المساعد الشخصي الرقمي

مشاهدة النسخة كاملة : وين اروح الربوع والخميس يااهل الرياض الى حدود 150 كيلو


احب البر
05/12/2006, 06:53 PM
ما افضل مكان تنصحون فيه هذا الربوع والخميس خاصة ان الربيع مابعد ظهر بشكل كثيف وبصراحه انا وربعي احترنا وين نروح ويش اقدع مكان وشي يوسع الصدر احترنا وقلنا مالنا الاحبايبنا في مكشات المكاشيت . الله يسلمهم ويحفظنا واياهم .


وين وين
مسافر1
05/12/2006, 06:57 PM
التنهات جيدة أخوي .
أو روضة خريم ..
أماكن جميلة وبداية الباذر ولله الحمد .
والبقية نتركه للإخوان ..
ساقان
05/12/2006, 07:27 PM
شويه وماحواليها
وان بغيت التنهات ادخل لها من جهة حفر العتش افضل ..
المربد
05/12/2006, 07:35 PM
تــــــــمـــــــــــــــــيــــــــــــــــــــــ ـــــر وما حواليها.
السارب
05/12/2006, 07:44 PM
150 كيلوا وش دعوا مأخذ سيارة إجار على العموم الله يحيك في مزاين الإبل في محافظة الخرج قريب وزين ومكانة واضح والله يحي الجميع
صائد الفوائد
05/12/2006, 07:53 PM
المسافات عن الرياض:
روضة خريم 130كم
شعيب الطيري 170كم
روضة التنهات 200كم
شعيب الشمس شمال غرب ضرما 150كم
راعي الطلعات
05/12/2006, 08:17 PM
يهلابك اخوي في وقة الامطار هذا

لك مكانين انا مريت عليهم بس حلوين ويستاهلون المشاوير

اولها الدهناء نفوذ نضيفه ولا تنسم واجد وحطب الارطا مشاءالله وش كثره وانصحك بعرق الكناسيه واذا كان معك جيب وتحب تتعمق داخل النفوذ عندك عرق الود
بس تبعد عن الرياض حوالي 200 كم بس تستاهل الزياره

وقبل الدهناء يجيك شعيب الطيري مشاءالله تشوف السيل ماشي من اوله الى اخره وارض حلوه ونياسه صراحه تبعد 170كم

احسن نضام لك تمر على شعيب الطيري ثم تخيم في الدهناء

والصمان يقلون جايه مطر مشاءالله بس الصمان قرابة يعني 300كم خخخخخخ اذا جاء الريع والله يستاهل الروحه

دمت بحفظ الرحمن
ذئب المراقيب
05/12/2006, 09:43 PM
التنهات وبس والطيري ونعم الطاري
عاشق مرات
06/12/2006, 10:32 AM
اذاكنت قريب من منطقة الوشم فانصحك بشعيب الشمس والشميسه والبسيتيين وابو الحيران وروضة القرعاء(روضة الشمس) لأنها جميعها ماشيه والروضة مليانه بالماء
التابعه لمنطقه (مرات)
الشبكة2
06/12/2006, 10:46 AM
عندك التنهات 200 كيلو بس تستاهل العنوه وفي قبلها شعيب الطيري والاقرب منهم خريم
قلب الداهيه
06/12/2006, 11:14 AM
150 كيلوا وش دعوا مأخذ سيارة إجار على العموم الله يحيك في مزاين الإبل في محافظة الخرج قريب وزين ومكانة واضح والله يحي الجميع

صدقت أخوي مزاين الخرج زين وقريب وحياكم الله جميعا :good:
الســـاري
06/12/2006, 12:51 PM
اذا ودك تزود على ال150 شوي لا يفوتك شعيب محارق الافضل ربيع الان
اذا تبي رمل و رمث و باذر واقرب من 150 شوي ...لا يفوتك الخفس

او تدري مرهم جميع تراهم على طريق واحد وطب و تنقى ;)
zaizoom
06/12/2006, 01:00 PM
( احب البر )

هلابك يالغلا ..

عندك وأنا أخوك أقرب شيء لك من الرياض :

روضة (فيضة) الخفس

شعيب الطوقي

شعيب الطيري

شعيب محارق

روضة التنهاة

قم بزيارة موضوعي للتعرف على الأماكن ومسافاتها بالضبط :good: ..

بدون أجهزة ولاقارمنات .. كروركي سهل بالمسافات .. من خزام للتنهات (http://www.mekshat.com/vb/showthread.php?t=65222&page=1&pp=15)
احب البر
06/12/2006, 01:04 PM
بيض الله وجيهكم يالربع كلكم واحد واحد كل باسمه .. وفيتوا وكفيتوا


معلومات مفيد للجميع .. وعسى يستفيد منها احبابنا الزوار والاعضاء . ولقد استفدت منها كثيرا
كشته 111
06/12/2006, 01:25 PM
اخوي احب البر احب اضيف للاخوان اللي ما قصروا , وانت عند محطة خزام عند التقاطع تروح يمين علي طريق الرمحيه وتتعدي الكسارات وتطلع الطلعه تلقي اماكن تبعد من 20 الي 30 كيلو عن محطه خزام سبحان الله اللي بعد الطلعه الجو روعه ومنطقه جميله وهادية وفيه شعبان وطلح ورعاة وتصلح للشباب اكثر منها للعوائل لانها صاده شوي ,,,

وسلامتكم والسلام عليكم ,,,
راعي الفزعه
06/12/2006, 01:53 PM
الاخ احب البر : عليك بالبران التالية واغلبها تقع في منطقة سدير وتحديداً مدينة تمير وتبعد عن الريـاض 170ك ...

1- روضة نورة شرق محطة حفر العتش على طريق الرياض سدير القصيم .
2- شعيب رويغب به اشجار الطلح والسلم شرق محطة حفر العتش ..اكثر من رائع .
3- روضة الخشم بالقرب من مدينة تمير شمالا.. توجد بها اشجار السدر الكثيفة .
4- شعيب الارطاوي بالقرب من مدينة تمير شمالا .. توجد بها اشجار الطلع .. رائع .
5- شعيب الشوكي بالقرب من مدينة تمير شرقاً .. اكثر من رائع

وغيرها الكثير من الشعاب الاودية ...................