ياخبرااااء ( الباترووول ) --- و( الباثفيندر ) $$$$$

[أبو عبدالكريم]

السلام عليكم

يالربع

أنا أدور لي موتر أستخدمه هالموسم ويمكن أبيعه بعد انتهاء الموسم

وماتهم الخسارة لو كانت 5 الاف وأقل اذا بغيت أبيعه . لكن كل ماكان الموتر يمسك سعره صار أحسن

لذلك ياأهل الباترول والباثفيندر أبي نصايحكم لاهنتوا

وانا محتار بين ثلاث أنواع :confused:

- باترول صالون . فتك بس أبي الرخيص والزين وبصراحة ماأعرف أسعاره

- باترول ربع . بشرط المكينة 4500 بخاخ . لو ستاندر بس المشكلة ماأعرف وش الموديل اللي يجي بخاخ 4500

- باثفيندر . قير عادي . 2004 أو 2005 لؤلؤي بفتحه ولا بدون مايهم .


لذلك أبي تطلعون لي موتر من هالثلاث لو بغيت أبيعه في نهاية الموسم ( مايطيح فيه واجد )

وياليت لو تعطوني أقيامهن التقريبيّة . حتى اذا نزلت السوق عندي معرفة مسبقة :D

------
ومارأيكم ؟ لو فكرت أجيب موتر من الكويت ؟ هل أبحصل أنظف وأرخص . ولا ماتنصحون ؟

-----------
هل يستاهل الربع التيوتا . يدخل في المنافسة ولا لا ؟ طبعا مع وجود سيارة صغيرة أخرى .;)

عطوني آراؤكم يالربع ونوروني

الله يوفقكم .

[حـاتـم]

اخوي العزيز

اذا تبي الموتر مايطيح فيه لا فشتاء ولاصيف

خذلك لاندكروزر والافضل يكون فكسار يمسك سعره تمام وخاصه المستعمل

اما الباترول الفتك فيمه الان غاليه جدا

يعني المعدوم والمكروف موديل 2002 قيمته حدود الـ60 الف

والنظيف موديل 2002 يوصل للـ75 الف

والنظيف النظيف يوصل الـ80 الف عل ى حسب السوق

اما الـ 2004 النظيف وسوبر يوصل سعره للـ90 الف وفيها

لكن عيب الباترول اذا طلع الشتاء نزل سعره وفالشتاء غالي جدا ولا تلقاه بسهوله

والربع النيسان الافضل فالبر بصراحه من ناحيه قطع نفود وغيره

الباثفايندر حساس جدا ويبيله واحد يهتم فيه يعني ما يكرفه مثل الباترول ولا يكسره

ولا نشاط وقوه مايحتاج

الربع التايوتا ما احس انه موتر بس ابدا

هو خموتر مراقا وتطعيس فقط اولا لان الشكل مايأهل بر والرساوه ضعيفه جدا ومطبه يروع

وموتر تطعيس اكثر من انه موتر بر

اذا تبي النصيحه

خذلك باترول الفتك

راحه وقوه ونشاط

وسواقته زي المواتر الصغيره ماتحس بثقل

واذا الخساره تهمك خذلك لاندكروزر

واتمنى اني افدتك

ومشكوووووووور


أخوك / حاتم

[الفردوس]

الفتك 4800 من 2002-2004 وسلمني عليه

[ع.ف.الدرويش]

الفتك 4800 من 2002-2004 وسلمني عليه

:d الفتك الـ4800
من 2002 إلى ما شاء الله ====>...........

أبو عبدالكريم.. حياك الله
أعتقد إن كلام أخوي بالله حاتم جميل جداً
وبالأصح عين الصواب

والله يوفقنا وإياك لكل خير...

أخوك..(أبو فهـد)

[salehhd]

السلام عليكم

من رايي الباث صرفية بنزين اقل ومطلوب هذي الايام بعد مانزل الجديد

واحتمال خسارتك تكون قليلة اذا جيت بيع

ولا تنسى الاتسخارة فما خاب من استخار
بالتوفيق

[m1m]

القاعدة في البيع بخسارة أقل

كل ما صارت السيارة أقدم صارت الخسارة أقل .. يعني تشتري فتك 2005 لكن إذا جيت تبيعه بينزل أكثر من خمسة لأن سعره مرتفع وكل موديل ينزل يأثر على الموديل اللي قبله

تاخذ 2003 الخسارة تكون أقل لأنه ما راح ينزل أكثر من 3000 الآف .. بسبب أن قيمته أصلا نازلة قبل .

طبعا هذا من واقع تجربة :)

[القناص]

فتك 2005 وفوق

والله يوفقك

[أبو عبدالكريم]

ياجعلكم تسلمون ... ماقصرتوا والله .


-------------
أخوي حاتم :

أشكرك على ردك . وبصراحة قبل ماأكتب الموضوع وأنا متحمّس لرأيك لأنك مجرب الموتر

لكن أبقول لك شيء . أنا تقريبا الآن صامل على أحد الثنين ( باترول فتك من 2002 وفوق ) أو ( باثفيندر )
أما الربع الباترول والربع التيوتا . طلعوا من القائمة الى غير رجعة ;)
أما اللاندكروزر بصراحة غالي ولا يصلح الا اذا تبي تخليه يطوّل معك . وأنا بصراحة حدي هالموسم وعقبه يمكن أبيع الموتر

لذلك يناسبني جدا ( الفتك أو الباثفيندر ) عاد الحين أبيك تساعدني شوي لاهنت
يعني لو شريت مثلا ( فتك ) بــ 75 قير عادي ;) وجاء أخر شهر في الربيع . وعرضت الموتر للبيع . برايك كم تتوقع ينزل ؟ لأني حاط حد الى 8 آلاف مافيه اشكال .
واذا تخبر لي فتك تراي أدور .النظيف والزين

--------------------
ع.ف.الدرويش

مشكور أخوي أبو فهد . وهل تؤيد الفتك أو الباث ؟

----------------
salehhd
مشكور وكلامك سليم . لكن مازلت محتار بين الفتك والباث

------------

m1m
بصراحة فايدة تشكر عليها ونظرة ثاقبة ماشاء الله عليك

لكن أخوي ماشاء الله عليك واضح انك فاهم باسعار الفتك . ياليت تفيدني أكثر واذا كانت الخسارة ثلاثة الاف اذا عرضت الموتر نهاية الموسم أنا اعتبرها مهيب خسارة . لكن الخوف انها تنزل ( 10000 ) وفوق :j . الله يستر . يكفي الأسهم :D

------
القناص

أنا معك لو اني باخذ موتر واستخدمه لسنوات . ومعي له رديف . لكن انا أبي موتر لها الموسم وان اعجبني خليته وان ماأعجبني بعته بنهاية الموسم لو بخسارة بسيطة . وتسلم على الرد اخوي


--------------------
وفي النهاية اخواني اللي يعرف موتر ينسفط سواءا ( باث ) أو ( فتك ) ياليت يدز رسالة عالخاص ويبشر بالدعوات الصالحات بإذن الله

ماقصرتوا يالقروم

[ولد الشايب]

والله تبي الرآي

اثنينهم والله مواتر تبرد الخاطر . انا عن نفسي موتري باث 2003 واما الباترول فما عليه كلام . استخر وربي يرزقك ويوفقك بالموتر الطيب

[ندمان]

خذ لك فتك 2002 - 2003 وماراح تندم

[أبو عبدالكريم]

طيب ياجماعة

اللي يخبر لي فتك 2002 - 2004 يعلمن

لاهنتوا

[حـاتـم]

اخوي العزيز ابو عبد الكريم

الباترول والباث على حسب احتياجك

يعني راعي تحميل واجد اغراض او ركاب معك

يفرق

اما اذا كنت بتكسر الموتر وناوي تكرفه كرف هالشتويه (( الله يجيب الخير ))

نفود وحصا

أنصحك بالباترول

اما اذا كنت بتدلع الموتر وتخاف عليه لايجيه شي وطلعات بعيده لكن بدون تكسير

لا يضر ان خذتلك باثفايندر والخساره بتكون اقل (( طبعا على حسب سعر الشراء ))

والباث لاتأخذ موديل من 2003 لان المكينه القديمه 2002 وتحت طايح سعر الباث فيها

وكلام اخوي m1m عن الاسعار وكيفيه طيحتها صحيح

يعني_

الباترول :

ان خذت النظيف بأذن الله تكسره ويدخل الشتاء ويطلع ماحطيت فيه مسمار

وصرفيه الفتك ممتازه فالخط التانكيين يمشونك 740كم

فالديره من الـ580 اذا انت ماترحم الموتر اما ممشاء عادي قالديره يوصل للـ650 تقريبا

وتعبي التانكيين بحدود الـ70 ريال

وموتر كبير يشيل اغراضك وسواقته متعه فعلا متعه

نمره قصار القير العادي بالاول 45 بالثاني 85 بالثالث 125

وتفيدك جدا فالبر لان الفتك ماشاء الله ماسك نمرته بثنين بشكل رائع

من ناحيه الراحه لاتأخذ غير السوبرسفاري لان السفاري والـSGL-V مرتبها قاسيه شوي
اما السوبر مريحه جدا بالنسبه للانواع الثانيه
_____________

الباث فايندر:

حساس لكن اذا بترفق عليه ماعليك بأذن الله لا بأس بشويه جلد بس مب دايم يعني شد وارخ

موتر خفيف جدا نشيط نمره طويله بالاول يوصل للـ60كم

وهذا طبعا يضعف عزمه في النهضه فالرباضات او النفود عامه

وطبعا تلاحظ عيب طول النمره اذا كنت مانسمت فالنفود

البنزين تعبيه فل بحودو 34 ريال تقريبا (( ان كنت ماني بغلطان ))

وعيبه تانكي واحد

لكن كلها ممتازه فالنفود

______________

وانا انصحك اذا شريت باترول فتك نظيف لاتفرط فيه

لانك ان شاء الله بتنبسط على سواقته لانه فعلا مريح وهادي ونشيط

وماراح تمل من سواقته مثل الجيوب الثانيه خاصه والمواتر الكبيره عامه

وشف الاصلح

والله يوفقك فالافضل

واتمنى اني افدتك

واي شي انا حاظر

وشكرا

أخوك / حاتم

[ع.ف.الدرويش]

--------------------
ع.ف.الدرويش

مشكور أخوي أبو فهد . وهل تؤيد الفتك أو الباث ؟

----------------



أبو عبدالكريم.. صبحك الله بالخير

بالنسبة لي فتفضيلي يكون للباترول الفتك أو الـ4500 ربع

والله يوفقك لكل خير...

;)

(أبو فهــد)

[قناص متقاعد]

المثل يقول اسأل مجرب ولا تسأل خبير

من حيث تجربتي مع الفتك هبال صراحه روعه لاتوصف وكلام اخوي حاتم صحيح 100%

وبحكم روحاتي الكثيره للبر والمقانيص لقيت اللي يطربني من جد الفتك (قوة ، متانه ، اتزان) صراحه تغير النيسان 180درجه للأفضل
واذا بغيت لايفوتك القيرين ( اللي هو تماتيك عادي) روعه . جربته في البر والخط وكل مكان لايعلى عليه

وحبت ابين شي ما بينه اخوي حاتم وهو نظام التعليق اللي يحفظ اتزان السيارة حتى ولو كانت تمشي بسرعات عاليه في الطرق الصحراوية او في الطرق المعبده بحيث تتحكم في السيارة وكأنها كامري وليست جيب

(( للمعلوميه معي الفتك 2003 قرابه 3سنوات قنصت عليه اغلب مناطق المملكه من الرمله وحائل والعلاء والمناطق الجنوبية والصمان والحدود الشمالية وعرعر وضباء ..............الخ والى الان اقول لكم بمشيئة الله تعالى لن افرط فيه ))

[almngar]

السلم عليكم
انا معي باث فندر موديل 2005شاريه العام وكاله مابقي مكن مارحتله حصي ونفود عزم مافيه كلام وتراه موتر ماعليه وتري رجلي حاره عليه

[farasan]

صدقني ماراح تندم;) من واقع تجربتي خذلك باترول ربع نهاية التسعينات او الالفين من النوع العادي وخليه للكشتات-واخد واحد ماخليت مكان مارحت فيه صدقني عندي غيره 3 سيارات مااركب :no2: غيره وركبت فيه كل ماتتخيل ونش -محول موطور هواء ثلاجة .... وعزمه كمان في طلوع الجبال الصعبه افضل من اي سيارة ثانية ترى اصحابي مايحبو يركبو الى معاي لأني دائما ارتقي بالباترول قبل الباقي:D سيارة خفيفة وعملية وعموما هذه تجربتي

[عابد]

الأخ في الله عبدالكريم
السلام عليكم ورحمة الله وبركاته

إذا انت جازم على الفتك ترى مرادك موجود عند أخونا شايب الصمان

المواصفات :

1- نيسان سفاري
2- قير أتوماتيك
3- موديل 2003
4- مثبت سرعه
5- اللون بني
6- كفرات جديد مشلان فرنسي ضمان الجفالي مفتوح .
7- الكيلو 118000
8- مغير الرفرف الامامي الايمن مع الكبوت والصدام الامامي وكاله ( ضربه من الزاويه اليمنى وكان ماشي 15000 ) والرفرف مع الكبوت والصدام القديمه موجوده ....( شايب وأحب أحتفظ :D ) .
---------------
الاضافات :
1- فتحه 3 حركات مع الضمان 10سنوات والباقي 9سنوات .
2- ونش 4.5طن نوعية وارن أخو الجديد .
3- بطاريتين مع لمبات كبوت عدد 2 .
4- بوالين مساعدات .
5- خزان ماء ستيل 35 لتر .
6- خزان ماء120لتر داخل السياره متحرك .
7- جنوط حديد عدد6 مع كفرات سلق .
8- الموتر على الفحص .
والى الصوره
http://www.mekshat.com/pix/upload/images14/mk5882_600.jpg
http://www.mekshat.com/vb/showthread.php?t=61569