طريــق حــايل --- الشمــال

[عود رمث]

الله لايهينكم اللي يعرف شيء عن طريق حايل -- الشمال ، سواء للجوف أو إلى الحفر أو قريب من الحفر أو لينه ... يعطينا معلومات عنه .. من حيث :

1- طول المسافة

2- محطات البنزين ( وفي رواية: البنزيم );)

3- هو زفلت ولا حزوم ولا نفود .. ولا سهل ولا قرشع أقشر ؟؟؟

4- القرى والفياض والأماكن الحلوة اللي يمر بها ...

5- معين يطلع من حايل ؟؟



وتسلمون لاخوكم / عويد رمث :p

[محــب الصمت]

هلا بخييي / عود رمث
اذا انك بالقصيم وتبي تروح لحايل على شان تروح للشمال هذي له جواب ,
واذا انت من القصيم والحين بحايل وتبي تروح للشمال هذي له جواب ثاني :confused:

فأنت حدد وراح تلاقي الجواب بإذن الله ,,

وتحياتي للرمث كله مو بس عوده :)

[عود رمث]

حبيبي محب الصمت وش اللي خلاك تهرج ؟؟ :D ( مزيحة )

الحقيقة أنا هالحين بالقصيم .. لكني ابصيد عصفورين بحجر مثل مايقولون .. يعني إن شاء الله تعالى أبروح لحايل تمشية يوم أو يومين بعدين اطلع منها للشمال ..

وعساك ماتحرم الرمث بعروقه وعودانه ( وأزهاره وثماره ) :p


اخوك / احطبة رمث

[محــب الصمت]

هلا وغلا بعود الرمث
ياخوي ترى الواحد لا من نه ;) صار اسمه بالنت محب الصمت هذا ما يعني انه يصير اطرم :D .!
عموما يوم سألتك عن مكانك على شان اختصرالمسافات عليك والذي اعرفه عن الطرق اللي سألت عنها مايلي :
1- طريق مسفلت من حايل( حائل ) إلى الجوف :
تطلع من غرب حائل باتجاه الشملي الى طريق ( المدينة - تبوك ) والمسافة من حائل الى الكبري 300 كلم تقريبا , اذا وصلت الكبري لف يمين باتجاه تيماء ومن ثم تبوك, قبل ما توصل لتبوك بمسافة 100كلم تقريبا تجيك لوحة تقولك( القلبية) يمين افرق يم القليبة ثم ابتل سيدا حتى يجيك مفترق طرق يسار طبرجل يمين دومة الجندل ومن ثم سكاكا الجوف . اذا رغبت انك تواصل ( تخذ لك لفة دائرية) اتجه من الجوف الى عرعر والمسافة بينهما 150 كلم , اذا وصلت عرعر( يمين) رفحاء وحفرالباطن و ( يسار) طريف والقريات اتجه يمين لرفحاء والمسافة فوق ال 200 كلم , اذا وصلت رفحاء اذا انك تبي تمر على لينة ( وترى زرقته مهيب شينة) بعد رفحاء بمسافة قليلة باتجاه حفرالباطن تجيك لوحة تقولك لينة يمين 70 كلم تقريبا , على طريقك باتجاه لينة فيه ( به ) هجرة اسمه زبالا لا تفوتك مر( عل يه ) بعدين توصل لينة .
2- طريق مشكل ( فيه زفلت وفيه مسحية وفيه جلد ) :
من حائل اتجه شمال شرق يم بقعاء ومن بقعاء واصل حتى توصل تربة( الشمال) وهي شرق حائل ب200 كلم تقريبا . من تربة فيه طريق يروح لـ ( لينه ) المسافة بحدو ال 100 كلم بعض الطريق مسفلت يجي حوالي 50 كلم وبعدين تجيك مطينة اللي بنهايته الدهناء ثم لينه( آخر علمي بها الطريق انه مسحيه وما ادري هو زفلت
او لا وترى خبري عتيق بذيك الأراضي ).

3- طريق رملي وعر من حائل لسكاكا الجوف :
اتجه من حائل لـ جبة والطريق مسفلت والمسافة 120 كلم , واذا وصلت جبة اطلع لغرب شمال الديرة ( لكن قبل ما تطلع لا تفوتك الآثار القدييييييييمة بـ جبة ( جبل عليه شبك غرب الديرة ) , واذا تفرجت رح للمحل اللي قلت لك عليه شمال غرب الديرة واللي يعتبرنقطة انطلاقك الى سكاكا , تفاصيل إضافية لهذا الطريق تلقاه تحت هذا الرابط :
http://mekshat.com/vb/showthread.php?s=&threadid=1138&highlight=%C7%E1%E4%DD%E6%CF+%C7%E1%DF%C8%ED%D1

طبعا فيه طرق أخرى من حائل للجوف منها الللي ( تتجه من حائل للخطة وهي شمال حائل ) ومن الخطة تدخل للنفود الكبير باتجاه الجوف.

ملاحظة :
ترى الطريق رقم ( 3 ) ماهو سهل يبي له موتر( وسواق ) زين وان حصل موترين افضل , وطبعا مع باقي العدة من قارمن وكنود وغيرها.

اخيرا تلقاء تحت الروابط اللي تحت خرائط مفيدة :

http://mynajd.com/~mat/smap/hayel.jpg

http://mynajd.com/~mat/smap/aljouf.jpg

http://mynajd.com/~mat/smap/arar.jpg

http://mynajd.com/~mat/smap/hafralbaten-rafha.jpg


http://mynajd.com/~mat/smap/qaseem-alartawiyah.jpg

اخيرا اذا فيه سؤال حول الموضوع انا تحت امرك وامر الأخوة رواد المنتدى

[راعي الحزم]

محب الصمت اشهد بالله انك كفيت وفيت وشرحك وافي وواضح اما بالنسبه لطريق تربه لينه فهو الى الان مردوم والمعدات تشتغل فيه وماسحينه عقب المطر التالي وانا توني جاي معه زين تمشي به السيارات الصغيره وشكرا

[محــب الصمت]

راعي الحزم / هلا ومرحبا وكل عام وانت بخير
ومشكور على المعلومة اللي ذكرتها .

[الدليميه]

مشكور يالحبيب على هاوصف الوافي

[عود رمث]

وجميع الاخوان .. خاصة راعي الحزم على معلومته الزينة ..

لكن لي سؤال ..

منين بالضبط نطلع من حايل إلى بقعاء ؟ هل الطريق واضح ؟ وتراي ما اعرف شوارع حايل زين .

وهل أول الطريق من حايل إلى بقعاء زفلت ولا تراب ؟

ومشكور مقدما ومؤخرا على الفزعة


اخوك \ عود رمث