين الموتر ماوقف عليك وقف على واحد ثاني ورفض اخباري من هو (كنت ابغى اتأكد من صحة كلامه) المهم صار مشكله ذاك اليوم وقدمت شكوى على شيخ المعارض ولا طلعت الا العشاء من المعارض وانا امشي وأشوف راعى الموتر وكان شباب وقلي احمد ربك انك ماشريت الموتر وكنت اتصدد عنك طول الحراج ماأبغاك تشري الموتر لان مشاكل الفورد كثيره وقطع غياره نار وترى اللي شرى الموتر هو نفس المعرض000 على كل حال الحمدلله انه ماباعني الموتر وأبشركم رزقني الله موتر جمس ونيت اخضر دبل قير عادي واسم الموتر الان (الخضر)

[شويح]

اخواني كلً باسمه بيض الله وجيهكم وجزاكم الله خير على المعلومات

ويوم شفت الاجماع على الجمس اتكلت على الله وبشري جمس لكن يوم رحت للوكاله

قالو لي فيه نوعين من المكاين 2500 و 1500 وش برايكم الافضل


وجزاكم الله خير