استشاره : هايلكس دفرنسين تمتيك أو فورتشنر 6 سلندر

[A612]

السلام عليكم
يا شباب انا محتار بين سيارتين يا هايلكس دفرنسين فل الفل تمتيك أو فورتشنر 6 سلندر تمتيك ستاندر
طبعا انا منيب راعي بر واجد اكثر وقتي في المدينه
لكن انا ابغا سياره تحمل ومرتفعه علشان الارصفه وكذا
وانا نادر احمل لكن قلت الهايلكس صبور وتمتيك اريح من العايدي
فأنا الان محتار بين السيارتين انصحوني
والسياره مهيب للعائله شخصيه

[adel-2014]

وعليكم السلام

السياره الهايلكس غماره ولا غمارتين ؟؟

اذا هي غماره عزمها تقريبا مثل عزم العادي الى بدون دبل
واذا هي غمارتين تراها شوي ثقيله لأن الماكينا نفسها 2700 CC

أما السيارة الثانيا لم أجربها والأخوان الى في المنتدى مايقصرون أن شاء الله

[A612]

غمارتين اكيد مستحيل اخذ غماره

[adel-2014]

غمارتين خذها عادي من دون دبل أذا أنت من محبين العزم والقومه أنا عن نفسي ما احب السيارة الثقيله في القومه ومن تجربتي للغماره الدبل والغمارتين الدبل الغماره الدبل قومتها وعزمها أقوى من الغمارتين

للأمانه و هذه الشيئ راجع للمشتري السياره ومحبينها وذوقهم حط ببالك جوده السيارة ليست كالسابق خصوصا بالديكور الداخلي وفرش السياره يتمزق وخاصه بجانب باب السائق مع الوقت طبعا اذا أنت مالبست المراتب فوق فرش الوكاله السياره قوة المكاينا والعزم يقلل عمرها وجوده القطع الأستهلاكيه والفحمات تستهلك بشكل سريع أكثر من الموديلات السابقه هذه تجربتي للسياره وأستخدامي لها

[صخب]

بالنسبه للهيكل والارتفاع تقريبا الفورتشنر هو نفسه الهايلوكس المدبله لكن مقفص
بالنسبه للمكينه الفورتشنر 6 سلندر اقوى وانشط ولايقارن بقوة المدبله ابدا
نجي للنصيحه:
اذا كان مافيه للبيت سياره حوض انصحك وبقوه بالمدبله ممتازه بالتحميل ولاتنزل واجد والحوض ضروريه جدا للبيت
اذا كان فيه سياره حوض خذ الفورتشنر شرط 6 سلندر يطربك خطوط وبر

[A612]

انا للاسف البيت ما فيه باك اب
والا الحين محتار

[سقم المعادي 1]

دامك منت راعي بر ماله سنع الفورتشنر لأن قيمه هذا وهذا بينهن فرق مايقل عن 25 الف
الهايلكس ارخص , ودامك راعي مدينه خذه تماتيك مهب فارق معك وحتى لو شطحت يوم ودخلت به بر فهو بيجمل ان شاء الله دام فيه دبل بيمشي ولو ان عزمه بيطلع ضعيف نوعاً ما

اذا يهمك العزم ورجلك حاره ترا مهب جايز لك ابد الهايلكس

[المعتصم بالله555]

انا معي هايلوكس دبل ٢٠١٤ سياره ما عليها لاكن لازم
وجود سياره اخري لانه غير مريح في الخط ولا يصلح للعائله
نصيحتي لك اذا هي سيارتك الوحيده خذ فورتشنر
لاكن خذ سته سلندر والاستخاره قبل كل شي
والله يكتبلك اللي فيه الخير

[ابو عزوزي2009]

وعليكم السلام تبي نصيحتي خذ فورتشنر وانت مغمض وربي يباركلك

[SIF]

وش جاب لجاب

اكيد فورتشنر إلا إذا كنت راعي تحميل

[مطر وسم]

اذا كنت تدور الراحه الفورتشنر اريح واوسع

واذا تدور سياره للتحميل الهايلكس احسن سياره للتحميل قويه

تحياتي

[عابد-]

اذا تحتاج الونيت خذ عايدي بدون دبل اخف وزن واخف ماديا
والفورتشنر جيد ومنتشر بشكل رهيب وسعره منافس بالنسبه للجيوب الاخرى

[البناوي 12]

الله ييسر أمرك ،،كل سياره لها ميزه ،،وانا مع أخوي ،،صخب،، كلامه عين الصواب،، واستخر قبل كل شي،،،

[ابونبيل]

معي هلي دبل ١٣ عايدي اشوف ان التماتيك ما ينفع ابداً
انصحك بالفورتشنر دام غالب وقتك بالبيت واذا تبي تحمل شي اكيد نادر تقدر تشيل المرتبه الخلفيه و تصفط المرتبه الوسطيه وحمل ٦سلندر مريح وافضل لك

[كاتم الانفاس]

الهلي غمارتين مدبل وبس

[أنصر نبيك]

اخوك في مثل وضعك ماني محتاج للتحميل واحترت بين الهللي دبل والفورتشنر
واخذت هللي دبل غمارتين قير تماتيك والصراحة انصدمت فيه عزمه تعبااااااااان مرررررة
حتى انه مايشجع الواحد يروح فيه النفوذ او الاماكن الرملية صحيح شكله ومنظره طيب
لكن عزمة زفت حجمه كبير والمكينة 4 سلندر والقير تماتيك بعد
كرأي شخصي القير التماتيك مانعرف قيمته الا لما ندش الزحام ونعرف انه نعمة صراحة
اقول دامك ماشريت ولا تورطت مثلي والله عليك بالفورتشنر 6سلندر قير تماتيك
ولن تندم

[رحال7]

فورتشنر سلندر 6

[أنصر نبيك]

بعته عصر اليوم بناقص 10 آلاف عزمه مايجمل

[أب رحي]

وعليكم السلام ورحمة الله وبركاته

عزيزي بما إنك ناوي تاخذ تماتيك خذ الفورشنر الـ 6 سلندر.

كانك تبي الهايلوكس تماتيك بتنفعك وسط البلد وتماشيه خفيف خفيف

لكن فالبر ماأعرف كيف ممشى التماتيك.

وبالتوفيق يالغالي.