علبة النيــدو

[دكتورالدله]

السلام عليكم ورحمته وبركاته
أحبابي أعزائي الكرام
ارجو من يجيد طريقه اللحم في علبة النيــدو
على شرط خطوه خطوه وأن تكون ميه بالميه
جزاه الله خيــــر واله دعوه بي ظهرالغيب
:fولكم جزيل الشكر وتقديــر :f

[ابونايف الفهد]

السلام عليكم دكتور الدله

انا مره استخدمته لطبخ الدخل بس جبت النيدو وحطيت نصه بصل والبهارات والملح والدخل وطبقته وخرمت للطباقه فتحه عشان التنسيم وحطيته بالجمر وبس الصراحه طلع طعمه فوق الخيال

[دكتورالدله]

ياملا العافية يابونايف انشهد انك طيب
وماقصرت بارك الله بك وبعيالك وحلالك

[ابونايف الفهد]

ياملا العافية يابونايف انشهد انك طيب
وماقصرت بارك الله بك وبعيالك وحلالك

ماسوينا شي يابعد راسي

[دكتورالدله]

نبي أكثر من طريقه اللي يعرف لايبخل علينا
كل شي نعرفله بس (علبة النيدو) ماعرفله
ابونايف ماقصر بس ودنا اكثر دقه وخطوه خطوه
وشكر

[ع العمرو]

احبيلك جب اللحيمة المشحمة وزوده بعد شحم وحطهن بالقوطي (علبة النيدو) وحط عليهن مليحة وغطهن وشق الغطاء شقيقات ماهن كبار لك خمس شقوق وادفنه بالملة ودرعليه داير مادار جميرات وخله فوق الساعة وتعال شف النتيجة (فتاكة) .!!

[دكتورالدله]

احبيلك جب اللحيمة المشحمة وزوده بعد شحم وحطهن بالقوطي (علبة النيدو) وحط عليهن مليحة وغطهن وشق الغطاء شقيقات ماهن كبار لك خمس شقوق وادفنه بالملة ودرعليه داير مادار جميرات وخله فوق الساعة وتعال شف النتيجة (فتاكة) .!!

مرحبا بس طال عمرك وعمري انا كيف وغطهن وشق الغطاء شقيقات
ويش اغطيهن جمر أومله ؟؟؟
ابي طريقه واضحة وحده وحده وخطوه خطوه
كفيت ووفيت وشكر
بس ودنا اكثر

[sfr]

مرحبا هذا غير صحي ولو تبحث عن غيره يكون احسن

[الصيادالمليح]

علبة النيدو اعتبرها كانها قصديرة
قطع حبة طماطم شرايح و حبة بصل شرايح و نصف ليمونة شرايح و فلفل اخضر كبير و اربعة شرايح بطاطس و قطع فلفل على حسب الرغبة وشرايح كوسة وجزر اذا حبيت كزيادة
و يكون اللحم مكعبات و يكون عليها شوية شحم بسيط
وتحط عليها كمون و فلفل اسود و ملح بكمية مناسبة
وتغطيها و تفتح فتحات بسيطة عل الغطاء عشان لا تنكتم العلبة و تنفجر مع الضغط
وتدفنها في الفحم و تحط بعض قطع الفحم على الغطاء
و تخليها تقريبا اربعين دقيقة على حسب قوة النار و لما تختفي صوت تشتشة الكشنة تقدر تفتح الغطاء
بس انتبه لا يكون وجهك مقابل الغطاء
و بالهناء و العافية ×

[ريف النشاما]

الموضوع في المكان الخطأ

سير على أهل خيمة الطبخات البرية وسوف تجد ما يسرك


وأنا أقولك التجربة خير برهان

[صياد الخبر]

السلام عليكم

نقطتين للنقاش

1- هل هي صحية ماهي مغلفة بمواد للبسترة والحفظ ..؟
2- هل معدنها صحي للطبخ ..؟؟ ( مو مثل باقي الاواني ) المخصصة لذلك .

افيدونا بارك الله فيكم

جاز لي الموضوع جدا

ومثل ما قال اخوي
ريف النشاما

التجربة هي الحكم

بالتوفيق

[mashaan]

استعمل اواني ستيل افضل ليش تستعمل العلب هذي قد تكون ضاره جدا بالجسم وتسبب في امراض مستعصيه لاقدر الله

لا تدور عن مثل هذه الاشياء الا لما تكون في صحراء ومقطوع وماعندك الا علبه نيدو تستعملها في الطبخ !