تجربتي بعد فصل الدفع الرباعي للجيب تويوتا GX 2007

[فايز العامر]

بسم الله الرحمن الرحيم

بعد بحث شامل وتفصيلي عن فوائد فصل الدفع الرباعي وعيوبه .. اقتنعت بقوة بحاجتي لفصل الدفع الرباعي المستمر للسيارة .. وتم فصله عند أحد المتخصصين في الدبلات والقيور في الصناعية القديمة في الرياض.


الفوائد بعد فصل الدفع الرباعي (سيارتي تماتيك) :

* اختفت الطقة القوية مع تعشيق القير أو إذا قمت تدبل للموتر، أو إذا دعست للموتر بعد مطب أو لفة.

* تريح العكوس تماما، وتسلم من خراباتها، حيث أنها مع الدفع الرباعي تتحرك بشكل مستمر حتى بدون ماتعشق الدبل وهذا يؤثر على عمر العكوس وصلاحيتها، وعموما الدفع الرباعي هو أكبر مشكل للعكوس.

* السيارة تصبح خفيفة بشكل كبير من ناحية القومة والفزة.

* صرفية البنزين خفت، حيث أني سافرت عليه من الرياض لحايل بعد فصل الدفع الرباعي .. عبيت بنزين من محطة على طريق القصيم دايم أعبي منها ثم حركت ولا ولعت لمبة البنزين إلا وأنا طالع من بريدة، وبالعادة تولع اللمبة قبل أدخل بريدة بكم كيلو، مع أني كنت أمشي أسرع من السابق، يعني فرق أكثر من 50 كيلو.

* الدبل شغال ولا أحلا، ولا له علاقة بفصل الدفع الرباعي، إذا بغيت الدبل شغله والا خل موترك مريح.


العيوب:

* لم أجد عيوب حتى الآن ولله الحمد .. فقط قرأت لأحدهم يقول أن الموتر لا يثبت مع اللفات، وهذا لم يحصل معي حتى الآن .. إلا إذا كان الرجال راعي مناورات.



نجي للسعر:

قرأت للكثير عن السعر والحقيقة فيه تفاوت كبير في السعر، والسببب في نظري أن بعض الورش غير متخصص في فصل الدفع الرباعي فيفك الدبل ثم يروح لواحد متخصص ويضبطونه ويرجعه وهو ياخذ حقه والمخرطة تاخذ حقها ويصير الضحية راعي الموتر!!

ولكني بتوفيق الله ، بحثت عن الورشة المتخصصة وسألت حتى وصلت لورشة في الصناعية القديمة يفك القطعة اللي لها علاقة بالدفع الرباعي ثم يوديها لورشة جنبهم (تبعهم) ويضبطونها بالمخرطة ويرجعون كل شي كما كان ..
وسعرهم مايتجاوز الـ600 ريال مع تغيير جميع صوف الدبل الأربع، وعموما الورش كثيرة وأسعارهم متفاوته وهذا طبيعي بحكم أن الشغلة غير معروفة للكثير ولا منتشرة ..


هذا موقع الورشة اللي فكيت الدفعل الرباعي عندهم في الصناعية القديمة بالرياض:


http://wikimapia.org/18964467/ar/مراكز-البعد-الشامل-1و3





تحيتي لكم

[يالبى الهلا]

الله يعطيك العافيه على الموضوع وشكرا لك على طرح التجربه بالتفصيل
الله يعطيك خيره ويكفيك شره فعلاً الموتررررر يفرق معاك يصير خفيف
ولو تركب فرار فيخف في الممشى وكذلك في القومة
أن شاء الله تعالى بيكون بعد العيد نركب فرار ويزين الجوا وتبدأ المكاشيت للبران
بس اباعرف أفضل فرار يركب بدون ترهيم



http://download.chatalkhaleej.com/uploads/1

[طارق المسحل]

طرح رائع أخي فايز

موضوع متكامل ذُكرت فيه الإيجابيات والسلبيات

[صبيا]

أنا عندي جيب كيا سورينتو دفع رباعي اوتو دائم يعطيك ثبات عالي جدا وكمان القومة أسرع بكثير لكن صرفية البنزين عالية جدا

[مطر وربيع]

لو ركبت فرار تسفيد 100% من فصل الدبل

[الحربي حاتم]

بارك الله فيك
وشلون تفصل الدبل وهو ماهو شغال يعني وضح لنا الفكره كامله

[نفود حلوان]

بعض السيارات تدخل الرمل يشبك الدبل تلقائي

[يالبى الهلا]

من موديلات98الي 2014 صار الدفع للجيوب الصوالين دفع رباعي معني الدبل شغال علي طووول
ماعدي الشاص والربع والصوالين القديمة

[الوسم]

شكرا لك أخوي فايز على التقرير
وهو روعة بصراحة خاصة إنه من تجربه شخصيه
وبصراحه ما ينقصه أي شيء إلا حاجه بسييييييطه
بعض الصور للقطعه المعدله أو المزاله مع مكانها
ونوع سيارتك مع موديلها لتكتمل الفائدة
شكرا لك من القلب

[ALBASHIRI]

سؤال هل كل الجيوب دفع رباعي مستر

عني جكس ار ٢٠٠٢ سعودي

كيف اعرف انه رباعي مستمر ؟

القير عادي بدون دوفلوك

[اليامي قطر]

افضل حل وافضل ماسويت الدفع الخلفي

[اليامي قطر]

سؤال هل كل الجيوب دفع رباعي مستر

عني جكس ار ٢٠٠٢ سعودي

كيف اعرف انه رباعي مستمر ؟

القير عادي بدون دوفلوك


لا هذا دفع خلفي وكاله

من 2006 جاء رباعي

[عايض الاحمدي]

يعطيك العافية ي أخوان كيف أضيف صوره هنيا
7DDDC13C

[ALBASHIRI]

لا هذا دفع خلفي وكاله

من 2006 جاء رباعي

الله يعطيك العافية :good2:

[قناص الوعول]

احذر ثم احذر انا حصل لي حادث بسبب فصلة الدفع المستمر وانعدمت السيارة بسبب عدم رساوة وارتخاء السيارة مع الفات لان السيارة تماتيك والله ستر علي وكان معي نفس سيارتك تماتيك ٢٠٠٧ . فصلت الدفع الرباعي المستمر ممتازة مع القير العادي لان القير العادي شاد مع المنعطفات . وانا قد جربت وفاهم الشغله والله قصدي النصيحه وخفوفي على الارواح

[قناص الوعول]

والحمد لله اني لوحدي ما معي عائله انا مابي احد يجرب تجربة الموت واحمد الله على السلامة

[فايز العامر]

احذر ثم احذر انا حصل لي حادث بسبب فصلة الدفع المستمر وانعدمت السيارة بسبب عدم رساوة وارتخاء السيارة مع الفات لان السيارة تماتيك والله ستر علي وكان معي نفس سيارتك تماتيك ٢٠٠٧ . فصلت الدفع الرباعي المستمر ممتازة مع القير العادي لان القير العادي شاد مع المنعطفات . وانا قد جربت وفاهم الشغله والله قصدي النصيحه وخفوفي على الارواح

الحمد لله على السلامة

السيارة لازالت راسية معي، ولا شفت فرق في الرساوة !!!

بالنسبة لحالتك ففيه عدة احتمالات:
- إما أن الطريق في مشكلة (حفرة، ماء، زيت، الخ).
- أو أنك مسرع وكنت متعود على رساوة الدفع الرباعي في اللفات مع السرعة العالية.
- أو أن الورشة ماضبطول لك الشغلة.

والله أعلم

قد أكون مخطئ ولكني جربت اللي ذكرت ولا شفت فرق.


لأني حاولت أشوف الفرق بالسيارة ورساوتها ولا شفت شي .. فقط السيارة تفحط مثلها مثل اللي مافيها دبل أصلا.


وشكرا على المداخلة.

[يالبى الهلا]

اكيد مسرع مع اللفات لو جيب لكزس ينقلب سيارة مرتفعة اكيد فوق تحت

[اليامي قطر]

احذر ثم احذر انا حصل لي حادث بسبب فصلة الدفع المستمر وانعدمت السيارة بسبب عدم رساوة وارتخاء السيارة مع الفات لان السيارة تماتيك والله ستر علي وكان معي نفس سيارتك تماتيك ٢٠٠٧ . فصلت الدفع الرباعي المستمر ممتازة مع القير العادي لان القير العادي شاد مع المنعطفات . وانا قد جربت وفاهم الشغله والله قصدي النصيحه وخفوفي على الارواح


اسمح لي يالغالي

كلامك مافيه شي من الصواب

عندي جكسار 2005 تماتيك دفع خلفي

رااااااااااااااااااااااااااسي ولا احلى منه

اكيد موترك فيه عطل او خراب

وعندي قير عادي جي اكس 2000 ممتاااااااااااز ماشاءلله

[يالبى الهلا]

فعلا كلامة صحيح الموتر يفقد من رساوتة لكل نظام ميزة ومساوى
مثل نظام الشاص والربع فقدت الرساوة واخذت االخفة بالقومة
رالسرعة لادورر كبير في ثبات الموتر خاصة اذا كان مرتفع مايزحف علي طول انقلاب اما القيرررررر يب من الارض يززززززحف

[ابو عادل9060]

السلام عليكم

يالربع احترت انا معي GX 2006 قير عادي دفع رباعي وافكر في فصله وتركيب فرارات .

الحين تنصحوني بفصله ؟

هل اركب فرارات ؟

ما هو افضل نوع بالفرارات ؟

ارجو الافاده

ولكم جزيل الشكر...

[اليامي قطر]

السلام عليكم

يالربع احترت انا معي GX 2006 قير عادي دفع رباعي وافكر في فصله وتركيب فرارات .

الحين تنصحوني بفصله ؟

هل اركب فرارات ؟

ما هو افضل نوع بالفرارات ؟

ارجو الافاده

ولكم جزيل الشكر...

حوله دفع خلفي ولاتركب له فرارات لانها مالها فرق في الاداء على الجيب

لكن على الجمس فرقها واااضح

[مخاوي المكشات]

ما شاء الله تبارك الله

تجربة موفقه أن شاء الله مع اني غير مقتنع من فصل الدفع الرباعي المستمر


ولو فيه مشاكل كان الكل اشتكى وكلاً بحث عن الفصلة وانا اولهم
لكن نقدر نقول التجربة ممتعة اكثر من انها مفيدة


موفق ان شاء الله

[الدوسري2010]

انا عندي في اكس ار 2007 فكيت الدفع الرباعي المستمر وخفت السياره ورتحت من صوت الطقه اللي مع التعشيق والحمد لله الى الان اموره تمام

[أبو براك 511]

اخوي أنا أعاني من النقطة الأولى الي ذكرتها انت وهي

* اختفت الطقة القوية مع تعشيق القير أو إذا قمت تدبل للموتر، أو إذا دعست للموتر بعد مطب أو لفة.

علماً أن موتري فكسار 2005 تماتيك
وودي افصل الدفع الرباعي واخليه خلفي لكني متخوف من فصلته
من ناحية رساوة الموتر في الخط او تطلع لي مضار اخرى

ولو أركب فرارات بدون ماأفصل الدبل هل تنفع للموتر

[يالبى الهلا]

بالنسبة للرساوة مراح تفقدها في الخط. بلاك اللي قدامة منعطف وياخذة علي سرعتة اكيددد يفقد السيطرة لان الموتر مرتفع ويجيب العيد
بالنسبة للفرار مايركب الا بعد فصل الدفع المستمر

[ابو عادل9060]

يعطيكم العافيه يا اخوان على الاجابه وما قصرتو ولا هنت يا اليامي قطر

[اليامي قطر]

ولا انت يابوعادل

سؤال ياشباب بخصوص الجيوب من 2008 وفوق اللاندكروزر

يركب لها فرار ؟؟ حتى لو الاستاندر صفاق ؟؟