قصص الكشاتة اللي يكشتون لحالهم

[الوافي.]

كنت اتصفح مواضيع مكشات القديمة فوجدت هالرابط واعجبني الموضوع
http://www.mekshat.com/vb/showthread.php?t=118957 (http://www.mekshat.com/vb/showthread.php?t=118957)
ولابد ان احدهم قابلته قصص واحداث وحوادث بعضها اليمة وبعضها سعيدة فياليت ان الاخوان يشاركون بقصصهم
انا صارت لي قصة صغيرة
وصلت لموقع الاتفاق وهو بعد سامودة قبل الربع قلت ابسوي القهوة والشاهي قبل ياصلون وياخذون فنجال وبعدها نتجه للموقع المقصود وحيث اننا بعد حزة الغداء قلت الربع يبون شاهي
المهم نزلت عزبتي وشبيت الضو عودين او ثلاثة وسويت الشاهي يوم صبيت اول بيالة والا هاك الهجوم الطائر( ذباب) اللي ما ادري من وين جاء من كل الاتجاهات على البيالة
يارجاجيل وخروا خلونا انتقهوا
ماسمعوا الكلام ولا طاعون واقوم انثر الشاهي والم عزبتي وانحاش
والاي حول شبك غنم
وسلامتكم
عاد لا تخلوننا من قصصكم خاصة انكم فاضين هالحين

[VT 4800]

موضوع عجيب وحلو الله يعطيك العافيه

[الوافي.]

وش رأيكم بهالكشتة
http://www.mekshat.com/vb/showthread.php?t=133062 (http://www.mekshat.com/vb/showthread.php?t=133062)
شخص واحد الله لا يضره لحاله

[الوافي.]

معقول انكم بخيلين الى هالحد
معقول انكم يالي تكشتون لحالكم ما مرت عليكم ظروف

[محمد3171]

مامن بخل يالوافي لكن بعض المواقف ماودك تتذكرها هههه انا صار لي موقف كنت بلحالي الكلام ذا تقريبا له اربع سنوات في موسم صيد الضبان اتجهت لله ثم لديره يقالها ام رجوم واقنص وعين من الله خير وجاب الله ذاك العجاج اللي مايخليك تشوف يدك ياولد اتلفت يمين يسسار ماشوف شي ايه يالله الخيره خلني مير اشوف البنزين اوووه لاوالله الي رحت فيها اللمبه حقت البنزين ولعت ومسك ذاك الاتجاه اللي بغا يوديني للعروق الدهناء ووقف شوي وطلع الجوال كود فيه ابراج ادق على احد من الربع لاحووول ولاقوة الا بالله مافيه ابراج ايييه في هالحاله مالك الا تطلب الي فزعته تغني عن كل فزعه واتجه للكريم بالدعاء الا يوم ركد العجاج عصير مابقى على المغرب الا ربع ساعه والحمدلله عرفت الاتجاه وسمي بالرحمن واجي سالم غانم وسلامتكم سبحان الله وبحمده سبحان الله العظيم

[وحدإني]

ياخي ودي اطلع ومعي الشباب كلهم

لكن الربع ماهم حقين برااان وكشتات وش اسوي.؟

اذا وقعت ذبانه على يده راح غسلها بصابون.! كيف تبيني اخذه هذا ههههههه

[قلب الداهية]

اغلب مكاشيتي لحالي ولله الحمد

[جني صغير]

ياخي ودي اطلع ومعي الشباب كلهم

لكن الربع ماهم حقين برااان وكشتات وش اسوي.؟

اذا وقعت ذبانه على يده راح غسلها بصابون.! كيف تبيني اخذه هذا ههههههه

لو أشوفه كذا والله معاد بخاويني ولا اخويه

[المتحـ2007ـد]

انا من الناس اللي يطلعون لحالهم ويصادف مرات عطل في السياره بنشره ضياع او قلبة راس لكن هذا كوم واللي بقوله كوم ثاني

طالعات الليل ما عاد احب اطلع لحالي الا اذا كان قريب من الديره

والسبب الجن الله يقاصرنا ويقاصرهم باحسان

تلقاك جالس ما عندك من الشر طاري والا هاك الضو اللي تمشي وثم ياقف شعر جلدي اذا شفتها يسمونها الشياب عندنا ام شوشه

غير نور السيارات اللي تشوفها من بعيد تمشي

من عقبها ما عاد اطلع لحااالي الا اذا صرت ابي الطلعه وما على من شي

اقراء المعوذات واذن واجلس

[الوافي.]

امس تكلمت مع واحد مهو راعي انترنت عن الموضوع وقال
انا من اللي يحبون يكشتون لحالهم بس عصرية اوصباحية ايام الشتاء ولقيت فيها ميزة اخلو الى نفسي واشوف هو انا اخطيت على احد فأحاول استسمحه
وفيه ثانية بعد القهوة احمسها بنفسي لان عندي وقت
ازين قهوتي على مزاجي
اسوي شاهيي على مزاجي
بدون تكدير
وبعض الاحيان افطر على ما تشتهي نفسي

[anas50]

احيان اطلع لحالي عصرية ولا اطارد سحابة بس ما ابات لحالي

[سقم المعادي 1]

اذا مطارد امطار ماعندي مشكله بالعكس احب لي اكون لحالي اوقف متى ما ابي و اروح وين ما ابي بحيث اني ما ارتبط مع احد
اما نوم بالبر لحالي لا والله ماحد الله لو الواحد لا سمح الله يجيه ظرف يغرز يتعطل يبنشر يمرض ينقلب راسه والا ماحوله احد

[تساهيل1]

اغلب مكاشيتي لحالي ولله الحمد


افا وش دعوى ياغالي الوحده شينه
احيان يمكن لاكن دايم صعبه

[اليامي قطر]

جربت في حياتي المكشات لحالي

ولقيت فيها مصايب واحوال منها قد غرزت والموتر مايل كاد ينقلب لاكن الرب سبحانه ستر

ومره قد نزلت مع طعس فالبران ويوم جاء نهايه الطعس ماحاسبت وصدم وجه الموتر بالارض

وضرب صدري الدركسون واغمى علي كم ساعه لحالي

ومره مسكت طريق لحالي فالليل مضيع الطريق الصحيح وراح كثير الوقود في ضياع

كلها اسباب المكشات لحالي لاكن خوه النشامى يستفيد منها الرجل ويكونون له ونيس ويرادونه الصوت

[ابوطيف2]

أحيان أطلع لحالي بس يالربع والله من الطفش والهم ماأستانس لحالي لو تخيرني أطلع لحالي أو آخذ غثيث لأخذت الغثيث أحسن من لحالي ...يمكن أمشور بالبران لحالي لكن مستحيل أمرح لحالي

[قناص الحوى]

الطلعه الواحد لحاله زينه

[قناص الصحرآء]

اكشت لحالك ابرك ولا تطلع مع واحد يغثك

[قناص502]

الطلعه لحالك حلوة لكن فيها سيئات وحسنات
لكن سيئاتها اكثر الله يكفينا الشر واياكم
لو غرزت ؟ لو اغمي عليك ؟ لو لو لو ،،،،،،، اشياء كثيره

لكن الطلعه مع الربع حلوة لو ان فيها شوي مغثة

بكل الحالتين يالحبيب شف وش ودك ودق سلف معك احد او لا مهما نصحنا الواحد ماله الا رايه ههههههه
الله يسعدكم جميعا

[الدبل الرابع]

عندما يكشت الشخص مع نفسه يجد الاسئلة حاضرة واجابتها مشوشة
بمعنى انك تحاول ان تقنع نفسك بأن اجابتك لاسئلة نفسك صحيحة وفي كثير منها مغالطة بالنسبة للواقع الذي تعيشه.
نعود لواقع من يكشت مع نفسه نجده واقع تحت تأثيرات عديدة لعل اهمها الشعور بالوحدة
وعدم وجود خل وفي او خل لايشارك نفس الهواية. فكثيرون يعيشون عزلة ويفضلون العزلة ويحبذونها بكامل تفاصيلها.
اتذكر ان احدهم اتصل بي ذات صباح وكنت في العمل وطلب مني ان نذهب للنفود او الطعوس او الرمال وكان الجو حينها يميل للاعتدال فاعتذرت بأدب جم. لكن صاحبنا ازبد وارعد لاسباب تخصه الحاصل من هذا كله انه ذهب لوحده للثمامة وهناك شب النار وحط الدلة وابريق الشاهي وتعال شف الصور اللي يرسلها لي عن جلسته وضوه ودلته وقدوعه صورة صورتين ثلاث اربع ماشي لكن بعد توقفه عن الارسال عددت صوره فوجدتها 25 صورة لاتفرقها عن بعضها الا بالاختلافات السبعة.
اتصلت به اساله ليش يافلان وراك على هالصور والتكريرقال ياخي ابيك تحس قلت احمد ربك انت كاشت مع نفسك وهذا شرف لك المفروض انك توجه هالشعور والاحساس عندما تكشت مع نفسك.
في النهاية يجب ان لانغامر بانفسنا خصوصا في مثل هالاوقات كفانا الله واياكم الشر واهله.

[Obu-Nasser]

عندما يكشت الشخص مع نفسه يجد الاسئلة حاضرة واجابتها مشوشة
بمعنى انك تحاول ان تقنع نفسك بأن اجابتك لاسئلة نفسك صحيحة وفي كثير منها مغالطة بالنسبة للواقع الذي تعيشه.
نعود لواقع من يكشت مع نفسه نجده واقع تحت تأثيرات عديدة لعل اهمها الشعور بالوحدة
وعدم وجود خل وفي او خل لايشارك نفس الهواية. فكثيرون يعيشون عزلة ويفضلون العزلة ويحبذونها بكامل تفاصيلها.
اتذكر ان احدهم اتصل بي ذات صباح وكنت في العمل وطلب مني ان نذهب للنفود او الطعوس او الرمال وكان الجو حينها يميل للاعتدال فاعتذرت بأدب جم. لكن صاحبنا ازبد وارعد لاسباب تخصه الحاصل من هذا كله انه ذهب لوحده للثمامة وهناك شب النار وحط الدلة وابريق الشاهي وتعال شف الصور اللي يرسلها لي عن جلسته وضوه ودلته وقدوعه صورة صورتين ثلاث اربع ماشي لكن بعد توقفه عن الارسال عددت صوره فوجدتها 25 صورة لاتفرقها عن بعضها الا بالاختلافات السبعة.
اتصلت به اساله ليش يافلان وراك على هالصور والتكريرقال ياخي ابيك تحس قلت احمد ربك انت كاشت مع نفسك وهذا شرف لك المفروض انك توجه هالشعور والاحساس عندما تكشت مع نفسك.
في النهاية يجب ان لانغامر بانفسنا خصوصا في مثل هالاوقات كفانا الله واياكم الشر واهله.

صباح الخير
يا الدبل الرابع خويك يعاني من مشكله نفسية، اجل يزبد ويرعد لانك ماطلعت معه!!
لاتقيس عليه فحالته خاصة.

[خليل909]

انا شخصياً ارفض فكرت اني اكشت لحالي. مافيها اي وناسه بالعكس تحس بالوحشه وتطري عليك طواري كثيره افضل شي يكون معك خوي واحد مطنوخ مزاجك ومزاجه واحد

[معنى الحياة]

حياكم الله
موضوع جميل وجيد جعلني اقرا كل الردود والتعليقات
لا شك ان الواحد قد يحتاج للخلوة بنفسه احيانا ولكن لا يخلو بنفسة في ظروف تستلزم وجود المجموعة مثل من يذهب بعيدا عن مناطق الارسال للجوال او مناطق غراز او وعورة فلا تبعد ولا تقرب قريب خلك مثل ماقيل حذفة حصاة (واعتذاري من صاحب البيت للتكسير فيه) ودمتم بخير وعافيه

[العريفي 911]

السلام عليكم ورحمة الله وبركاتة




عضو جديد وأول رد لي بِسْم الله


ي الربع غلط الواحد يكشت لحالة لا تعطلت ولا من السوالف ذي والواحد ماودك انه يأدي نفسه اللى التهلكة

[ابو البر]

اطلع لوحدك وأتكل على الله
الموت جايك لو انك في وسط المستشفى
اهم شي جهز نفسك صح وأتكل على الله سبحانه .

[ذيب ذهلان]

الركب شيطان كم قال عليه الصلاة والسلام مع اني دايم اكشت لحالي لاني اخوياي مايحبون البر

[بوعبداللهuae]

مرحبااا

انا عندي الكشته لابد يكون عندي خويا لانه كشته بدون لمه ماتنفع

اما طلعه القنص او مشاهدت امطار او طبيعه اذا كالقيت حد يخاويني اطلع
لوحدي مافيه مشكله

اما الطلعه في الرمل والكثبان سوا لكشته او صيد لازم يكون خوي وشرط سيارتين بعد
لان الصحرا او الرمله ماهيب هينه وخطيره للغايه
وانصح الشباب اللي ناوين دخول الصحراء لابد من ((سيارتين))

والسموحه منكم
.

[خزامى وراط]

موضوع مهم :l:l:lدايما اكشت لحالي ومتعود لاكن اروح لاماكن اعرفها جيدا والحمدلله والعزبه كامله والاشتراك وواير للسحب (مهمين جدا) كما حصل معي موقف واحد طفت السيارة المشكله البطاريه والساعه 7بعد المغرب وقت ربيع وخير رحت لصاحب المزرعه قريب وعنده بطاريه وشركنا السياره واشتغلت :f:f

[مـرمـر زمـانـي]

على حسب المكان

اذا كان بعيد لابد نكون مجموعة اما اذا كانت الكشتة قريبة كالغضا اطلع لوحدي واجهز الشاهي والقهوة وارتب الجلسة وارسل بالسناب او بالقروب اني كاشت حتى يتجمعون الربع وبعض الأوقات يسيرون ويذهبون وانا انام لوحدي بالبر لأني من عشاق النوم بالبر هدوء الليل ومشاهدة النجوم والقمر بدون ازعاج لها متعة


المواقف المضحكة
قبل اسبوعين تقريباً اخذت اغراض الطبخ واتجهت للبر واخترت مكان جميل وكانت الساعة تقريباً 10 مساء وجهزت الاغراض طبعاً لا يتواجد بالمنطقة الا انا لوحدي طلعت الايباد وجلست اتابع شيلات وفجئة يطلع شخص من خلف موتري مأخفيكم جتني ام الركب هههههههه حتى سلامة لي كان بصوت مرتفع جداً افجعني جلس معي وتقهوى وتبين لي بأنه متعطل بنقرة قريبة من مكاني تجمعوا الربع وأخذت موتر واحد منهم وذهبنا لأخراجها .

المواقف كثيرة لكن ما يحضرني الا هذا اتمنى ان تسعفني الذاكرة لأعود واذكر بعض المواقف

وكل الشكر والتقدير للجميع

[مطر وسم]

هي نفسيه

مره اروح لحودي للبر ومره لازم خوي

[ابن ضعيان]

من المواقف أني ضيعت مفتاح السيارة أثناء التمشي بالبر ... واستمرت رحلة البحث عن المفتاح تقريبا ساعتين، وبعد أن غربت الشمس وأدعية لها أول وليس لها آخر وجدت المفتاح بجانب شجرة، وإلا كان الطريق يبعد 20 كيلو متر ... الله ستر

[عاشق الددسن84]

موضوع شيق ،،، لكن شف هي الدعوه ماهي نفسيه ولا شي مرات ادق على واحد ولا اثنين من اخوياي الي ماله نفس يطلع والي يصرف وابد اطلع لحالي بس ل اماكن اعرفها زين مو ابعد بالنفود وماعرف احد سلامات

عاد مره كنت منسم كفر ام عزيز وم رقيها ذاك النفود القوي ومديور فيها مخلي خشمها على ألنزله واتعشى وانام يوم اصبح وأشغل الا ماتسمع الا صوت البطاريه طقطق طقطق فاضيه والقمه ب الفاضي وتحدرد ونتعه وروح بدون تصخين بالبرد ونسيت فـرشتي ماصدقت انها اشتغلت
لكن ما طول عليكم اماكن بعيده وما تعرفونها لاحد يروح لحاله

[براعة فنان]

الطلعة لحالك عصرية أو صبحية بس
وبعدين اللي يطلع نفود لحاله وسيارته مافيها دبل
هذا يعرض نفسه للتهلكة
لازم سيارتك تكون مناسبة للمكان اللي بتروح له

[ابو اماني 1]

دائما اطلع لحالي وانام في البر لحالي واخذ معي كتاب اتونس بقرائته في الليل لما يجيني النوم
مره قررت المبيت في البر يوم صليت المغرب والعشاء جمع وقصر رحت امشي على رجولي جهة مكان مرتفع علشان اكلم الوالدة الله يرحمها واكلم الأهل اطمنهم عني المهم يوم خلصت المكالمات رجعت ابي السيارة وكانت الليلة غدراء والله واضيع سيارتي يوم حسيت اني مشيت مسافة ابعد من سيارتي خفت والله قلت تهت في الخلاء ولحالي ولا معي ماء ولا سلاح ولا كشاف والوقت صيف في موسم هجرة الطيور لو يصبح الصبح وانا ضايع عزالله بهلك وارجع مع الجهة اللي جيت منها وامشي مافيه فايده وزاد الخوف عندي المهم وانا على هالحال اروح وارجع و مادلني على السيارة بعد توفيق الله الا القمر بعد ماطلع سطع نوره في نور السيارة والسيارة لونها ابيض والمحها وانا بعيد عنها وستر الله.........المكان شرق الرياض بالقرب من شعيب الحلال الشمالي

[ahmed alwabsi]

يقولون الجنه بدون الناس ماتنداس
وش الله حادني امشي لحالي
اتعب على دورة الخوي الطيب لكن ما اروح لحالي
الا مثل ماتفضل الاخوه عصريات او مباكير الصباء
اذا بغيت اجلس لحالي واعيد ترتيب امر هالدنيا
واوزن البراد ولا المهيله بس ما ابعد قريب
وحنا ديارنا معالمها واضح وبينه ماهي مثل نجد وضواحيها

[سارق الكحل]

الحين الواحد صار يخاف من شياطين الأنس يطلعون له لحاله
وإلا شياطين الجن أمرهم هين

[اليامي قطر]

انا مااؤيد اللي يطلع لحاله ابد ابد وخاصتن هالايااام

كل يوم سامعين اخبار ذبح قتلا

يااما تطلع انت وربع فيهم خير او اجلس عند اهلك وربعك واذكر الله

[خيال المفخره]

انا اول ضد الي يكشت لحاله ولكن بعد ماعشيري تغرب عن الديره شكلي ابي اكشت وحداني

[خوي السطحه]

ممكن اطلع لحالي بعد البحث عن خوي عارفه وحاب خوته اذا مالقيته طلعة لمكان عارف فيه ناس واجد كشاته مثل الافياض ومكان الربيع

[][][زلفاوي][][]

موضوع جميل جدا وفيه فائدة من تجارب الآخرين.. وبالفعل اذا الدعوة مطارد امطار وتمشية وسعة صدر خفافية ما يمنع انك تكون لحالك والوضع طبيعي.. لكن مكشات وسجات بعيدة واماكن يعني يقل من يكون فيها الافضل مع الربع وان كثرت السيارات ابرك بعد..
موقف ربما يكون عادي لكن هي تجربة من تجارب الحياة.. اتفقت مع كذا واحد من الشباب اننا نطلع رحلة بس بعيدة شوي كلن جاه ظرف واعتذروا جميعا حسيت ان الدعوة سحبة فدقيت سلف وتوكلت على الله ومشيت.. بالخط نفسه جاء غبار له اول ماله تالي وسبحان الله لما اتخذت قرار اني اوقف صار علي حادث الامور زينة كلنا بخير لكن انعدمت سيارتي واللي صدمته جحدني ومشى ولا امن طرق ولا غيره ولا احد يعبر بالخط.. قاعد لحالي في مقطع الارسال مو مشكلة موجود.. لكن ما خدمني الا شركة صيانة طرق نزلوا 3 دفوا معي السيارة عن الخط وجزاهم الله خير اخذوني لاقرب ديرة ومنها رجعت والحمد لله على كل حال.
الصحبة زينة باتخاذ القرارات بالتعامل مع المواقف بمواجهة المشاكل وووووووو مزاياها اكثر من عيوبها.

[حبل الوريد]

انا من الاشخاص الي يعشقون العزله احياناً واكتشاف اماكن جديده
وحصل لي عدة مواقف فيها عبر
الموقف الاول
في نهاية موسم الشتاء قبل سنتين هملت مع شعيب بقر شعيب جميل تظله الطلح والرمال تملاه كانه شعيب بوسط نفود
بعد ما انتهيت من التمشيه وسعة الصدر قلت بطلع قدام اكتشف المكان
لم يكن معي جوال ولا قارمن كلهن ناسيهن ... الشاهد اني طلعت على ارض حجزيه ممتده
كان معي الشاص وقتها فجئه جيت في منخفض بين ظهرتين ما يبين لك ان فيه منخفض من روئيتك للافق
الا والله يالربع واحصل ثلاث سيارات جالسين في مكان اجرد لا ظل ولا ربيع وما نزلو لافرشه ولا عده تبين انهم كشانه
طبعاً النقطه الي انا فيها تبعد عن الخط قرابة 30 كيلو
واضح من التجمع انه مريب اما بياعه حبوب او ما شابه انا فهمت الوضع
ظهرت من المكان على طول وازر لشاص ويوم اشوف بالمرايه واشوف الهايلكس جاي وراي مسرع بس الحمد لله
اني على كحيلان وكفرات حجريه انطح الدروب كلها للاسف ما كان معي سلاح وما تمنيت اني حامل السلاح
كثر ذيك المره .. الشاهد اني يوم تبين لي الخط من بعيد واراعي للهايلكس يوم ذل ورجع
هنا انا ضمنت ان الدعوى بياعه لكن حماني الله شرهم وهذي من المواقف الي ما يطري علي نسيانها

[حبل الوريد]

ونصيحة للجميع من مجرب بالليل لا تجي لحال لشعيب ولا بطن وادي
فهي اماكن ممفضله للجن الله يقاصر بينا وبينهم بالاحسان

واذا تهت بنفود او ما شابه وحل عليك الليل نزل عزبتك وسم بالله وتقهو ىعين خير والصباح فلاح
ممشى النفود بالليل خاصه اذا ضيعت تختلف عليك الامور كللها والارتباك يضيع علمك

[مخربطجي]

الله يوفق الجميع

[ع.العماري]

الكشته لوحدك تخليك تتفكر وتتدبر وتتأمل فيها صمت وتدبر خصوصا اذا كانت في الجبال
وتعلمك واما من يقول انه يخاف . فالله المستعان كيف تخاف من غير الله وصدقني اذا انت متحصن ومحافظ على صلاتك ما يقربك مكروه وكلما كنت ذاكر ما يجيك اذى . بس ما هوب يوم تكشت قمت تذكر وتتحصن لا من اول يعني من قبل والله يا اخوان جربت كثير طلعات لحالي وما جاني اذى ولله الحمد ولكن من كان لاهي وساهي فلينتبه ومن جرب الوحده يصير محب لها بس برضه الواحد يا خذ حذره خصوصا من مواسم ظهور الحيات او انه ينام في مكان قد يكون عرضه للسباع وخصوصا السبع ( الضبع . الذيب ....) ما ياكل الا بالعنق .

احب اكشت في الجبال لوحدي لكن بعض الاماكن اللي تكلموا الشباب عنها انها اماكن فيها قطاع طرق ومهربين وبياعين
لا انا اتكلم اذا كشت في مكان بعيد عن الاماكن اللي الناس فيها

[اليامي قطر]

والله نصيحه لكم ياشباب من القلب

الوحده في كل شي مكشات او سفر او ماشابه خطير وواجد المواقف اللي تحصل فيه

انا ماقول خل رفيقك معك في كل الحالات على حسب الظروف اللي تحكمك

وفيه ناس ودك انه مايروح معك لان مافيه أي فايده

لاكن الكشتات بالذات وشو له تروح بروحك وعاد هالايام خطيره مرره

والناس تقل مافيهم عقول يمشي والسلاح معه ويقتل الادمي مثل قتل البهيمه

الله يكفينا وياكم الشر يارب العالمين

[faisal 506]

الكشتات زينتها حقيقة بالرفقه الطيبه والرجال القرووم
وانا حقيقه اكره جداً الخروج لوحدي لسفر فما بالك بالبر
لكن الاحظ ناس تعشق هذا الشي للاختلاء بالنفس
لذا اذا انت معزم تطلع لحالك للبر لاتتعمق واجد واطلع فجريات وعود العصر قبل المغيب بفتره
ولاتفكر ابداً بالمبيت لوحدك واخبر اي احد بمكان خروجك ووقت عودتك المتوقع
ولاتلقوا بانفسكم للتهلكه
لان الشخص اذا كان وحده لايستطيع ان يتخذ قرار صائب في حال حدثة مصيبه له
الله من واحد مات بسبب عطل بسيط او غراز ولاوجد منقذ
اقولكم هالكلام لاني من اسبوع طالع للدهناء ولقيت واحد مسكين متعلق بالعروق وله يوم جالس لحاله
وحسب ماقالي ان اخوياه سروا وهو قرر يبيت ويمشي الصبح ويوم اصبح قرر يتمشى
وغرز موتره الصبح ولالقى احد يسعفه لين جيناه من بكره الصبح واسعفناه برحمه الله
والله انه مسكين من الخوف تحس انه مربووش مسكين مع ان معه زاد وفير يكفيه لفوق يومين بالراحه
ورانا ظرف وقال والله كاتب وصيتي فيه لكل الله سلمني يقول حسيت بالموت يقرب مني حيل
لذا وسع صدرك ورح وين ماتبي بس خذ مع رفقه واحرص تكونون اقل شي موترين
والله يحفظنا وياكم من كل شر

[أبو يزن1]

ماأنصح بالطلعه لحالك
مافيه مثل الخوه حتى لو كان الخوي غثيث تحمله الله يعين.

[ابو البر]

طبعا لا أنسا اكمل الموضوع
اني تذكرت ان عندي نظاره قديمه في درج السياره والله رحمني سبحانه .رغم انها كانت مغبشه وحالتها حاله
ولاكن نفعتني في طريق الرجعه والحمد لله ان الطريق من العقير الى الرياض (سيدين ) وللا كان بتصير علوم.

[ابوريان 1972]

جميل ما سردتم

[مخرمس]

راءئع رائع

[alisabr]

موضوع جميل
واللي مولع بالكشتات والسفر والتجول من الصعب يجد صاحب يوافقه دائما في كل طلعة
والاحتياط والحذر واجب لكل من أراد الخروج أو السفر لوحده

[زيد السمار]

الله الحافظ أكثر كشتاتي بعيد ولحالي وابات والسيارة مافيها دبل والله يرزقنا من واسع فضله.

[ملا عمر]

شكراً على الموضوع الرائع

[اليامي قطر]

الله الحافظ أكثر كشتاتي بعيد ولحالي وابات والسيارة مافيها دبل والله يرزقنا من واسع فضله.

لاتلقي بنفسك الى التهلكه يازيد

اذا سلمت مره مرتين ف انتبه من الثالثه

[ناصر]

بالنسبه لي اكثر طلعاتي مع الزملاء او الاقارب وعددنا طيب نبات في البر يوم يومين
وندخل البر لحدود 30 ك
لكن احيانا تجيني افكار احب اطلع لحالي
لاهو قصور في الزملاء لكن شعورقوي ودي اختلي مع نفسي هههه بدون احد معي
اهجول براحتي

لكن طلعتي لحالي تختلف عن تلك االتي مع الزملاء
مافيه دخول للبر مسافه ولا مبات واغلبها بالنهار للغروب ورجع لكنها تتميز بالمسافات الطويله
ومطاردة الامطار
وكلها الثنتين بنكهات حلوه تختلف سواء اللي مع الزملاء او بلحالي

بالنسبه لي الطريقتين تناسبني

[المستوطن]

في سفر طريق يمكن بس طلعه ماني معك ياصاحبي لان فيه اخوه على كيفك يالخوي

[الدوسري2010]

انا احب المكشات لحالي الا بالليل تجيني تخيلات 3D هههههه ودك بواحد او ثنين بالكثير يوسعون صدرك