محتار بين سيارتين

[FaisalSS]

السلام عليكم، كيف حالكم يا اخواني

اخواني انا مشترك جديد و حاب احدد خياري منكم بإذن الله

انا محتار بين سيارتين و هما :

كابرس 2014
و
يوكن 2014

انا من ناحيتي انا نفسي باليوكن و لكن المشكلة اذا شروه لي أهلي يبون ياخذونة سفريات و طلعات بر و انا من النوع الي مررررة محافظ على السيارة و طلعات مرة او مرتين بالكثير يوميا،

و قلت الكابرس لان اذا هي سيارة صغيرة أهلي ماهم راكبينها واجد او حتى بياخذونها

فا وش رأيكم يا أهل الخبرة ؟

[زوم]

الكابريس ممتاز بس ترا اليوكن رخيص جداا لانه نزل الشكل الجديد

[FaisalSS]

اليوكن ارخص ؟؟؟
سعرة عند الجميع ٢٠١٤ ب ١٦٥٠٠٠ و الشكل الجديد ١٨١٠٠٠

[يالبى الهلا]

أنصحك ابتعد عن الكابرس علة كلة خرابات
اليوكن اقتصادية وقطع رخيص ويصبر

[قناص الأشهب]

أنا بأتكلم من منطق آخر وأرجوا ان تتقبل كلامي
لو منك انا آخذ الموتر الي يخدم اهلي قبل الي يخدمني
وليه ما تبي أهلك يركبون فيه خدمة الأهل واجبة قبل ان تكون فخر و فاتحة رزق وتوفيق من رب العالمين
وخيركم خيركم لأهله .
أنا لا أتهمك بأنك لاتريد خدمتهم ولكن يمكن يحسب كلامك من التقصير .
وأنا لا أدعي المثاليه ولكن النصيحة والأمر بالمعروف هو ما ميزنا الله به عن باقي الأمم .
نصيحة مجرب في أستعمال المواتر لاتتعنى في المحافظه ولا تهمل موترك ولكن سدد وقارب .
المواتر احنى اللي نجيبها وليست هي الي تجيبنى عشان ندلع فيها ونبالغ في المحافظة.
كم من واحد شرا موتر وجلس يداريه حتى البر ماينزل به وراح عليه في حادث لاقدر الله
في الأخير نرجع لموضوعك وأنا أتأسف على الأطاله والتدخل
الكابرس لا يطريلك والله اني فكيتها وكاله وأستخدمتها 7 سنين و بعتها برخص التراب عطالات وحرارة دائما
اليوكن أطيب بواجد .

[قبطان الريشه]

نصيحة
وأنا أخوك ابعد عن الكابريس والله انه يتعبك تعب من ناحية التعقيدات اللي فيه تخرب عازة وتجي تغيرها تكلفك قيمة القطعة وأزود ومو الكل يعرفله
لكن ريح رأسك وخذ يوكن يكرف كرف الحمار أعزكم الله وخراباته معقولة وخذ الشيء اللي يخدمك ولا يتعبك

[المميـز]

:

اليوكن افضل لك ولاهلك وخدمة الاهل واجبه مهما كانت نوع سيارتك
وسياره رفيعه تخدمك بالديره وقت الامطار وتخدمك بالسفريات وطلعات البر الخفيفه
وعند البيع اسرع من الكابرس ان شاء الله واقل اعطال بإذن الله
والله يكتب لك اللي فيه الخير

:

[dhoomi]

كابريس ؟ أغديك مستخير بس

الكابريس الشي اللي يميزها الوحش اللي تحت الكبوت 8 سلندر 6 لتر ..عزم وقوه خرافي سلبيته الحراره يبي يبهذلك ..وسيعه من الداخل فقـط هذا ماتتميز به
يعني اذا شريته تراك شريت مكينه فقـط ... مابه ذيك المواصفات الـ واااو !! لو تبيعه بعد سنه يطيح سعره واجد
وازيدك من الشعر بيت ..الموديل القادم يبي يتغير محركه الى ls3 وتصير اللي معك ولاشي قدامه وينقص سعر البيع

مع تحفظي على اليوكن إلا انه افضل من الكابريس بواجد فوق كذا شكل جديد ومواصفات بـ الهبل صراحة
وتم رفع الجوده باليوكن والتاهو 2015

[alsahli]

وعليكم السلام والله نصيحه ابعد عن السيارات الصغار مامثل الجيوب واستخر ربك والله يدبرك وبتوفيق .

[شايف نفسه]

ماقصروا الاخوان كفو ووفو
لكن عندي نقطه اود ابينها لك
وللجميع
الان السيارات الجديده اللي هي الدفع الرباعي
سواء جيب او يوكن تعتبر سلسه وممتازه سواء داخل الديره
او الخطوط الطويله ويميزها الخف بالعزم والاقتصاديه بالبانزين
والراحه
ولا تنسى الخطوط عندنا يالله من فضلك حفريات وقلة حيا
ناهيك عن المطبات اللي تقل حواجز
والله يالمواتر الصغيره انه خلال سنه راح تلاحظ التفكك والتأثر فيها
واما بالنسبه للكابرس لا يخطر على بالك
مشاكله واجد ولا يمسك سعره نهائيا
فا استخر وتعوذ من ابليس ولا يهمك قوة مكينته او شكله
ترى راح تستانس مطوله بجدته وبعدها بتندم
موفق

[FaisalSS]

شكرا يا اخوان ما قصرتوا الله يعطيكم العافية

[FaisalSS]

صدقت ولله جزاك الله حير

[ابونبيل]

جمس و اهلك لهم حق كانهم خذوه ما يغلا عليهم
الكابرس سياره كبيره وبالنهاية سيدان حقت ناس تدعس وتتسابق