اصحاب الهايلوكس الدبل التماتيك أتمنى الدخول للاستفسار

[kmk9999]

السلام عليكم ورحمة الله وبركاته

أخواني أصحاب الهايلوكس الدبل التماتيك
الوالد الله يطول بعمره وبعمر المسلمين جميعاً موصيني أسأل عن
الهايلكس من ناحية عزمه وقوة تحمله ووش الأفضل من ناحية المواصفات
السعودي او الخليجي او الاردني؟ وكم أسعاره 2014؟
وكيف الهايلكس مع القير التماتيك من ناحية الهايلكس

أتمنى ما احد يدلو بدلوه الا اللي مجربينه لا تقول لي فلان معه ومجربه
أبي السواق بنفسه وصاحب السيارة اللي مستخدمها

والسلام عليكم
كان ودي اشوف ادور اي واحد معه هايلكس علشان اسأله
بس انا موجود خارج السعودية والوالد يبيها مستعجل

[سقم المعادي 1]

الهايلكس عزمها مهب هاك الزود وهي قير عادي فمابالك بالتماتيك
خاصه انه موتر تحميل حط في بالك انه بيطلع ثقيل ويالله بيشيل روحه
اذا قير عادي انا معك صح يستاهل من يشتريه

[kmk9999]

جزاك الله خير اخوي سقم المعادي

ننتظر اراء باقي الاعضاء وملاكه

[حسين السبيعي]

الجير العايدي عزمه طيب اما التماتيك ماعندئ علم فيها والله يوفقك الئ مايحب ويرضئ

[kmk9999]

جزاك الله خير

[kmk9999]

وين أصحاب الهايلوكسات؟؟؟
نبي الجواب الشافي منكم

ووش الافضل مواصفات سعودي أو خليجي أو أردني؟ وما هو الفرق بينهم؟

[مسير عليكم]

الموتر عند خويي وسقته الموتر نفسه ثقيله حيل تقل ديزل وتعشيقاته خشنه شوي تحس بها ماهي بسلسه زي تعشيقات المواتر اليابانيه القديمه 97 .

اخيرا ,, انت قلتها الموتر لشايب والشايب ما يدقق زي الشباب علي اقل دقه

الله يوفقكم ويكتب الي فيه خير

[HAS5SAN]

القير العادي يتحمل واقوى وسعره زين اذا فكرة تبيع

https://fbcdn-sphotos-g-a.akamaihd.net/hphotos-ak-ash3/1377409_568184033231458_152750971_n.jpg

الأوتو مريح وهادي وصرفيته اقل

http://www.mstaml.com/imagesData/%D9%84%D9%84%D8%A8%D9%8A%D8%B9_%D9%87%D8%A7%D9%8A% D9%84%D9%88%D9%83%D8%B3_S-GLX_2013_%D8%AF%D8%A8%D9%84_%D9%82%D9%8A%D8%B1_%D8 %A7%D9%88%D8%AA%D9%88%D9%85%D8%A7%D8%AA%D9%8A%D9%8 3-i136542183812980051.jpg

[أبو زيد ...]

الموتر مع ولد عمي من 2008
مسكت به خط الي لاحظته عليه دوران مكينه أقل على سرعات عاليه ويجيب 180 سلام سلام
مع العلم أن معي أخوه بس قير عايدي.

[روقي نجد...]

وعليكم السلام ورحمة الله وبركاته..أهلاً ومرحبا أخي الكريم..
بالنسبة للهايلوكس الدبل بعطيك خلاصة تجربتي فيه بعد استخدام ٥ سنين.
١/الموتر عزم وقوة وتماسك لا تنشد عنها دام المستخدم ماهو راعي تطعيس.
٢/في الخطوط والتحميل وداخل المدينة خذ موتر خفيف نفس ولا يخالف معك.
٣/فيه سلبيات منها سرعة انقلابه ، انقلبت عليه من أول شهر استخدام،الكلتش ثقيل نوعاً ما ومع الإستخدام الطويل داخل المدينة يتعبك (انصحك بالأوتوماتيك).
٤/قليل الأعطال ومع الإستخدام المحافظ يطول معك ولا يشكي من شيء بإذن الله.
هذا اللي أقدر أفيدك فيه والله اعلم.
رزقك الله بر والديك وبالتوفيق.

[kmk9999]

جزاكم الله خير جميعاً

بس من ناحية المواصفات او الوكيل أيهم تنصحوني فيه
سعودي أو خليجي أو أردني وأسعارهن للي يخبر سعره

[أحمد الدهمشي]

وعليكم السلام ورحمة الله وبركاته

عند الوالد واحد ٢٠١٢ و الحمد لله مرتاح معه
ومن خلال تجربة اغلب السلبيات اللي ذكرت غير موجودة
خفيف واستجابته حلوة ويجيب فوق ١٨٠ مع ٥ اشخاص وعفشهم
بالبر وبالمدينة والطعس ممتاز لاي انسان عاقل
الشي الوحيد اللي يفرق معك لما تحمله فوق ١٠٠٠ كجم
يبين ضعف بالسيارة اذا واجهت طلعات قوية
بالنسبة للوكيل شف الخليجي لانه ارخص بواجد

[kmk9999]

اخوي احمد جزاك الله خير
وش نوع قير الهايلوكس؟ تماتيك او عادي؟

ووش رايكم بمواصفات الاردني

[ابونبيل]

جرب نصيحه قبل لا تشتريه
انا معي قير عايدي وماشاء الله ممتاز بس الي شريت منه الهنقلين كان معه ٢٠٠٨ تماتيك يقول موتر حلو لكنه ثقيل جدا يقول لامشيت كنك تسحب وراك تجوري : )
هذا كلامه بالنص
والتجربة خير برهان ��

[falah8879]

السعودي أفضل بكثير

والله أعلم

[أحمد الدهمشي]

اخوي احمد جزاك الله خير
وش نوع قير الهايلوكس؟ تماتيك او عادي؟

ووش رايكم بمواصفات الاردني

القير تماتيك
وعذرا ماعندي علم عن مواصفات الاردني

[أبوهلي2008]

مواصفات الاردن احسن شيء وهي ارخص شيء بعد لان سعره بين 90 الف الي 93 الف تزود او تنقص لان السراحه فيها حساسات وكميرا ودرج بالوسط جامعلك مواصفات السعودي والخليجي وانصحك بالاردني واول ماتشترونه دخله على وكاله ابوجميل عشان الضمان والله يرزكم كل خير ولا تنساء الاستخاره

[عاشق القرى]

كان معي 2011 ومشيت عليه 40 الف كيلو مانقص من راس ماله الا اربع الاف طبعا قير عادي بريمي..

[srab09]

ليش مايشوف السييرا او السلفرادو او فورد حوض
على الرغم انه ممكن يجي دبل وقير تماتيك
لكن عزم جبااار

[kmk9999]

السييرا كان براسه بس ما يبيه لأن غمارته كبيرة

يعني شاصيه كبير تقل سواق تريله

[أنصر نبيك]

شريت واحد 2014 اغلى من الوكالة لانه يبي حجز وتعب المهم بعته بعد شهر
لان عزمه سيء جداً جداً وبصراحه خفت اجربه في الرمال يفشلني دبله لان عزمه جداً تعبان
ويوم جيت ابيعه بعته بخسارة حول 15 لان سوقه طايح وغير مرغوب لانه تماتيك
اظن الوالد بيمل من عزمه التعبان وفي نفس الوقت انا ماجربت لكن يقولون القير العادي
كلتشه ثقيل اقترح انك تدير البوصلة باتجاه شركة اخرى
القير التماتيك عزمه مخيس والعادي كلتشه ثقيل ومافي داعي تبلش الوالد بهايلوكس
شف له برادو اوفتك يستانس فيه

[المسنلم]

اشوف المتسوبيشي الغمارتين سبورت سته سلندر خيار ممتاز جدا اقوى وافخم واعزم من الهايلكس وتوماتيك بالذات للي يبي يقتني السياره 000اما للي يبي يجرب ويبيع ماينفع00

[حق صلصله]

بسم الله ..

بالنسبه للقير هذي ترجع للشخص نفسه واحتياجه
طبعاً شي طبيعي فرق التسارع بين العادي والتماتيك
وىالتحكم في النمرات هو اللي يفرق في تسارعها .

انا افضل العادي .. وفيه ناس تحب الراحه وتاخذ التماتيك
ونفسها نفس اي سياره سيدان او جيب لما يكون تماتيك وعادي
---------------
بالنسبه للمواصفات ..
هناك :السعودي - الخليجي " ويفرق من كويتي الى بحريني ألى اماراتي" - بريمي
بالنسبه للسعودي .. خطها يعتبر الأجمل بينها كلها وهو المسيطر في السوق
فرق المواصفات بين السعودي والخليجي والبريمي .. على الأكسسورات وليتها تستاهل
السعودي مسجله يختلف عن الخليجي والبريمي والوطايات تختلف في s-glx
السعودي والخليجي يجيك مقاعد مفصوله بدون تكايه والخليجي بتكايه
نفس المكينه نفس المراتب نفس الدركسون نفس الهيكل نفس كل شي .. الفرق خرابيط
سعر السعودي فل كامل 100 الف ريال - الخليجي سعره 84 الف ريال
وهنا : اقول الخليجي افضل بسبب فرق السعر .. لأن الفرق اكسسورات وما تستاهل موب مواصفات ..
انا بالنسبه لي الخط الكويتي هو الافضل على الهايلكس في الخليجي ..

[الصخرة]

اشوف التماتيك الدفرنسين مع شيبان الديرة طايحين فيه وكان اثنين منهم قبل معهم جمس سييرا ماتمت عندهم الجمس سنة تقريبا.

علما أن سعره بالوكالة 107 الآلف تقريبا. مع انتظار اسبوعين أو اكثر

والشباب اللي معهم قير عايدي دفرنسين وما يردهم شيء ما شاء الله كل اسبوع في الدهناء .....

[FJ3230]

من تجربة عز الله انه موتر لايعلى عليه وافضل من الدفرنس

من ناحية مركب ومظهر واداء بالبر

لكن عليك بالسعودي القير العادي

[طير حوران]

حبيبي الله يرزقك بر والديك شف يالغالي اذا الوالد راعي مكاشيت خفيفة وبالديرة ولاهو مثل الشباب اللي يبي موتر يصارخ بكل لفة معي اتوماتيك واطلع بها ولا شفت منها شي ولله الحمد لكن بالسفر الطويل. متعبة نوعا ما وانصحك بالسعودي ولو تروح المعارض تلقاها ارخص واستخدام قليل واوصيك بالاستخارة والاستشارة والتوكل على الله سبحانه وتعالى قبل كل شي وبالتوفيق

أرسلت من GT-I9500 بإستخدام تاباتلك

[أب رحي]

وعليكم السلام ورحمة الله وبركاته

أخوي الغالي كانك تبي تاخذ تماتيك أنا مجربه طالع مع صديقي وهو عنده تماتيك

ممشى وسط البلد بسرعه خفيفه مو مشكله يمشي معاك بدون أي مشاكل.

لكن أنا شخصيا عندي دبل عايدي الحمد لله مايحتاج كلام وسط البلد وفالبر يشيل عزمه.

التماتيك مااعرف عنه فالبر.

وبالتوفيق يالغالي,