ماهو السر في قوة القير الأول

[دوج رام 98]

عندي جمس HD قير عادي دبل , لاحظت أنه يمشي بالقير الأول حتى لوكان الجلنط مربوط , قلت يمكن جلنط تعبان , وقبل ما أروح للفحص الدوري شديت الجلنط , لكن نفس أول بالقير الأول يسحب والجلنط مايوقف الموتر , أما بالقير الثاني او الثالث او الريوس يمسك الموتر.

مثال : كنت مغرز وعشقت اول ومشى الموتر وطلعت من التغريز وحطيته على الثاني علشان امشي لكن الموتر توقف بقوة وأكتشفت أن الجلنط مربوط , يعني الأول طلعني وأنا مغرز والجلنط مربووووط

هل هي ميزة وقوة أم هو خلل.

القير الاول بصراحه يعجبني في التغريز والسحب والطلوع مايبرد عزم الموتر حتى بدون دبل وحتى بدون ماتضغط على البنزين

[Salamah.y]

أخوي شي طبيعي النمرة الأولى تكون قوية جداً
خصوصاً في السيارات الدفع الرباعي , و المخصصة للمهمات الصعبة
زي الـ سييرا HD ~

للسحب و العقبات , و النمرة الأولى في السيارات الأمريكية القير العايدي يسمونها L
وهي ثقيلة جداً , و نادر تحتاجها , غير في المهمات الصعبة ~

[المميـز]

:

الاول عندك اسمه L هذا اقوا من قولة الاول
لان لو تلاحظ السيارات التماتيك اذا صار على D واثناء الطلوع تجد القير بالاول ولكن تحس انه يرد نمره اقوى من الاول هذي هي L علشان تقوي عزم الموتر

:

[Chevy8]

HD وقير عادي!! يااسلااااام و اذا كان محركه 6 لتر v8 عز الله انه هو الموتر اللي يستاهل
ياليت تأكد لي معلومه المحرك

وأتوقع شي طبيعي اللي يحصل معك لأن الموتر يعتبر عيار ثقيل صراحه.

[دوج رام 98]

HD وقير عادي!! يااسلااااام و اذا كان محركه 6 لتر v8 عز الله انه هو الموتر اللي يستاهل
ياليت تأكد لي معلومه المحرك

وأتوقع شي طبيعي اللي يحصل معك لأن الموتر يعتبر عيار ثقيل صراحه.


المحرك 8 سرندل 6000 سي سي , 6 لتر

[بدران الدوسري]

الحين اذا كان الهايلكس يمشي بالاول وانت ساحب الجلنط فما بالك الجمس ماشاء الله تبارك الله

شي طبيعي وأكثر من طبيعي بعد

الله يعطيك خيره ويكفيك شره

[يالبى الهلا]

ترس الأول كبير فالدوران بيكون أكبر وعندك الريوس اقوئ من الأول بمراحل يسحب في التغاريس ولأ يفرط

[كم كيلو باقي]

القير عبارة عن تروس
من الترس الاول - الترس الخامس
الترس الاول حجمه كبير لذلك عزمه قوي مره لكن مايسرع
والترس الخامس حجمه صغير لذلك سرعته عالية لكن مامن عزم
وطبعا من الاول للخامس بالتدريج ينقص الحجم

[ابونبيل]

القير عبارة عن تروس
من الترس الاول - الترس الخامس
الترس الاول حجمه كبير لذلك عزمه قوي مره لكن مايسرع
والترس الخامس حجمه صغير لذلك سرعته عالية لكن مامن عزم
وطبعا من الاول للخامس بالتدريج ينقص الحجم

كلامك صحيح بس عكستها الخامس ترسه كبير والاول صغير والدليل ان ان سرعته محدوده ام الخامس ترسه كبير فيمد اكثر

[كم كيلو باقي]

^
مادري والله لعلي اراجع معلوماتي
شكرا لك

[ماجد الشمال 1]

الترس الاول كبير بعده الترس الثاني اصغر شوي من الاول بعده الثالث اصغر شوي من الثاني وهكذا