وش الحل مع رجة طارة الفتك 2014

[FJ3230]

بسم الله الرحمن الرحيم
السلام عليكم ورحمة الله وبركاته
ياجماعة الخير معي فتك 2014 قير عادي
ويوم انه مشى 6 الاف ابتدت معه رجة بالطارة بهذلتني
وتقل كنه فيه فضاوة خصوصاً مع المطبات على سرعة 100 / 110
ترج الطارة سويت ترصيص اختفت الرجة شوي ورجعت مثل ماكانت
وقريت مواضيع بالمنتدى عن الرجة والحلول بس ماظنها تنطبق على موتري
لانه بعده جديد وعلى حسب مافهمت انه عيب مصنعي بالباترول
وش العلم يارجال افيدوني حرم الله وجيهكم عن النار

[أطلال نجد]

سيارتك ٢٠١٤ و على الضمان

رجعها للوكيل

و اشترط إصلاح المشكلة بلا رجعة وفي حال عدم إصلاح المشكلة و عودة الرجة من جديد

فمن حقك أن تسترد قيمة السيارة مع خصم قيمة الاستعمال

[ابو محمد64]

ركب مساعد دركسون يولفوه وذا عيب مصنعي وما يبغون يحلوه فيه سبب محد عارفه ولا سهله بالنسبه لهم لاكن في سر بالموضوع

[اسم قديم]

الكفر شيك عليه

وده الوكاله وهي تعلمك

[الهواوي 1]

شيك على الجنوط ودها المخرطة وباذن الله تنحل المشكلة وبعدها ترصيص وميزان وراح تدعي لي للاسف مشكلة كثيييييير من الناس لايعلم بهاذا الحل

[سقم المعادي 1]

رصص ارضي عند العضيب

[علم162]

مر بها على العضيب اعرف السبب قبل الوكاله اذا سبب الرجه مو واضح يمكن عيب مصنعي شريت النترا جديده والطاره غير موزونه وكشف عند العضيب ورجعتها للمعرض اللي شريتها منه

[تزبطي]

الحين الرجال يقولكم 2014
واحد يقول ولف مساعد والقاني يقول رصص ارضي والثالث يقول رح للعضيب

هههههه ليش طيب

ليش كذا ...
فيه وكيل ضامن السياره الله ﻻيهينه يشوف لها حل

ارجع للضمان واذا ماصلوحها رح لوزارة التجاره قدم شكوى عليهم

وكانك مركب بالون تراا منه الرجه
موفق

[علم162]

الحين الرجال يقولكم 2014
واحد يقول ولف مساعد والقاني يقول رصص ارضي والثالث يقول رح للعضيب

هههههه ليش طيب

ليش كذا ...
فيه وكيل ضامن السياره الله ﻻيهينه يشوف لها حل

ارجع للضمان واذا ماصلوحها رح لوزارة التجاره قدم شكوى عليهم

وكانك مركب بالون تراا منه الرجه
موفق
الرد عن تجربه اولا يمكن الجيب خليجي وشغله لين يدخل الضمان ووزارة التجاره ميب واقفه بعصا على باب الوكاله تحتريه يشتكي ..... اخيرا رح العضيب :لفهم المشكله عشان يعرف يتفاهم مع الوكاله لاتتخيل الوكاله بيصلحون اي شي بدون اصرار ...... وآخر اخيرا قل خيرا او اصمت عندك علم وصله ولاتهزأ برأي غيرك

[صباح القايله]

جرب بدل الجنوط الاماميه مع الخلفيه

[المميـز]

:

الحل ترصيص ارضي

:

[خالي الهم]

السلام عليكم مبروك الموتر

اذا توايرك ( كفرات ) دانلوب يعني ستوك قديمه

الدالوب من سنتين متغير لازم ميزان كل شهرين

واذا غير دانلوب بعد تأكد من التاير انت مشكلت فالتاير السياره تبارك الله جديده

رح للوكيل ونشبله يغيرهم لك واذا عيا ولا ماطل قله عطني تقرير بحالة السياره ولو على حسابك وصور التقرير

وراسل الشركه نيسان يومين بيتصل فيك الوكيل وتزين امورك بإذن الله

[مقلع الرمث]

اخوي ابعطيك قاعده

عموم الباترول فيه رجه بسيطه عند سرعه 90 وتزود السرعه الى 100 نفس الرجه هذي عاديه جدا

وانصحك ابعد عن الورش وجع الراس حتى لو صلحته ترجع بعد فتره انا مجرب

وسالفه ركب مساعد ترهيم اضافي وخرابيط لا تقربك جربت كل شي كان معي باترول سويته حقل تجارب

هذي راعي الورشه لاجيته بس يستفيد من كم قرش ويلحم بموترك وخربطه مالها فايده

[FAPioO]

ترصيص ارضي وركب مساعد دركسون استرالي لان الفتك مساعد دركسون الوكاله لك عليه ولين يسبب رجه بالحفر والبطانيج

[ابوعبدالله199]

هذي الرجه صايره معي في اف جي

وعبيت الكفرات 40 واختفت الحمد لله والحين احسن مايكون

[ابو محمد64]

ترصيص ارضي وركب مساعد دركسون استرالي لان الفتك مساعد دركسون الوكاله لك عليه ولين يسبب رجه بالحفر والبطانيج

ايه صادق يعني الموتر جديد ما تبي ترهمله ؟ ذا الحل الوحيد معروف مساعد الدركسون بالباترول

[FJ3230]

اشكر كل من شارك وبيض الله وجوهكم يارجال

[ابو محمد64]

http://24.media.tumblr.com/72356425d4560528a17e426779358ecb/tumblr_mw99pxB9y81rzz83ko1_400.png

ههههههههههههههههههههههههههههههههه امزح امزح يالربع يالله عن اذنكم قبل تهيجون علي

[فارس العمور]

اذا مستعجل روح للعضيب وترصيص ارضي مع ضمان شهر

واذا تبي حقك انشب للوكاله ويغيرون الكفرات جديدة لان عادة تكون مشمسه من الوقفه

كلامي من تجربه ونشبت لهم وغيروها طقم مشلان جددددد

[مخاوي البر9]

إن شاء الله مشكلتك بسيطة شييك على هواء الكفرات الأمامية تحصل واحد أزود من الثاني حاول تخلي الهواء متساوي في الكفرات الأمامية وإن شاء الله أمورك طيبه
عندي سوبر سفاري 2009 وتحصل معاي ويطلع من هواء الكفرات الأمامية .
هذا والله أعلم

[ابوهيثم2008]

انا نفس المشكله ٢٠١٤ باترول ربع جديد ماكملت الالف كيلو وفيه رجه خفيف تجي على سرعة ٧٠-٨٠ الى تقريبا ١٠٠-١١٠ بعدين تختفي
طبعا الكفرات برجستون اذا كان عيب مصنعي نبلغ وزارة التجاره والصناعه
واهم حاجه الي هو مسمار الثلاجه الى الان موجود ،
طبعا انا ماسويت شي بالرجه توقعت انه الترصيص الداخلي طايح ،

[طالب المعرفه]

أخي العزيز :ـ انت تقول سويت ترصيص وراحت ؟؟؟؟؟

المشكلة عندك واحد من أمرين يا من الكفرات او من الجنوط غيرها ما فيه يا الغالي ....

[Salamah.y]

دام السيارة على الضمان
لا تفكر بأي حل ,, و دها للوكالة و أشرط عليهم ما تأخذ السيارة الى ان يحلون هالمشكله
حرام سيارة 2014 ممشاها 6 آلاف فقط ,, يظهر فيها هالمشكله !!

[Noz]

كفرات + مساعد دركسون وشكرا

[ابو محمد1991]

ودي لو تجرب وتعلمنا اولا تدل الكفرات الي ورا قدام والي قدام ورا اذا تغيرت الرجه فهي يالجنوط يالكفرات وقتها تروح للوكاله وانت عارف وش في موترك ولو ما فرق توديه لواحد يفحص مساعد الدركسون ولا تفك الا في الوكاله على الضمان ويا ليت تخبرنا وش يصير معك

[شاق النفد]

ان كانها بين 80 الى120
فهذي الرمانات اللي فوق الركب فك قواعدها وشل الوردات
واخرط القواعد نص ملي وصدقني بيضبط باذن الكريم سبحانه
لاني قد جربتها على شاص تيوتا وربع فتك جديد

[عاشق الغضا]

المشكلة عندك الله والعالم من الكفرات واكيد الكفرات برجستون متعبات خاصة لانسمت الكفرات ثم عبيتهن يطلع رجه خاصة بالبرجستون . وشف الذراع اذا كانه يتحرك بيدك فأنه يبي كبس ولوكان جديد الموتر

رح بالموتر ميزان اليرموك وخلهم يناظرون الاذرعه وخلهم يرفعون الموتر ويعلمونك ان الكفرات محبلات والا لا

[بربنجي]

انا اشوف انك توديه للوكاله وهم ملزومين بالموتر لانه على الضماااااااان
ولا وش فايدة الضمان
ياخذون دبلات وياخذون حق الضمان ولا يضمنونه ليه ÷÷÷÷

وبالتوفيق أن شاء الله

[ابوهيثم2008]

Fj3230
وش صار عليك علمنى سويت شي بالسياره
بالنسبه لي رصصت ترصيص عادي ولا راحت الرجه والرجه عندي من سرعة ٩٠ الى ١١٠ بعدين تختفي
طبعا موتري فتك ٢٠١٤

[إبو عبدالعزيز]

اللي يعاني من رجة الفتك يجرب هالحل و ماجاه علي
الحل النهائي للمشكلة هو برد قواعد الرمانات
و اللي فاهم له هو ميزان البادية في الصناعية القديمة

[التعـ King ـديل]

اذا كانت سيارتك على الضمان والمشكله من الكفرات الوكيل يغير لك الكفرات بشرط عدم استخدامها بشكل سيئ

لو تفك درج السياره بتلاقي كتيب الضمان شامل السياره والبطاريه والكفرات

[أطلال نجد]

يا أخوان سيارة الرجال 2014 جديدة ماشيه 6 ألاف فقط

يعني ما بعد وصلنا لمرحلة الترهيم والبرد وتغيير المساعدات والجنوط

المشكلة ٩٠٪ من الكفرات

بسبب سوء التخزين تكون مشمسه أو ناقصة هواء أثناء وقوف السيارة قبل الشراء بمدة طويلة

و إذا تبي تكتشف هالشيء عب الكفرات هواء 40 أو 45 و جرب السيارة

إذا اختفت الرجة بدل الكفرات على الضمان و كفى الله المؤمنين شر القتال.

[هارون97]

ياخي حرام عليك ارجع للوكالة وش الكلام رصص رهم اذا خربطو كلم التجارة

[م.سعيد]

اكاد اجزم 100% ان مشكلتك في الكفرات..
صارت معي في سيارة جديدة وغيروها لي على حسابهم وانتهت المشكلة

[* ابو باسل *]

المشكله بالكفرات نفس ماحصل معي ورحت الوكاله وغيرو لي اربع جدد واختفت المشكله السيارة توقف واجد اكثر من اسبوعين او ثلاثه في الوكاله قبل البيع او في الباخره والهواء يكون جدا ناقص ويسبب مشكله بالكفر هم يعرفونها يحولونك على وكيل الكفرات يشيك عليها ويختم لهم بالاستبدال جرب وماراح تخسر شي الا اكيد ببتغير بعون الله .

[بواسامه]

منذ مبطي وهذا طبع الفتك
رجه من 80 الى 110 وتزول

فلاتحزن
سو الترهيمات مثل اللي سواها قبلك

[قشوط]

اخوي انا نفسك معي فتك 14 فيه رجه من 90 الى 110 خفيفه وديته الوكاله غيرو الكفرات على الضمان ولا راحت نفس الرجه

[قشوط]

بالنسبه للكفرات انا غيرت الكفرات على الضمان ولا اختفت المشكله لاتخسر نفسك وقت وخساير واضنه طبيعي كثير نفس المشكله

[سي سي]

اللي يعاني من رجة الفتك يجرب هالحل و ماجاه علي
الحل النهائي للمشكلة هو برد قواعد الرمانات
و اللي فاهم له هو ميزان البادية في الصناعية القديمة


ابو عبدالعزيز كلامه صحيح وانا جربته وضبط معاي بس سعره مبالغ فيه مره