الله يحرم وجيهكم عن النار ابي شوركم

[راعي الاف جي2]

السلام عليكم ورحمة الله وبركاته
ياشباب تكفون الله يوفقكم انا ابي شوريكم
مقبل على شراء باترول فتك الموديل 2008 والله اني محتار يالربع
كثير ناس نصحوني يقولون النيسان يتفكك والباترول الفتك يسخن ووالله اني احترت
لاني بعت موتري وجمعت لي شوية دراهم بعد تعب وصبر
انا ابي اسالكم تكفون خاصه الي مجرب السياره
تنصحوني فيه ؟ قطعه خراباته وهل هو يكد ؟ ولا هو حق ورش
وانا ان شاء الله اني بحافظ عليه
وللعلم بأذن الواحد الاحد اذا الله كتب لنا عمر بيكون معي على الاقل لـ 5 سنين قدام
والله ياشباب محتار و ابي شوركم يالي مجربينه
وجزاكم الله خير جزاء

[اليامي قطر]

طيب ليه ماشتري الفتك 2014 مثل 2008 وجديد اصفار

تفكه على يدك وموترن حطه على يمناك للمكده اشهد بالله انه صبور

واعلومه غانمه وصبوووور حييل مافيه من العيب البسيط الا يقولون

مكيفه ماهو بذاك البروده مقارنه بالتيوتا ...

[راعي الاف جي2]

لو اقدر اكيد باخذ وكاله وعلى يدي بس مابليد حيله

[المسنلم]

السياره ممتازه وماعليها كلام وبالنسبه للجيوب الصوالين هي الأفظل حاليا 00
وبالنسبه للتفكك والورش أي سياره إذا جرت عليها بتتفكك وأنصح فيها لأهل البر بالذات 00

[راعي الاف جي2]

جزاك الله خير ياخوي المسنلم
طيب ياخوي كيف الحراره ؟
والله ناس كثير حذروني يقولون انه يسخن

[راعي الاف جي2]

والله يا اخوان انا بحاجه لشوركم خاصه انها بتكون سياره العمر بأذن الله 5 اسنين لقدام

[ff34d]

بالنسبه للنيسان
سياره محركاتها قويه
وعيبها تتفكك وتهربد اذا انت راعي بران ومناقز يبيلك كل سنه تربطه

[بوماريه]

عيبه الوحيد كتاوت البنزين . ( عيب قديم ومعروف وسهل جدا أصلاحه )
أثنين . مسمار المكينه لازم يشال حتى 2013 موجود انا شايله بموتري
ثلاثه . تانكي الاحتايطي احياننا تعلق لمبته الحل وجدته وغيري بالأخير انك ماتخلي التانكي الاحتياطي فاضي عطول . تنشف جلد الطرمبه وتعلق . خل به بانزين لو حق 10 ريال
رابعا" . الطامه الكبرى انك ماراح تحصل نظيف كله ملعوب به ياخليجي حق تفجير وتفحيط او سعودي حق قنص وتكسير .الشيبان مايركبونه قليل . وهذا مشكلة الفتك يشرى مستعمل ويقعد الواحد يسبه خربات وماأدري ايش . لكن رح لواحد فاكه على يده وأسأله .

[أبوصالح9]

اذا على نوعية السيارة عز الله موتر - لكن الفتك توافيق - والمفروض حطيت الميزانية عشان نقدر نفيدك بشكل افضل سواء فتك او غيره - والله يكتب لك اللي فيه الخير والبركة

[- أبو رنيم -]

شوف لك جي اكس ار بحدود 100 وتحت افضل لك كد ومد

[مخاوي دابذريع]

دور لك جي وريح راسك

وان كان انك هاوي الفتك ركب له كفرات بالون ويرتاح موترك

[راعي الجيوب 1]

قبل كل شي عليك بركعتين استخاره انشاء الله بيوفقك
بنسبه لتجربتي لنيسان الموديل الجديد 320 موديل 2012 جربت الاستندر مشاء الله لا يعلو عليه شي جربته بر وخط
تبات قوه ولا لاحظت اي شي عليه لا قرقعه ولا شي ! كذلك جربت موديل 2014 بلاتنيوم مشاء الله لا يختلف عن سابقه سواء بلاكسوارات مثل ألكمرات والنفقيشن والثلاجه ما شابه ذلك ! والي يقول يتفكك او خرباته واجد كلامه
غير صحيح هذا عن تجربه والله يوفق الجميع للخير والتوفيق

[ابوعبدالله199]

اذا مستعمل خذ لك لاند كروزر يعني هدد ولا جي ولا جكسار

الفتك المستعمل اغلبه مضروب ودايم يكون توافيق .. بس اللاند بتلقى النظيف واجد

[التعـ King ـديل]

بالبدايه اذا انت من النوع اللي يسمع كلام الناس ويتغير رايه بكلامهم ماراح تحصل موتر على بالك

انا بكلمك من واقع تجربه لموديلات الباترول عامه من موديل 89 الى 2013 بطل الدروب ،، والفتك خاصه جربته 2003 & 2004 & 2005 & 2007 & 2012

النيسان بشكل عام سياره البر رقم 1 والفتك بشكل خاص

لكن وين بتحصل النظيف لان الفتك موتر طرب ولا يبيع الا المحتاج للدراهم او انه موتر انهلك وراعيه مايبي يصلحه ينزله السوق علشان ياخذ غيره

نصيحتي لك جرب عرض العيسى 50% و 50% بعد سنتين موتر وكاله على يدك

[الذاهب]

لو تحط المبلغ افضل
استخدامك بر ومناقز وقنص
او توسيع للاهل
الله يرزقك باللي يطربك

[الفهيد بدر]

اشهد ان النيسان موتر ما عليه خلاف وخالي من العيوب وبالنسبه لي اعتبره السياره رقم 1 بالجيوب

[الشيخ الظريف]

انا معي فتك2009 لو يبدلون لي تايوتا مابغيته مريح ولا ترتفع حرارته وعندي تايوتا كل فتره ازيدماء الاديتر00وقد سألت اخوان اماراتيين وقلت لهم ليش السعوديين يتعصبون للتايوتا وانتم اكثر سياراتكم نيسان قالوا التايوتا اذا ضربت مطب جميع العزبه اللي بالشنطه تجي عند السواق اما النيسان فتبقى في محلها00الصراع بين التايوتا والنيسان قائم وكل موتر له مميزات وما دامك وضعت يدك على الموتر فالنيسان رفيق. طيب

[بوماريه]

سبب كره الناس او بالأصح عدوانية البعض للباترول انهم مقتنعين ببطلهم الشعبي . وقاهرهم تفوق الباترول عليه بالادا والتحمل .

بدون زعل المعاناة هذي اوجهه دائما مع خوياي ياطلعنا بالبر . يفرحون ياغرز موتري الباترول او يفتحت كبوته لو ابعاير الزيت

تقامزو مستانسين . ههههههههههههههه

[ابونبيل]

انا اشور عليك تاخذ برادو سعره حول الفتك وتراه انشط من الندكروزر ال٦ موتر ان شاء الله يعجبك مع اخوي واحد ٧ من الوكاله معه و ما طلب الا امور استهلاكيه ومره كمبرسر فقط ماشاء الله

[اتجاه السحاب]

الفتك زين
لكن خذ جديد أو أخو الجديد فقط..مع العلم نادر تحصل نظيف
بالتوفيق





.

[ابو حمود f]

الباترول موتر يعطيك بس المهم تحافظ عليه وبيجلس معك عمر

اذا بتاخذ خذ من 2006 وفووق افضل عزم ممن رائيي بس المشكله

اذا انحديت بالبيعه فبيعه ثقيل شوي , التايوتا جيد جربت الفكس ما يحتاااج

موتر شيخ بس مشكله السعر مبالغ فيه يعني اذا بتاخذ يا باترول او فكس اترك جي وجي اكس متعب شوي

الفكس مريح لانه هدرليك وتراه عملي ما علييه خرب معاي المساعد خلف السواق وغيرته 230 ريال عند عبداللطيف

طبعا مديله 2006 , انت شوف الي انت تبييه واترك كلام الناس

موفق يابعدي

[الحربي 591]

اخوي من تجارب لي من اكثر السيارات

اي سياره تحافظ عليها وتسويلها صيانه دوريه انت بنفسك

لك وللزمن..

[نجم الفجر]

النيسان ميزته الراحة و الباقي لصالح تويوتا