الى خبرااااء اللاندكروزر .. مع التحية ..

[دحيٌم]

السلام عليكم ورحمة الله وبركاته ..

تحية طيبه لكل اللي يقرون هالموضوع ..

عندي استفسار بالنسبة للاندكروزر من موديل ( 98 ) وفوق ..
واللي انا اتكلم عنه اللي يجي اسطبه عريض من ورا مثل جيب اللكزس ..

المشكله هي في الكفر اللي تحت عند التطعيس فلو يكون القص قوي شوي بيضرب الكفر اللي تحت ( السبير )
في الطعس وبالتالي بينقطع الحبل اللي ماسك الكفر وبالتالي بيعفطلك البدي من داخل وكذلك الصدام الخلفي كله ..

وانا بصراحه ماكتبت هالموضوع الا يوم صارتلي المشكله وكلفني تصليحها حوالي 3000 ريال ..( وكاله )

وهو مبلغ مب بسيط ولكن لكثر الضرر اللي يسويه الكفر في السياره من تحت ..

وانا الحين كل ماجيت اطلع لبر في طعوس اضطر اني انزل السبير واركبه داخل ورا ..

فهل فيه حل لهالمشكله ؟؟؟؟؟؟؟؟

وياليت اللي عنده اي حل والا اي اقتراح انه مايبخل علينا فيه ..........

وتحياتي للجميع ................

[القماري]

مشكور يادحيم على التنبيه وكان ودي لو أقدر أفيدك
بالطبع مايصلح أنك تركب حامل الكفر على الباب الخلفي أنوار بتعيق العملية ، أحسن حل ثبت لك كرسي داخل السيارة أو لا تطعس كثير :D

[دحيٌم]

القماري .. :)

مشكور على الرد ويعطيك العافيه ..

بس احيانا تحتاج للتطعيس لان احيانا المكان اللي انت رايحلن له يجي في طريقك طعوس بنت كللللللللب ..

عالعموم يعطيك العافيه وماقصرت ..

تحياتي .. :)

[مبسوط]

السلام عليكم
اخوي دحيم حبيت اشارك برأي لعله ينفع معك :

1_غير الاستبنه بجنط GX لانه اقل عرض من جنوط ال GXR و VXR وهي استبنه منتب محتاجها الا نادرا من غير شر.

2_ارفع الموتر اما عن طريق تغيير الكفرات بكفرات اكبر واكثر رفع او غير المساعدات واليايات وركب كعكات.

[الشقردي]

السلام عليكم

انا ودي أسألك:
اذا انت من النوع اللي ما يستخدم المراتب الخلفية فكها جميع أو واحد منهم وثبت الاستبنة داخل بطريقة مشابهة للصالون أو الجراند شروكي وفصّل للكفر تلبيسة عشان ما يعدم داخلي الموتر

المطلوب اذا كنت بتتبع مثل هالحل انك تروح لواحد بالصناعية أو الغرابي يظبط لك تثبيت الكفر مثل المواهب اللي بصناعية الرياض
=======
اما اذا ان اللي يركبون معك واجد غير خلفية الجيب بالكامل وخل الاستبنه ورى (على الباب الخلفي يفضل باب شنطة)

في هالحالة بيبلك تدور واحد يبادلك بالخلفية والابواب (وياكثر اللي يدورون خلفية لكزس) أو تشوف لك أحد هالتشاليح.

لاحظ انك في كل الحالتين ممكن تستفيد من المساحة اللي كانت للاستبنه بتانكي مويه 90 لتر بدون ما يسبب لك المشاكل اللي كنت تعاني منها.



مجرد رأي وتراني ما قد جربت هالطريقة

[ابو الريم]

اخوي هذي مشكلة تم تفاديها في الموديلات الحديثه بحيث تم الغاء تنكي البنزين الاضافي لكي يتم رفع السبير وجعله مستقيما ......

عموما حلك لهذه المسألة كما ذكر الاخوة لا يخرج عن اثنين .....


اما ان تركب سبير ضعيف نسبيا مثل جنط ال G وان شاء الله ما تحتاجه مع انه في نظري ايضا حل مهوب عملي لان الكفر مايل قليلا ......... او انك وهذا افضل تركب السبير داخل السيارة بطريقة جيدة ..... اما انك تقعد تفك وتركب كل ما حبيت تطعس فصراحة اضن انها صعبه نوعا ما .


تحياتي ابو الريم ,,,,

[دحيٌم]

مبسوط ، الشقردي ، أبو الريم ...

والله ياجماعه ماقصرتوا وردكم ذا مايدل الا على طيبكم والله ..

وانا اسف اذا ازعجتكم وبصراحه فكره التفصيل داخل السياره احس انها احسن حل لان بيني وبينكم اصلا الاسيات اللي ورا دايم برا عشان يمديني احط اغراضي وعزبتي وخيمتي ..
وللمعلوميه نص اغرضي جراكل ماء يعني لو افصل مكان للكفر داخل واحطلي تحت تانكي ماي 90 لتر بحل مشكلتين كذا ..

والله انكم ماقصرتوا وهذا من طيبكم وجزاكم الله الف خير ..

تحياتي ........ :)

[الشقردي]

الاخ دحيم لا شكر على واجب

وترى الصديق وقت الضيق

وعلى قول القايل ماندم من استشار وما خاب من استخار

[Y&Y_4X4]

لا تحط السبير منداخل لانك منتب لاقي محل لا للخيمة ولا للعزبة وبعدين تبي تلغي الدروج والكماليات الي ورا انا اشوف انها مهمه وبعدين الكفر يبي يوصخ الشنطة

الحل

اشتر جنط شاص 5 مسمار موديل 2000 او اكثر ( شفه ) ماهوب شنبــر وكفر شاص شد بلد 8 كندس موجود عند البناشر وحقين الكفرات . تانكي الماء زين بس مزعج وكثير مشاكل وزنه مهوب صاحي . جالون مربع 40 لتر زين مرة لراعي البر طبعا بدون ترويش.
واذا ركبته ان شاء الله ما كنك مركب سبير البته..........
ودمتم

[دحيٌم]

الشقردي ،،،،،،،،، تسلم حبيب ألبي عالرد الحلو والله يكثر من أمثالك ولا يحرمنا منك ..

Y&Y_4X4
مشكور على انتباهك للموضوع وردك عليه ،،،
بس الجنط حق الشاص هذا كم مقاسه ؟؟ 15 والا 16 والا ... الخ ؟؟
وهل هو موجود بالوكاله ؟؟
وبعدين لو اركبه تحت بدال الاصلي اقدر اركب تانكي ماي بالسياره ؟؟ لانها مع السبير اللي تحت مافيه مكان تحط فيه اصبعك اصلا !!

واذا كان فيه مكان فياليت تعلمني وين بالضبط تحت السياره لان الجوانب بس هي اللي فيها شوي مكان فاضي ..
وياليت بعد اذا ماعليك كلافه تعلمني وش احسن محل يفصل توانك الماء ..

ومشكور والله وماقصرت حبيبي ،،،،،،،،،،،،،،،،،، يعطيك العافيه ..

[قتال]

أخوي دحيّم .. الله يعافيك على هذا الموضوع .. بس حبيت أشاركك معاناتك ..

يا خوي ماني خبير بالكروزر لكن ممكن أفيدك بخصوص الكفر .. عادة يستعمل الرحالة والسفاري في الأماكن الوعرة مثل أفريقيا وغيرها سلة تنحط فوق الموتر وهي مريحة جداً ولا تخرب شكل الموتر بعد .. مع العلم إنها سهلة التركيب وما تحتاج تخريم ولا شي وتركب على الحروف بأطراف الموتر ويبيعها وكيل تويوتا .. أضنها تجي ألمنيوم ،، بإمكانك إنك تربط الكفر فيها .. وفيه أنواع ثانية كثيرة وتركب بدون تخريم السقف بإمكانك تفصيل مكان لتثبيت الكفر فيها وتستعملها لباقي الأغراض بعد ...

أيضاً أنا شفت لندكروز جديد مرهم حامي صدام خلفي يركب عليه كفر .. مثل حق الجيب المرسيدس على شكل V مقلوبه .. شكلها غريب لكن أضن أنه هو الشي اللي تحتاجله .. دور زيه عند أهل زينة السيارات .

أنا عندي نفس المشكلة بخصوص أن الإستبنه تحك بالأرض في بعض الأماكن الوعره ، وكنت أخاف أن الكفر يطيح وأنا ما دريت عنه .. لأنه كثير تحصل لخوياي .. لكن ما أفكر في هذي الحلول .. علشان الموتر جديد ولا ودي أخرب شكله .

أتمنى أني أكون أفدتك .. وسامحني على القصور ..

[Y&Y_4X4]

لايوجد على الاطلاق محل تركبه تانكي ماء في ( قاهر الصحارى والاودية والشعبان والجبال حبيب قلبي لاندكروزر) الي خلفيته سطب عريض .

الا في حالة انك تفك السبير من محلة وهذي صعبة .

اولا بانسبة للماء ياخي ماهي صعبة قلتلك جيك مربع من النوع الي يجي فيه بزبوز داخلي ( مخفي ) 40 لتر اكثر من كذا ظلم يابعدي انا قلتلك ( بدون ترويش ) تلقاه عند محلات لوازم الرحلات او محلات بيع الادوات المنزلية عند مخرج 15 الدائري الشرقي الي يطلع من مالربون ويوصل لمنشتر في مدينة نيس اليابانية.
(صاقط جغرافيا)!!!

ثانيا بالنسبة للكفر تحصله عند بياعين الكفرات في الغرابي كوارتر . لاتشري جديد غالي اذا مستعمل وصحته زينة لا يفوتك لأن النوعية هذه مايبيد بأذن الله.

ثالثا فكرة السلة اذا هي يعني مدلقمة وشكلها حلو شي طيب اذا تحصل اما شد بلد ماهيب لم درب صراحه تخرب شكل حبيب القلب.

الله يعطيكم العافية .

[Y&Y_4X4]

دحيم ولا يهونون الربع
معليش نسيت

الجنط 16

لاتواخذوننا .