قررت اشتري موتر خاص للبر.... ابي شوركم

[مكيشيت]

بسم الله الرحمن الرحيم

السلام عليكم ورحمة الله وبركاته

اولا رحبوا بي فهذه اول مشاركة لي معكم في هذا المنتدى الرائع

اخواني قررت اشتري موتر جيب خاص لطلعات البر والصراحة محتار لعدة اسباب

اولا ولاعمري في حياتي سقت جيب دائما اكون راكب

ثانيا وش افضل انواع الجيوب من حيث قوة التحمل والاداء وافضل ان يكون موديله فوق 2002

ثالثا من ناحية الاسعار تراي جدا غشيم ولا اعرف في الاسعار شي

رابعا من ناحية السيارات عيني على اللاند كروزر (( بس سعره غالي )) والباترول (( الكثير يمدحه ويفضله على اللاند )) البرادو (( اشوفه جيد ولكنه غير رائج )) الباثفيندر (( خاصة الشكل الجديد رائع ولكني متخوف منه ))

اشيروا على اخيكم قبل ما يتوهق ويطقها وتجي عوجا

جزاكم الله خير الجزاء

[بيرق العزة]

حياك ربي وان شاء الله تفيد وتتستفيد بهذا المنتدى المبارك والي فيه اجواد من نسل اجواد
وانصحك بسعر القليل والفائدة التي تريحك هو المستوبيشي الباجيرو فيه عيب واحد وهو القطع غاليه والا جوده افضل من غيره بالجوده والسعر ورواجه هنا فقط والا غيرنا منتشر هلا وسهلا فيك وننتظر مشاركاتك اخوك ناشد الخير

[جمس قطعه 10]

اخوي الاند كروزر غالي جدا الباترول يشفط بانزين الباثفندر الجديد بايخ مو ذاك الدرجه انا انصحك بااليوكن موصفات قويه ماشاالله قوه جامحه 5.7لتر وخذا دفرنسين وانشا الله ينفعك وقوي في البر وراحه وبنزين ممتاز هذا الي عندي وانت وارحتك

[مكيشيت]

بسم الله الرحمن الرحيم
شكرا لك اخي ناشد خير
وشكرا لك اخي جمس قطعة 10 وبسأل عن اليوكن كيف هي اسعاره مقارنة باللاند والباترول

[هاوي الله]

حياك الله
لاتبتعد عن التويوتا سواء لاند كروزر أو برادو

[aziz2727]

اللاندكروز زين بس غاااااااااالي
اشور عليك بالباترول زين وخفيف طيبنه
بس زي منت عارف الباترول ما يمسك سعره

[منتعش]

حي الله أخوي المحب والغالي / مكيشيت
كان معي يوكن قبل ثلاثة أيام
وبعته خصب عني - واحد من أعضاء مكشات المحترمين - أتصل على وقال موتري خرب جيره
وبشتري موترك ، وقلت له يبن الحلال ما تهنيت فيه وقال : أنا طالبك وبروح للبر الآن وقلت : الله يعطيك خيره ويكفيك شره .
عذراً على الإطالة في المقدمة .
الزبدة :
أنصحك باليوكن ، وإن حصل باب واحد ودفرنسين وموديل 95 أفضل وأحسن والسبب أن موديل 95 الدبل عادي
والموديلات اللي أعلى دبلها زر .
والشي الثاني الله يحفظك سعره رخيص ، رح دور عند اللي يجيبون السيارات من أمريكا وتلقه عندهم ويكون داخليه نظيف وممشاه شوي .
موتري اللي بعته موديل 95 ونظيف جداً ومجهز من وإلى للبر وبحته بـ25 ألف .
ومرة ثانية عذراً على ( الكركره )
والله يوفقك وييسر أمورك

[شبح الصحراء]

هايلوكس أو ددسن دفرنسين والحق اهلك ، قوة كافية مع متانة عالية رخص في قطع الغيار اقتصادية في البنزين حوض للعفش تمسك سعرها عند البيع تتعلم معاها اصول طلعات البر وأسرار القيادة البرية .

[مكيشيت]

بسم الله الرحمن الرحيم

اشكر من كل قلبي جميع الاخوان اللي ردوا علي والله يجزاهم كل خير وصحة وعافية

صراحة دخل مخي الباترول وودي اسأل كم تتراوح اسعاره يعني موديل 2002 او 2003

[أفلاجي موت]

تبي النصيحه لاتبعد عن التيوتا Vx-r شي

[نجـ*سهيل*ــم]

اخي انا معي برادوا 2004 في اكس 2

والحمد لله ماشاء الله ما اشتكيت منه شي لانه مثل اللاند بس مصغر بس لاتاخذ جي اكس لانه دمار وما ينبغى وما يجيب لك سعر عندالبيع

[abosami]

شف أخوي مكيشيت إذا سواقتك راكده وتحب التمشي بالبر عل مهل فلاتفوت البرادو فكس 6 سرندل أو الباجيرو تراه سيارة من أروع مايكون إذا كانت الصيانة مستمرة وتحافظ وموتر يطربك بالبر وكلامي من تجربة أحد الزملاء والأسعار متقاربة نوعا ما
===============
أما سؤالك عن سعر البترول 2002 و 2003 فتتراوح أسعارها مابين 55 و75 الف للموديلين على حسب النظافة واللون والمواصفات
===============
أتمنى لك سيارة تعجبك وتشوف خيرها ويكفيك الله شرها
لك تقديري وإحترامي

[العمده عصوم]

يمكن تضحك علي بس ابقولك شي عن تجربه
هونداي توسان ( قير توماتيك وعادي ) ممتاااااااااااز للتمشي بالطعوس وصيانته سهله وممتازه وعن تجربه
على فكره تراه دفع رباعي مستمر وفيه دبل ثقيل يعني لاتخاف
أستخر اهم شي وشف اللي يحبه قلبك

[salehhd]

السلام عليكم
الاخوان ماقصرو

يابرادو 6 سرندل او باجيرو وترى فورنتشر حق تويوتا يمدحونه

ولا تنسى الاستخارة فما خاب من اسخار

بالتوفيق

[جرير الشاعر]

بارك الله فيكم

فوائد من أهل الخبرة لايعدلها شيء

شكراً على طرح الموضوع

[الهاوي.]

نصيحة اخوية عليك بالهلي دفرنسين او اي سياره من تايوتا نـــــصــــيـــــــحــــــة

[الطعس الذهبي]

اولا انا اقول اذا انت تبغى سيارة حوض فأن اقولك خذ الجمس غمارة او غمارة ونص اما اذا كنت تبغى جيب فأن انا انصحك وبكل جدارة ومن دون منافس او منازع الباجيرو خاصة اذا كان باب واحد وانظر الى بعض الدوريات معهم باجيرو باب واحد فهو ينافس الربع من تويوتا او الربع من نيسان

[ebdaaa3]

لاتبعد عن البرادو 6 سلندر والله موتر ولا اروع في البر واسال اللي يملكونه

ولك تحياتي

[شبح الصحراء]

هايلوكس دفرنسين وبس! .

[مكيشيت]

بسم الله الرحمن الرحيم

الله يجزاكم الف الف خير يا اهل الخير

واللسان عاجز عن شكركم

بس تراكم زدتوي حيرتي حيرة :confused: وصرت اقلب راسي ما ادري وش اشتري ولوني املك 0.5% من ثروة الوليد :D كان شريت كل السيارات اللي وصيتوا عليها

طيب خلونا من الاحلام الوردية ونرجع للمهم بعض الاخوة وصوا على الفي اكس ار

لحظة يا اخوان انا وين وسعر هالموتر وين ترا اخوكم ضعيف مسيكين :( وعلى قد حاله لو انكم قايلين لي هالكلام قبل 23 فبراير (( يوم طيحة الاسهم )) كان ممكن شريته وعلى فكرة الموتر اللي ابشتريه اقساط

شوفوا يا اخوان انا ابي موتر يبيض الوجه في طلعات البر ولاني من هاللي يطامرون فوق الطعسان كل يوم خميس وجمعة ولا انا راعي تحديات واستعراضات لانه سيكون عائلي بالنسبه لي يعني ابي موتر مريح ولا يعلك ولا يبهذلك بقطع الغيار (( عندي عقدة منها اخوكم راعي مكسيما ))

صراحة دخل مزاجي البرادو وش رايكم فيه وقبل كذا يوم كنت اشوف الهدد استحقره واستحقر شكله السياحي بس يوم قريت احد المواضيع اللي كتبها احد الاخوان عن الهدد وقوته ومواصفاته ومقارنته مع الجي اكس ار دخل مزاجي هو الثاني (( والله ماعرفت لنفسي كلمه توديني وكلمه تجيبني ))

المهم ابي شوركم في هالموترين والله يعين كل المسلمين

(( ترا الباترول يمدحونه بعد )) :j

[مكيشيت]

بسم الله الرحمن الرحيم

اسف تكرر الرد ما ادري ليش وقمت بتعديله

[غضنفر]

مدري
بس اشوف ان الهدد مناسب
لكن بيهلكك بالاقساط
قيمته كاش 130 الف وزود اذا تبي فيه فتحة و ونش ودفلك

[أبو أسامة]

السلام عليكم ورحمة الله وبركاته
أنصحك .......... أنتظر فترة خمسة أشهر .......... وراح إن شاء الله تأخذ البترول 2008 الذي سيتغير بالكامل إن شاء الله ...... وإذا ما جازلك خذ الفكس آر 2008 بعد الذي راح يتغير بالكامل إن شاء الله ....... وغيره لا تدور من السيارات لأنه مع أحترامي لكل من يملك غير هاتي الأسطورتين (البترول ,الفي أكس آر ) أنه يملك شبه جيب ..............

أما إذا كنت تريد سيارة تستخدمها في الخمسة شهورالقادمة حتى تنزل الجيوب ............ فخذ هايلكس 2005 وتحت دفرنسين أو ددسن دفرنسين ........ تعبرك وتطربك وتمسك سعرها وقطع غيارها رخيص هذا إذا أحتاجت قطع خلال الخمس أو الست الأشهر من الأستخدام ............

والسلام عليكم ورحمة الله وبركاته ............

[راعي القميري]

تبي الموتر اللي ماعليه كلام هو gxقطري ولاg قطري وهذا الموتر الجي القطري والله اذا عطيته والله انه يتفرقع تفرقع والجي اكس بعد هذي هي مواتر البر ولا ننسى الفي اكس ار في مقدمتها لكن الخفه واهل المقناص والمكشات انصحك بالجي والجي اكس فقط بلا منازع مع اعتذاري لاهل النياسين وغيرها فهذا هو موتر البر والمقناص والنيسان لاباس فيه فهو قوي انتهى ...

[مكيشيت]

بسم الله الرحمن الرحيم

خلاص يا اخوان خلاص .......... رسيت على بر

على قد لحافي ابمد رجلي

رسيت على البرادو وودي اسأل الاخوان عن قيمة 2006 و2007 الفل كامل واللي اقل منه
وياليت اللي يعرف اسعاره عند البازعي يوافينا بها لانه ودي اقارن بين الموديلين اذا كان الفرق كبير اباخذ 2006 واذا كان بسيط اخذت 2007 والله المعين ان شاء الله

[محسن اليامي]

لا تبتعد عن التيوتا والنيسان
وطالما رسيت على البرادو ممتاز ومبروك مقدما ، ((بس تراه ضيق شوي))
والأسعار والله مااعرفها يالغالي

لأن استعمالي باترول

[شبح الصحراء]

اذا عزمت على البرادو لا تاخذ إلا ستة سليندر وأياك ثم إياك تاخذ اربعة سيلندر .

[Nawaf alrawaily]

اخوي مكيشيت




السلام عليكم ورحمة الله وبركاتة




تبي نصيحتي يا الغالي . انا اعلمك وش تشتري .




طبعاً أنت تبي السيارة على قولتك مخصصة للبر والطلعات الحلوة والمقناص والتطعيس وتبيها تبيض وجهك وين ما



تتجدة .


هذا اللي فهمتة من كلامك يا استاذي الفاضل .




انا بقول لك شيء طبعاً فية بعض الشباب يشتري جيب أو ددسن جديدة . وبعد ما يطلع للبر يقول والله اخاف اجر



على الموتر وما ودي اكسرة لأني دافع فلوس كثيرة علية . طبعاً في هالحالة هذة نقول لة أنت ما شتريت السيارة إلا



انك تبيها تبيض وجهك وقت المحن سواء في البر أو في المقناص أو حتى التطعيس . في هذة الحالة اقول لك



نصيحة . ربما تكون صائبة ووجهة النظر لا تفسد الرأي بل ناخذها بعين الاعتبار .




أول شيء حاول انك تبحث عن جيب شاص قديم موديل 77 م أو موديل 79 م طبعاً تحصل سعرة رخيص بالمرة .




ثاني شيء عليك بتغير ماكينة جيب الشاص وتسقط علية ماكينة جمس وتحصل آهل التشاليح يركبونها لك بالراحة .




ثالث شيء سوي تربيطات كاملة للموتر وغير آي شيء تشوفة بنصف العمر .




رابع شيء ركب كفرات عريضة وجديدة للسيارة . وعرض الكفرات مفيد للنفوذ سواء في الدهناء أو الربع الخالي .




خامس شيء يمكن تكلفك تصليح السيارة من إلى حوالي 25 الف ريال فقط .




سادس شيء تكون وفرت على نفسك مبلغ 40 الف ريال وهو ثمن شراء سيارة جديدة .




سابع شيء حتى لو تبي تجر على الجيب الشاص القديم في البر أو في النفوذ أو في التطعيس ما عندك مشكلة وما



تخاف علية


لأنة كلة حديد في حديد وسعرة رخيص ويبيض وجهك وصدقني راح تنبسط منة وفية قوة ماهيب صاحية




يعني الفكس آر ولا شيء عندة واتحدى اي سيارة تجي بقوتة لأنة خفيف جداً وماكينة جمس قوية




وآخيراً فكر في الموضوع وإن شاء الله راح تدعيلي وبعدين سيارة البر للبر فقط وليست سيارة عوائل .




وتقبل تحيات اخوك




مكتف العقرب

[مكيشيت]

بسم الله الرحمن الرحيم


يا اخوان اللي عنده علم عن البازعي بالرياض هل نزل موديلات 2007

لانه حسب علمي قبل ممكن 3 اسابيع ان المتواجد عنده 2006

[shams]

السلام عليكم

اشجع اليوكن وعسى ربي يرشدك للي يبسطك

[غالي]

باختصار وماابي اطول
اذا كان مثل كلامك للبر فقط والطلعات
دور لك شيء فيه حوض للشيل....... عاد انت اختار وشهو
اذا كان عائلتك كبيره
ترا اليوكون دفرنسين حليو وخراباته قليله جدا ومريح ومكينه ماشاء الله
والله يكتب لك الي فيه خير