أسعار السيارات , الى أين ..!!؟

[Wa7ed NJD]

السلام عليكم ورحمة الله وبركاته

الله يمسيكم بالخير جميعاً
) تقصدت أكتب الى اين بدلاً من الى متى , لأنه ومع الأسف الشديد المشكله كل مالها بأتساع عام بعد عام الى ان اصبحت الجيوب هي ((الولد البار)) بدلاً من الأراضي , فالجيب الذي يباع بـ 15 عام 2006-2005 اصبح يباع الأن بـ 35 بقدرة قادر
أختصاراً للوقت وبدون مقدمات ندخل بموضوعنا

عن اسعار السيارات بشكل عام , والجيوب المستخدمه بشكل خاص

بعد مابعت موتري ( خبالة مني قبل فترة ) رجعني الحنين للجيوب خصوصاً ايام الشتاء تكون مجبور انك تمشي بجانب المزفلت اكرمكم الله

جلست ابحث من قرابة شهرين على سياره مستخدمة ( رخيصة ) من قرابة 35 ونازل

تكون للبر فقط , لكن الواقع مؤلم

جيوب قيمتها العادلة ماتتعدى في افظل الحالات 15-12 الف ريال تباع على 32 ألف :mad:

سيارات على الشرط ( زي مايقول اصحابها ) تحتاج لأصلاحات فوق 8 الاف ريال ومع ذلك ماراح تصل الى مستوى مرضي

مبالغه بالأسعار بشكل غير طبيعي

قلت الي يبيعون بالنت ( خبلان ) خلني اروح للسوق , شفت العجب العجاب :eek:

الشركات المعروفه تلقى الموتر مكدود وطالع كل مافي بطنه
بعض الشركات الأقل رغبه بسوقنا تحصل النظيف لكن الكلام على الوكلاء والقطع غير المتوفرة :(

اصبحت بين نارين , نار موتر رخيص وقطعه غاليه وغير متوفرة وقيمته عادلة , ونار موتر غالي وقطعه رخيصه ومتوفرة وقيمته غير عادلة

[محمد 2002]

السبب ارتفاع أسعار السيارات الجديدة
وما دام فيه وكيل حصري يتحكم في السوق ووزارة تجارة متوفية دماغيا وزباين يطامرون من غير تفكير في تدبيل الأسعار فأكيد ان كل ماله يرتفع أكثر وأكثر
نعوذ بالله من الغلا

[سقم المعادي 1]

الاستيراد الاستيراد الاستيراد لا بارك الله في من وقفه ...

كان لي روحه لقطر في عطله الصيف لحضور زواج يوم خميس و من بكره الجمعه قالو اللي معي نبي نمر حراج السيارات اللي على طريق سلوى

ياجماعه الخير الكروزرات موديلات 98 عندهم نظاف بالهبل ماتعدن ممشى 150 الف في البعض منها و السعر يوصل لحول الـ60 الف ريال قطري و هو نظيف و يستاهل

عندنا مكروف على اذنه و ماشي 500 الف و ينباعن على 55 الف و حواليها !!

وهذا نموذج عن سياره وحده و هي الكروزر بما انها منتشره عندنا و عندهم فما بالك ببعض السيارات الثانيه ؟!

لو يفتحون الاستيراد محد طق لمواتر الشريطيه اللي هنا خبر ..

[اسبيدر مان]

وجة نظري انا مهب تأييد لرفع الاسعار او الحث على شراء السيارات بالاسعار الفلكيه
لكن مادام الموتر الى ابشريه ابستخدمه واببيعه بسعر زين يعني مايخسرني واجد فلا مشكله

ودام السيارات الجديده ترتفع مباشره راح يرتفع المستعمل

لكن نقول الله يعين

[منطلدز]

الزين غالي وانا اخوك

الشروكي ماتلقا مثل قوته بالبر وشكله بعد هيبة وخفيف للمطامر بالبر والديرة وسعره رخيص لكن من يجزم يشرية

الشروكي موديلات 2000 و2001 النظيف المكمل مايتعدا 20 الف وقطع غيارة بتراب الدراهم والسوق مليان منهن بس ان شريت لاتناظر السوق منتب قادر تبيع

والباترول موديلات التسعينات يطقن الاربعينات وقطع غياره شلق مع الوجه من الغلا لكن لهن زباينهن وتلقا اللي يشري لو بتبيع

واللاند تمسك راسك من اسعارهن حتى لو موديله 12 خخخ وقطع غيارة يبيلك تطلع قرض من البنك ولا يحتاج تروح السوق لو تبيع مجرد ماتنوي تلقا ثلاثة يحترونك عند باب البيت الصبح

وقس على ذلك وقرر وش اللي يصلح لك

[Wa7ed NJD]

الاستيراد الاستيراد الاستيراد لا بارك الله في من وقفه ...

كان لي روحه لقطر في عطله الصيف لحضور زواج يوم خميس و من بكره الجمعه قالو اللي معي نبي نمر حراج السيارات اللي على طريق سلوى

ياجماعه الخير الكروزرات موديلات 98 عندهم نظاف بالهبل ماتعدن ممشى 150 الف في البعض منها و السعر يوصل لحول الـ60 الف ريال قطري و هو نظيف و يستاهل

عندنا مكروف على اذنه و ماشي 500 الف و ينباعن على 55 الف و حواليها !!

وهذا نموذج عن سياره وحده و هي الكروزر بما انها منتشره عندنا و عندهم فما بالك ببعض السيارات الثانيه ؟!

لو يفتحون الاستيراد محد طق لمواتر الشريطيه اللي هنا خبر ..

رحم الله والديك , نعم هذا السبب

بالكويت قبل فتره حصلت باثفندر موديل 2005 رمادي نص فل مع حرمه ماشي حول 85 الف فقط ونظيف من اليوم لين بكره ومحدود بـ 28 الف فقط

بينما عندنا 2005 مشيه مطوف الـ 200 الف كيلو ماتاخذة الا 38 وزود ولقيت شي محدود ع 42 و 45

[Wa7ed NJD]

الزين غالي وانا اخوك
الله الله ماقلنا شي ياغالي , لكن كلش له حدود
الشروكي ماتلقا مثل قوته بالبر وشكله بعد هيبة وخفيف للمطامر بالبر والديرة وسعره رخيص لكن من يجزم يشرية
اختلف معك بهالنقطه , لو فيه خير ماعافه الطير , هذاهن موديلات حديثة مرميات بتراب الفلوس والسبب الوكيل , لا قطع غيار رخيصه ولاهي متوفرة
الشروكي موديلات 2000 و2001 النظيف المكمل مايتعدا 20 الف وقطع غيارة بتراب الدراهم والسوق مليان منهن بس ان شريت لاتناظر السوق منتب قادر تبيع

والباترول موديلات التسعينات يطقن الاربعينات وقطع غياره شلق مع الوجه من الغلا لكن لهن زباينهن وتلقا اللي يشري لو بتبيع
ما كأنك عكست الآيه ..! خذ هالسالفه :( لقيت قبل فتره رانجلر بالسوق راعي زعلان ماعطوه سعر طيب جيت عند الرجال واضح من استخدامه انه مايدل البر واستخدامه للمدينة فقط , قلت هات رقمك والله يكتب الي فيه الخير , اخذت رقم الرجال وخزنته عندي , واتصلت على الاستعلامات واخذت رقم المتحدة , فخمات اماميه موجوده والخلفيه بالطلب , طقم سيور 360 ريال , عكس خلفي 1190 , يارجال وين رخيصه الله يهديك ..!! اخذ لي مرسدس والا بي ام اصرف :p

بينما النيسان صحيح سعر مشتراه نار , لكن ياخي تربطه من الصدام للصدام بـ 2000 ريال

واللاند تمسك راسك من اسعارهن حتى لو موديله 12 خخخ وقطع غيارة يبيلك تطلع قرض من البنك ولا يحتاج تروح السوق لو تبيع مجرد ماتنوي تلقا ثلاثة يحترونك عند باب البيت الصبح

وقس على ذلك وقرر وش اللي يصلح لك

حياك الله , ردي بالأحمر داخل الأقتباس

[Wa7ed NJD]

وعليكم السلام ورحمة الله وبركاته

صدق ان عبداللطيف جميل حنون ولطيف

يعني لو رفع سعر اللاندكروزر الى 700 ألف بيتركونه ؟؟!!
او الكورولا الى 150 ألف
أو الكامري لنصف مليون ريال
او الهايلكس لربع مليون !!

بيلقى من يشتري وهو مبسوط !

فرصتك ياعبداللطيف لا توفرهم اسحب دراهمهم خلهم على الحديدة !!

ابو جميل وغير ابو جميل كلهم من نفس الطينه

بتفهمني ان الزياده بسعر السييرا 2014 الجديد منطقيه .!!

يا اخي كان SLE + اكسسوارات غمارتين بـ 128 مطلعه واحد من الربع

الحين SLE سلق غمارتين بـ 177 ان ماخانتني الذاكره والـ SLT بـ 190 تقريباً او 193

معناها الدينالي صار بـ 240 :p


هو المشكله كل وكيل يقارن سعر سيارته مع اسعار السيارات البديله ويرفع السعر

كمثال : ممكن يقارن الجميح سعر السييرا الغماره بسعر الشاص , ويالله كل واحد يقلد الثاني

تبي الدليل ؟ شف الأن اسعار الفورد الونيت + الدوج رام , ورح شفها بعد سنه او سنتين , بتزود بسبب ان السييرا زاد , والحسابة بتحسب

[منطلدز]

الشروكي اتكلم عن موديلات 2000 و 2001 ونازل الصالون

ماعمري اخذت قطع من الوكالة محلات الصناعية والتشاليح مليانة

بالمقارنة مع الباترول اللي معي حاليا والله القطع كانت ولازالت رخيصه

حتى انه منتشر كثير عندنا بعنيزة

لكنه موتر لطلعات البر بس وطلعات قريبة بعد لانه ماينوثق به

اما الباترول والله اني اعاني منه حاليا صح انه موتر ومركوبه طرب بس قطعه غالية

يارجال ريشة مروحة بلاستك لو اعطس عليه انكسرت سعره ب١٦٠ ريال !!! الاديتر كل يوم اروح للصناعية الحمه ماودي انشد عن سعر الجديد اخاف انجلط ههههههه

الشكوا لله وانا اخوك يازين الجديد بس

[الحربي 591]

اقول يا زين الشفر لو احط في 200 الف

[التعـ King ـديل]

افتح المجال للاستيراد من برا اي موديل وراح تنزل الاسعار والناس تربح البايع والمشتري

غير كذا الاسعار راح تصل الى المليون

الباترول عام 2005 السوبر سفاري كامل المواصفات ب 115 الف والفكسار كامل المواصفات ب 150 الف

الان الباترول ب 300 الف والفكسار ب 320 الف ناهيك عن اللكزس اللي وصل 430 الف

[وطن العزة]

طبيعي بتلقاها غاااااالية لأن سعر القديم مربوط بسعر الجديد , والجديد الحين نارٍ كبرى


الجيب اللي انت ذكرت بعام 2005 كان بـ 15 لكن شف كم كان أخوه الجديد


والمصيبه الأدهى منع الاستيراد من برا , وبكذا المستهلك بين نارين يا موتر جديد أسعاره تقصم الظهر و ما تطولها الا بقرض

و الا موتر قديم يرقع به لين ياصل قيمة الجديد

[فرفور بريده]

ابو جميل وغير ابو جميل كلهم من نفس الطينه

بتفهمني ان الزياده بسعر السييرا 2014 الجديد منطقيه .!!

يا اخي كان SLE + اكسسوارات غمارتين بـ 128 مطلعه واحد من الربع

الحين SLE سلق غمارتين بـ 177 ان ماخانتني الذاكره والـ SLT بـ 190 تقريباً او 193

معناها الدينالي صار بـ 240 :p


هو المشكله كل وكيل يقارن سعر سيارته مع اسعار السيارات البديله ويرفع السعر

كمثال : ممكن يقارن الجميح سعر السييرا الغماره بسعر الشاص , ويالله كل واحد يقلد الثاني

تبي الدليل ؟ شف الأن اسعار الفورد الونيت + الدوج رام , ورح شفها بعد سنه او سنتين , بتزود بسبب ان السييرا زاد , والحسابة بتحسب


اسباب ارتفاع السييرا لها اسباب كثيره

لكن بالله اقنعني الاند 2008 جي اكس كان ب 160 والحين طق فوق 200

واقنعني الربع والشاص كانت رخيصه والحين اسعارها وصلت 140 مع نزول مستمر

اقنعني الهلي كانت فل 2006 ب 60 الف تقريبا او ارخص .. والحين وصلت 90

الباترول فتك ايضا خبري فيه فل ب 170 !!

وش اللي تغير فيه ؟ فقط اشياء جماليه وربما اشياء طفيفه لاتذكر ولاتستاهل كل هالارتفاع

السييرا فرق فرق كبييير بينه وبين القديم

- واولهم المكينه اصبحت اقوى واخف خصوصا التورك قوي جدا + اقل صرفيه
- دفرنس ال 1500 تم تطويره واصبح اقوى من السابق
- انظمه رادار وانظمه اماميه وخلفيه ويمينك ويسارك .. كلها تحذرك من الاصدام وتجاوزات خاطئه بين المسارات ( وينبهك المرتبه اذا تجاوزت بشكل خاطئ يمين .. جانب المرتبه يمين تهتز )
- جوده المواد الداخليه اصبحت افضل من السابق بكثير
- نظام التعليق تم تطويره وتم اضافه مساعدات رانشو المعروفه للطرق الوعره
- تم تطوير عزل الهواء بشكل كبير جدا
- الصندوق اصبح يأتي بانور ليد بدلا من تركيبها
- ناهيك عن الشكل الجمالي اللي تغير بنسبه 80 بالميه عن السابق
- اصبح اكثر انسابيه وخفه من السابق

واشياء اخرى غيرها .. من الاخير هناك مبرر لزياده السعر

واما اغلب السيارات كلها ارتفعت بلا مبررات ابدا

[- النشمي -]

اقول يا زين الشفر لو احط في 200 الف

يستاهل الشفر وابن اخيه الجمس ولايهون الفورد :good2:
اول مواتر شقت الوعر في ارض الجزيره

[بدوي جنوبي]

السبب ارتفاع أسعار السيارات الجديدة
وما دام فيه وكيل حصري يتحكم في السوق ووزارة تجارة متوفية دماغيا وزباين يطامرون من غير تفكير في تدبيل الأسعار فأكيد ان كل ماله يرتفع أكثر وأكثر
نعوذ بالله من الغلا

لا معليش يا محمد وزارة التجارة نايمه اول
اما الان شغاله على قفا الوكالات
وتابع الصحف وشوف كلامى .

اما قولك زبائن يطامرون هذا الكلام الصحيح فيه سيارات في السوق
عائليه ودفع رباعى ومواصفات الامان عاليه جدااا وتقنيه افضل
وتجد سعرها مقبول جدااااا ويرضى المشترى






وعليكم السلام ورحمة الله وبركاته
صدق ان عبداللطيف جميل حنون ولطيف
يعني لو رفع سعر اللاندكروزر الى 700 ألف بيتركونه ؟؟!!
او الكورولا الى 150 ألف
أو الكامري لنصف مليون ريال
او الهايلكس لربع مليون !!
بيلقى من يشتري وهو مبسوط !
فرصتك ياعبداللطيف لا توفرهم اسحب دراهمهم خلهم على الحديدة !!


صحيح ارتفعت الاسعار لن لا تبالغ في الوصف
خليك منصف شوي




الزين غالي وانا اخوك

الشروكي ماتلقا مثل قوته بالبر وشكله بعد هيبة وخفيف للمطامر بالبر والديرة وسعره رخيص لكن من يجزم يشرية

الشروكي موديلات 2000 و2001 النظيف المكمل مايتعدا 20 الف وقطع غيارة بتراب الدراهم والسوق مليان منهن بس ان شريت لاتناظر السوق منتب قادر تبيع

والباترول موديلات التسعينات يطقن الاربعينات وقطع غياره شلق مع الوجه من الغلا لكن لهن زباينهن وتلقا اللي يشري لو بتبيع

واللاند تمسك راسك من اسعارهن حتى لو موديله 12 خخخ وقطع غيارة يبيلك تطلع قرض من البنك ولا يحتاج تروح السوق لو تبيع مجرد ماتنوي تلقا ثلاثة يحترونك عند باب البيت الصبح

وقس على ذلك وقرر وش اللي يصلح لك

والله كلامك مفروض ينحط في برواز
لان هذا واقع السوق :good2:

ههههههههههههههه اضحك الله سنك ،،، اجل قرض هاه :D



الشروكي اتكلم عن موديلات 2000 و 2001 ونازل الصالون

ماعمري اخذت قطع من الوكالة محلات الصناعية والتشاليح مليانة

بالمقارنة مع الباترول اللي معي حاليا والله القطع كانت ولازالت رخيصه

حتى انه منتشر كثير عندنا بعنيزة

لكنه موتر لطلعات البر بس وطلعات قريبة بعد لانه ماينوثق به

اما الباترول والله اني اعاني منه حاليا صح انه موتر ومركوبه طرب بس قطعه غالية

يارجال ريشة مروحة بلاستك لو اعطس عليه انكسرت سعره ب١٦٠ ريال !!! الاديتر كل يوم اروح للصناعية الحمه ماودي انشد عن سعر الجديد اخاف انجلط ههههههه

الشكوا لله وانا اخوك يازين الجديد بس

يا رجال عندى ربع 91 زر قزازة السواق خرب
وسئلت عنه ب 300 ريال بعد التخفيض 290 :eek: هنا الجلطه
لك الله ما شريته ،،، افتح القزازة اللى وراى واللى جنمبي ومبسوط وال 290 في الجيب
كويس انى ما سئلت عن الكربريتر :D:D

[فرفور بريده]

يستاهل الشفر وابن اخيه الجمس ولايهون الفورد :good2:
اول مواتر شقت الوعر في ارض الجزيره

انا اشهد :good2:

[العطاوي a511]

الشركات تربح وحنا نخسر وسلامتكم

[عاشق الددسن92]

ما اقول الا الحمد لله ان الددسنوشاص النيسان بعيده عن الغلى

[ابونبيل]

اسباب ارتفاع السييرا لها اسباب كثيره

لكن بالله اقنعني الاند 2008 جي اكس كان ب 160 والحين طق فوق 200

واقنعني الربع والشاص كانت رخيصه والحين اسعارها وصلت 140 مع نزول مستمر

اقنعني الهلي كانت فل 2006 ب 60 الف تقريبا او ارخص .. والحين وصلت 90

الباترول فتك ايضا خبري فيه فل ب 170 !!

وش اللي تغير فيه ؟ فقط اشياء جماليه وربما اشياء طفيفه لاتذكر ولاتستاهل كل هالارتفاع

السييرا فرق فرق كبييير بينه وبين القديم

- واولهم المكينه اصبحت اقوى واخف خصوصا التورك قوي جدا + اقل صرفيه
- دفرنس ال 1500 تم تطويره واصبح اقوى من السابق
- انظمه رادار وانظمه اماميه وخلفيه ويمينك ويسارك .. كلها تحذرك من الاصدام وتجاوزات خاطئه بين المسارات ( وينبهك المرتبه اذا تجاوزت بشكل خاطئ يمين .. جانب المرتبه يمين تهتز )
- جوده المواد الداخليه اصبحت افضل من السابق بكثير
- نظام التعليق تم تطويره وتم اضافه مساعدات رانشو المعروفه للطرق الوعره
- تم تطوير عزل الهواء بشكل كبير جدا
- الصندوق اصبح يأتي بانور ليد بدلا من تركيبها
- ناهيك عن الشكل الجمالي اللي تغير بنسبه 80 بالميه عن السابق
- اصبح اكثر انسابيه وخفه من السابق

واشياء اخرى غيرها .. من الاخير هناك مبرر لزياده السعر

واما اغلب السيارات كلها ارتفعت بلا مبررات ابدا

اخوي مع احترامي لك كلامك غير صحيح الاسعار ليس كما ذكرت

[أطلال نجد]

أخوي تبي النصيحة

خلك مع السيارة الجديدة أو النظيفة اللي سعرها فيها و معروفة بجودتها و لا تعرفها الناس


بالنسبة لوكلاء السيارات عندنا كلهم متساويين الآن و ما فيه أحد أحسن من أحد من واقع تجربة


موفق للخير

[Wa7ed NJD]

يا اخوان جزاكم الله خير

احنا مانتكلم عن شفر والا فورد والا غيره , الموضوع يتناول اسعار السيارات بشكل عام والجيوب بشكل خاص

وخصوصاً الجيوب للناس الدراويش الي مثل حالتي ولاعنده استعداد يشتري سياره للبر بـ 150 الف واكثر

بالنسبة لقطع الغيار , فلكل سيارة نقظة ضعف بما يخص قطع الغيار , لكن فيه شركات تشتهر بغلاء اسعار قطع الغيار عن باقي الشركات

كمثال : الفرود , وانا مستخدم لأكثر من سياره فورد , قطع غيارها كانت رخيصه خلال السنوات الماضيه , ارتفعت الأسعار قليلاً خلال هالسنتين وخصوصاً بعد ما انسحب وكيل الميركوري الحاج حسين , لكن مازالت بحدود المعقول , هذا مايخص قطع الغيار بشكل عام , لكن اذا شفنا مثلاً الأكسسوارات فهي نار الله المولعه , اسطب القراند ماركيز الأصلي الأصلي بقيمة اسطب المرسيدس بانوراما 2010 وعندكم المحلات اسألوا عن قيمتها , لكن نقول بشكل عام اسعار الفورد معقوله نوعاً ماء ولاتقارن مثلاً بأسعار الدوج او الكرايسلر ولاحتى الشفر , لكن تبقى كل سياره فيها نقطة ضعف بما يخص قطع الغيار

[Wa7ed NJD]

اسباب ارتفاع السييرا لها اسباب كثيره

لكن بالله اقنعني الاند 2008 جي اكس كان ب 160 والحين طق فوق 200

واقنعني الربع والشاص كانت رخيصه والحين اسعارها وصلت 140 مع نزول مستمر

اقنعني الهلي كانت فل 2006 ب 60 الف تقريبا او ارخص .. والحين وصلت 90

الباترول فتك ايضا خبري فيه فل ب 170 !!

وش اللي تغير فيه ؟ فقط اشياء جماليه وربما اشياء طفيفه لاتذكر ولاتستاهل كل هالارتفاع

السييرا فرق فرق كبييير بينه وبين القديم

- واولهم المكينه اصبحت اقوى واخف خصوصا التورك قوي جدا + اقل صرفيه
- دفرنس ال 1500 تم تطويره واصبح اقوى من السابق
- انظمه رادار وانظمه اماميه وخلفيه ويمينك ويسارك .. كلها تحذرك من الاصدام وتجاوزات خاطئه بين المسارات ( وينبهك المرتبه اذا تجاوزت بشكل خاطئ يمين .. جانب المرتبه يمين تهتز )
- جوده المواد الداخليه اصبحت افضل من السابق بكثير
- نظام التعليق تم تطويره وتم اضافه مساعدات رانشو المعروفه للطرق الوعره
- تم تطوير عزل الهواء بشكل كبير جدا
- الصندوق اصبح يأتي بانور ليد بدلا من تركيبها
- ناهيك عن الشكل الجمالي اللي تغير بنسبه 80 بالميه عن السابق
- اصبح اكثر انسابيه وخفه من السابق

واشياء اخرى غيرها .. من الاخير هناك مبرر لزياده السعر

واما اغلب السيارات كلها ارتفعت بلا مبررات ابدا

حبيبي , الأسعار الي ذكرتها صحيحه , لكن الكلام هذا كان عام 2003 تقريباً قبل التضخم العالمي

من بعدها بدت ترتفع اسعار السيارات بشكل عام وبدون مبرر

وكلامك بخصوص السييرا , احب اقولك اولاً اني من عشاق هالموتر لكن الحقيقه اشوف فيه مبالغه بسعره حتى بعد هالتعديلات , لانه ترا بالأخير بك اب ترك على قولتهم , اول كان عندي استعدادا اشتري SLT بحدود 140 لكن الأن 193 الف :eek: