المشكلة الأزلية في سيارات السعودية

[السيطره]

الاخوه الزملاء، اعاني من مشكله في سيارتي عجزت وهلكت وما وصلت لسببها الفعلي، وهي المشكلة المعتاده " طقه عند اللفات، يمين او يسار "

وابي الافاده من واقع خبرتكم، علماً اني بحثت في المنتدى وفي عدة مواقع وقرأت عدد لا يحصى من المواضيع والكثير يشتكون من نفس مشكلتي بمختلف السيارات

ولا وصلت من تجاربهم الى اي حل نهائي

عموماً انا بدأت بفحص السيارة ولم اصل لتشخيص منطقي من الورش، فقررت اجلد كل شي، نفضت تحتي السياره بالكامل جميع القطع من والى، ركب على مقصات على جلد مقصات على مسامير توازن على اذرعه ومساعدات وإلخ وجميعها قطع اصليه من الوكاله .. ولا زالت المشكله موجوده

وضبت الدوده وغيرت طرمبة الدركسون ولا زالت المشكله موجوده

بل وطحت في مشكله جديده في الدوده وطرمبة الدركسون من وراء الاجتهادات المكانيكيه من السباكين اللي بالصناعية ((( خصوصاً مركز الطائر ))) وابو سليم المسيحي حسبي الله عليه انصحكم لوجه الله بالإبتعاد عنه 100 كم

ومركز المجد تسبب لي في مشاكل في الاصلاحات من مزاجية مدرائهم الشاميين وسوء تعاملهم مع الزبون والعامل

وبسبب هذه المشكله الان بيني وبين الورش مشاكل وصلت للشرطه، يصلحون شي ويخربون 200 شي، مثل توضيب الدودة كاد يكلفني مبلغ فلكي الاف الريالات لتغيير طرمبة الدركسون وتكلفت بها الورشه بعد شكواي عليهم للشرطه

وبعد كل هالمعاناة لا زالت المشكله قائمة

* التكاليف: حتى الان فوق 5,000 ريال
* الوقت: حتى الان 3 شهور
* النفسيه: تحت الصفر

ويا انا يا هالطقه !

اتمنى منكم الارشاد والنصيحه حيث اني صرفت من جهدي ووقتي ومالي الشي الكثير

ومنكم نستفيد ،،،

:f

[السيطره]

المعذره للشيوخ مشرفين القسم المعذره يرجى نقل الموضوع الى:

http://mekshat.com/vb/images/myicons/33.gif خيمة أعطال السيارات وإصلاحها

[فرفور بريده]

وش سيارتك ؟

لنفيدك

وبعدين خذها قاعده

اي شي بموترك ماتعرف علته

خله لين يخرب حتى لو تطق المكينه

ولا انفض الموتر بمبلغ طائل على غير سنع

ويمكن البلا يصير تافهه

[عزوز الحجازي]

تدفع 5000 لمجرد ذهب صوت الطقة و هي حتى الان لم تؤثر في قيادة السايرة اوتسببت في اعطال
اتركها و توكل على الله

[تساهيل1]

طيب يمكن الطقه في عمود الدركسون اللي مشبوك في الطاره

وممتد الى الدوده فحصته او لا ...؟

[Nasser33]

يارجال لاتكون حريص مررره ولاتهمل الموتر مررره
يعني مب عشان طقه ادفع 5000 ريال
واخر شي يطلع سببها تافه وتصلحها ب 100 ريال
غير كل جلد الموتر وشحمه وان شاء الله تروح

[الحربي 591]

اخوي الطقه تطلع اذا لفيت الكفر اخر شي ثم اذا دعست تطلع الطقه؟؟
اذا نعم ابغاك تشيك على كرسي المكينه فقط شيك شوف مكسور ولالا
لا تقول ماله علاقه
له علاقه في الطقه وفي القومه وفي العزم وفي تثبيت المكينه وفي غيارات القير

[الحربي 591]

واذا ما طلع منها ^^
وجهه الضوء على((العكوس))

[فرفور بريده]

واحيانا تكون من الكفرات

اذا كنت مركب كفر اكبر او اعرض

[cadillac911]

ترى احتمال بطانه الكفر هي السبب تحك في الكفر شيك عليها


Liverpool for ever

[اليامي قطر]

الله يعينك

[كم كيلو باقي]

ارفع الموتر من قدام بعفريته من عند كل كفر
وانسدح تحته وخل احد العيال يركب ويلف
ولا تطلع لين تعرف من وين الطقة

اذا ماطلعت الطقة معناها المشكله بالكفر او الفلنجه او قاعدة المساعد

[MSAN]

وش السيارة وكم موديلها

[ابوراكان تبوك]

5000ريال على شان طقه

ماكتبت مواصفات سيارتك ونوعها ومن متى ظهرت الطقه

بعض السيارات تكون الطقه فيها شيء طبيعي

[شايب حرب]

اذا السيارة دفع امامي الطقة من العكوس

[اابو مياس]

الطقه ممكن جوزات (بيضات) ممكن رمان الهوب
اذا القماشات احد المشكبيات الي تثبتها بالكلبيبر طايحه اذا اخذ مطب يتحرك القماش ويطق

[zayed98]

الوكاله الوكاله الوكاله الوكاله

[laurel_200L]

يمقن من الاذرعة الداخلية او الخارجية !!

[السيطره]

كل الشكر لمن شارك وافاد

السياره لها معي 9 سنوات ولا ظهرت الطقه الا في الشهور الاخيره ولاني غشيم في سيارتي الطقه قويه جدا وغير طبيعيه لدرجة ان اي شخص حول السياره يسمعها اذا لفيت الدركسون !

وبعض الاخوان مستكثرين ما دفعته عند راحة بالي وسلامتي ! صعبه الاستهانه في اصغر الشرر الطقه حاله غير طبيعيه بالسياره وتثبت وجود خلل وانا ما عندي استعداد اتجاهلها واخاطر بنفسي داخل هالحديد

ومن شوف عيني حالات متكرره لحوادث مميته في سيارات الفورد الفكتوريا والهوندا الاكورد حاله فجائيه لانكسار قطعه في مجموعة الدركسون بسبب تلف ركبه او تلف مقص او حتى ذراع دركسون ما يكلف 200 ريال !

وعن نفسي ملعون ابو الريال عند سلامتي وسيارتي ما شريتها ببلاش !

عموما شكرا للجميع على الافاده واخص بالشكر الاخ ابو مياس من الجوف مشاركه ثمينه وملاحظات في محلها شيكت الهوب والفحمه ولاحظت احتياج لخرط وتغيير علماً اني غيرت الجوزات كامله ولكن باقي مجموعة الفرامل والله يعين

وكل عام وانتم بخير

[cadillac911]

غيرت أذرعة دكسون ولا لسه واذا أكلت حفرة او مطب تسمع الطقة اذا كانت إجابتك نعم فمعناه انه أذرعه دركسون داخليه وخارجية يبيلهم تبديل

وأنتم بصحة وسلامة

Liverpool for ever

[خيال الغلبا]

عندي نفس المشكله في اللاند 2009 لما ألف الدركسون على الآخر

[ابوريان 470]

طيب فكرة تشيك على جلد البودي الي عند باب الراكب والسايق قد صارت معي وشديت عليهن والحمد الله راحت الطقه

[يزمجر]

نفس المشكلة عندي كامري 2008 رحت الوكالة قالوا هذا عيب مصنعي من عمود الدركسون غيروه على الضمان سنتين الا هي راجعه وانا طنشتها دام ان ما فيها ضرر

نفس المشكلة عندي في يوكن 2013 قالوا الاخوان ان يبيله تشيحم والله يعيين

لكن اذا تبي نصيحتي لا تدقق في كل شي بعدين تتعب

ترى راس مالها حديد والعمر واحد وانا اخوووك عش يومكـ

[الحربي 591]

كل الشكر لمن شارك وافاد

السياره لها معي 9 سنوات ولا ظهرت الطقه الا في الشهور الاخيره ولاني غشيم في سيارتي الطقه قويه جدا وغير طبيعيه لدرجة ان اي شخص حول السياره يسمعها اذا لفيت الدركسون !

وبعض الاخوان مستكثرين ما دفعته عند راحة بالي وسلامتي ! صعبه الاستهانه في اصغر الشرر الطقه حاله غير طبيعيه بالسياره وتثبت وجود خلل وانا ما عندي استعداد اتجاهلها واخاطر بنفسي داخل هالحديد
خ
ومن شوف عيني حالات متكرره لحوادث مميته في سيارات الفورد الفكتوريا والهوندا الاكورد حاله فجائيه لانكسار قطعه في مجموعة الدركسون بسبب تلف ركبه او تلف مقص او حتى ذراع دركسون ما يكلف 200 ريال !

وعن نفسي ملعون ابو الريال عند سلامتي وسيارتي ما شريتها ببلاش !

عموما شكرا للجميع على الافاده واخص بالشكر الاخ ابو مياس من الجوف مشاركه ثمينه وملاحظات في محلها شيكت الهوب والفحمه ولاحظت احتياج لخرط وتغيير علماً اني غيرت الجوزات كامله ولكن باقي مجموعة الفرامل والله يعين

وكل عام وانتم بخير



اخوي لا هنت
الطقه مع الحفر والمطبات
ولا مع اللفات
لانها تفرق فرق السماء عن الارض

[200]

اذا الطقه تطلع وانت واقف اذا لفيت يمين أو يسار شيك على ك سي الياي أو الياي نفسه عندك الباترول والصني والمكسيما يطلع بهن الصوت واخر شي يطلع من الياي أو كرسي الياي تأكد من هالحاجتين وان شاء الله تهون

[خيال الغلبا]

نعم تطلع اذا لفيت وانا واقف يمين اويسار على الاخر