تعشيق الدبل والموتر يمشي

[الفردوس]

السلام عليكم
من المعروف بين الجميع ان تعشيق الدبل الخفيف والسيارة قير عادي لا يتطلب الوقوف اضغط الكلتش وعشق او بدون ضغط اما الثقيل فلا بد من الوقوف
الآن مع السيارات الجديدة من جيب النيسان هل يلزم القوف اذا كان القير تماتيك
والتويوتا اذا كان القير تماتيك والدبل زر

[ابوطاقية]

بالنسبه لي معي جمس صالون دفرنسين اشغل الدبل الخفيف وانا ماشي لاكن افضي الموتر الى N واعشق الدبل عادي
لاكن يستنصح الوقوف تماما عشان تمسك التروس وكذلك عند تفضية الدبل يجب الرجوع للخلف لفك التروس

[ماجلان]

أخي الكريم الاسعدي

بالنسبه للدبل الخفيف 4h بإمكانك التعشيق والسياره تتحرك
إذا كانت السياره غيار عادي تحتاج إلى استخدام الكلتش
إذا كانت السياره غيار أوتوماتيك يفضل أن يرفع السائق قدمه عن دعاسة البنزين

بالنسبه للدبل الثقيل 4l تحتاج إلى أن تكون السياره متوقفه تماما
إذا كانت السياره غيار عادي تحتاج إلى استخدام الكلتش
إذا كانت السياره غيار أو توماتيك تحتاج إلى وضع الغيار في وضع N

هناك بعض السيارات تحتاج إلى التوقف والعوده إلى الخلف قليلا لفك تعشيق الدبل وتكتشف ذلك عن طريق التجربه ( النيسان السفاري لا يحتاج لذلك )

[GMC79]

الدبل الخفيف عادي عشق وبس بدون كلتش او تقف وباذن الله مايكون الا خير

وبالنسبة للثقيل لازم تتوقف تماما

[ملاعب الريح]

السلام عليكم ورحمة الله وبركاته

أخوي الموتر ما يحتاج وقوف للدبل الخفيف سواء كان القير عصا ولا زر (زي الفكسارات وبعض الجكسارات) هذا بالنسبه للقير العادي أما التماتيك ما أقدر أفيدك إلى الآن ولله الحمد ما طاح بيدي موتر تماتيك

بالنسبه للدبل القيل يلزم الوقوف التام وضغط الكلتش

أتمنى أكون أفدتك (ملاعب الريح)

[imksa]

في الكاتلوج

التوصيات التالية:-

لا تتجاوز 80 كيلو

اشبك الدبل والسياره تسير في خط مستقيم فقط


لا تشبك الدبل والسيارة تسير للخلف


هذا طبعاالدبل الخفيف

فمان الله

[الفهد11]

مايضر التعشيق بالخفيف والموتر يمشي بس حاول انك ماتحرص عليه واجد
واذا بغيت تعشق فض الموتر لn
وارجو اني افدتك.

[الفردوس]

مشكورين نصائح حلوة
نورتوا الموضوع

[شبح الصحراء]

يا شباب هل صحيح انه يمكن اعشق الدبل الخفيف بدون الضغط على دعاسة الكلتش؟ .

[السالمي]

وليه ماتقولون اذا كان الدبل جنزير اشبكه والسياره تمشي

اما اذا كان تروس لازم توقف


انا معي قراند شروكي ودايم اشبكه وهو يمشي وافكه وهو يمشي

ولقير اوتوماتيك والنيسان كذالك لان الشروكي والنيسان دبلاتهم جنازير على ما اعتقد

بينما التايوتا تروس لازم توقف

[هاوي الله]

القير العادي والقير الأوتوماتيك كلها تقدر تشغل الدبل الصغير H4 وأنت تمشي بشرط إنك ترفع رجلك عن البنزين &
القير العادي ( الدبل الصغير قير H4 يعني مهوب زر ) تقدر تشغله وسرعة السياره 150 كم وتحت يعني 150-140-130 آلخ & ( يُفضل إنك ماتشغله على السرعات العاليه )>>> وتراه ينفع كثير في حال بنشرت وأنت مسرع لأنك تقدر تشغله وتثبت السياره ولايضره &
القير الأوتوماتيك تقدر تشغله وسرعة السياره 40كم وتحت <<<< أتوقع ولكن بتأكد وبقولك بالنسبه للسرعه المحدده <<< بس تأكد إنه يشتغل وهو يمشي &
بالنسبه لمعلوماتي هي عن طريق الكاتلوج ( كُتيب الإرشادات لمالك السياره ) <<<< لاندكروزر استيشن واجن

وسلامتك &

[هاوي الله]

يا شباب هل صحيح انه يمكن اعشق الدبل الخفيف بدون الضغط على دعاسة الكلتش؟ .
نعم تقدر بسرعات بطيئة يعني 30 كم وتحت 20كم - 10كم <<<< بس الأفضل إنك تضغط الكلتش

[هاوي الله]

نعم نعم نعم تقدر تشغل الدبل الصغير H4 بأي سرعه للقير العادي والأوتوماتيك بس ارفع رجلك عن البنزين &

راجع صفحه 175 من الكاتلوج حق السياره موديل 2006 &

وأي شي ماتفهمه مستعد أشرحه لك &

موفق,,,