هل فيه محطه بنزين على طريق الرين بيشه الجديد

[بندر الكبيري]

السلام عليكم
طريق الرياض الرين بيشه الجديد هل فيه محطات بنزين على نفس الطريق
اتمنى الاجابه العاجله لاني اذا كتب الله مسافر الاسبوع هذا
تقبلوا تحياتي ....

[نقاء المطوع]

عب بانزين عند محطة الرين وبعد 100كيلو فيه محطتين وبعده تجيك قطعت الطريق مسافة 80 كيلو اللي باقيه من تحويلات وترتيب للطريق ماجهز فيه محطه مب محطه صندقه حقة الارمض فيها جوالين وبعدها محطه بعسيله قبل مايكمل خط ال 80بعدها 350كيلو مافيه محطات لذالك الافضل والاريح طريق الوادي لان هذا لم يكمل بعد ولو بنشر عليك كفر لاسمح الله بتبلش مافيه محطات فيها بناشر والبنشر تجيه مايفك الكفر يصلحه لانه ماطورهم مايتحمل ولا عطلان سبق جيتهم بنشر علي كفر وفيه كم موتر مبنشرين وحاول قالي معك ماطور قلت ايه قال اتفخه ارقعه لك قالي انا ماعندي ماطور شغال حاولت بالرقعه ولا فاد معي اضطريت اكمل المسافه بدون استبنه لانه ماحصلة احد يصلحه لي لان مسافة الجبل يحصل فيها بناشر للسياره وهي 30كيلو بس طريق مازال يشتغلون فيه

[مدرس في نجد]

تفضل هنا


::

http://www.mekshat.com/vb/showthread.php?t=540877

::

[salih100]

السلام عليكم

يابندر الكبير

من الرياض الى الرين 128 وعبي من الرين وبعد 100 تقريباْ بيجيك محطتني يمين ويسار وبعدها ب 30 كلم تقريباْ بتدخل في بدايه طريق لم يزفلت يمكن 5 كلم وبعدها بتنزل عن مسار الطريق وتبداء تمشي في مسحيه ووداي الارمض بيجيك محطه بانزين يمين طبعاً هي توانكي فوق ردميه وموصل لها شيش وعداد المهم انها بنزين :D وبعد ما تطلع من الارمض تمشي شوي يمكن 10 كلم بيجيك محطه ع يسارك طبعاً نفس الكلام توانكي وبعدها ب 150 كلم بتجيك عسيله ع يسارك فيها بنزين وبعد عسيله ب 25 كلم تقريباً بتجي هجرة النميص ع يمينك وفيها بنزين وبعدها 220 كلم وانت في بيشه

طبعاً انا مسافر معه في تاريخ 10/7/1435هـ

وانصح بالسفر معه للونيتات والجيوب والسيدان شفت فيه فورد كراون فكتوري يمشي فيه بس فيه تغاريز بسيطه في وادي الارمض الذي هو وادي الآبار

[ابوعمرالفاروق]

عليكم السلام ورحمة الله وبركاته

مثل ما وجهك أخونا مدرس في نجد

ولكن المقطعة تبدأ من برودان إلى بيشة ما عاد عندك محاط مثل اللي تخبرها فيه محطات عبارة عن براميل سود كبار ومنها ليات وعداد جنبها يعد في الأرمض كم برميل وعقبه بحول ثلاثين أو دون شوي فيه برميل يسارك وانت رايح والقرايا يمينك ويسارك فيها وعسيلة عن يسارك بمسافة ولا تخلا وانا ما أنتبهت لكن عقب عسيلة والنميص ما عاد فيه هقوتي بنزين إلا في بيشة عقب محاري 225 لكن تزهل بالجراكل المناسبة معك وعند فراغ مكان لها في التانكي فرغها فيه لا تقول بيكفيني اللي فيه علشان تتخلص من خطر وجوده معك خارج التانكي
ولكن من الرين إلى برودان لاتخاف فيه محطات على بعد 100 من الرين يمين محطة وتصك في الليل مدري متى تصك وعاملها فيها وعقبها تقاطع الأفلاج يسار حول 18 فيه محطة ولا أدري جيدة ولا لا أشوفها محطة متكاملة وانا ماشي يساري وعقبها برودان حول 17 كم فيه محطتين متقابلات جيدات ومحري هي واللي قبلها تصك في الليل ثم خلاص ما فيه إلا الأرمض
لكن ترا فيه قرايا حول الخط أكثرها يمين ما تخلا

من الرياض للرين ما يحتاج المسافة كلها 120 كم من المفرق عقب المزاحمية وانتبه ليا وصلت الرين لا تلفلف ترى الخط مستقيم قدامك لا تستنكر كانك في ليل إستمر على خطك
بالنسبة للبنشر ليتك تاخذ زود كفر استبنة إحتياط
ولكن اللي يرفق ومع الخط الممسوح وينهم الموتر لا يغرز عند الحاجة ترا إن شاء الله ما عليه وترا الردمية خطرة كانها على خبري تفقد موضوع أخونا مدرس في نجد تراه وافي وكافي والكثير شاركوا فيه وانا منهم
وليا رحت مع الخط عطنا علمك
الله يحفظك

[BMAKG]

بالتوفيق ...................

[بندر الكبيري]

اسأل الله ان يحرم وجوهكم عن النار انتم ومن تعزون
ماقصرتوا شكرا لكم من القلب
اذا ماعليكم كلافه هل السفر من الرياض الى العقيق يعتبر مجدي لاهل الباحه ( اقصد المسافه)
والا نسافر على خطنا القديم ( ارياض الحجاز)
شكرااااااااااااااااااا لكم

[حسن مخفور]

طريق الرياض بيشة الجديد
حبيت اشارك تجربتي السفر عبر الطريق الجديد من الرياض لبيشة وتوضيح الا يجابيات والسلبيات
اولا :- الايجابيات
** يختصر اكثر من 300 كيلو من الرياض لبيشة
** استقامة الطريق في اغلبه "مسطرة " حيث تتمكن من مشاهدة الجمال من مسافات بعيدة - باستثناء البداية من الرياض الى الرين حوالي 150كم
** ساهر ليس له اي وجود تماما
** متعة التعرف على طريق جديد وديار اول مرة تسمع عنها
ثانيا :- السلبيات
## بقي وصلة طول 20 كيلو بدون ازفلت جزء منها ارض صخرية قاسية بطناج وجزء ارض رملية تغاريز ( لكن يمكن للسيارات الصغيرة العبور شرط اخذ الحيطة وعدم تخفيف السرعة عن 50كم)
طبعا لتجنب التغريز للسيارات الصغيرة
## بعض التحويلات البسيطة
## بعد الرين ب130 كيلو يوجد اخر محطة يعني 390كم مافيه ولا محطة باستثناء بعض الاماكن يوجد خزانات بنزين عبيت منها في طريق الروحة ووجدتها فاضية في طريق
الرجعة
## غير مناسب للسفر باليل حاليا حتى يتم زفلته الطريق المتبقي
* * *
بعض الملاحظات المهمة
© وصف الطريق من الرياض = بعد المزاحمية اطلع من مخرج 880 وهو طريق الرين وسيدة الى بيشة
©للقادم من بيشة اتجه شرق مع طريق بيشة الخميس واطلع مع طريق تثليث وادي الدواسر ومن عند اول كبري "جديد " رح يسار وسيدة الى الرياض
© افضل وقت تمشي الصباح بدري حتى لو تعطلت او حصل شي تكون في اول اليوم قبل يجيك الليل
©التجهيزات الضرورية ) دبة ماء كبيرة ؛ واير سحب ؛ التاكد من الكفر الاحتياطي (الاستبنه) + عدة اصلاح البنشر + ماطور هواء
»» ««
واولا واخرا تقوى الله والتوكل عليه
محبكم حسن بن مخفور الشهري ابو عمر
تاريخ السفر غرة شهر رجب 1435
وصلى الله على سيدنا محمد