التعامل مع السيوف او التلال في التطعيس ياخبراء

[ريان FJ]

السلام عليكم ورحمه الله وبركاته



ياشباب انا توني شاري اف جي الله يبارك لي فيه و قبلها كان معي موتر صغير يعني ما عندي خبره التعامل مع الجيوب والتطعيس نهائياً :)
الأن بديت على حبه حبه و تعلمت كيف استعمل الدبل و اتمشى بالنفود على الهداوه اموري في السليم

بس المشكله اني اخاف من السيوف و الفناجيل و اي مكان فيه طلعه ولا نزله و هاجس الأنقلاب يطاردني الى حد الارتباك

ودي تعلموني بس اساسيات التعامل مع السيوف او السكاكين حسب ماتسمونها اللي تصير كذا \/ و كيف اتجنبها في الليل و افضل الطرق للتعامل معها و هل في حاله النزول من على السيف انزل عدال ولا على جنب (اخاف انقلب:eek:)

و هل في المسايف للمضطر مثلاً ينزل على جنب افضل شيء يكون الدبل يشتغل ولا بدون دبل ؟


و اي نصايح لتجنب الانقلاب في النفود ما نستغني عنها

اخوكم ريان FJ

[ابو فهد...]

السكاكين على حسب قوتهن بس الغالب تجي وسرعتك وسط وعلى جنب وتقمزه طبعا وانت بعض العالم اول مايرتفعن المفرات الي قدام يضغط فرامل همن يقلب الفرامل بالنفود لاتظغطه الا والموتر كله على الارض
المسايف سايف ولاتترك الدعسه لئنك لو ترك الدعسه او فرامل لاقدر الله يمكن تنقلب وانت تسايف كل ماثقل الموتر خلك داعس وسايسه على النزول طبعا المسايف لازم تصير منزل هواء الكفرات شوي لاتنزله كثير ينفسخ الكفر
واذا كان الكفرات مليانه تقلب الموتر

[ا ل ح]

الافجي يروع في المسايف كان معي 2011 والله ما اتجرء اسايف عليه الموتر تحس انه اذا اسرعة عليه او شديت عزم انه يطلع من يدك
الزبده وانا اخوك لاتتهور موتوك غالي وحياتك اغلاء

[أبو شيري]

أولا : يا عزيزي السيوف توضع في جرابها
أما السكاكين والفناجيل فهي تلم وتوضع بداخل العزبه لكي لا تتبعثر هنا وهناك من المطاب .

ثانياَ : السياره هي عباره عن راحله تنقلك من مكان الى مكان وتغنيك عن سؤال الناس وقت حاجتك

لم تصنع للعب والعبث وأرغامها بالطلوع مع أماكن لم تصنع من أجلها

أرفق على حلالك وعمرك فلن ينفعك غيره ولا تخاطر بعمرك ... أتمنى لك التوفيق

[ابوعبدالله199]

بالليل حاول انك ماتسرع
واذا واجهت طلعه خفيفه هد اذا ماتشوف نهايتها
بالنسبه للمسايف احشر الموتر بنمره قويه وادعس واعكس الطاره عكس اتجاه نزولك ولاتفك الا اذا خلص السيف او واجهم عقم وتكون مشغل الدبل الخفيف طبعا

وبالنسبه للفناجيل من يوم ماتطيح لاتفك اادعسه ووجه الموتر للمكان السهل له والرقيه السهله اللي ماتضر وجهه الموتر

[تميم2222]

اف جي نصيحه لا تسايف خطططططططططر الموتر يتجعف

[ابوعبدالله199]

بالعكس انا معي اف جي ودايم اسايف ... الاف جي ميزته انه ثقيل

الخطير الفورتشنر والبرادو اهم شي بدون تهور بزياده

[ابو صقر 111]

السياره وسيلة للنقل والمال مسؤول عنه فيما انفقته وعلينا ان نصحو فيما يدور حولنا من مصائب اما ااذا اعترض طريقك اسياف فعليك ان تستخدم النمره الثقيله والدبل وان تنزل بطريقة رأسيه من رأس السيف اما الفناجيل اذا وقعت فيها فلن تستطيع الخروج منها الا بطريقة الدوران أي بطرقة حلزونيه

[الهدد الاشهب]

سبب الانقلاب هو المسايف خصوصا في منطقه ماتعرفها احيانا تسايف وماتدري الا الطعس صار تحته فنجال و ترتبك عاد فرامل وانت مجنب مشكله لازم تحشر رجلك لا تفك الدعسه ابد ولا تخاف على الموتر وكل الله و عطه النار
و انصحك بشكل عام ابعد عن المسايف مامنه خير الا اذا كنت مضطر عاد ...

اما السيوف لو تطمر معهن في اردى الحالات بيضرب وجه الموتر ضروب بسيطه اذا كنت مهدي ما تأثر اما اذا قصيت على سرعه بتكون ضربه الوجه قويه و احتمال يطلع الايرباق و يخر الرديتر و حتى الشاصي ممكن يتاثر لذلك السرعه ما انصحك فيها بالنفود و حتى غير النفود و على كل حال انت حاول ماتتهور بالليل امش على هونك واذا شكيت بمكان هو سيف ولا لا حاول تباريه و تخلي النزله على يسراك يم دريشتك عشان تشوف وش هي من لحيه وتختار المكان الزين و تنزل معه

ولو تفاجأت انك طحت بنزله قويه و مافيه مجال ترجع قو قلبك و لا تستعمل الفرامل نزل القير واحد و تبي تهدي استعمل الجلنط

[عبون الجواء]

أولا : يا عزيزي السيوف توضع في جرابها
أما السكاكين والفناجيل فهي تلم وتوضع بداخل العزبه لكي لا تتبعثر هنا وهناك من المطاب .

ثانياَ : السياره هي عباره عن راحله تنقلك من مكان الى مكان وتغنيك عن سؤال الناس وقت حاجتك

لم تصنع للعب والعبث وأرغامها بالطلوع مع أماكن لم تصنع من أجلها

أرفق على حلالك وعمرك فلن ينفعك غيره ولا تخاطر بعمرك ... أتمنى لك التوفيق
بيض الله وجهك فعلا اتفق معك فيما تقوله اخوي ابو شيري

[ريان FJ]

بيض الله وجيهكم كلكم
و ياخوي ابو شيري نصيحتك على عيني وعلى راسي بس اتوقع انك فهمتني غلط او انا ماوضحت زين نيتي موب تطعيس مثل المراهقين لا بالعكس محاكيك عمره 32 سنه كبرنا على هالامور بس انا اكشت مع ربعي من زماان بالنفود و دايماً اكون راكب لكن بعد ماشريت الجيب صرت قبطان لكن المشكله اخر مره كشت مع ربعي وهي اول مره اكشت معهم بالنفود وانا على سيارتي الخاصه امشي معهم و ماشاء الله عليهم يتمشون كنهم على الزفلت و يجزمون على اماكن عسره وانا ام الركب لاعبه بي هههههههه

شكراً لكم (ابوفهد - ا ل ح - أبو شيري - ابوعبدالله199 - تميم2222 - أبو صقر 111 - الهدد الاشهب - عيون الجواء)

[XRAY MAN]

الإف جي سريع الإنقلاب كانك تطيع الشور لا تهور به

والشور الزين لا تمشى في طعس بالليل وأنت ماتخبره بالنهار لأنك تمشي مثل الأعمى