بالله عليكم ابي مشورتكم

[para]

السلام عليكم ورحمة الله وبركاته
الاخوه الاعزاء........صباح......مساء الخير........كل باسمه .

موضوعي طلب استشاره منكم يا اهل الخبره.

ناوي باذن الله اشتري سياره آخر موديل.....ومحتار بين اخمسع سيارات..رابتور وشاص تويوتا وشاص نسيان وسلفرا دو وسييرا..




حاجتي للسياره....ضروري الحوض او الصندوق للتحميل....وكل اسبوع عندي سفر 600 كم خط بشكل اسبوعي.....وعندي حلال غنم بالبر ومزرعه.....ومحتاج سياره تلبي جميع احتياجاتي بالراحه والخط والعزم....وطبعا بالمنظر والفخامه ام....واكثر وقتي اكون عند الحلال.. متردد خايف اشتري سياره مثل الرابتور وبعد كم شهر اتندم... ياليت اللي جرب الرابتور يفيدنا عنه من ناحيه التماسك والجوده والقربعه لاني ابيه استخدام يومي......



وسلامتكم........من شاور ما خاب ....

[para]

[SIZE="6"][/SIZE
نسيت اذكر لكم ....انني من النوع المحافظ جدا جدا على السياره.......فابيها اقل شئ خمس سنوات]

[عاشق الددسن92]

الفخامة والراحه السييرا والسلفارادو
التحميل والبر الشاص التويوتا
البر والسعر و الراحه في الخط شاص نيسان ياي و التحميل سست

[غار بن شعلان]

السلام عليكم

ماقلت اخوي تهمك الراحه والا ماعندك مشكله فيها

كانها تهمك لاتتعدى الرابتر والسييرا والرابتر افضل من السييرا خصوصا انك من النوع المحافظ

واذا ماتهمك الراحه عليك بالشاص سواء تايوتا او نيسان لكن اعانك الله في المصوع والام الظهر مع انو النسيان اهون منه

وترى الرابتر مجنون مجنون موتر في قوه غير طبيعيه وراحه وفخامه وع ماسمعت بطن الموتر عليه ضمان مدى الحياه انه مايتأثر من المطامر بس عيبه سعره غالي شوي

موفق خير ومبروك وش ماشريت والله يعطيك خيره ويكفيك شره

[ابوحسن ...]

اذا لتحميل ولسفر عليك بالسييرا 2500 hd لاتتعداه ممتاز جدا لتحميل والكرف ومريح واذا شريته علمنا عشان نعطيك بعض النقاط المهمه ...

[حفراويون]

اذا تبي سياره 3 في واحد خذلك سلفرادو او سييرا الرابتر الحوض مع الايام يلعب كنه حوض ددسن 81 انواع القرقعه

[ابن عكاش]

اذا تحميلك واجد فوق الطن ونص مالك غير شاص التيوتا
اذا تحميلك طن وفيها خذ حوض نيسان وركب ياي استرالي
الامريكي حلو ومريح بس ماراح يخدمك مثل الياباني
هذا رأيي الشخصي

[حفراويون]

يفيدك هالموضوع جدا
http://www.mekshat.com/vb/showthread.php?t=621382

[حبل الوريد]

دامك بتاخذ جديد خذ شاص نيسان
وان بغيت الراي خذ شاص تويوتا ٢٠٠٩ شبه مخزن

[para]

الله يعطيكم العافيه على آرائكم

بصراحه القلب ميال......للرابتور اكثر من غيره....ولو ان سعره غالي....لكن انا حسبتها اذا كان غالي مع جوده بالتصنيع...مهي مشكله......بصراحه انا خايف انه غالي على قلة سنع........المشكله ان المقارنات كثير باليوتيوب......لكن انا خايف انها مهي عمليه للاستخدام اليومي والكرف


ياليت اذا فيه احد الاعضاء جربه اكثر من سنه استخدام يومي....يدلي بدلوه...ويعطينا رايه

[حفراويون]

اخوي اذا تبي النصيحه انحش عنه غالي على قلت سنع والتزويت الي عليه في العظلات يايات ومساعديات
واحد من العيال ماخذه يقول حسافه هالقيمه فيه والموتر ليا مر من جنبك تحس انها ددسن بلاط انواع القرقعه
وباعه واشتراء سلفرادو وزود عليه عضلات

واهم شي الخيره اذا انت ناوي

[para]

اخ حفراويون
شفت الموضوع....للاسف مافيه فورد

وجهة نظري ان الفورد اريح واقوى عزم من جمس وشفر

طبعا اقصد....رابتور و سييرا وسلفرادو

[para]

اممممم

رايك استبعد الرابتووووور

طيب القربعه للرابتور فقط ولا للf150 عموم

[((ابوملاك))]

يا شيخين وش اللي رابتر يقرقع ههههههههههههههههه

اللي ما يطول العنب حامض عنه يقول اجل الرابتر يقرقع كنه ددسن والحوض يلعب كنه ددسن ٨١
ان قدرت عليه لاتدور غيره

مع العلم معي شاص

[para]

اشاور واحد من العيال وقلتله اميل للامريكي لانه يجي غماره ونص وغمارتين.....يعني يخدمني من هالناحيه


فرد علي يقول....طيب خذ شاص تويوتا غمارتين...........!!!

احس انه حق عماله...مبين من شكله غير مريح بتاتا

[حفراويون]

مجهول 666
اتكلم عن شي شفته وسمعته و على قيمة السياره مالها دخل في الاداء
والقوة
وللعلم نقدر نطوله ونطول 10 مثله

[الربذي]

وعليكم السلام
خليت المجال واااسع
اختصار لكل ميزة وجه اخر مؤلم
تبي راحه وقوه ووسع وكشخة خذ رابتر بس يبي محافظه ويطلب قطع بعد الاستعمال المتكرر
تبي كد ومد بس ضيق وغير مريييح بس عملي تويوتا شاص
الغمارتين قبيح وحوضه صغير الا اذا يكفيك بس الكشخة بوادي وهو بوادي
النيسان شاص مريح وقوي بس مايخلى من المعاكسات
السيير حلو خذ غمارة ونص ولا وربع حلوه وكشخة وقوه بس ايضا محب للورش عن تجربه خصوصا اذا جاوز المائة الف. ويهربد مع الصحاري .
السفرادوا نفس السييرا بس مركب عليه هيكل مختلف فقط البدي ولا الداخلي مايفرق مسمار واحد نفس القطع من الى الا البودي
انا ارشح السييرا
السلفرادو
تويوتا
نيسان
الرابتر اخر شي لانه غير عملي وغالي وقصدي اضافات عليه كثيرة ولا هو حق كرف يومي وبر وتحميل فقط للكشخات والمشاوير الخفيفة
انا عن نفسي لو كلها مصفوفة قدامي اخذ النيسان شاص قوه وتحمل نوعا ما وانا من محبي نيسان
موفق
اعرف واحد معه سلفرادوا قعد معه سنه شاريه وهو ماشي 85 وباعه وهو ماشي 118 خسر عليه فوق 11الف تصليحات عقده وهو مخليه بس لطلعات وهي توافيق الامريكي بعضهن يطق 300 الف زي العسل وبعضهن يعاكس التهريب زيوت يحبهن مررررة جاري معه يوكن 13 تصدق تبهذل له ثلاث اسابيع بالورش خراب ورا خراب يلعن ويشتن فيه اخر معه يوكن2002 اف رود حوض دبل بس مخصص الاراضي الوعرة حنا شوارعنا اراضي وعره ماشكى منه ماشاء الله

[الربذي]

اخوي رابتور من فورد تر اسعار: جمس حوض فورد اف 150 رابتور 2014 Ford F150 ... (http://www.google.com.sa/url?sa=t&rct=j&q=&esrc=s&frm=1&source=web&cd=5&ved=0CDMQFjAE&url=http%3A%2F%2Fallmobilephoneprices.blogspot.com %2F2012%2F03%2F150-2013-ford-f150-raptor.html&ei=8TILU9j7DJDn7Aa1-oHIBA&usg=AFQjCNERNI7wckh-WEoGPdxcy6-brGK_LA)

[para]

الاخ حفراوي

بارك الله فيك.....كم موديل اللي مع صديقك.....وهل اشتراه جديد ولا مستعمل....وكم الفتره اللي استعمله .

اذا كان استعماله بحفر الباطن وتقربع.....مصيبه....لان حفر الباطن ارضها سهل

اجل عندي ماراح يكد.....انا بالشمال قاعنا حجره .

[para]

الله يجزاكم خير على وجهات النظر .

استشفيت من كلامكم ان اغلبكم لم يستخدم الرابتور .

مع احترامي وتقديري لوجهات النظر

[ميدان التحدي]

الحقيقة انا لم اجرب الرابتور ولاأحب ان افتي في شي لم اجربه
لكن جربت السييرا اتش دي تبارك الرحمن ماشاء الله موديله 2009 وماشي الان 250الف وعليها وماغيرت فيه الا الاذرعه حتى القماشات شد بلده وحسب ماقرأت ان الموديلات الاخيره من السييرا الاتش دي تغير نظام التعليق والشاص للأفضل ..
وفي النهاية خذ الموتر اللي ترتاح له ،،،

أرسلت من GT-I9100 بإستخدام تاباتلك

[ميدان التحدي]

يعيب الاتش دي قله الراحة مقارنة مع 1500

أرسلت من GT-I9100 بإستخدام تاباتلك

[((ابوملاك))]

اما اذا تبي نصيحه لك من اخو الشاص الجديد لاتقربه

انا كان معي ٢٠١١ على يدي وكاله

والله انيبعته وشريت ٢٠٠٤ ويالله لك الحمد افضل بمليون مره

[N أبورغد N]

سعر الرابتر يجيب لك شاص نيسان ومعه جمس غمارة ويبقى كم الف

[para]

على كذا اتجه لنيسان باترول شاص......

اذا كان الرابتر مبالغ بسعره حيل .
والتويوتا محد مدحه الجديد .
والسييرا ما تعتمد عليه بالمشاوير البعيده واكيد السلفرادو مثله

اصبح نتجه لشاص نيسان .

طيب افضل مواصفات النيسان.....قير تيماتيك ولاعادي......سست ولا ياي....وافضل الاسعار وين احصلها.....وهل الخليجي يفرق عن السعودي ولا لا

[ابوسند9]

وعليكم السلام
شف طال عمرك
السيارات حظوظ , وسيارات الحوض راح ارتبها لك من حيث الراحه على الخطوط وفي البر بما ان مشوارك 600 كيلو بالاسبوع
بالخطوط:
دوج رام نظام رباط خلف وليس سست ومكينه 5700
الجمس السسييرا والسلفردو والتندراء والرابتر تقريبا زي بعض بالراحه وممتازه بحكم ضخامة المحرك
يجي بعدهم الشاص النيسان
والاخير الشاص التايوتا واتوقع لو فيه جائزه اشين سياره خط وبر كان اخذها
نجي للبروالراحه واقصد هنا لو تضرب صحراء 500 كيلو :
الشاص النيسان بحكم ياي خلف وامام, الدوج الرام, الرابتر, السييراء والسلفردو, التندراء ,شاص تويوتا
لكن بما ان رغبتك في الرابتر وسعر م 2013 جديد بين 245 الى 260 الف خليجي
والمستعمل بحدود 210 الى 220 الف ,ولعلمك اخر انتاج له راح يكون موديل 2014 ,واحتمال بعد ثلاث سنوات راح يعاد انتاجه مع ادخال بعض التحسينات ,
لذا لو تجلس تشاور 3 سنوات ما راح تطلع بنتيجه لانه راح يجي ناس يمدح ا ويسب السياره وهو ما قد شافها اللى بالصور .
وانا رائيي لك بما ان نفسك بالرابتر انك تشوف مكتب واللى حد لك في امريكا واشتر موديل 2010 راح يطلع عليك بحدود 125 الى 135 الف ريال لكن انتبه موديل 2010 نزل عليه نوعين من المكائن مكينه ضعيفه 5.4 لتر ومكينه 6.2 لتر 411 حصان وهذي اللي عليها الكلام واذا ما اعجبك ان شاء الله انه راح تكسب فيه.
اما التجربه ثلاث من الزملاء معاهم موديلات 2010 و2012 و2013 ولا شافو منها أي شي لكن تجربتهم ما اقدر اخذ بها لان استخدامهم حشمه وطلعاتهم للبر خفيفه جداا
اما قوة البدي انا اشوف انه اقوي ومتماسك وصدمات ودعسات مصنوعه من الصلب واسفل السياره معزول بصاج قوي وتقدر تطمر فيه بالهواء ,
واذا تقول خلاص مالي رغبه فيه ومشوارك وعر وحجره انصحك بالشاص النيسان قير اوتو وركب ياي استرالي وبالون ونزل الهواء في الحجره ل 18 وانبسط
ولعلمك احد الزملاء نفسك بالضبط تقريبا يضرب مشوار 1000 كيلو للمزرعه رايح جاي وفيها 130 كيلو ردمية قشراء جرب سلفردو وتندراء وسياره ثالثه نسيتها واخير استقر على شاص نيسان مع بالون ومبسوطه منه لكن يقول ليتني ماخذ قير اوتو
وانا عندي قاعده جرب قبل تشتري
والله يكتب اللي لك فيه خير
تحياتي ابو سند2

[para]

الله يجزاك خير يابو سند....ولا يهون باقي الاعضاء

حقيقه رأيك مقنع ومنطقي.....بحكم انني جربت شاص تويوتا 2002 8 ريش......لكن استخدمته داخل المدينه غير مريح بالمره....فقلت ياولد هذا شلون لو امتر الخطوط عليه....صحيح انني شباب ولله الحمد ولا يهمني....لكن ماله موازي على المطامر....خاصة اذا كان فيه بديل اريح بكثير .

فاشكرك على رأيك السنع .

[para]

مثل ماتفضلت اخي العزيز رغبتي وهواي يم الرابتور......كشكل وراحه وقوه مكينه وقير ودفرنسات وفخامه......وفوق ذلك غماره ونص....يعني ما يخذلني ياصاروا معي اثنين.....

صراحه ماني عارف عيوبه....الكل يتكلم عن مميزاته..

مثلا هل يمسك سعره مثل التويوتا ولا تشريه ب 250 وتبيع بعد سنه 125 !!!!!

[بيك اب 4X4]

ما عندي علم عن الرابتر بس اعتقد قطع الغيار و الصيانه بتكون مرتفعه بحكم سعره المرتفع
لو ما عندك مشكله من الناحيه الماديه خذ رابتر
جربت الفورد f150 في العمل بصراحه المكيف تعبان ما ادري إذا الرابتر نفس الشي

كنت بأقترح عليك النيسان مع اني اشوف عيب النيسان في الوكيل السيء بس انت كأنك ذكرت انك تبي غماره و نص
او غمارتين و النيسان يجي غماره

الشاص في نظري ما يسوى و غير مريح و الغمارتين شكله بشع

الجمس او الشفر يمكن انسب شي مع انهم رفعوا سعر الجديد فوق

الدوج وكيله داج