المساعد الشخصي الرقمي

مشاهدة النسخة كاملة : خاص لخبراء العراجين


الخبوبي
05/12/2006, 04:15 PM
اخواني أعضاء وزوار منتدى مكشات

السلام عليكم ورحمة الله وبركاته ........

الفزعه يا النشاما اخوكم الخبوبي في ورطه :rolleyes:

ام العيال متوحمه في العراجين ,,, مبلشتن الليل والنهار تبي عراجين

والله الورطه !!!!!

تكفون ابي اقرب مكان من الرياض بوه عراجين ;)

فرصه نطلع للبر ونعرجن

وسلامتكم
طيور نجد
05/12/2006, 04:27 PM
السلام عليكم ورحمة الله وبركاته

ماخبرت يالحبيب مكان بوه عراجين بالرياض
بس فيه مكان حول القصيم ببعد 100 كم
كله عراجين حول ....قطن

وشكرا
الخبوبي
06/12/2006, 06:09 AM
ياأخوان عدد القراء 55 ولا فيه إلا رد واحد :mad:

وش ها البخل ياكافي ........وين الشقرديه راعين الفزعات !!!! ;)

اخي طيور نجد ...شكرآ على مرورك ياالغالي

وبعدين أنا اقول اقرب مكان من الرياض ماقلت بالرياض :looney:

وسلامتكم ياالطيبين
ريم البراري
06/12/2006, 07:13 AM
أخوي طيور نجد الله يجزاك خير وين المكان؟
العراجين موجودة الحين؟
خبرااي
06/12/2006, 09:08 AM
ولاتزعل اخوي انا اليوم ماشي القصيم وراسلن على الجمعه عشان فيه مكان خابره وابجيب منه وابشر بعزك وبالنسبه لاماكن قريبه الحين من الرياض ماظنك تلقى لأن الارض توه جايه مطر ولا جاها شمس كافيه
http://www.mekshat.com/pix/upload/images23/mk35178_9arajeen.jpg
OTHMAN65
06/12/2006, 10:35 AM
السوال ايش ازين طبخه للعراجين وكيف الطريقه يا الخبوبي مع تمنياتي لك ان الله يرزقك عبد صالح
الخبوبي
06/12/2006, 10:52 AM
الله يكثر خيرك اخوي خبرااي ومايجي اقصور ونا اخوك

بس من جد الصوره هذه ذكرتنا بأيام زمان
الخبوبي
06/12/2006, 11:03 AM
اخوي عثمان صبحك الله بالخير ... وشكرآ على مرورك الكريم

افضل طريقه لطبخ العراجين هي :

أولآ تقوم تنظف العراجين من التراب ثم تقطعها إلى قطع صغيره حلقات ثم تطبخها مع المرقوق

وبعدين بالهناء والعافيه...
أسامة
06/12/2006, 03:42 PM
أخوي الخبوبي أبدلك على مكان بس لا تعلم أحد هذا أولا
عاشرا : أبيك تدعي لي كلما لقيت عرجون ، وحتى لو ما لقيت تدعي لي الله لا يهينك
ألفا : المكان هذا كان مليان عراجين ، كنا نزحلق بعراجينه ما شاء الله ، لكن للأسف الآن تلقى لكن قليل مررررررة لأن الرعيان حاسوا الأرض
أنا عارف إني غثيتك بس أبقول لك المكان وين
بس حسك عينك تعلم أحد
أنتبه
وقبل لا أقولك : هل هذا وقت العراجين ؟
ما عليش مصختها شوي
شف الله يجزيك الخير ويجعلك تحمل ددسن عراجين : إذا وصلت مفرق الطوقي والصمان تلف معه يمين ثم أمش لك حول الكيلو ودور يمين ويسار وبإذن الله بتلقى وتدعي لي
واذا ما لقيت رح على طول وقبل طلعة الطوقي تلقى نفود على يدك اليمين إن شاء الله بتلقى
إذا لقيت رد لنا ولو بالخاص
الله يوفقك
صمان1
06/12/2006, 03:52 PM
أحفظ الله ............. يحفظك
عاشق الزلفي
06/12/2006, 04:02 PM
السلام عليكم ورحمة الله وبركاته

فيه في روضة الخفس بعد مفرق الطوقي على اليمين ( لغير الناطقين بالعربية )

ويوصوفون شعيب على طريق رماح بالضبط ما أعرفه لكن هو بداية شعيب الرمحية من جهة الغرب علامة الطريق بعد إنتهاء على ما أعتقد مواصير الكهرب على اليسار فيه مطينة على يسارها قبر يعني تمشي تقريبا 6-8 كيلو من القار وتشوف الشعيب

والله أعلم
طيور نجد
07/12/2006, 07:36 PM
شوفي اختي ((بنت الرس)) المنطقه اسمه ((محيلانه )) تبعد عن منطقة القصيم وباتحديد الرس 140 او 130 كم ومكانه من ورى قطن بــ 90 او 80 كم ان بغيتي ربيع فيه وان بغيتي عراجين فيه وان بغيتي حطب برظه فيه والأرض رويانه ....ماشاء الله ....

والمنطقة معروفه لأهل القصيم وبذات اهل الرس لاني رساوي....

وشكرا .....
غضنفر
07/12/2006, 10:25 PM
اذا جتك محطة خزام افرق معها يمين جهة الرمحية
بعد ما تطلع طلعة الرمحية
تلفت يمين يسار بتحصل عراجين
والافضل والاكثر قبل روضة الخفس
ريم البراري
07/12/2006, 10:35 PM
جزاك الله خير اخوي طيور نجد
ان شاء الله بروح لها
الخبوبي
08/12/2006, 09:54 PM
اخوي أسامه :

شكرآ على مرورك الكريم وتسلم ياالحبيب

وابشر مارايح اعلم احد ... لكن لو مالقيت عراجين الله يعينك ;)

اخوي صمان 1:

بارك الله فيك نعم أحفظ الله يحفظك شكرآ على مرورك الكريم

اخوي عاشق الزلفي :

حي الله اهل الزلفي كلهم وشكرآ على المعلومه القيمه

ولكن يمدحون عراجين الزلفي ;)

اخوي بلاك باث :

نورت الموضوع بمرورك الكريم وشكرآ لك.

اختي بنت الرس :

اشوفك داخله عرض في الموضوع ...:p

ترى الحقوق محفوظه ... يكفيني كرتون عراجين :D

وشكرآ على مرورك الكريم

شكرآ للجميع
الضاري
08/12/2006, 11:11 PM
الله يستر كان ما راس ولدك اللي بالطريق طلع تقل عرجون

ما ينفع بطاطس

أوووووف يالعراجين مع المرقوق

شي خيال

تدري شلون الله يعينك .. توحم بعراجين أزين من اللي توحم بثوم ( صار البيت تقل بيت مصريين )
OTHMAN65
29/01/2007, 08:41 AM
اخوي الخبوبي اشكرك على الرد واحب افيدك اني جمعت من العراجين السنه الماظيه كميه كبيره في الارض التي بين روضتين الخفس الشماليه والجنوبيه بس اعتقد والله اعلام يبغالها شوي وتمل من كثرتها وتقبل تحياتي على فكره برضو فيه على طريق البير (المحمل) يمين ويسار على الخط قبل الديره ب 10 كيلو وتقبل تحياتي،،،
الخبوبي
31/01/2007, 12:22 AM
اخوي Othman65
اشكر لك تفاعلك وردك الكريم والمعلومات القيمة ,,,

تقبل خالص شكري وتقديري