يامستخدم الكنود قناه العامه ليست للتهريج

[ابو ساره العنقري]

بسم الله الرحمن الرحيم

الله يصبحكم / يمسيكم بالخير جميع

موقف حدث قبل فتره بالخشيبي مازال عالق بذهني

كنا جالسين بالخشيبي وفالين الحجاج الساعه 11 بالليل واحد الاجهزه كان شغال على العامه

سمعنا شخص خليجي جالس يفزع الي حوله بالايكوم بأن معه عائله وموتره نشب بالطين

تفاعل معه اكثر من شخص الله يجزاهم خير يحاولون ياخذون وصف موقعه لان مامعه قارمن

الا دخل واحد ارساله قوي وجلس يقطع على الرجال ويهرج ويستهزي فيه وانتم خابرين سوالف الورعان الي الواحد يستحي يقولها

المشكله ان اكثر من شخص ومنهم بعض اخويانا حاولو ينصحون الشخص ويذكرونه بالله وان الله ممكن يحطه بنفس الموقف ولا فيه فايده كل سوالفه كل .... وكل .....

والله ياخوان اني خفت من كثر المداعي الي جته ذيك الليله فلا حول ولا قوه الا بالله

حتى يوم اصبحنا كان فيه تفاعل بين بعض المطانيخ كلن يسأل عن الرجال الي البارح مغرز ومحد يدري وش صار عليه

الامر الاخر

احيانا اذا جلست تحط العامه وتخلي الجهاز شغال اذا احد يستنجد او احد يحتاج فزعه

تقوم تقفل الجهاز من ازعاج بعض الخلق

الي يحط اغنيه والي يحط شيله والي يخثرق سوالف بارده مثل وجهه

رساله لمستخدمي الجهاز

ارجوكم لاتحرمو محتاج المساعده بسبب سوء استخدامكم للأجهزه

[خوي_الذيب]

كلام لا غبار عليه

وفعلاً كثير من سفهاء المراسلة

ودك تعلقهم با قرب برج جوال

:D:D:D

عبرة لغيرهم

:good2::good2::good2:

[عاشق العرض]

بارك الله فيك كلام في محله

[ابو صالح 871]

الشكوى لله يجي من صغار العقول الشي الكثير

[ابو ساره العنقري]

الله يحييكم جميع

[مفضخ الشري]

الشكوى لله يابو سارة صغار العقول واجد

العامه غاسل يدي منها نهائياً و حتى بالمكاتب الثانيه ماتسلم من الملاقيف

[قوافي ( أم نهار )]

السلام عليكم ورحمة الله وبركاته

نسأل الله لهم الهدايه

الكنوود للتواصل وهذا الهدف من وجوده مع الكشاته ولضروف طارئه يمر بها البعض أحيانن..

اشكرك اخي الفاضل للتنبيه

والله يصلح الاحوال

تحياتي وتقديري واحترامي

..قوافي..

[ناصح]

فعلا كلامك سليم

ما يكرهك في المراسلات إلا سفهاء العقول

قليلي الأدب والذوق والمروءة

اشكرك على الموضوع الهادف :good:

وهذا موضوع سبق أن طرح حول القضية ذاتها

توصيات مهمة لأهل أجهزة اللاسلكي (( بالصور )) (http://www.mekshat.com/vb/showthread.php?t=26831)

بارك الله فيك

[ابوماجدد]

اقسم بالله انه افشل برنامج

[رويلي]

المشكلة اخوي ان الغرب وهم غير مسلمين تشوف الاحترام والفوائد اثناء المراسلة والفزعات

اما هنا الله يخلف, حتى بعض الشيبان يبيلهم دورة تأهيلية بالاخلاق ولنا خير مثال بالمسخرة اللي كانت بالخشيبي

وانا كنت وقتها هناك وسامع كل شي .. حتى المخدرات وانواع الحبوب يسولفون ويتفاخرون بها

[اي-مكشات]

جزاك الله خير ياراعي الموضوع

أكثر المرات اقفل الجهاز من الخرابيط اللي تنقال على العامه أو أطلع قناة خاصة مع خوياي ومع ذلك فيه ناس ملاقيف يدخلون معك على نفس القناة ويقعد يخربط سوالف مالها أول ولاتالي ولايدري المسكين إن مايلفظ من قول إلا لديه رقيب عتيد

[ابو ساره العنقري]

والله ياخوان الوضع سيء

قناه العامه عاده عندي اخليها شغاله لاصرت جالس

خصوصا ان جهازي ابو قناتين قناه لاخوياي وقناه للعامه

ثم يجيك الي يشغل اغنيه او شيله مدري من قاله سمعنا

الله يصلح الحال

[ابوعبدالرحمنV]

موضوع قيم بوركت