هل اختياري خاطئ؟

[موسي المطر]

السلام عليكم ورحمة الله وبركاته
اخواني انا عضو جديد في منتداكم ومتابع لكم منذ فترة واحتاج لخبرتكم.
انا ارغب في شراء سيارة جيب تكون مريحة وذات خزان وقود كبير وتحافظ علي سعرها عند البيع.

قررت اشتري برادو 2013 جديد من البازعي. مواصفات السيارة هي:
6- سليندر بنزين
جير اوتوماتيك
فتحة سقف
مكيف اوتوماتيك
سبير علاق

وبعض التفاصيل الاخري الغير مهمة بالنسبة لي.

السيارة يقسم الشخص الذي يخدمني انها افضل من 2014 من ناحية السعر والبيع بعد الشراء وانها ربما افضل سيارة ساقتنيها. السعر 153 الف ريال.

طلبت منهم ان يخدموني في تركيب جي بي اس وعازل حراري وتغليف الفرش الارضية فجائت التسعيرة كالتالي:
جي بي اس: 2400
عازل حراري: 1400
تغليف الفرش: 600 ريال


خبرتي في السيارات محدودة جدا وهذي اول سيارة اشتريها من حر مالي. كان معي رينج روفر اشتراه لي الوالد جعله الله في جنات النعيم وبعته قبل فترة.

لا نستغني عن خبرتكم. والسلام خير ختام.

[غار بن شعلان]

الله يرحم والدك ويغفر له ويسكنه فسيح جناته

والله ياخوي انا ماجربتها للامانه جربت الفورنشر الي هو اخوه يشبه له ركبته فقط والصراحه ماهو مريح وضيقه جدا مراتبه مع اني ماني من الاشخاص الي وزنها زايد لكن انت لاتاخذ بكلامي

نصيحه وانا اخوك جرب السياره قبل لاتشتريها اما انك تستأجر لك يومين تجربها او تروح الوكاله وتطلب تجرب السياره وبعدها انت بتحكم مناسبه لك او لا

واذا بغيت الصدق ماراح تنفع لك مدامك مجرب الرينج روفر فرق شاسع بالراحه بمراحل وسنوات ضوئيه

فزي ماقلت لك لايهمك كلام الي بييبعك اكيد بيمدح عشان يسوق لسلعته عليك بالتجربه ثم التجربه ثم التجربه لاتحط مالك في شي ماتعرفه لو تشوف احد زملائك وتاخذ موتره يوم

هذا ماعندي وبالتوفيق لك اخوي ومبروك مقدما وش ماشريت والله يعطيك خيره ويكفيك شره

[aham707]

الله يرحم والدك رحمه واسعه

تبي الشور من مجرب انا كان عندي 2012 برادو 6 سلندر وجلس سنه وبعته واخذت فورتشنر 2013 طع شوري وخذ الموتر ولاتسئل الموتر افضل من الفورتشنر ال6 بمراحل ويكفيك انه ياباني 100% ووالله لو يرجع الزمن لورا ماابيعه ولاافرط فيه موتر بالبر بالخط وثلاجه وعزم ورساوه ورحب ومريح جدا قير اوتوماتيك وعادي مكينه قويه مكيفين منفصله شنطه وسيعه وثلاث مقاعد واسمه لاندكروزر في الاخير اتمنالك التوفيق

[اي-مكشات]

أولا مبروك السياره مقدما
انا جربت برادو 2009 (6 سلندر ) لمدة أربع سنوات مشيته به في النفود،القرشع, السهل، الطين، خطوط سريعه, ومقانيص، ...... من أحسن مايكون.عزمه قوي, نفسه خفيفه,متماسك, مايحتاج إلا زيت كل خمسة ألاف كيلو.
السياره ممتازه وإن شاء الله ماتندم على شرائها

[نايس × كول]

الفتورتشنر احلا من البرادوا

بعدين البرادو الجديد شكله سامج

خذ فور تشنر احسن او خذ فتك

[مزدهر]

الفتورتشنر احلا من البرادوا

بعدين البرادو الجديد شكله سامج

خذ فور تشنر احسن او خذ فتك

والله انك بديره والسيارات بديره

[موسي المطر]

جزاكم الله خير علي ردودكم. سؤالي هو هل السيارة 2013 افضل فعلا من 2014؟ ما ادري عن مواصفات الامان ومنع الانقلاب اللي في موديل البازعي. ثم هل اسعار الاكسسوارات خادميني فيها والا اركب لحالي؟

[ابونبيل]

الفتورتشنر احلا من البرادوا

بعدين البرادو الجديد شكله سامج

خذ فور تشنر احسن او خذ فتك

هههههههههههه
الناس تشتري عشان تستعمل ولا عشان تتفرج على ابسياره الله يصلحك بس



اما بخصوص الموضوع مع اخوي برادو 2007 ماشاء الله موتر صبور حدا وقوي الشكل القديم يبدولي اقسى من الجديد يعني الجديد اريح وميزه السبير علاق التانكيين الي يمشون اكثر من 900 كيلو ومبروك مقدماً

[ابونبيل]

جزاكم الله خير علي ردودكم. سؤالي هو هل السيارة 2013 افضل فعلا من 2014؟ ما ادري عن مواصفات الامان ومنع الانقلاب اللي في موديل البازعي. ثم هل اسعار الاكسسوارات خادميني فيها والا اركب لحالي؟

الاكسسوارات اشوف انها غاليه اسأل برا وبتشوف انه ارخص

اما بالنسبه للشكل فعلاً 13 افضل من 14 الوجهيه وبالنهايه السياره هي هي يعني شف الارخص دامنه اصفار مايفرق يبقى جديد

[سفاري 95]

الله يبارك لك مقدما ويجعل والديك بالجنه ومن يقرا

خالي عنده برادو 2008 سته سلندر فل وانا من الناس اللي اكره التويوتا بشكل عام .. بس كلام المنطق ينقال الصراحه موتر حلو بجميع المقاييس وانا مجربه ومسافر عليه اكثر من 900 كيلو ماشاء الله عليه ماعليه عيب سواء صرفيه البنزين يمكن بحكم انه سته سلندر ..اما شي ثاني الصدق ماشفت به عيب .

انا بس حبيت اعلق على الاكسسورات اشوف انه مبالغ فيها كثير
تلبيسه الفرش 600 ريال ؟؟؟؟ غاااالي برا ارخص وراح تلاقي من يسنع لك الشغله

والله يسهل لك امرك

[مزدهر]

جزاكم الله خير علي ردودكم. سؤالي هو هل السيارة 2013 افضل فعلا من 2014؟ ما ادري عن مواصفات الامان ومنع الانقلاب اللي في موديل البازعي. ثم هل اسعار الاكسسوارات خادميني فيها والا اركب لحالي؟

كل فئات البرادو السته سرندل من مديل 2010 واحدث فيها نظام الثبات والالتصاق ونزول المنحدرات ونظام التوقف عند رجوع السياره وهي في d
الفل فيها رادار ونظام التوقف قبل الاصطدام في وارد بهوان واليحيى
2014 جاء فيها زيادة النقطة العمياء
اما الجيل السابق من مديل 2005 واحدث فقط بال vx3 فقط يجي انواع بسيطه فيها الانظمة وهي ما هي فل

[موسي المطر]

قررت شراء السيارة دعواتكم يا شباب

[ابو سعد 502]

الله يطعمك من خيرها ويكفيك شرها

[علي101]

قرارك بالإجمال صحيح
والجي..... ركبها عند مختص ولو كان أغلى
والله يبارك لك

[ابن عكاش]

السؤال عن البرادو 2014 مادري ليش تعطون الرجال اجابات خارج عن سؤاله

[فارس العمور]

١٤ افضل في نظري بمراحل

[sgl2002]

موتر ممتاز

لكن خذ ال2014 اذا فرق السعر ماهو كبير


لان الجديد جديد باي مكان وشكله افضل

لكن وش اللي يركبون جي بي اس ب2400

رح الغرابي طق اطلق شاشه ب1500

[موسي المطر]

14 افضل في نظري بمراحل

والسبب اخوي؟ هل تقصد الشكل اجمل ام ان السيارة فيهاا تقنيات غير موجودة في الموديل 2013؟ اليوم العصر ابروح اشتري السيارة اللي عنده معلومة لا يبخلبها اذا الفرق جوهري حرام ما ادفع الفرق (12 الف ريال)
تم التعديل بعدما تاكدت من الفرق.

[خبايا انسان]

حلو البرادو ٢٠١٣ في نظري احلا من ال ٢٠١٤


والبرادو مايقارن بالفوتشنر ابدا ، توكل على الله وخذ البرادو ، بالتوفيق



لا تنسى الاستخارة

[التعـ King ـديل]

الله يرحم والد ويغفر له ويسكنه جنات عرضها السماوات والارض ولا يحرمنا من دخولها والحياه الابديه فيها

بالنسبه للموتر توكل على الله وخذ الموتر

تراه طيب وانا جربته 2004 موتر حلو

بالنسبه احلا شي الاسبير علاق لانه يجي تانكيين يعتبر من اكبر التوانك في الجيوب عامه 180 لتر

90 رئيسي و 90 احتياطي

والف مبروك مقدما احرص على الابيض اللؤلؤي والداخليه البيج

[كم كيلو باقي]

الله يبارك لك

[موسي المطر]

مع ان الموضوع قديم جدا الا انني اردت ان اشارك الناس تجربتي. اشتريت برادو 2014 من البازعي وفورا شعرت بان السيارة تستاهل كل ريال دفعته فيها. الاسبير العلاق والتانكي الكبير فرقت وااااااجد. الرنج كنت اعبيه علي الاقل مرتين علي طريق الحجاز. الحين رحت من الرياض ما عبيت الا في الطايف - ولو مسيته شوي يمكن اوصل محطة قبل مكة وما خلص. الموتر مريح - المراتب ضيقة شعرة بس موب مشكلة. افضل شيء الموتر واشوف انه يتفوق علي الرنج فيه هو صعوده الجبال بكل اريحية. الناس يقولون لي اذا انت تحب الجبال غير واشتر جي اكس ار ولكن انا مبسوط علي الاخير من السيارة الي شريتها. البازعي عطاني اول 10 الاف صيانة مجانية وركبت نظام جي بي اس علي الشاشة من الجوال فما احتجت اغير الشاشة. الموتر ماشي 11 الف هالحين ويسام مني بسعر مرتفع جدا. الحمد لله ان الخيار كان صحيح.
الخلاصة انني اقتنعت 100٪ من كلام الناس اللي يقولون البرادو موتر واشكرهم شكرا جزيلا علي النصيحة التي اثبتت جدواها.

[الحربي 591]

الله يرحم والدك رحمه واسعه

تبي الشور من مجرب انا كان عندي 2012 برادو 6 سلندر وجلس سنه وبعته واخذت فورتشنر 2013 طع شوري وخذ الموتر ولاتسئل الموتر افضل من الفورتشنر ال6 بمراحل ويكفيك انه ياباني 100% ووالله لو يرجع الزمن لورا ماابيعه ولاافرط فيه موتر بالبر بالخط وثلاجه وعزم ورساوه ورحب ومريح جدا قير اوتوماتيك وعادي مكينه قويه مكيفين منفصله شنطه وسيعه وثلاث مقاعد واسمه لاندكروزر في الاخير اتمنالك التوفيق




طيب الفورتشنر صيني يعني:D

[الحربي 591]

مع ان الموضوع قديم جدا الا انني اردت ان اشارك الناس تجربتي. اشتريت برادو 2014 من البازعي وفورا شعرت بان السيارة تستاهل كل ريال دفعته فيها. الاسبير العلاق والتانكي الكبير فرقت وااااااجد. الرنج كنت اعبيه علي الاقل مرتين علي طريق الحجاز. الحين رحت من الرياض ما عبيت الا في الطايف - ولو مسيته شوي يمكن اوصل محطة قبل مكة وما خلص. الموتر مريح - المراتب ضيقة شعرة بس موب مشكلة. افضل شيء الموتر واشوف انه يتفوق علي الرنج فيه هو صعوده الجبال بكل اريحية. الناس يقولون لي اذا انت تحب الجبال غير واشتر جي اكس ار ولكن انا مبسوط علي الاخير من السيارة الي شريتها. البازعي عطاني اول 10 الاف صيانة مجانية وركبت نظام جي بي اس علي الشاشة من الجوال فما احتجت اغير الشاشة. الموتر ماشي 11 الف هالحين ويسام مني بسعر مرتفع جدا. الحمد لله ان الخيار كان صحيح.
الخلاصة انني اقتنعت 100٪ من كلام الناس اللي يقولون البرادو موتر واشكرهم شكرا جزيلا علي النصيحة التي اثبتت جدواها.



الله يعطيك خيره ويكفيك شره..

[نجم الفجر]

البرادو شكله افضل و الاختيار لك

[باوزير]

زين ما اخترت و انا عندي برادو 2012 اشوفه ممتاز لولا الضيق اشوي و الوعورة و قساوة الكرسي و حليتها بمخدات صغيرة حطيتها مكان الظهر و الالجلسة و فرقت كثير من ناحية الراحة

[فالك السعد]

الله يبارك لك يا اخوي ومركب العافية