عطوني رايكم لو تكرمتوا بخصوص تانكي الماء............

[ملاعب الريح]

السلام عليكم ورحمة الله وبركاته

مساكم الله بالخير جميعاً

بصراحه مليت:(من الجراكل وغثاها وودي أركب تانكي ماء

وش تنصحوني فيه

1- حديد ولا ستيل (فيه ناس تقول الحديد يصدي وناس تقول عب نص التانكي ماء ولا عليك)

2- داخل الموتر بالشنطه ولا تحت الموتر (مع ذكر المميزات والعيوب للي جربوها سواء داخل الموتر ولا برا تحت الموتر)

3-وش الورشه اللي تنصحوني بها (الرياض) والأسعار


نسيت أعلمكم الموتر:d (لانكروزر قديم الإستبنه في الخلف على الباب) يعني فيه إمكانيه أحط التانكي تحت لو بغيت.


جزاكم الله خير ومشكورين مقدماً


تحياتي أخوكم (ملاعب الريح)

[وقيان]

السلام عليكم...

يا الربع ابي احط لي تانكي ماي باللاند... ابي احطه بالشنطة ورى... و ابيه يغطي الأرضية كلها تقريبآ...كم اسعارهم ووين احصلهم...

علمونا بارك الله فيكم

[الكايف2]

السلام عليكم عليكم با الالمنيوم بس لايجيه مويه الا تحليه والشغل الزين في القصيم والرخيص
اتمني للجميع التوفيق

[ابوعبدالله9999]

ألأفضل حسب رأيي تحت أسهل في الإستخدام ومايرشح لأنه لابد من وضع غطاء له نسم , فيرشح ويعدم الفراش إذا حطيته داخل السياره مع عدم أخذ حيز داخل السيارة حيث والأمر كما ذكرت أن الإستبنه معلقه وتحت مايصلح إلا للستبنه أوتانكي ماء.

[الخادم]

اخوي التانكي تحت احسن لانة ثابت و يريحك من الشيل و نسيان و اخذ حيز داخل

بالنسبة للتانكي داخل الجيب فية تانكي بالرماية شارع التخصصي بالرياض ممتاز و سعرة بـ 600 ريال تفصيل على قد ارضية الشنطة بعد رفع الكراسي و لونة ابييض
أمل ان تتخذ قرارك بقناعة منك
و الله يوفقك

[الضاحي]

كلام اخوي الخادم تمام التمام

انا مركب تانكي الرماية الجديد (فيبر) بـ 600 ريال ومفصل على قد الشنطة بالضبط (لاند و باترول) وعملي مع وجود عيب صغيييير فيه وهو انهم مركبين له نقاص (حنفية) صغيرة بقصد الترشيد في استهلاك الماء ويمكن لمن يرغب تغييرها بنقاص اكبر شوي . العيب الثاني السعر بس بتعوضه بالميزة التالية:

اكبر ميزة هي انه تانكي موبايل يعني تحطه بالسيارة متى ما بغيت وتشيلة متى ما بغيت لا براغي و لا لحام ولا مسامير ولا شي .

السعة حوالي 90 لتر للباترول و 100 للاندكروزر واللكزس .

تحياتي .

[ملاعب الريح]

romance202 أتمنى تلقى جوابك.

الكايف 2 مشكور والقصيم بعيده.


الخادم مشكور على إبداء الرأي والرد.


الضاحي مشكور وما قصرت لاكن هل تشتكي من تطعيم بالماء ولا لا.


بإنتظر باقي الردود والآراء

(ملاعب الريح)

[نيشان نجد/]

أنا عندي ألمنيوم مركبه على حوض 130 لتر

أفضل شي الألمنيوم لكن إحتمال إنه ينشق إذا جته ضربه ولاكن اليحيى يعزلونه وسعره تقريبا 1200 -130لتر عند اليحيى بالرياض
بعدين الإستيل يتحمل لاكن إذا الماء جلس به تقريبا إسبوعين تتغير لون الموية إلى الأصفر وسعره 1200 -150 لتر عند المميزبالرياض
بعدين الحدبد المطلي ناس يقولون إنه يطعم لاكن أخوياي 2 مفصلينه ولاإشتكو وسعره 500-450 ريال-150لتر في الزلفي.
بعدين وأخر شي الحديد يبغالك تهتم فيه وغثى المهم سعره 280 تقريبا -150 لتر في القصيم لاكن فيه بالرياض لكن سعرهم غالي يعني 350-400 فذي الحدود
ولاكن أصفى مويه طبعا الألمنيوم والله اعلم
أخوك/نيشان نجد

[طارق الحربي]

نيشان نجد ولا يهونون الربع

اقدر افصل مثل تانكي الرمايه اللي جوا السيارة بس المنيوم ؟

[سداااااح]

تلقى مطلوبك عند ورشة اليحيا بشرق الرياض على امتداد مقبرة النسيم وانت متجه شمال تجيك على اليسار

[ملاعب الريح]

إخواني

نيشان نجد مشكور وما قصرت.

طارق الحربي مشكور على الرد وأتمنى تلقى إجابه لسؤال.

سداااااح مشكور على المرور والوصف.

بإنتظر باقي الردود والآراء

تحياتي (ملاعب الريح)

[راع الصمان]

تلقى مطلوبك عند ورشة اليحيا بشرق الرياض على امتداد مقبرة النسيم وانت متجه شمال تجيك ع لى اليسار كلام صحيح:good: بس خذ الومنيوم....:)

[قير عادي]

لا تتعدى الالمنيوم ،،،، خفيف ،،، ولا يصدي ،،،، وتقدر تفصله تفصيل

وراجع هالرابط يمكن يفيدك

http://www.mekshat.com/vb/showthread.php?t=62164

[تكفون]

خذ العلم بس ...... ورشة المواهب في الصناعية القديمة ... والله أعرف ناس يجون من الشرقية ومن الخرج يركبون عنده ... شغل صح ...ولا تفكر بغير الستيل أضمن وازين .

[ملاعب الريح]

asm1968 مشكور على الرد والرأي.


قير عادي مشكور على المرور وإبداء الرأي والنصيحه.


تكفون مشكور وما قصرت.


في إنتظار باقي الردود والآراء ويا ليت يكون معها عرض أسعار

تحياتي (ملاعب الريح)

[ملاعب الريح]

طيب يا جماعة الخير الألمنيوم كم أسعاره.

[altheeeb79]

بسم الله الرحمن الرحيم00 أخي الفاضل 000توكل على الله وركب تانكي تحت حديد والا ستيل ابعد عن الالمنيوم والفيبر جلاس ومادري وش بعد 0موية التانكي ستستخدم للغسيل أغلب الاحيان 0 لذلك مايضر لها طعم والا "لا" لآنك اذا كنت كاشت يومين التانكي مارايح يكفي للاكل والشرب والشاهي والقهوه والغسيل0 عشان كذا خذ معك كم جالون ماء من اللي يباعن على 5أو6 ريال للاكل والشرب وخل التانكي للغسيل فقط 0 أنا شخصيا عندي ولله الحمد باترول وجمس ونيت ومركب لهن توانك ستيل ومع ذلك اخذ من الجوالين اللي قلتلك للاكل والشرب 0واذا خلصن وبغيت اموت من العطش ابشرب موية التانكي ياأخي ناس شربت موية الاديتر 0الله يحفظ الجميع من كل مكروه0 توكل على الله ترى الامطار والخير قريب ان شاء الله وبتحتاج التوانك0000000000000

[راعي المقناص]

أخوي ملاعب الريح اذاكنت في الرياض رح لمحل اسمه البرية في حي السلام بعد ماتخلي كلية المعلمين على يسارك وانت متوجه شمال بيجيك على اليمين بعد صراف الرجحي بشوي وملبس تلبيسة حلوة وشغل نظيف مرة وبتدعي لي وعلى العموم سعره800 وياخذ 104 لتر تقريباً
أخوك /راعي المقناص
أي استفسار على الخاص حياك ربي

[نعمان الفهمان]

توي مركب تانكي المنيوم 95 لتر 900 ريال تحت السيارة

بعد ما سالت ناس مجربين كل الانواع قالو الامنيوم ممتاز

ركبتة عند ورشة ممتازة ومتخصصة اسمة السوافي او سوافي في صناعية الفوزان مخرج 18 الدائري الشرقي

[ملاعب الريح]

السلام عليكم ورحمة الله وبركاته

أخواني

الذيب 79 مشكور وما قصرت على الإفاده

راعي المقناص مشكور ويعطيك العافيه لاكن ما قلت لي وش نوع التانكي

نعمان الفهمان مشكور (مبروك التانكي) والله يطعمك خير التانكي ويكفيك شره


تحياتي أخوكم (ملاعب الريح)

[الشوكيss]

السلام عليكم

انا مركب تانكي المنيوم على سيارتي وصار له اكثر من خمس سنوات وما عندي اي مشكله ولله الحمد
ومركبه عند ورشة في الصناعية القديمه بالرياض
وسلامتك يالغالي

[ملاعب الريح]

وعليكم السلام ورحمة الله وبركاته

أخوي الشوكي وش إسم الورشه وكم التكلفه الله لا يهينك.............

في إنتظار باقي النصائح والردود


(ملاعب الريح)

[سداااااح]

ملاعب الريح انا مركب تانكي
اللمنيوم يشيل 144 لتر وكلفني 1000 ريال والتانكي مركب بالشنطه وغير ثابت