ما هي افضل كفرات للرمل

[ksaboss]

السلام عليكم

ابغى اعرف افضل كفرات للرمل فقط. يعني ما يهمني راحتها على الطريق او المطب ولا يهمني كم تعيش. اللي يهمني انها ما تثقل الموتر في الرمل و تريح القير و المكينه. لاني ناوي اشتريها لطلعه واحده للربع الخالي مع مجموعة شباب بسياراتهم.

سيارتي برادو 2011

[ابو فهد...]

دنلوب ٢٧٥ /٦٥/١٦

[أبوبسام 0104]

هانكوك 17 النقشه الجديدهHP2

[أبوعلي700]

البالون يمدحونه حيل بس ثقيل شوي

[ksaboss]

دنلوب ٢٧٥ /٦٥/١٦

شكرا يا ابو فهد لكن انا اقصد كفرات للبر فقط و ليس للاستخدام اليومي


هانكوك 17 النقشه الجديدهHP2

الله يعطيك العافية يا ابو بسام. هذي ممتازم للخطوط و داخل المدينة على حسب المعلومات في موقعهم


البالون يمدحونه حيل بس ثقيل شوي
كلامك صحيح يا ابو علي و انا ادور على الكفر الخفيف

[طحنون]

اذا للرمله والموتر ماهو محمل فوق طاقته
رقم واحد الشاهين وفيه عده مقاسات للجنط 17 وجنط 16 وارشح الجنط مقاس 16 ويكون عريض
الشاهين ممشاه بالرمال الناعمه ممتاز جدا ان لم يكن الافضل علی الاطلاق لاكن ماهوب للمناطق الجبليه
فقط رمال وخطوط يمشي الحال وغير مزعج جدا تكمن خطورته في الامطار والسبخات
وبالتوفيق

[طير الطنايا]

والله من ناحيتي انا اراى وﻻ افضل نفسي عليكم ان الرمله شاهين وبالون
لكن اذا تبي الرمال والحجر والوعر
خذ هانكوك وﻻ تبالي
ماشاء الله كفر يعني كفر

[القلب المحروم]

دنلوب في الرمل نسمه
وفي الاحجار والوعورة عب الكفر فل

[الذئب الاليف]

عن نفسي جربت الهانكوك رمل وحجر 80%

[أبوصالح9]

السلام عليكم ورحمة الله

اول شي اذا الجنط 17 انتبه تركب اعرض من مقاس البلد - ايضا انتبه تركب ارفع من مقاس البلد لانه راح يحك بالرفرف والربع الخالي ماينفع معه الغثاثه

على ما اعتقد مقاس البلد عندك 17/65/265 - لاتركب اعرض من 265 + لاتركب ارفع من 65

وبالنسبة لي انا ارشح لك الهانكوك جميع الظروف والعوامل

[المتلولس]

اهم شي لاتحرص على البالون بالرمل كفر ثقيل ....الدنالوب بالرمل نسم شوي ممتاز

[فؤادسعدون]

السلام عليكم ورحمة الله وبركاته ركب وانا اخووك ماكسسس الجديد نقش شاهين وراح تدعلي ان شالله

[سقم المعادي 1]

الشاهين لا يعلى عليه في النفود

[هايلكس مدبله]

سلامم عليكم ياخوك الربع الخالي انا رحته 3 مرات عام 2006 وعام 2009 وعام 2012
الوكاد ماينفع كفر لربع الخالي الا البالون مقاس 825 لنه يفرش ومهوب مثقل ع الموتر واهم شي تاخذ معك صفايح عشان ﻻ قدر الله لاطحت في رباضه من رباضاتها اللي ماترحم يمديك تخارج نفسك بصفايح

والله يستر عليكم وتوقعوا :)

[ابونبيل]

اشور عليك بالون واذا ما تبيه خذ دنلوب لانه يفوش وبالتفد ممتاز جداا

[ksaboss]

اذا للرمله والموتر ماهو محمل فوق طاقته
رقم واحد الشاهين وفيه عده مقاسات للجنط 17 وجنط 16 وارشح الجنط مقاس 16 ويكون عريض
الشاهين ممشاه بالرمال الناعمه ممتاز جدا ان لم يكن الافضل علی الاطلاق لاكن ماهوب للمناطق الجبليه
فقط رمال وخطوط يمشي الحال وغير مزعج جدا تكمن خطورته في الامطار والسبخات
وبالتوفيق

الله يعطيك العافية
كثير اللي نصحوني بالشاهين و الظاهر انه الافضل


والله من ناحيتي انا اراى وﻻ افضل نفسي عليكم ان الرمله شاهين وبالون
لكن اذا تبي الرمال والحجر والوعر
خذ هانكوك وﻻ تبالي
ماشاء الله كفر يعني كفر

جزاك الله خير يا طير الطنايا


دنلوب في الرمل نسمه
وفي الاحجار والوعورة عب الكفر فل

مشكور يا القلب المحروم الله لا يحرمك ولا يحرمنا من الجنة. الكفر الحالي دنلوب و ماشي حاله لكن ما فيه تميز لازم تنسمه كثير ولا يغوص في اول رباضة




عن نفسي جربت الهانكوك رمل وحجر 80%



مشكور يا الذيب. اي نقشة من الهانكوك؟


السلام عليكم ورحمة الله

اول شي اذا الجنط 17 انتبه تركب اعرض من مقاس البلد - ايضا انتبه تركب ارفع من مقاس البلد لانه راح يحك بالرفرف والربع الخالي ماينفع معه الغثاثه

على ما اعتقد مقاس البلد عندك 17/65/265 - لاتركب اعرض من 265 + لاتركب ارفع من 65

وبالنسبة لي انا ارشح لك الهانكوك جميع الظروف والعوامل

حياك الله يا بو صالح. كلامك صحيح و المقاس مثل ما قلت.


اهم شي لاتحرص على البالون بالرمل كفر ثقيل ....الدنالوب بالرمل نسم شوي ممتاز

هلا بك يا المتلولس. البالون تقريبا شلته من راسي.


السلام عليكم ورحمة الله وبركاته ركب وانا اخووك ماكسسس الجديد نقش شاهين وراح تدعلي ان شالله

شكرا اخوي فؤاد. اغلب الاراء ترجح الشاهين سواءا كفر الشاهين او نقشته من اي شركة ثانية.


الشاهين لا يعلى عليه في النفود

صدقت و الله يعطيك العافيه


سلامم عليكم ياخوك الربع الخالي انا رحته 3 مرات عام 2006 وعام 2009 وعام 2012
الوكاد ماينفع كفر لربع الخالي الا البالون مقاس 825 لنه يفرش ومهوب مثقل ع الموتر واهم شي تاخذ معك صفايح عشان ﻻ قدر الله لاطحت في رباضه من رباضاتها اللي ماترحم يمديك تخارج نفسك بصفايح

والله يستر عليكم وتوقعوا :)

الله يجزاك خير و يستر عليك دنيا و اخره. خوفي ان البالون هذا المقاس يكون كبير و يحك لان البرادو قليل اللي ركبوا عليه بالون.


اشور عليك بالون واذا ما تبيه خذ دنلوب لانه يفوش وبالتفد ممتاز جداا

شكرا على مرورك يا ابو نبيل.



الخلاصة اللى استنتجتها الى الان هي ان الشاهين هو الاخف و الافضل للبرادو. يمكن يكون استنتاجي خطأ بس هذي نتيجة اكثر الآراء اللي تكرموا علي فيها الشباب الله يجزاهم الجنة.

[كاشت في الحوش]

شاهين من واقع تجربه
موتري ددسن عزمه لك عليه وبعد ماركبت الشواهين خلاص في الرمل احيانا ما احتاج الدبل

[كاشت في الحوش]

والشباب هنا لما يتكلمون عن الدنلوب
ترى يقصدون النقشة اللي تجي على الشاص
وليس الجبلي أو الدنلوب اللي يجي على الجيوب أو المواتر الامريكيية