هل سحب السيارات يؤثر على القير ؟؟ [الأرشيف]

imksa

12/11/2006, 11:35 AM

السلام عليكم

الخميس طلعت البر وشاورت ربعي اذا احد بيطلع معي ،،

المهم اغلب الشباب نبهوني من سحب السيارات ،، يقولون هذا يؤثر على القير .

هذ هذا صحيح ؟؟

وهل عمل الاشتراك يؤثر على السياره ( المصدر ) ؟؟

اذا كان الجواب ( نعم يؤثر ) ،، فبتقل الفزعات وماراح تنعدم ،،لان اهل الفزعات واجد وما راح ننعدم منهم الله يجزاهم عنا كل خير.

فمان الله

مروق

12/11/2006, 12:17 PM

السلام عليكم ..

في ظني انه حسب طريقة السحب ..

يعني اذا السواق غشيم ممكن يعدم الموترين الساحب والمسحوب .. واذا كانت عملية السحب بشكل مدروس ماظن لها تأثير يذكر

لان اول نمرة مع الثقيل .. معدة خصيصا" للسحب والاحمال الثقيله .. ويمكن ترجع للدليل وتشوف التفاصيل

وبالنسبه للبطاريه اتوقع احسن لها انها تسوي لها عملية تنقيص كهرباء كل فترة اما اشتراك او تترك النور شغال لمدة قصيرة .. على شان تنشط خلايا التخزين

تحياتي

عمر المختار

12/11/2006, 12:25 PM

السلام عليكم
هلا اخوي صحيح اذاكان قير الموتر تماتيك فانه يؤثر عليه واذا كان عادي لايؤثروهذا حسب تجربتي

لبرتي

12/11/2006, 12:35 PM

أفضل شي إذا كانت السيارة الساحب أتوماتيك أو عادي تسحبه بالريوس أفضل وأقوى

بن عاقول c.o

12/11/2006, 12:52 PM

سحب سيارة متعطلة وتفريج عن مسلم وإخراجه هو ومن معه من ذلك المأزق عند الله مايظيع بس السيارة ومافيها تاليها تتحوّل إلى كومة خردة عند ميزان الحديد .
والفلوس تروح وتجي وهي وسيلة تجعل منك إنسان شهم وغيور وصاحب نخوه ووووو ... كله من عند القوي الجبّار يالله من فضلك .
وشكراُ

imksa

12/11/2006, 12:53 PM

والله مشكله اذا كان يؤثر على القير

لا للفزعات :)

اذا كانت السيارات على خط واحد واستخدم واير او سبته وكانت مسافة السحب 10 متر فكيف يؤثر ؟؟؟

المسافة قصيرة ،، غيرك يسحب كرفااااان 4 × 2 متر وزنه اثقل من السياره ويسحبه من ولايه الى ولايه 1400 كيلو ساحبه وراه بفورت مهوب حتى دبل ،،

انا اعتقد انه ما يؤثر واللي عنده تفسير علمي ممكن ينورنا وله منا الدعاء.

فمان الله

حـاتـم

12/11/2006, 01:04 PM

السلام عليكم

انا مع اخوي مروق في كلامه ولايهونون الاخوان

والسحب يؤثر أكثر شي على الكرونه

لان اعرف كم واحد معه لاندكروزر يوم حاول يسحب موتر انكسرت الكرونه حقت الدفرنس الخلفيه

واعرف راعي فكسار انكسرت الاماميه عليه

اما القير ان شاء الله ماعليه مشكله

دام الي يسحب والمسحوب فاهمين

اما اذا الساحب او المسحوب ما يعرف ويخاف الله يعين الموترين

اما عن تجربتي

انا ساحب بموتري الباترول الـ98 باترول 2002 تعطل علينا الحساس فالبر

وسحبته مسافه 60 كم وسرعه قصوى وصلت لها 60 كم

والحمد لله ماشفت اي مشكله

وشكرا

أخوكم / حاتم

أبو تركي 2009

12/11/2006, 01:17 PM

مساعدة المحتاج واجب على كل مسلم واهم شي النية الطيبة .

عاشق البسيتين

12/11/2006, 01:56 PM

ماعليك يارجال السحب انشالله مافيه شي بس اهم شي اذا بغيت تسحب احد وعك سيارة دبل طبعا القير عاد يفضل انك تقدم الموتر شوي شوي لين ينشد الواير وبعدين توكل على الله واسحب سحبه وحده وبعدها مافي تاثير

البيـرق

12/11/2006, 02:04 PM

يا جماعة الخير هو ما يتأثر بالشكل الي تتخيلونه.......لانه مثلا في حالة الغراز يقوم المسحوب بالدعس معك......

فيقل الحمل على القير.......كان معي جي اكس ار توماتيك سحبت فيه خلق الله لين قلت بس.......

بس اهم شي تحط الدبل على الثقيل.....والقير تخلية بالاول بس........

وكان معي هايلكس 2000 غمارتين سحبت فيه يوكن مسافة 100كم في طريق مهجور......

والحمد لله الموتر مافيه الا العافية.......

imksa

12/11/2006, 02:11 PM

من حق المسلم على المسلم حق النصره والاغاثه فهذا واجب لا مناص منه

اذا كان الكلام هذا في مقطعه ،،اما اذا كان الونش موجود والامور متيسره فننسم كفر ات الرجال وندف افضل من السحب والنتع

نعم للمحافضة على الكرونه ولا للقافه اللي مالهاداعي

فمان الله

ابوسليم

12/11/2006, 02:28 PM

والله ياشباب الفزعه مع اخوك المسلم واجبه !!!
انامره غرزت في مكان ماهو بعيد عن الخط ..مر جنبي خمس سيارات من جيب وباثفندر وصوالين ولا واحد وقف كلهم خايفين على سياراتهم
عقبها ققلت ياشين الحاجه للناس . الله لايحوجنا الى احداًغيره ..

عابد

12/11/2006, 03:07 PM

السلام عليكم ورحمة الله وبركاته

والله ان الفزعة لواحد محتاج أما ان يكون راعي عايلة مغرز ومتورط مع حريمه وبزارينه أنها تسوى الكرونة والقير والموتر كله يكفي ان الله يكون في حاجة العبد ما كان العبد في حاجة أخيه وهذا والله من شيم المسلمين وعلينا ان نخلص النية في مساعدة الآخرين .

والله يا اخواني اني ولله الحمد اذا لقيت واحد مغرز اني أحس برجفة واجلس اتابعه من بعيد ان لقيته طلع نفسه حمدت الله وان ما طلع رحت له وعرضت عليه المساعدة مع العلم اني غشيم في مثل هذي الأمور لكن ولله الحمد ان الله موفقني وفي الغالب أستطيع أطلعه من غرازه أو يجي واحد من الإخوان شرواكم من رواعي النخوة ويساعدونا.

الله يجعلني في خدمة المسلمين

غضنفر

12/11/2006, 04:04 PM

انا مع أخوي حاتم
السحب يأثر على كارونة الدفرنس وليس لها علاقة بالقير
اعرف راعي لاند سحبله موتر منقلب في النفود يبي يعدله وطق عليه الدفرنس الخلفي
وغالبا الي يسبب المشاكل هو طريقة السحب بالنتع هذي لا أنصح فيها ابدا
طريقة السحب :
أولا : استعن بالله
ثانيا : نسم كفرات سيارتك وكفرات السيارة المغرزة واذا كنت مولع المكيف بالصيف طفه
ثالثا : يفضل استخدام حبل طويل ولفه عدة مرات بين السيارتين لأن شنكار الواير ممكن يشق صدامك اذا انقطع
رابعا : عشق الثقيل لسيارتك والسيارة المتعطلة
خامسا : قدم سيارتك الين ما يشد الحبل ثم ابدا بالسحب تدريجيا بدون نتع

نايف الذيب

12/11/2006, 04:20 PM

لبرتي

12/11/2006, 04:21 PM

أنا بقولكم سالفة حصلت لي شخصياً

العام الماضي كنت بالنفود وكان معي سفاري ربع 2005 وأنا ماشي مريت من عند كابرس الظاهر أن موديله 90 أو دون ومعه عائلة
المهم وقفت وسلمت عليهم وقلت مساعدة قال السواق (( بشين نفس )) لالا شكراً
طبعاً كانوا حوالي 3 رجاجيل
أنا قلت مع السلامة ورحت حوالي 2 كيلو وفرشت زوليتي ونزلت عزبتي ما بقى الا أشب الضووو أنتظر الزملاء يجون

والله أني ما قعدت حوالي 10 دقايق الا جاء واحد منهم وقال معك واير تسحبنااا

قلت له يخوي أنا جيتكم وقلتوا شكراً
الرجال سكت واستحى على وجهه

أنا قمت وضفيت عزبتي كلها ورحت لهم وسحبتهم وتفخت كفراااتهم ورجعت لمحلي

وأحتسبتها أجر عند الله

لكن ليه أول مره رافضين ؟؟؟

imksa

12/11/2006, 06:16 PM

يمكن ما يبون يكلفون عليك

اخوتي الكرام

الفزعة ( واجبه مالنا منه ) واحيانا مثل ما تشوفون تلاقي 3 ولا 4 فازعين .

المقصد من الموضوع ان الواحد يعرف قبل لا يقدم على شي حتى ممكن لو جا واحد يبي يسحبني امنعه ونحاول ندف السياره ونستخدم البلونه والاساليب المعروفة ،، او اقل شي نستخدم الونش ،،لأن فيه بعض الناس يستصعب استخدام الونش ويسحب السيارة اعتقادا منه انه ما فيه فرق.

المحصلة النهائية للموضوع :-

استخدم كل الاساليب الممكنة لاستخراج السيارة ( بشرط أن لا يتدهور الوضع اكثر )

استخدام الونش افضل من سحب السيارة.

ملاحظة اخيرة :-

عند استخدام الواير أو السلسلة ضع سجاده او دعاسه على الواير من عند المشبك عشان لو انقطع تحميك هذي الزولية ( بأذن الله )

فمان الله

m1m

12/11/2006, 07:48 PM

من المستحيل أن يكون السحب يؤثر على السيارة حتى لو كانت السيارة الأخرى مغرزة ..

أنا أقصد السحب على خفيف .. يعني تدرج في السحب ..

كان عندي سفاري 91م سحبت ما يقارب 80 سيارة .. على الطرق أو في غراز أو مطينة .. ومن ضمنها همر متعلق .. ولاند مثولث في نقرة .. وكان الأصعب هو الهمر .. حيث حاولت 3 مرات كانت الأخيرة نتل .. أثرت في عزم السيارة بسبب الكربون .. وقفل بلف .. ( لأن النتل كان قوي جدا)

أما السحب .. فبمجرد ان أجد سيارة مغرزة أو في حاجة سحب .. أنطلق إليه حتى لا يسبقني إليه أحد .. فأنا أولى بالخير ..

ودع عنك الخوف .. اللي ما يخرب من السحب ... يخرب من الضربات :) والعمر واحد ..

أعيد السحب لا يؤثر .. النتل يؤثر على القير الأتوماتيك .. وعلى الفلوف في العادي ..